Wednesday, October 5, 2022
ሌሎች ዓምዶች
    - ማስታወቂያ -
    - ማስታወቂያ -

    በኢትዮጵያ ብቸኛ የሆነው የጠለፋ መድን አክስዮን ማኅበር አዲስ የቦርድ ሊቀመንበር መረጠ

    - ማስታወቂያ -

    ተዛማጅ ፅሁፎች

    በአገሪቱ ብቸኛው የጠለፋ መድን ሰጪ ኩባንያ የሆነው የኢትዮጵያ የጠለፋ መድን አክሲዮን ማኅበር የዳይሬክተሮች ቦርድ ወ/ሮ መሠረት በዛብህን በቦርድ ሊቀመንበርነት መረጠ።

    የኩባንያው የቦርድ ሊቀመንብር ሆነው የተመረጡት ወ/ሮ መሠረት በዛብህ በአሁኑ ወቅት የኅብረት ኢንሹራንስ ዋና ሥራ አስፈጻሚ በመሆን በማገልገል ላይ እንደሚገኙ ከኢትዮጵያ ጠለፋ መድን አክሲዮን ማኅበር የተገኘው መረጃ ያመለክታል።

    በቅርቡ በኢትዮጵያ ብሔራዊ ባንክ ሹመታቸው የፀደቀላቸው የኩባንያው የዳይሬክተሮች ቦርድ አባላት ሰሞኑን ባደረጉት ስብሰባ ከቦርድ ሊቀመንበር በተጨማሪ የምክትል ቦርድ ሊቀመንበርነት ምርጫንም አካሂደዋል። በዚህም መሠረት የኢትዮጵያ መድን ድርጅት ዋና ሥራ አስፈጻሚ በመሆን እያገለገሉ የሚገኙት አቶ ነፃነት ለሜሳን ምክትል የቦርድ ሊቀመንበር ሆነው ተመርጠዋል።

    እስካሁን ኩባንያውን በቦርድ ሊቀመንበር ሲያገለግሉ የቆዩት አቶ ኃይለ ማርያም አሰፋ መሆናቸው የሚታወስ ሲሆን፣ በምክትል ቦርድ ሊቀመንበርነት ሲያገለግሉ የነበሩት ደግሞ ከአዋሽ ኢንሹራንስ የተወከሉት ወ/ሮ ፍሬሕይወት ዓለማየሁ ናቸው፡፡ በኩባንያው መተዳደሪያ ደንብ መሠረት አንድ የቦርድ ሊቀመንበር የሚያገለግለው ለሦስት ዓመት ነው፡፡ 

    ይህ በእንዲህ እንዳለ በቅርቡ በተካሄደው ጠቅላላ ጉባዔ የኢትዮጵያ ጠለፋ መድን አክሲዮን ማኅበር የዳይሬክተሮች ቦርድ አባል እንዲሆኑ ከተመረጡት ዘጠኝ አባላት ውስጥ ሹመታቸው በብሔራዊ ባንክ የፀደቀላቸው የስምንቱ እንደሆነና የአንዱ የቦርድ አባል ሹመት በብሔራዊ ባንክ አለመፅደቁ ታውቋል።

    የቦርድ አባል እንዲሆኑ ተመርጠው ሹመታቸው በብሔራዊ ባንክ ሊፀድቅ ያልቻለው ግለሰብ የተወከሉት ከኢትዮጵያ ንግድ ባንክ እንደሆነ ቢታወቅም የኢትዮጵያ ብሔራዊ ባንክ የግለሰቡን ሹመት ለምን እንዳልተቀበለ ግን የታወቀ ነገር የለም። በመሆኑም ሰሹመታቸው ባልፀደቀላቸው ግለሰብ ምትክ በተጠባባቂ የቦርድ አባልነት ከተመረጡት በአንዱ ይታከሉ ተብሎ ይጠበቃል፡፡

    የኢትዮጵያ ንግድ ባንክ በኢትዮጵያ ጠለፋ መድን አክሲዮን ውስጥ ትልቁን የአክሲዮን ድርሻ የያዘ  እንደሆነ ይታወቃል፡፡ 

    የኢትዮጵያ የጠለፋ መድን አክሲዮን ማኅበር በአሁኑ ወቅት ከ2.5 ቢሊዮን ብር በላይ የተፈረመ ካፒታል ያለው ሲሆን፣ የተከፈለ ካፒታሉ ደግሞ ከአንድ ቢሊዮን ብር በላይ ነው፡፡ 

    ሁሉንም የኢንሹራንስ ኩባንያዎች ባለአክሲዮን ያደረገው ይህ ኩባንያ ካፒታሉን ለማሳደግ ተጨማሪ አክሲዮኖችን በአሁኑ ወቅት በመሸጥ ላይ ነው፡፡

    - Advertisement -spot_img

    የ ጋዜጠኛው ሌሎች ፅሁፎች