Wednesday, April 17, 2024
- ማስታወቂያ -
- ማስታወቂያ -

የነዳጅ አመላላሽ ቦቴዎች ቁጥር በ40 በመቶ መቀነሱ ተነገረ

ተዛማጅ ፅሁፎች

ታኅሳስ 27 ቀን 2014 ዓ.ም. የኢትዮጵያ የፈሳሽ ጭነት ማጓጓዣ ባለንብረቶች ማኅበርኧ ለትራንስፖርትና ሎጂስቲክስ ሚኒስቴር በጻፈው ሁለተኛ ደብዳቤ፣ 40 በመቶ የነዳጅ ቦቴዎች በጎማና መለዋወጫ እጥረት ከገበያ መውጣታቸውን ገለጸ፡፡

የነዳጅ ቦቴ መግዣ ዋጋ ከባለፈው ዓመት ወዲህ ብቻ በእጥፍ መጨመሩ ከጂቡቲ ወደ ኢትዮጵያ ነዳጅ የሚያመላልሱ የፈሳሽ ተሽከርካሪዎች ቁጥር እያመናመነ መሆኑ ተገለጸ፡፡ የአንድ ነዳጅ ቦቴ ዋጋ ባለፈው ዓመት ከነበረበት አምስት ሚሊዮን ብር አሁን 12 ሚሊዮን መድረሱን የነዳጅ አመላላሾች ማኅበር ያደረገው የገበያ ዳሰሳ ጥናት አመላክቷል፡፡

‹‹የዋጋ ፕሮፎርማዎች ከአምቼ፣ ከበላይነህ ክንዴ የመኪና መገጣጠሚያና ከሌሎችም አቅራቢዎች የተሰበሰቡ ሲሆን፣ የሻንሲና የቦዲ ዋጋ ብቻ ከእጥፍ በላይ በአንድ ዓመት ጨምሯል፤›› ሲሉ የማኅበሩ ሥራ አስፈጻሚ ቦርድ አባል አቶ መርከብ ተፈራ  ለሪፖርተር ተናግረዋል፡፡

በአጠቃላይ 3,500 የነዳጅ ቦቴዎች በሥራ ላይ የቆዩ ቢሆንም፣ ቁጥራቸው ግን ካለው ፍላጎት በታች በመሆኑ በሚፈለገው ፍጥነት ነዳጅ ለማመላለስ አዳጋች መሆኑ ተገልጿል፡፡ በዚህም ምክንያት አንድ ቦቴ ነዳጅ ከጂቡቲ ወደ ኢትዮጵያ ለማድረስ የደርሶ መልስ ዋጋ በብዙ እጅ አድጎ፣ በአሁኑ ጊዜ 115,000 ብር መድረሱ ታውቋል፡፡ የነዳጅ ቦቴዎች ዋጋ በእጥፍ ያደገው በኮሮና ወረርሽኝ ምክንያት ምርታቸው በመቀነሱና በዓለም አቀፍ ገበያ ውስጥ በተፈጠረ መዛባት ሲሆን፣ በኢትዮጵያ ውስጥም የዶላር ምንዛሪ በከፍተኛ ፍጥነት በመውረዱ ነው ተብሏል፡፡

‹‹አሁን ባለው ሁኔታ እንኳን አዲስ ቦቴ ወደ ሥራ ሊገባ ያሉትም ወጪያቸው ከትርፋቸው በመብለጡ ሥራው እንዳይቋረጥ ከፍተኛ መስዋዕትነት እየከፈሉ ነው፤›› ብለዋል አቶ መርከቡ፡፡

በአሁኑ ጊዜ መንግሥት የነዳጅ አመላላሾችን የትርፍ ህዳግ ከፍ ለማድረግ በፊናው የገበያ ዳሰሳ ጥናት እያደረገ ሲሆን፣ ለዚህም ከትራንስፖርትና ሎጂስቲክስ ሚኒስቴር፣ ከንግድ ሚኒቴርና ከኢትዮጵያ ነዳጅ አቅራቢ ድርጅት የተውጣጣ ኮሚቴ ተቋቁሞ ወደ ሥራ ገብቷል፡፡

ይሁን እንጂ ማኅበሩ በጠየቀው የትርፍ ህዳግና መንግሥት እሰጣለሁ ባለው ላይ መግባባት ላይ መድረስ እንዳልተቻለ ምንጮች አረጋግጠዋል፡፡ የነዳጅ አመላላሾች ህዳጉ የወጪያቸውን 15 እጅ እንዲሆን የጠየቁ ሲሆን፣ መንግሥት የሰጠው ግን ከዚያ በታች መሆኑ ተገልጿል፡፡

‹‹የባንክ ብድር ወለድ፣ የተሽከርካሪ እርጅና ፍጥነትና ሌሎች ወጪዎች ከፍ ብለዋል፡፡ የመንግሥት እሴት ግን እነዚህን ወጪዎች ከግምት አላስገባም፤›› ብለዋል አቶ መርከቡ፡፡

በቅርቡ የሚኒስትሮች ምክር ቤት ያፀደቀው መመርያ የትርፍ ህዳጉ ከባንክ ተቀማጭ ወለድ በላይ መሆን እንዳለበት የደነገገ ሲሆን፣ የትርፍ ህዳጉ በጥናት ላይ ተመሥርቶ በየስድስት ወሩ መታየት እንዳለበት አትቷል፡፡

በሌላ በኩል ግን የትርፍ ህዳግ መውረድ የነዳጅ ኮንትሮባንድ እንዲበራከት አስተዋጽኦ እያደረገ መሆኑም ተመልክቷል፡፡ ‹‹ያለው ትርፍ በገበያ ውስጥ ለመቆየት በቂ ስላልሆነ ሳይወዱ ወደ ኮንትሮባንድ እየገቡ ነው፤›› ሲሉ  የነዳጅ ማደያዎች ማኅበር የቦርድ አባል ተናግረዋል፡፡ ‹‹ከሦስት ቦቴዎች የሚገኘው ጠቅላላ ትርፍ 81,000 ብር ሲሆን፣ አንዱን ቦቴ ገዝቶ ለማከፋፈል ግን 3.5 ሚሊዮን ብር ይፈጃል፤›› ብለዋል፡፡

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች