Tuesday, May 21, 2024
- Advertisement -
- Advertisement -

የሳምንቱ ገጠመኝየ ሳ ም ን ቱ ገ ጠ መ ኝ

የ ሳ ም ን ቱ ገ ጠ መ ኝ

ቀን:

በቀደም ጠቅላይ ሚኒስትር ዓብይ አህመድ (ዶ/ር) ለአዲሶቹ ተሿሚዎች የሚሰጥ ሥልጠና ላይ ተገኝተው ንግግር ሲያደርጉ፣ ሹማምንቱ ሕዝብን በተመለከተ ያላቸው አተያይ ገዘፍ እንዲል በሰጡት ማብራሪያ መነሻ እኔ ደግሞ ከዚህ ቀደም የማስታውሳቸውን ገጠመኞች እንዲህ አድርጌ ከተብኩ፡፡ ‹‹ሕዝብ የወደደው እግዜር የወደደው›› የሚባለው አባባል በጣም ደስ ይለኛል፡፡ ይህ አባባል ለራስ ወዳዶችና የሕዝብ ክብር ለማይገባቸው የማይዋጥ ቢሆንም፣ እኔ በበኩሌ እንደ ሕዝብ የማከብረውና የምፈራው የለኝም፡፡ በአንድ ወቅት ሕዝብ በሙያቸውና በሥነ ምግባራቸው ያደነቃቸው ሰዎች፣ ሁሌም ያንን ክብርና ሙገሳ ላለማጣት ሲሉ በጨዋነት ይዘልቃሉ፡፡ የሕዝብ ነገር ከልባቸው ሳይሆን ከአንገታቸው የሆነባቸው ደግሞ ወደ ላይ የወጡበት መሰላል ተንሸራቶ ወድቆ ሲከሰክሳቸው በዓይናችን ዓይተናል፡፡ ፖለቲከኛ፣ መምህር፣ ሐኪም፣ መሐንዲስ፣ ጋዜጠኛ፣ ኢንቨስተር፣ ሙዚቀኛ፣ ቴአትረኛ… እያልን ብንቆጥር ከሕዝብ ፍላጎት ሲያፈነግጡ መግቢያና መውጪያው ይጠፋቸዋል፡፡ ሕዝብ ካመነና ካከበረ በኋላ አይሆኑ ሆኖ መገኘት የሚያስከትለው ውርደት ነው፡፡ ለዚህም ነው፣ ‹‹ሕዝብ የጠላህ ዕለት አበቃልህ…›› የሚባለው፡፡

 

ለዚህ መነሻ ሐሳብ ምክንያት የሆነኝ በአንድ ወቅት አንድ ጨዋ የሚባሉ የቀድሞው ኢሕአዴግ ፖለቲከኛ በአንድ የፓናል ውይይት ላይ እንዲህ ተናግረው ነበር፡፡ በዚህ የተለያዩ የኅብረተሰብ ክፍሎች በተሳተፉበት ውይይት ላይ ለተነሱ ጥያቄዎች ምላሽና ማብራሪያ የሰጡት ፖለቲከኛ በስፋት ብዙ ነገሮችን ቢያነሱም፣ እኔ ደግሞ ሕዝብን በሚመለከት የተናገሩትን ትኩረት አድርጌበታለሁ፡፡ እኝህ ሰው ግልጽና ቀጥተኛ በመሆናቸው ድብብቆሽ አያውቁም ነበር፡፡ ‹‹ባለፉት 27 ዓመታት ብዙ ተግባራት ቢከናወኑም፣ መሠራት ባለበት ደረጃ ግን አልሠራንም…›› ሲሉ ጀመሩ፡፡ ‹‹የሚጠበቅብንን ሠርተን ቢሆን ኖሮ ሕዝቡ ለምን ይቆጣል? ለምንስ ይነሳብናል? ብንሠራማ ኖሮ ያመሠግነን ነበር… ለራሳችን ምስክር ከመሆን ይልቅ ሕዝብ ይመሰክርልናል… ሕዝብ ለሥራችን የመመስከር ችግር የለበትም…›› ነበር ያሉት፡፡

- Advertisement -

ሰውየው ቀጠሉ፡፡ ‹‹…ትናንት የተነሳንለትን የሕዝብ ተቆርቋሪነት ሜዳ ላይ ጥለን የቆምን ብዙ ነን፡፡ አንዳንዱ የራሱን ጌታ ፈጥሮ ይሰግዳል፡፡ ጌታ መፍጠር ለምን አስፈለገ? የድርጅታችን ዓላማ ይኼንን ይላል? ሕዝቡስ ይኼንን ይፈልጋል? በጭራሽ፡፡ ችግሩ የድርጅታችን ነበር? አዎ፣ ሕመማችን እዚህ ጋ ነበር መደባበቅ የለብንም፡፡ አንድ ሕዝብ እያለን ለምን እንባላለን? አንድ አገርና አንድ ዓላማ ነው ያለን፡፡ ለምን አንደኛችን በሌላችን ደባና ሸር እንፈጽማለን? አዎ፣ ይህ የሕዝባችን ችግር ሳይሆን የግል ጥቅም ጉዳይ ነው፡፡ ከአገርና ከሕዝብ የሚቀድም የግል ጥቅም ስላለ ነው፡፡ የራሱን ጌታ የፈጠረ ደግሞ በየደረሰበት ጉልበቱ ይከዳዋል፡፡ የሥልጣን ወንበር ላይ የምንቀመጠው ለስም መሆን አልነበረበትም፡፡ ወንበሩ የሚፈልገውን መሥራትና መወሰን ካልተቻለ ዕርባና የለውም፡፡ በእንዲህ ዓይነት ችግሮች ሳቢያ ነው ከ27 ዓመታት በኋላ ከታገልንለት ሕዝብ ጋር የተቃቃርነው፡፡ ምክንያቱ ሌላ አይደለም፡፡ ሕዝቡ የመጨረሻ ዕድል የሰጠን እነዚህ ሰዎች ምን እንደሚሠሩ እንይ ብሎ ነው፡፡ በሌላ አቅጣጫ ካሰብን ግን ተሳስተናል፡፡ ይህ ይሰመርበት…›› አሉ፡፡

እኝህ ሰው እጅግ አስተዋይና ኃላፊነት የሚሰማቸው ይመስላሉ፡፡ ለእኔ እንደገባኝ እኝህ ሰው ፖለቲካው በሚገባ የገባቸው ብቻ ሳይሆኑ፣ ነገ ተነገ ወዲያን እያሸጋገሩ እያዩ ያሉ ብልህ ሰው ናቸው፡፡ ‹‹የእኛ ጌታ ሕዝብ ነው›› ሲሉ የሕዝብን የሥልጣን ባለቤትነትና የፈለገውን የማድረግ ችሎታም ተገንዝበዋል፡፡ ‹‹ከሕዝብ በስተቀር ሌላ ጌታ የለንም›› ሲሉ ተወደደም ተጠላም ሕዝብን ይዞ አሸናፊ መሆን እንደሚቻል ነው በግልጽ ያስቀመጡት፡፡ ‹‹ሕዝብ ተይዞ የምን መብረክረክ ነው?›› ሲሉም ማየትም ማዳመጥም ተገቢ የሚሆነው ሕዝብን ነው ማለታቸው ነው፡፡ አገር ችግር ውስጥ ገብታ እንዳትፈርስ ያለው ምርጫ ጥርስን ነክሶ ከሕዝብ ጋር መሥራት ብቻ ነው የሚያዋጣው መንገድ ያሉት፣ ሕዝብን ሳይዙ የትም መድረስ አይቻልም ለማለት ነው፡፡ በቃ፣ የመታገል ዓላማው የሕዝብን ኑሮ መለወጥና ለሕዝብ ፈቃድ መገዛት ነው፡፡ ሌላ ነገር የለም፡፡

በወቅቱ የእኝህን የተከበሩ ሰው ንግግር ሳዳምጥ ውስጤ ያቃጭል የነበረው ከሕዝብ የተራራቁ ባለሥልጣናትን ጉዳይ ነው፡፡ የሚናገሩትና የሚሠሩት የማይገናኝ ባለሥልጣናት ስማቸው በጉቦ፣ በትልልቅ ግዥዎችና ኮንትራቶች የሌብነት ኮሚሽን፣ በቤተሰቦቻቸውና በዘመዶቻቸው ስም ባሉዋቸው ንግዶችና ንብረቶች፣ በዕብሪታቸውና ከመጠን ባለፈ ውሸታምነታቸው ይነሳል፡፡ አንድ ቀን ደፍረው ወጥተው፣ ‹‹የሚወራብኝ አሉባልታ ነው…›› ብለው ማስተባበል የማይችሉ ናቸው፡፡ ደፈር ሲሉ ዓይተንም ሰምተንም አናውቅም፡፡ በእርግጥ በየመድረኩ፣ ‹‹የኪራይ ሰብሳቢነት አደጋዎች…›› እያሉ ለይስሙላ ይደሰኩራሉ፡፡ ላይ ላዩን የመልካም አስተዳደር ችግሮችን ከመደስኮር ወጥተው፣ ‹‹ችግራችን በግልጽ ይኼ ነው…›› ብለው ለመናገር ድፍረቱ የላቸውም፡፡ ሁልጊዜ በዚያ መከረኛ ቴሌቪዥን ጣቢያ ሾላ በድፍኑ ያቅራራሉ፡፡ ሥርዓቱ የገባበትን ችግር ከማድበስበስና ራስን የማሞኘት ያህል ከመመፃደቅ ውጪ ጥሬ ሀቅ አልነበራቸውም፡፡ በዚህ የተነሳ ሕዝቡ ጥልትና ጥምድ አደረጋቸው፡፡ ሕዝብ ሲጠላ ደግሞ መልዕክቱ ግልጽ ነበር፡፡ በትግሉ ፈጥፍጦ ጣላቸው፡፡ ዛሬ እነሱና መሰሎቻቸው ናቸው አገራችንን የጦርነት አውድማ ያደረጉ ወንበዴዎች፡፡

ከዛሬ 30 ዓመት በፊት ፒያሳ ጣይቱ ሆቴል አጠገብ የሚገኝ አንድ ሆቴል ውስጥ፣ ምራቃቸውን የዋጡ ሰዎች የሚገናኙበት የከረንቦላ መጫወቻ ትዝ ይለኛል፡፡ ከአዲስ አበባ ዩኒቨርሲቲ፣ ከተለያዩ መንግሥታዊ መሥሪያ ቤቶች፣ ከተለያዩ የንግድ ሥራዎች፣ ከዓለም አቀፍ ድርጅቶች፣ ከሕክምና ተቋማት፣ ወዘተ የሚሰባሰቡት እነዚህ ሰዎች በዕድሜና በትምህርት ደረጃ ጥሩ ይዞታ ላይ የሚገኙ ነበሩ፡፡ በከረንቦላ ጨዋታ ጊዜ ጥርስ የማያስከድኑ ቀልደኞችና ተረበኞችም ነበሩ፡፡ ቦታው ትኩረት ስለሚስብ የደኅንነት መሥሪያ ቤት ሰዎችም ብቅ ጥልቅ ይሉ ነበር፡፡ ያም ሆኖ ግን በሹክሹክታም ቢሆን የደርግ መንግሥት እስኪበቃው ይቀረጠፍ ነበር፡፡ በወቅቱ በደርግ መንግሥት ሲበሳጩ ከነበሩበት መካከል አንቱ የተባሉ ነበሩበት፡፡ ደርግ ተወግዶ ኢሕአዴግ ሥልጣን ሲይዝ እነዚህ ሰዎች ተፈልገው ሹመት እንደ ተሰጣቸውም አስታውሳለሁ፡፡ እነዚያ ለሕዝብ ተቆርቋሪ ነን የሚሉ ግለሰቦች ሕዝብ ረስተው አዲሱን መንግሥት ለማስደሰት ይናገሩ የነበሩትን በቴሌቪዥን ስሰማ ከመጠን በላይ ይደንቀኝ ነበር፡፡ ሌሎችም በጣም ይከፉ እንደነበር አስታውሳለሁ፡፡ ሁሉም በጊዜ ሒደት ከሥልጣኑ ላይ ሲራገፉ ቀስ በቀስ  የተመለሱት ወደዚያች የረሷት ከረንቦላ መጫወቻ ቤት ነበር፡፡ ሲመለሱ ግን የነበረው አቀባበል እንደ በፊቱ አልነበረም፡፡ የተከፉ ፊቶች ነበሩ ያስተናገዷቸው፡፡ ሕዝብ የጠላውን ማን ይወዳል? ሕዝብ ነዋ የሁሉም ነገር የበላይ፡፡ አሁንም ጠቅላይ ሚኒስትር ዓብይ እንዳሉት ሥልጣኑ ሕዝብ ማገልገያ እንጂ ራስንና ቢጤን ማገልገያ እንዳልሆነ ልብ ያለው ልብ ይበል፡፡

(ኤፍሬም ረታ፣ ከቱሉ ዲምቱ)

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

በሥጋ ላይ አላግባብ እየተጨመረ ያለውን ዋጋ መንግሥት ሊቆጣጠረው ይገባል

በአገራችን የግብይት ሥርዓት ውስጥ ኢኮኖሚያዊ ያልሆኑ ወይም ያልተገቡ የዋጋ...

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት...

የፖለቲካ ቅኝቱ የሕዝባችንን ታሪካዊ ትስስር ለምን አያከብርም?

በንጉሥ ወዳጅነው የዓብይ አህመድ (ዶ/ር) መራሹ የ2010 ዓ.ም. የለውጥ መንግሥት...

ዛሬም ኧረ በሕግ!

በገነት ዓለሙ በዚህ በያዝነው ሚያዝያ/ግንቦት ወይም ሜይ ወር ውስጥ የተከበረው፣...