Wednesday, July 24, 2024

የሐሳብ ልዕልና የበላይነት ሲያገኝ የውጭ ጫና አያሳስብም!

ኢትዮጵያ አሁንም ከበርካታ ፈተናዎች ጋር የምትታገል አገር ናት፡፡ ከድህነት ውስጥ ለመውጣት የሚደረገው ትግል ይህ ነው የሚባል ውጤት ሳይገኝበት፣ የግጭት አዙሪት ውስጥ ሆና የንፁኃን ደም በከንቱ እየፈሰሰና የአገር ሀብት እየወደመ ነው፡፡ አሜሪካን ጨምሮ ዓለም አቀፉ ማኅበረሰብ ከመቼውም ጊዜ በላይ ጫናቸው እየበረታ ነው፡፡ የግዛት አንድነትና ሉዓላዊነትን ለማስከበር የሚደረገው ጥረት በርካታ መሰናክሎች ተጋርጠውበታል፡፡ ሰሞኑን መንግሥት በተባበሩት መንግሥታት ድርጅት (ተመድ) የተለያዩ ክፍሎች ውስጥ የሚሠሩ ሰባት ግለሰቦች በ72 ሰዓታት ከአገር እንዲወጡ ትዕዛዝ ካስተላለፈ በኋላ፣ ከተለያዩ አቅጣጫዎች የሚሰሙ ቁጣዎችና ማስጠንቀቂያዎች ትኩረት ይሻሉ፡፡ ምንም እንኳን ኢትዮጵያዊያን በተለያዩ የመገናኛ ዘዴዎች የቬና ኮንቬንሽን አንቀጽ 9 በማጣቀስ የመንግሥት ውሳኔ በዓለም አቀፍ ሕግ ድጋፍ እንዳለው ቢወተውቱም፣ የውጭ ኃይሎች አቋም ግን የሚለወጥ አይመስልም፡፡ በአገር ላይ እንዲህ ያለ ከባድ ግፊትና ጫና ሲኖር ኢትዮጵያዊያን በአንድነት ቆመው መታገላቸው እንዳለ ሆኖ፣ በውስጥ ጉዳይ ደግሞ መታረም ለሚገባቸው አሳሳቢ ጉዳዮች ከፍተኛ ትኩረት መሰጠት ይኖርበታል፡፡ ኢትዮጵያዊያን ጥቃቅን ልዩነቶቻቸውን በአግባቡ መያዝ ቢችሉ ኖሮ፣ ይህ ሁሉ ሥቃይና መከራ በሕዝባችን እንደማይደርስ መተማመን ይገባል፡፡ ከጉልበት ይልቅ ለሐሳብ ልዕልና ትኩረት ባለመሰጠቱ ግን መከራው የተረፈው ለሕዝባችን ነው፡፡

 

ኢትዮጵያ እልህና ግትርነት ከተፀናወተው የፖለቲካ አስተሳሰብ ለአንዴና ለመጨረሻ ጊዜ መላቀቅ አለባት፡፡ እልህና ግትርነት የንፁኃንን ደም እንደ ጎርፍ ከማፍሰስና የደሃ አገር አንጡራ ሀብት ከማውደም በስተቀር ፋይዳ እንደሌላቸው በተደጋጋሚ ታይቷል፡፡ ከሥልጣንና ከሚያስገኘው ጥቅም ባሻገር የሕዝብ ደኅንነትና የአገር ሰላም ደንታ የማይሰጣቸው ወገኖች፣ በእልህና በግትር ፖለቲካቸው ምክንያት የሚቀሰቅሱት ግጭትና ውድመት ከፍተኛ ጥፋት እያስከተለ ነው፡፡ የኢትዮጵያ ሕዝብ በማንነት፣ በእምነት፣ በባህል፣ በቋንቋና በመሳሰሉት ልዩነቶች ሳይበገር የጦርነት ነጋሪት ጎሳሚዎችን ማስቆም አለበት፡፡ ፖለቲከኞች በማንነት ጭምብል ተጋርደው አገር አፍራሽ እንቅስቃሴ ውስጥ ሲገቡ፣ በንፁኃን ደምና ዕንባ እንዳይቆምሩ ክፍተት ሊሰጣቸው አይገባም፡፡ በነፃ አውጪነትና በተቆርቋሪነት ስም እያታለሉ ኢትዮጵያውያንን በመከፋፈል አገር ሊያፈርሱ ሲነሱ፣ የደም ትስስርንና የእምነት ተጋሪነትን ከለላ እያደረጉ ስለሆኑ በቃችሁ መባል አለባቸው፡፡ ኢትዮጵያዊያን ኅብረ ብሔራዊ አንድነታቸውን በማጠናከር ለእውነተኛ ፌዴራሊዝም ሥርዓት ግንባታ መታገል አለባቸው እንጂ፣ ጥቂቶች ብዙኃንን እንደፈለጉ የሚጋልቡበት ከፋፋይ ሥርዓት እንዲመሠረት መፍቀድ አይገባቸውም፡፡ ኢትዮጵያ መመራት ያለባት በዕውቀት፣ በሥነ ምግባርና በአገር ፍቅር ስሜት እንጂ ጥራዝ ነጠቅነትና ስግብግብነት በተፀናወተው ጉልበተኝነት እንዳልሆነ ማረጋገጥ ይገባል፡፡ ይህ ድርጊት ነው ለውጭ ተፅዕኖ የሚያጋልጠው፡፡

ለኢትዮጵያ ሰላም ሲባል ማንኛውም ዓይነት መስዋዕትነት መከፈል አለበት፡፡ ይህ መስዋዕትነት የሚጠበቀው አገራቸውንና ሕዝባቸውን ከልባቸው ከሚወዱ ኢትዮጵያዊያን ነው፡፡ ጦረኝነትና ጀብደኝነት የተፀናወታቸውና ለዘመኑ የዕድገት ደረጃ የማይመጥን ያረጀና ያፈጀ አስተሳሰብ አራማጆች፣ የአገር ፍቅር ስሜት ጨርሶ የነጠፈባቸው ራስ ወዳዶችና ጽንፈኞች በሕግ መባል አለባቸው፡፡ ለሕዝብ አለማሰብና ለራስ ብቻ መጨነቅ ወንጀል ነው፡፡ የኢትዮጵያ ሕዝብ ሰላም፣ ነፃነት፣ ዕድገትና ፍትሕ ያለበት ሥርዓት ነው የሚያስፈልገው እንጂ፣ ለጥቂቶች ፍላጎት ሲባል ብቻ ተገዶ የጦርነት ማገዶ መሆን የለበትም፡፡ ይህ ወሳኝ ወቅት ለሕዝብ የሚያስቡና በሕዝብ ላይ የሚቆምሩ የሚለዩበት ስለሆነ፣ ለሕዝብ ጠቃሚ ተግባር በማከናወን ቢያንስ በታሪክ መዝገብ ላይ ጥቂት ሥፍራ ማግኘት ቀላል አይደለም፡፡ ለሕዝብ ሰላምና ደኅንነት የማይጨነቅ ዓላማ ይዞ ሕዝባዊ ነኝ ማለት በፍፁም አይቻልም፡፡ ከዚህ ቀደም ሕዝባዊ ነን እየተባለ በሕዝብ ላይ የተፈጸሙ አሰቃቂ ድርጊቶች ብዙዎችን ሕይወታቸውን አስገብረዋል፣ ለእስር፣ ለሥቃይና ለስደት ዳርገዋል፡፡ በተጨማሪም ለከፍተኛ ሥነ ልቦናዊ ጉዳቶች አጋልጠዋል፡፡ ኢትዮጵያንም የግጭትና የትርምስ አገር አድርገዋት፣ ለውጭ ኃይሎች ጣልቃ ገብነት ምክንያት ሆነዋል፡፡

ኢትዮጵያንና ሕዝቧን ማዕከል ያላደረጉ በርካታ ሐሰተኛ ወሬዎች በየቀኑ እየተፈበረኩ ይለቀቃሉ፡፡ እነዚህ ወሬዎች በማኅበራዊ የትስስር ገጾች ለሚሊዮኖች ይደርሳሉ፡፡ ሆን ተብለው በተደራጁ ኃይሎች አማካይነት የሚለቀቁት እነዚህ ሐሰተኛ ወሬዎች በተለይ ወጣቱን ዒላማ ያደረጉ ናቸው፡፡ ስሜትን በሚያነሳሱና እውነታን በሚጋርዱ ኃይለ ቃላት ስለሚታጀቡ፣ ወገንን ከመግደል ጀምሮ ንብረት እስከ ማውደም ድረስ ይቀሰቅሳሉ፡፡ ትንሽ እውነት በብዙ ሐሰት ትቀባባና አደባባይ ስትደርስ ብዙዎች እየገነፈሉ ለፀፀት የሚዳርግ ድርጊት ይፈጽማሉ፡፡ ብሔርና ሃይማኖት በቀላሉ የሚያነሳሱ ስለሆኑም ሁሉንም ጉዳይ ማስተሳሰር ተለምዷል፡፡ አንድ ችግር አጋጥሞ የሰው ሕይወት ሲያልፍ የሚታዘነው በሰብዓዊ ፍጡርነት መሆኑ ቀርቶ፣ በብሔር ወይም በእምነት አሠላለፍ ሲሆን የሚስተዋለው በዚህ ምክንያት ነው፡፡ በወንጀል የተጠረጠረ ሰው በቁጥጥር ሥር የመዋሉ ዜና ሲሰማ ከየጎራው የሚያላዝኑ ድምፆች የሚሰሙት፣ ለፍትሕ ሳይሆን ለምን የእኔ ሰው ተነካ በሚል ተልካሻ ሰበብ ነው፡፡ ስለሞራላዊና ሥነ ምግባራዊ እሴት ሳይሆን የእኔ ከሆነ ለምን እንዳሻው አይሆንም በሚል ግብዝነት ነው፡፡ ሹመትና ሹምሽር የብሔርና የሃይማኖት ሰሌዳ እየተለጠፈላቸው ዕውቀት፣ ብቃትና ክህሎት ዋጋ ቢስ ተደርገዋል፡፡ መናኛ ቅራኔዎች አድገው ነው ለውጭ ኃይሎች ተጋላጭነት መዳረግ የተከተለው፡፡

በመንግሥትም ሆነ በሌሎች አካላት ዘንድ ከሚስተዋሉ አጉል ልምዶች መካከል አንዱ፣ ለአስመሳዮችና ለአጭበርባሪዎች መደላድል መፍጠር ነው፡፡ በመኖሪያ፣ በሥራ፣ በትምህርት፣ በእምነት፣ በንግድና በመሳሰሉት ሥፍራዎች በርካታ አስመሳዮችና አጭበርባሪዎች እንደ ልባቸው እየሆኑ ነው፡፡ በኃላፊነት መንፈስ የተሰጣቸውን ተልዕኮ በአግባቡ የሚወጡ ቅኖች እየተረገጡ፣ በአስመሳይነትና በአጭበርባሪነት የተካኑት ደግሞ ከሥልጣኑም ሆነ ከጥቅማ ጥቅሙ የድርሻቸውን ያነሳሉ፡፡ የተለያዩ የዕውቅና ሥነ ሥርዓቶች ሲዘጋጁ አገራቸውን በትምህርት፣ በጤና፣ በግብርና፣ በውትድርና፣ በንግድና በመሳሰሉት በቅንነት ያገለገሉ ዜጎች እየተረሱ እዚህ ግባ የማይባሉት የሠሩትም ያልሠሩትም እየተደመረ ይወደሳሉ፡፡ ከወገናቸው ላይ አንዲት እላፊ ሳንቲም ሳይሰርቁ በንፅህና ያገለገሉ በሐሰት እየተወነጀሉ፣ በገሃድ አገርን የሚዘርፉ እንደ ጀግና አቀባበል ይደረግላቸዋል፡፡ እውነተኛ ታሪክ ጽፈው ትውልድ የሚያንፁ ወደ ጎን እየተገፉ፣ በሐሰተኛ ትርክቶች ማጅራታቸውን ያሳበጡ ይንቆለጳጰሳሉ፡፡ አስመሳይነትና አጭበርባሪነት ብሔርና እምነት ጉያ ውስጥ እየተወሸቀ ሲሞካሽ፣ ሀቀኝነት ግን በግትርነት አስፈርጆ ‹‹አይበላ አያስበላ›› የሚል ሰሌዳ ተለጥፎለት የኋላቀርነት ተምሳሌት ተደርጓል፡፡ ሕገወጥነት ሲነግሥ የሚገኘው ትርፍ ይህ ነው፡፡ የሞራልና የሥነ ምግባር ዝቅጠት ሲስፋፋ አገር ለውጭ ኃይሎች ተንበርካኪነት ትመቻቻለች፡፡

የኢትዮጵያ ፖለቲካ የቂመኞችና የባላንጣዎች ሒሳብ ማወራረጃ ሆኖ የዘለቀው፣ ለሕዝብ ነፃ ፈቃድና ይሁንታ ሥፍራ ስላልነበረው ነው፡፡ ለውይይትና ለድርድር ባዕድ የነበረው የፖለቲካ ምኅዳር ምሁር ጠል፣ ለመካሪና ለዘካሪ ያስቸገረ፣ ለማኅበረሰቦች ተሳትፎ ቦታ ያልነበረው፣ የአስመሳዮችና የአድርባዮች መፈልፈያና ራዕይ አልባ ነበር፡፡ ክፋት፣ ሴራ፣ አሻጥርና ኋላቀርነት የተፀናወቱት ከመሆኑም በላይ አርቆ አስተዋይነት ያልፈጠረባቸው ደካሞችና ሰነፎች ስለሚተውኑበት ለአገር ሰቆቃ እንጂ ብሥራት አልነበረውም፡፡ እርስ በርስ መጋደል፣ መሳደድ፣ ስም መጠፋፋት፣ ወጣቱን ትውልድ መበከልና የአገርን ሚስጥር ለባዕዳን ማቀበል አሳፋሪ ልማዶች የሰፈነበት በመሆኑ፣ ኢትዮጵያና ሕዝቧ ያለ ኃጢያታቸው ፍዳቸውን ዓይተዋል፡፡ ያንን የተሰነካከለ አስተሳሰብና ጎዳና አንለቅም ብለው የሚንገታገቱ ኃይሎች፣ ዛሬም እሱን ሙጭጭ ብለው ነጋ ጠባ ሲያስተጋቡት ይሰማሉ፡፡ እስቲ እንነጋገር፣ እንደራደር፣ የጎደለ ካለ አብረን እንሙላ፣ ወዘተ. መባባል ሲገባ ተመልሶ እዚያው አረንቋ ውስጥ ካልተገኘን ማለት ያሳፍራል፡፡ ከዚያ አሳፋሪ የታሪክ ስብራት ተላቆ በብሔራዊ ጉዳይ ላይ የሐሳብ ልውውጥ በሰፊው መጀመር የግድ ይላል፡፡ በአገር ጉዳይ ላይ መነጋገር ይለመድ፡፡ የውጭ ኃይሎች ጣልቃ ገብነት የሚፈጠረው እርስ በርስ መነጋገር ሳይኖር ሲቀር ነው፡፡ ኢትዮጵያዊያን ሲነጋገሩና ችግሮቻቸውን በራሳቸው መንገድ ሲፈቱና የሐሳብ ልዕልና በጉልበት ላይ የበላይነት ሲያገኝ፣ የውጭ ኃይሎች ጫና እንደማያሳስብ መታወቅ አለበት!

በብዛት የተነበቡ ፅሁፎች

- Advertisment -

ትኩስ ፅሁፎች

“ከሁለት ሳምንት በፊት ወደ ኤርትራ የማደርገውን በረራ እንዳሳድግ ተጠይቄ ነበር” የኢትዮጵያ አየር መንገድ

ኢትዮጵያ አየር መንገድ ወደ ኤርትራ የሚያደርገውን በረራ እንዲያሳድግ የሚጠይቅ...
00:06:46

የኤርትራ አቪዬሽን ባለሥልጣን የኢትዮጵያ አየር መንገድ በረራዎችን ማገዱን አስታወቀ

የኢትዮጵያ ሲቪል አቪዬሽን ባለሥልጣን ጉዳዩን እያጣራሁ ነው ብሏል በኤርትራ ትራንስፖርትና...

[ክቡር ሚኒስትሩ ከተቋሙ የሠራተኞች ማኅበር አመራር ጋር እየተወያዩ ነው]

ጤና ይስጥልኝ ክቡር ሚኒስትር? ሰላም! በአስቸኳይ እንደፈለጉኝ መልዕክት ደርሶኝ ነው የመጣሁት። አዎ።...

የሱዳን ጦርነትና የኢትዮጵያ ሥጋት

የሱዳን ጦርነት ከጀመረ አንድ ዓመት ከአራት ወራት አስቆጠረ፡፡ ጦርነቱ...

ግለሰብ ነጋዴዎችን በአስገዳጅነት የንግድ ምክር ቤት አባል ለማድረግ ያለመው ረቂቅ አዋጅ ተከለሰ

በምትኩ የንግድ ተቋማት በአስገዳጅነት የንግድ ምክር ቤት አባል ይሆናሉ...
spot_img

ተዛማጅ ፅሁፎች

የፖለቲካ ፓርቲዎች ከእንቆቅልሽ ጨዋታ ውስጥ ውጡ!

በወርኃ ሚያዝያ ተካሂዶ የነበረው ውይይት ቀጣይ ነው የተባለው መድረክ፣ ጠቅላይ ሚኒስትሩንና የተፎካካሪ ፓርቲዎችን እንደገና ሰኞ ሐምሌ 15 ቀን 2016 ዓ.ም. አገናኝቶ ነበር፡፡ መንግሥትን የሚመራው...

ለልዩነት ዕውቅና የማይሰጥ ፖለቲካ ፋይዳ ቢስ ነው!

በፍርኃትና በሥጋት የተኮማተረ አገር ለመለወጥም ሆነ ለማደግ ዝግጁ መሆን አይችልም፡፡ አጉል ድፍረትና ምግባረ ብልሹነት በተንሰራፋበት ስለነፃነት መነጋገር አይቻልም፡፡ ፍርኃት እንደ ወረርሽኝ አገር ምድሩን አዳርሶ...

ለሕዝብ መሠረታዊ ፍላጎቶች ልዩ ትኩረት ይሰጥ!

በዚህ ዘመን ለሰው ልጅ የሚያስፈልጉ ነገሮች ብዛታቸው እየጨመረ ቢመጣም፣ በኢትዮጵያ ተጨባጭ ሁኔታ ግን መሠረታዊ የሚባሉ ፍላጎቶች ከመቼውም ጊዜ በላይ ትኩረት ሊቸራቸው ይገባል፡፡ በአሁኗ ኢትዮጵያ...