Sunday, May 19, 2024
- ማስታወቂያ -
- ማስታወቂያ -

ኢትዮ ቴሌኮምን ወክለው ከሚሠሩ ሰባት ድርጅቶች ሽያጭ ብቻ 43.8 ቢሊዮን ብር እንደሚገኝ ተገለጸ

spot_img

ተዛማጅ ፅሁፎች

የ5ጂ ትውልድ ኔትወርክ አገልግሎትን በነገው ዕለት ይፋ ይደረጋለሁ አለ

በተያዘው በጀት ዓመት ኢትዮ ቴሌኮምን ወክለው ከሚሠሩ ሰባት አገር በቀል ድርጅቶች፣ 92 በመቶ የአየር ሰዓት ሽያጭ ወይም 43.8 ቢሊዮን ብር እንደሚገኝ ተገለጸ፡፡

ይህም የተገለጸው አገር አቀፍ አከፋፋዮች ኢትዮ ቴሌኮምን በመወከል የሚከናወኑ ሥራዎች መካከል የቴሌ ብር አገልግሎት፣ የሞባይል ሲም ካርድ፣ የአየር ሰዓት፣ የምትክ ሲም ካርድ አገልግሎቶችን በብቸኛ አጋርነት በዋና አከፋፋይ ከሚሠሩ ሰባት ድርጅቶች ጋር ዓርብ ሚያዝያ 28 ቀን 2014 ዓ.ም. ስምምነት ሲፈረም ነው፡፡

የኢትዮ ቴሌኮም ዋና ሥራ አስፈጻሚ ወ/ሪት ፍሬሕይወት ታምሩ፣ ‹‹ድርጅቶቹ ከዚህ ቀደም ከኢትዮ ቴሌኮም ጋር ሲሠሩ ነበር፡፡ አገልግሎቱን በማስፋፋትና ሌሎች የአገልግሎት ዓይነቶችን በመጨመር ይዘው ይቀርባሉ፤›› ብለዋል፡፡

ህዳሴ ቴሌኮም አክሲዮን ማኅበር፣ የኢትዮጵያ ፖስታ አገልግሎት ድርጅት፣ ናሬድ ጄኔራል ትሬዲንግ ኃላፊነቱ የተወሰነ ግል ማኅበር፣ ኃይላይት ስቴሽነሪና ማኑፋክቸሪነግ ትሬዲንግ፣ ስማርት ዲጂታል ቴክኖሎጂ ኃላፊነቱ የተወሰነ የግል ማኅበር፣ ቴሌፖርት ቴክኖሎጂ ኃላፊነቱ የተወሰነ ግል ማኅበርና ኢላሚ ኢንዱስትሪያል ኢንጂነሪነግ ከኢትዮ ቴሌኮም ጋር ስምምነት ያደረጉ ናቸው፡፡

ስምምነት ያደረጉት ድርጅቶቹ ይሠሩ ከነበሩት ውስን አገልግሎቶች በተጨማሪ፣ በአገር አቀፍ ደረጃ በአከፋፋይነት እንዲሰማሩ ያስችላቸዋል ተብሏል፡፡

ኩባንያው በዞኖችና በሪጅኖች በብቸኛ አከፋፋይነት የሚሠሩ 13 ድርጅቶች ጋር ስምምነት ከማድረጉም በላይ፣ ሌሎች 48 ድርጅቶች በአከፋፋይነት እየሠሩ እንደሚገኙ ዋና ሥራ አስፈጻሚዋ ተናግረዋል፡፡

በአጠቃላይ የኩባንያው ምርትና አገልግሎት አከፋፋዮች ቁጥር 68 እንደሚደርስ፣ በእነዚህ ሥር የሚሠሩ 9,448 ንዑስ አከፋፋዮች መኖራቸውን ጠቁመዋል፡፡

እንዲሁም 350,102 የችርቻሮ ሱቆችና በሽያጭ ትስስሩ 359,618 ድርጅቶች በአጋርነት አብረው እየሠሩ እንደሚገኙ፣ በዚህም ከአንድ ሚሊዮን በላይ ለሚሆኑ ዜጎች የሥራ ዕድል መፍጠር ይቻላል ብለዋል፡፡

ኢትዮ ቴሌኮም በአዲስ አበባ ብቻ ተወስኖ የቆየውን የ4ጂ ሞባይል ኔትወርክ አገልግሎት በመላው አገሪቱ የማስፋፋት ሥራ ባለፉት ሁለት ዓመታት ሲያከናውን መቆየቱ፣ እንዲሁም ከ136 በላይ የኢትዮጵያ ከተሞች የ4ጂ ሞባይል ኔትወርክ አገልግሎት ተጠቃሚ መሆናቸው ይታወሳል፡፡

ኩባንያው ቀድሞ የገነባቸው የ4ጂ ሞባይል ኔትወርክ ማስፋፊያ መሠረተ ልማቶች  ለቀጣዩ የ5ጂ ሞባይል ኔትወርክ ዝግጁ ተደርገው የተሠሩ መሆናቸውን፣ የኢትዮ ቴሌኮም ዋና ሥራ አስፈጻሚ ወ/ሪት ፍሬሕይወት መግለጻቸው አይዘነጋም፡፡

በአሁኑ ጊዜ ኩባንያው ላለፉት ወራት  ሲያደርገው የነበረውን የ5ጂ ሞባይል ኔትወርክ የሙከራ ሥራ በማጠናቀቅ፣ አገልግሎቱን በይፋ ሰኞ ግንቦት 1 ቀን 2014 ዓ.ም. እንደሚጀምር ታውቋል፡፡

የ5ጂ ሞባይል ኔትወርክ በአሁኑ ጊዜ ዓለም የደረሰበት የመጨረሻው የሞባይል ኔትወርክ ነው፡፡ ኢትዮ ቴሌኮም ከ65 ሚሊዮን በላይ የሞባይል ደንበኞች ያሉት ሲሆን፣ 25 ሚሊዮን ገደማ ያህሉ የሞባይል ኢንተርኔት ተጠቃሚዎች ናቸው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች