Wednesday, July 24, 2024

ኢትዮጵያ የመፍትሔ ያለህ ትላለች!

በዚህ ወሳኝ ወቅት በአገር ጉዳይ ላይ መነጋገር ያስፈልጋል፡፡ ውይይቱ ግን ገንቢና ሁሉንም ወገን ማዕከል ሲያደርግ መደማመጥ ይኖራል፡፡ መደማመጥ ሲኖር ልዩነትን ይዞ በጋራ አገራዊ ጉዳዮች ላይ ለመደራደር አዳጋች አይሆንም፡፡ ከዚህ ቀደም መነጋገርና መደማመጥ ባለመቻሉ ምክንያት በርካታ ወርቃማ ዕድሎች አምልጠዋል፡፡ እነዚያ ዕድሎች ባይመክኑ ኖሮ ሞት፣ ሥቃይ፣ እስራትና ስደት የበርካታ ኢትዮጵያውያን ዕጣ ፈንታ አይሆኑም ነበር፡፡ የሕግ የበላይነት እየተደረመሰ አምባገነንነት አይፈነጭም ነበር፡፡ ሰብዓዊና ዴሞክራሲያዊ መብቶች እየተጣሱ ዜጎች በገዛ አገራቸው ባይተዋር አይሆኑም ነበር፡፡ ላባቸውን እያፈሰሱ የሚሠሩ ሚሊዮኖች እየደኸዩ፣ ከዘራፊ ባለሥልጣናት ጋር የተወዳጁ ጥቂት ቅንጡዎች ሚሊየነሮች አይሆኑም ነበር፡፡ ሕገወጥነት በሕጋዊነት ላይ የበላይ መሆን የቻለው የሕግ የበላይነት በመደርመሱ ነው፡፡ ከዚህ መሰሉ የሰቆቃ ታሪክ ውስጥ በመውጣት ኢትዮጵያን የሰላም፣ የነፃነት፣ የዕድገትና የዴሞክራሲ አምባ ማድረግ ይቻላል፡፡ የሚቻለው ግን ለሰላማዊ የሰጥቶ መቀበል መርህ ዕድሉን በማመቻቸት ነው፡፡ ይህንን ማድረግ ከተቻለ ሰላም በምድሪቱ ላይ ይናኛል፡፡ ሰላም እንዲኖር ደግሞ ኢትዮጵያውያን በሙሉ ልዩነቶቻቸውን አክብረው በአንድነት መቆም አለባቸው፡፡ ኢትዮጵያ ከገባችበት አዙሪት ውስጥ እንድትወጣ ፈጣን መፍትሔ ያስፈልጋል፡፡ 

ከሃምሳ ዓመታት በላይ የዘለቀው የሴራ ፖለቲካ መቋጨት አለበት፡፡ ለሥልጣን ተብሎ ደም ማፍሰስም ሆነ፣ የሴራ ፖለቲካ እየጎነጎኑ በኢትዮጵያ ምድር መተማመን እንዳይኖር ማድረግ ሊያበቃ ይገባል፡፡ ኢትዮጵያ ውስጥ የሴራ ፖለቲካ አብቅቶ ለንግግርና ለድርድር አመቺ ሁኔታ መፍጠር ተገቢ ነው፡፡ በሴረኞች ምክንያት ከሚፈጠር ቀውስ ማንም ማትረፍ አይችልም፡፡ አሸናፊም ተሸናፊም አይኖርም፡፡ የቀውሱ ውጤት ግን የሚታየው በሕፃናት፣ በአጥቢና በነፍሰ ጡር እናቶች፣ በአረጋውያን፣ በአቅመ ደካሞችና በቀላሉ ለችግር ተጋላጭ በሆኑ የኅብረተሰብ ክፍሎች ላይ እንደሆነ ከመጠን በላይ ታይቷል፡፡ የኢትዮጵያን ሕዝብ ለዘመናት ከሚጫወቱበት ድህነት፣ ኋላቀርነትና ጉስቁልና ማላቀቅ የዚህ ትውልድ ታሪካዊ ኃላፊነት ሆኖ ሳለ፣ በሰበብ አስባቡ ተያይዞ ለመጥፋት የሚደረገው አጓጉል ድርጊት በፍጥነት መቆም ይኖርበታል፡፡ የኢትዮጵያ ሕዝብ በዚህ ዘመን የሚገባው በክብርና በደስታ መኖር እንጂ፣ ማንም ጀብደኛ እየተነሳ በሚቆሰቁሰው እሳት መሰቃየት አይደለም፡፡ ሕዝብን ለዘመናት ከሚያሰቃዩት ችግሮች ውስጥ ጎትቶ ማውጣት ሲገባ፣ በችግር ላይ ችግር እየደራረቡ መከራውን ማብዛት ኃጢያት ነው፡፡ ለመፍትሔ መረባረብ ያዋጣል፡፡

በዚህ በሠለጠነ ዘመን ልዩነትን የመጠፋፊያና አገር ማፍረሻ ማድረግ ከቶውንም ተገቢ አይደለም፡፡ ገድሎ መፎከርም ሆነ ማስፎከር ለዚህ ዘመን አይመጥንም፡፡ ወንድም ወንድሙን ገድሎ መፎከር ወይም የመገዳደል ትርክትን የአገር ወግ ማድረግ ነውር መሆን አለበት፡፡ የሐሳብ ልዩነትን ለመጠፋፊያ ሳይሆን ለዕውቀት መገብያና ለመረጃ መለዋወጫ ማድረግ ሲቻል፣ በጠላትነትፈራርጆ ከምድረ ገጽ ለመጠፋፋት ጦር መነቅነቅ ሊቆም ይገባዋል፡፡ በምክንያታዊነት ላይ የተመሠረተ የሐሳብ ልውውጥን የአገር ባህል እንደማድረግ፣ አገርን ለጥፋት የሚዳርግ ከንቱ መባዘን መቆም አለበት፡፡ በማናቸውም መስኮች ልዩነት መኖሩ ተፈጥሯዊ ነው፡፡ ልዩነትን በሠለጠነ መንገድ ማስተናገድ ሥልጣኔ ነው፡፡ ልዩነቶችን በመደማመጥና በመከባበር ማስተናገድ ሲቻል የኢትዮጵያ ሕዝብ መከራ ይቀረፋል፡፡ ኢትዮጵያ የጦርነት ቀጣና ሆኖ ዕድገት አይታሰብም፡፡ ጦርነት የአስተዋዩንና የጨዋውን የኢትዮጵያ ሕዝብ ፍላጎት ይፃረራል፡፡ ይህ በሚገባ ግንዛቤ ማግኘት አለበት፡፡ አዲሱን ዓመት ከስህተትና ካላስፈላጊ ድርጊቶች በማንፃት መጀመር የሚጠቅመው፣ የኢትዮጵያ ሕዝብ ከዳር እስከ ዳር የሚናፍቀውን በሰላም፣ በነፃነት፣ በእኩልነትና በፍትሐዊነት የሚኖርበት ሥርዓት ለመገንባት ስለሚያግዝ ነው፡፡ የሕዝቡን መሠረታዊ ፍላጎቶች በማሟላት የተሻለ ሥርዓት ለመገንባት መታገል ይበልጣል፡፡

የኢትዮጵያ ሕዝብ ለዘመናት ከሚዳክርበት የድህነት ማጥ ውስጥ ማውጣት ሲገባ እያፈናቀሉ ማስራብ ነውር ነው፡፡ ሕዝብ ድህነቱ አልበቃ ብሎት ዕልቂት እየተፈጸመበትና እጅግ በሚያሳዝን ጎስቋላ አኗኗር ውስጥ ሆኖ አሳሩን እየበላ፣ ለኑሮ ተስማሚ ባልሆኑ ጎስቋላ ቤቶች ውስጥ እየኖረ፣ መሠረታዊ የምግብ ፍጆታ ማግኘት አቅቶት፣ ይህ አልበቃ ብሎ ለአስቸኳይ የምግብ ዕርዳታ ጥበቃ የተጋለጡ በሚሊዮኖች የሚቆጠሩ የሚላስና የሚቀመስ አጥተው ጦር መማዘዝ ያሳፍራል፡፡ መዳን የሚችሉ በሽታዎች ብዙዎችን ከመግደል አልፈው በተመጣጣኝ ምግብ እጥረት ምክንያት በርካታ ሕፃናት ይሞታሉ፡፡ ንፁህ የመጠጥ ውኃ ባለማግኘት በተላላፊ ወረርሽኞች አሁንም በርካቶች ይሞታሉ፡፡ እንኳንስ ዝናብ ጠፍቶ እያለም በርካቶች ይራባሉ፡፡ እነዚህን እንደ ቋጥኝ የከበዱ ችግሮች ታቅፎ አገርን በጦርነት ማመስ ሊያሳፍር ይገባል፡፡ የኢትዮጵያ ሕዝብ ከእንዲህ ዓይነቱ አሳዛኝና ለፀፀት ከሚዳርግ ሕይወት ውስጥ መውጣት አለበት፡፡ ከድህነት ጎጆዋቸው ተፈናቅለው በዚህ ኃይለኛ ክረምት የትም የወደቁ እናቶችና ሕፃናት እየተራቡ ነው፡፡ አቅመ ደካሞችና አዛውንቶች መከራ ውስጥ ናቸው፡፡

የኢትዮጵያ ልሂቃን በፍጥነት አሁን ያለው ከባድ ሁኔታ የሚለወጥበትን መፍትሔ ማመንጨት ካልቻሉ፣ ካለፈው ዓመት ወደ አዲሱ ዓመት የተሸጋገረው ጦርነት አገር ይፈታል፡፡ ጦርነት እየቆየ ሲሄድ ከሚያደርሰው ሰብዓዊና ቁሳዊ ኪሳራ በተጨማሪ፣ በአገር ላይ ይዞት የሚመጣው ዳፋ በቀላሉ የሚገላገሉት አይሆንም፡፡ ከእርስ በርስ ትንቅንቁ ተሻግሮ የውጭ ኃይሎችን ጣልቃ ገብነት ሊጋብዝ ስለሚችል የመፍትሔ ያለህ መባል አለበት፡፡ ፖለቲከኞች ለገላጋይ ሲያስቸግሩ የቤተ እምነት መሪዎች፣ የአገር ሽማግሌዎች፣ ታዋቂ ግለሰቦችና የአገር ጉዳይ ያገባናል የሚሉ የኅብረተሰብ ክፍሎች ሰላም እንዲሰፍን ኃላፊነታቸውን መወጣት አለባቸው፡፡ ጦርነቱ አድማሱን እያሰፋ የንፁኃንን ሕይወት እየቀጠፈ፣ ንብረታቸውን እያወደመ፣ ከቀዬአቸው እያፈናቀለና በአጠቃላይ የአገር ህልውና አደገኛ ሁኔታ ውስጥ ሲገባ ዝም አይባልም፡፡ ልሂቃን ከገቡበት ችግር ራሳቸውን አላቀው በምክንያታዊነት ላይ የተመሠረተ ንግግርና ድርድር እንዲኖር ማገዝ ካልቻሉ፣ መጪው ጊዜ ከብሩህነት ይልቅ ድቅድቅነት ያይልበታል፡፡ በተለያዩ የሙያ መስኮች ተሠልፈው ተሰሚነት ያተረፉ ወገኖች፣ አገር ከገባችበት አጣብቂኝ ውስጥ እንድትወጣ መንገዱን ማመላከት ይኖርባቸዋል፡፡ ጦርነቱ ከበርካታ ወራት በኋላ መቆም አቅቶት አገርን አደገኛ አዙሪት ውስጥ ሲከት ቆሞ ማየት አይቻልም፡፡

ኢትዮጵያ በርካታ ችግሮች ያሉባት አገር ስለመሆኗ ከማንም የተሰወረ አይደለም፡፡ ከእነዚህ ችግሮች ውስጥ በፍጥነት መውጣት ካልተቻለ ቀውሱ ይባባሳል፡፡ 110 ሚሊዮን በላይ ሕዝብ ያላት ኢትዮጵያ ከፍተኛ የሆነ ሥራ አጥነት ያስጨንቃታል፡፡ የአገር ውስጥና የውጭ ዕዳ ክምችት እንቅልፍ ይነሳታል፡፡ የኑሮ ውድነቱ እየባሰበት የሕዝቡን ሕይወት እያመሰቃቀለ ነው፡፡ በግጭት መፈናቀል ምክንያት ሚሊዮኖች አስቸኳይ ዕርዳታ ይለመንላቸዋል፡፡ በዚህ ላይ ደግሞ አሜሪካ ማዕቀብ የምትጥል ከሆነ ሸክሙ ከባድ ነው፡፡ ሰፊ ለም መሬትና ከፍተኛ የውኃ ሀብት ቢኖርም አሁንም ግብርናው ኋላቀር ነው፡፡ ደካማ የሆነው የአምራች ዘርፍ ከውጭ የሚመጡ የካፒታል ዕቃዎችንና የምግብ ሸቀጣ ሸቀጦችን መተካት አልቻለም፡፡ የአገሪቱ የወጪና የገቢ ንግድ ሚዛን አሁንም ከፍተኛ ጉድለት አለበት፡፡ ሌሎች ተጨማሪ በርካታ ችግሮች አሉ፡፡ እነዚህን ችግሮች ለመፍታት ግን መንግሥትም ሆነ የሚመለከታቸው ባለድርሻ አካላት፣ ለጋራ ራዕይና ዓላማ አንድ ላይ መሠለፍ አለባቸው፡፡ ሠልፉን ለማስተካከል ደግሞ ሰላም ትልቁ መሣሪያ ሊሆን ይገባል፡፡ ሰላም በመጥፋቱ ምክንያት የብዙዎች ተስፋ እየጠወለገ ነው፣ የአገር ኢኮኖሚ እየቆረቆዘ ነው፣ መሠረተ ልማቶች እየወደሙ ነው፡፡ ከሥፍራ ወደ ሥፍራ ተንቀሳቅሶ መሥራት የማይቻልበት ደረጃ ላይ እየተደረሰ ነው፡፡ ከምንም ነገር በላይ ግን የጦርነቱ ወላፈን ውስጥ ያሉ ንፁኃን ክቡር ሕይወት እየረገፈ ነው፡፡ በውጭ ኃይሎች አማካይነት ማዕቀብ የሚጣል ከሆነ ደግሞ ኢኮኖሚው ይፍረከረካል፡፡ ድህነቱ እየተባባሰ የበለጠ ቀውስ ይፈጠራል፡፡ ኢትዮጵያ የመፍትሔ ያለህ እያለች ነው!

በብዛት የተነበቡ ፅሁፎች

- Advertisment -

ትኩስ ፅሁፎች

“ከሁለት ሳምንት በፊት ወደ ኤርትራ የማደርገውን በረራ እንዳሳድግ ተጠይቄ ነበር” የኢትዮጵያ አየር መንገድ

ኢትዮጵያ አየር መንገድ ወደ ኤርትራ የሚያደርገውን በረራ እንዲያሳድግ የሚጠይቅ...
00:06:46

የኤርትራ አቪዬሽን ባለሥልጣን የኢትዮጵያ አየር መንገድ በረራዎችን ማገዱን አስታወቀ

የኢትዮጵያ ሲቪል አቪዬሽን ባለሥልጣን ጉዳዩን እያጣራሁ ነው ብሏል በኤርትራ ትራንስፖርትና...

[ክቡር ሚኒስትሩ ከተቋሙ የሠራተኞች ማኅበር አመራር ጋር እየተወያዩ ነው]

ጤና ይስጥልኝ ክቡር ሚኒስትር? ሰላም! በአስቸኳይ እንደፈለጉኝ መልዕክት ደርሶኝ ነው የመጣሁት። አዎ።...

የሱዳን ጦርነትና የኢትዮጵያ ሥጋት

የሱዳን ጦርነት ከጀመረ አንድ ዓመት ከአራት ወራት አስቆጠረ፡፡ ጦርነቱ...

ግለሰብ ነጋዴዎችን በአስገዳጅነት የንግድ ምክር ቤት አባል ለማድረግ ያለመው ረቂቅ አዋጅ ተከለሰ

በምትኩ የንግድ ተቋማት በአስገዳጅነት የንግድ ምክር ቤት አባል ይሆናሉ...
spot_img

ተዛማጅ ፅሁፎች

የፖለቲካ ፓርቲዎች ከእንቆቅልሽ ጨዋታ ውስጥ ውጡ!

በወርኃ ሚያዝያ ተካሂዶ የነበረው ውይይት ቀጣይ ነው የተባለው መድረክ፣ ጠቅላይ ሚኒስትሩንና የተፎካካሪ ፓርቲዎችን እንደገና ሰኞ ሐምሌ 15 ቀን 2016 ዓ.ም. አገናኝቶ ነበር፡፡ መንግሥትን የሚመራው...

ለልዩነት ዕውቅና የማይሰጥ ፖለቲካ ፋይዳ ቢስ ነው!

በፍርኃትና በሥጋት የተኮማተረ አገር ለመለወጥም ሆነ ለማደግ ዝግጁ መሆን አይችልም፡፡ አጉል ድፍረትና ምግባረ ብልሹነት በተንሰራፋበት ስለነፃነት መነጋገር አይቻልም፡፡ ፍርኃት እንደ ወረርሽኝ አገር ምድሩን አዳርሶ...

ለሕዝብ መሠረታዊ ፍላጎቶች ልዩ ትኩረት ይሰጥ!

በዚህ ዘመን ለሰው ልጅ የሚያስፈልጉ ነገሮች ብዛታቸው እየጨመረ ቢመጣም፣ በኢትዮጵያ ተጨባጭ ሁኔታ ግን መሠረታዊ የሚባሉ ፍላጎቶች ከመቼውም ጊዜ በላይ ትኩረት ሊቸራቸው ይገባል፡፡ በአሁኗ ኢትዮጵያ...