Monday, July 22, 2024
- Advertisement -
- Advertisement -
ማኅበራዊበተቋራጮች አለመኖርና በተጋነነ ዋጋ ምክንያት የመንገድ ፕሮጀክቶች ተደጋጋሚ ጨረታ እንደሚወጣባቸው ተነገረ

በተቋራጮች አለመኖርና በተጋነነ ዋጋ ምክንያት የመንገድ ፕሮጀክቶች ተደጋጋሚ ጨረታ እንደሚወጣባቸው ተነገረ

ቀን:

በኢትዮጵያ በሁሉም አካባቢዎች እንዲገነቡ በፓርላማ በጀት የፀደቀላቸውን የመንገድ ፕሮጀክቶች ግንባታ ሊያከናውኑ የሚችሉ የሥራ ተቋራጮችን ማግኘት ባለመቻሉና በገበያ ውስጥ ባለ የተጋነነ ዋጋ ምክንያት፣ እስከ አምስት ጊዜ ጨረታ ለማውጣት እየተገደደ መሆኑን የኢትዮጵያ መንገዶች አስተዳደር ገለጸ፡፡

በመላ አገሪቱ እንዲገነቡ ታስቦ በጀት የፀደቀላቸው፣ ወደ ግንባታ የገቡና የግንባታ ሒደታቸው እየተጠናቀቀ ያሉ የመንገድ ፕሮጀክቶች አጠቃላይ ዋጋ፣ ግማሽ ትሪሊዮን ብር መድረሱ ተገልጿል፡፡ እነዚህን የመንገድ ፕሮጀክቶችን ለማከናወን የሚችሉ የሥራ ተቋራጮች ገበያ ውስጥ ማግኘት ፈታኝ እንደሆነ፣ የኢትዮጵያ መንገዶች አስተዳደር ምክትል ዋና ዳይሬክተር አቶ የትምጌታ አሥራት ተናግረዋል፡፡

በተጋነነ ዋጋ ወይም በተጫራቾች አለመኖር ምክንያት ባለፉት ሦስት ዓመታት ብቻ 64 ፕሮጀክቶች፣ ለአምስት ጊዜያት ያህል እንደገና ጨረታ እንደወጣባቸው ምክትል ዋና ዳይሬክተሩ ገልጸዋል፡፡

በ2013 ዓ.ም. በድጋሚ ጨረታ ከወጣባቸው 38 ፕሮጀክቶች መካከል አምስት የተጋነነ ዋጋ የቀረበባቸው፣ 16 የተቋራጭ እጥረት የገጠማቸው፣ 17 የመንገድ ፕሮጀክቶች ደግሞ ተጫራቾች ቢገኙም ያቀረቡት ሰነድ በሚፈለገው መጠን ባለመሟላቱ በድጋሚ ጨረታው እንዲወጣ መደረጉን አስረድተዋል፡፡

ምክትል ዋና ዳይሬክተሩ ይህን የተናገሩት ጥር 16 ቀን 2014 ዓ.ም. የከተማ መሠረተ ልማትና ትራንስፖርት ጉዳዮች ቋሚ ኮሚቴ፣ የከተማ መሠረተ ልማት ሚኒስቴርን የ2014 ዓ.ም. በጀት ዓመት የስድስት ወራት ሪፖርት ገምግሞ ባቀረበበት ወቅት ነው፡፡

አቶ የትምጌታ በዘርፉ የሚታየውን የተቋራጮች እጥረት ለመቅረፍ ፓርላማው ዕገዛ እንዲያደርግ ጥያቄ ያቀረቡ ሲሆን፣ አሁን የሚታየውን ችግር ለመቅረፍ የመንግሥት የልማት ድርጅቶችን እንደ አማራጭ እየተጠቀሙ ቢሆንም ድርጅቶቹ መሸከም ከሚችሉት በላይ በመያዛቸው ተጨማሪ ሥራ ማስተናገድ አይችሉም ብለዋል፡፡

የመንግሥት ንብረት የሆኑት የኢትዮጵያ ኮንስትራክሽን ሥራዎችና የመከላከያ ኮንስትራክሽን ድርጅቶች ሲሆኑ፣ አገሪቱ የምታከናውናቸውን ፕሮጀክቶች በከፊል ስለመያዛቸው ተነግሯል፡፡

በተመሳሳይ የመንገድ ኮንስትራክሽን ከላይ ከተገለጹት አስቸጋሪ ሁኔታዎች በተጨማሪ ተቋራጭ ተገኝቶላቸው ወደ ግንባታ እንዲገቡ ሲታሰብ፣ በታችኛው የመንግሥት መዋቅር ላይ ባሉ አካላት የሚጠየቀው የካሳ ክፍያ ላይ ከፍተኛ የሆነ ማነቆ መሆኑን ምክትል ዋና ዳይሬክተሩ አስረድተዋል፡፡

በተለይ የካሰ ጉዳይ በወረዳ በሚገኙ የመንግሥት አካላት የሚከናወን ሥራ እንደሆነ የገለጹት ምክትል ዋና ዳይሬክተሩ፣ ለአንድ ፕሮጀክት እስከ አንድ ቢሊዮን ብር የካሳ ክፍያ እየተጠየቀ እንደሆነ ገልጸዋል፡፡

በመሆኑም ካሳ ተከፍሏቸውም ቦታውን የማይለቁ አካላት በመብዛታቸው፣ ‹‹የምክር ቤቱን ዕገዛ እንሻለን፤›› ብለዋል፡፡ በግንባታ ላይ ያሉትና በቅርቡ ግንባታቸው የሚጀምር የመንገድ ፕሮጀክት በቀጣዮቹ አምስት ዓመታት በየዓመቱ ከ80 እስከ 100 ቢሊዮን ብር ወጪ ሊጠየቁ እንደሚችሉ አስረድተዋል፡፡

በሰሜኑ የአገሪቱ ክፍል ጦርነት ምክንያት ግምታቸው 84 ቢሊዮን ብር የሚሆን 60 ያህል የመንገድ ፕሮጀክቶች ተስተጓጉለው እንደነበር የተገለጸ ሲሆን፣ ተቋርጠው ከነበሩት ፕሮጀክቶት ውስጥ አሥር የሚሆኑት ወደ ሥራ መግባታቸው ተገልጿል፡፡

በጦርነት ወቅት የበርካታ ፕሮጀክቶች ንብረት እንደ ወደመና እንደ ተዘረፈ ከ ምክትል ዋና ዳይሬክተሩ ማብራሪያ ለመረዳት ተችሏል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ኢትዮጵያዊ ማን ነው/ናት? ለምክክሩስ መግባባት አለን?

በደምስ ጫንያለው (ዶ/ር) የጽሑፉ መነሻ ዛሬ በአገራችን ውስጥ በተለያዩ አካባቢዎች ግጭቶችና...

ዴሞክራሲ ጫካ ውስጥ አይደገስም

በገነት ዓለሙ የዛሬ ሳምንት ባነሳሁት የኢሰመኮ ሪፖርት መነሻነትና በዚያም ምክንያት...

ኢትዮጵያ በምግብ ራሷን የምትችለው መቼ ነው?

መድረኩ ጠንከር ያሉ የፖሊሲ ጉዳዮች የተነሱበት ነበር፡፡ ስለረሃብ፣ ስለምግብ፣...

ደረጃውን የጠበቀ ስታዲየም በሌላት አገር ዘመናዊ ስታዲየም እየገነቡ ያሉ ክልሎች

አዲሱ የማዕከላዊ ኢትዮጵያ ክልል ዘመናዊ ስታዲየም ለማስገንባት ከ500 ሚሊዮን...