Wednesday, April 17, 2024
- ማስታወቂያ -
- ማስታወቂያ -

ዳሸን ቢራ 1.7 ቢሊዮን ብር የፈጀ ማሳፋፊያ ፕሮጀክቱን አጠናቀቀ

ተዛማጅ ፅሁፎች

የዳሸን ቢራ አ.ማ. በደብረ ብርሃንና በጎንደር ከተሞች የሚገኙ ፋብሪካዎቹን የማምረት አቅም ለማሳደግ ከ1.7 ቢሊዮን ብር በላይ ወጪ በማድረግ ሲያካሂድ የነበረውን የማስፋፊያ ግንባታ አጠናቀቀ፡፡

ዳሸን ቢራ በሁለቱም ፋብሪካዎች ያካሄደው የማስፋፊያ ግንባታ የማምረት አቅሙን በከፍተኛ ሁኔታ የሚጨምርለት ሲሆን፣ በተለይ ዛሬ ይመረቃል ተብሎ የሚጠበቀው የደብረ ብርሃን ፋብሪካው ዓመታዊ የማምረት አቅሙን ወደ 3.2 ሚሊዮን ሔክቶ ሌትር ያሳድግለታል፡፡

የደብረ ብርሃኑ የዳሸን ቢራ ፋብሪካ እስካሁን የማምረት አቅሙ ሁለት ሚሊዮን ሔክቶ ሌትር እንደነበር የሚያመለክተው መረጃ ተጨማሪ፣ የማምረቻ መስመሮችን በማከል የተካሄደው ማስፋፊያ 1.2 ሚሊዮን ሔክቶ ሌትር ተጨማሪ ምርት እንዲያመርት ያስችለዋል፡፡ በተመሳሳይ በጎንደር የሚገኘው ፋብሪካውም ያካሄደውን የማስፋፊያ ሥራ ያጠናቀቀ ሲሆን፣ ይህም የማምረት አቅሙን ከ800 ሺሕ ሔክቶ ሌትር ወደ 1.2 ሚሊዮን ሔክቶ ሌትር ያሳድግለታል፡፡

በአጠቃላይ ዳሸን ቢራ በሁለቱም ፋብሪካዎቹ ያካሄደው የማስፋፊያ ግንባታ ዓመታዊ የማምረት አቅሙን ወደ ከ4.4 ሚሊዮን ሔክቶ ሌትር ያሳድገዋል፡፡ አዲሱ የማስፋፊያ ሥራ ፋብሪካው አዲስ ምርቶችን ለማከል ጭምር የሚያግዘው ከመሆኑም ሌላ በሁለቱም ፋብሪካዎች ተጨማሪ የሥራ ዕድል የሚፈጥር ይሆናል ተብሏል፡፡  

በዳሸን ቢራ ውጥን መሠረት ይህ የማስፋፊያ ሥራ ለቢራ ጠመቃ የሚጠቀምበትን ዋነኛ ጥሬ ዕቃ የሆነውን የቢራ ገብስ ከአገር ውስጥ አምራች በከፍተኛ ሁኔታ ለመረከብ ያስችለዋል፡፡ ይህንንም ትስስር ከቢራ አምራች አርሶ አደሮች ጋር ለማጠናከር የበለጠ እየሠራ መሆኑን የፋብሪካው መረጃ ያመለክታል፡፡ ፋብሪካው ይህንን ትስስር በመጀመሩም በከፍተኛ የውጭ ምንዛሪ ሲመጣ የነበረውን ብቅል በማስቀረት በአገር ውስጥ ገብስ እየተካና ይህንንም መጠን እያሳደገ ይገኛል፡፡

 ዳሸን ቢራ ወደ ሥራ ከገባ 20 ዓመታትን ያስቆጠረ ሲሆን፣ ወደ ሥራ የገባውም የመጀመርያውን ፋብሪካ በጎንደር በመገንባት ነው፡፡ በዚህ የአገልግሎት ዘመኑ ማኅበራዊ ኃላፊነቱን ለመወጣት ከ800 ሚሊዮን ብር በላይ ድጋፍ ማድረጉን ገልጿል፡፡ ይህንን ማኅበራዊ ኃላፊነት በትምህርት፣ በጤና፣ በንፁህ መጠጥ፣ በመንገድ፣ ለአረጋውያን ቤት ግንባታና በመሳሰሉ ላይ ያደረጋቸው ድጋፎች ተጠቃሰሾች ናቸው፡፡ በተማሪዎች ምገናባ ፕሮግራምና በስፖርት ረገድም በከፍተኛ ሁኔታ ማኅበራዊ ኃላፊነቱን ሲወጣ እንደነበርም አስታውቋል፡፡ 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች