Sunday, May 19, 2024
- Advertisment -
- Advertisment -

​​​​​​​ለኢትዮጵያዊያን የሚበጀው መተባበር እንጂ መፋጀት አይደለም!

ሰሞኑን በኢትዮጵያ ጉብኝት ያደረጉት የአሜሪካ ተራድኦ ድርጅት ኃላፊ ሰማንታ ፓወር ከመንግሥታቸው ተልዕኮ አኳያ፣ በኢትዮጵያ ስላደረጉት ቆይታ የሚያቀርቡት ሪፖርት በቅርቡ ይዘቱ ይታወቃል፡፡ የእሳቸው ሪፖርት በኢትዮጵያና በአሜሪካ የቆየ ግንኙነት ላይ አዲስ ክስተት እንደሚያስከትልም ይታሰባል፡፡ በዚህ መሠረት አሜሪካ በኢትዮጵያ ላይ ልትከተለው የምትችለው ፖሊሲም ምን እንደሚመስል ግልጽ ይሆናል፡፡ እሳቸው ወደ ኢትዮጵያ ከመምጣታቸው በፊት የአገር ጉዳይ የሚያሳስባቸው ኢትዮጵያዊያን፣ የኋላ ታሪካቸውን መነሻ በማድረግ በርካታ ሐሳቦችን ከመለዋወጥ አልፈው ሚዛናዊ የሆነ አቋም እንዲያራምዱ ማሳሰቢያዎችን ሰጥተዋቸዋል፡፡ በሶሪያ፣ በየመን፣ በሊቢያና በመሳሰሉ አገሮች ፈጽመዋቸዋል ከተባሉ አፍራሽ ድርጊቶች እንዲታቀቡም ነግረዋቸዋል፡፡ ቀደም ሲል የቀድሞው የአሜሪካ ፕሬዚዳንት ባራክ ኦባማ መንግሥታቸው በሊቢያ ስለፈጸመው ጣልቃ ገብነትና አፍራሽ ድርጊት በይፋ መፀፀታቸውን ሲገልጹ፣ በወቅቱ ዋና አማካሪያቸው የነበሩት ሰማንታ ፓወር ግን ይህንን ድፍረት አላገኙም፡፡ እሳቸው ራሳቸውን እንደ ሰብዓዊ መብት ተቆርቋሪ ቢቆጥሩም፣ ብዙዎች ግን በአፍራሽ ድርጊታቸው ነው የሚያውቋቸው፡፡ ስለዚህ አገራቸው ሲደርሱ የሚያቀርቡት ሪፖርት ወደፊት የሚታይ ቢሆንም፣ ኢትዮጵያውያን ግን በጋራ ሊጋሩት የሚገባው ቁምነገር መጋደል ሳይሆን አንድነታቸውን በማጠናከር ለአገራቸው ህልውና በጥንካሬ መቆም ነው፡፡ ይህንን ጥንካሬ በፅናት ለማሳየት ደግሞ የመንግሥት አመራር በሳል መሆን ይኖርበታል፡፡ 

የአገር ሰላምና ዕድገት አስተማማኝ የሚሆነው ብልኃትን ከጥንካሬ ጋር ያዋሀደ አመራር ሲኖር ነው፡፡ ይህ ዓይነቱ አመራር ለምንም ዓይነት ችግር ሸብረክ እንዳይል፣ ብልኃትና ጥንካሬው በዕውቀት ላይ የተመሠረተ ሊሆን ይገባዋል፡፡ ዕውቀቱም የሚገኘው በትምህርት፣ በልምድና በሥነ ምግባር የተኮተኮቱ አገር ወዳዶች ጠቃሚ ሐሳባቸውን የሚያካፍሉበት ማዕድ ማግኘት ሲችሉ ነው፡፡ ኢትዮጵያ በዚህ አስቸጋሪ ወቅት ከሚያስፈልጓት መሠረታዊ ነገሮች መካከል አንዱ፣ ከገባችበት ማጥ ውስጥ ጎትተው ሊያወጧት የሚችሉ ልጆቿ ያልተቆጠበ ተሳትፎ ነው፡፡ በፖለቲካ፣ በኢኮኖሚ፣ በሕግ፣ በዲፕሎማሲና በተለያዩ መስኮች አገር ሊያግዙ የሚችሉ ኢትዮጵያዊያን አስተዋጽኦ ያስፈልጋል፡፡ እንደ ከዚህ ቀደሙ ሥልጣንን የዕውቀት ምንጭ ለማድረግ በመሞከር ጠቃሚ አበርክቶ የሚኖራቸውን ወገኖች ማራቅ ያተረፈው ውድቀት ነው፡፡ ኢትዮጵያ በአሜሪካ መራሹ የምዕራብ ኃይል ተወጥራ ባለችበት በዚህ ጊዜ የሚወሰዱ ማናቸውም ዕርምጃዎች ኢትዮጵያዊያንን ሊያግባቡ የሚችሉት፣ በሚገባ የተመከረባቸውና መግባባት ላይ የተደረሰባቸው ሲሆኑ ብቻ እንደሆነ ግንዛቤ ሊኖር ይገባል፡፡ እርግጥ ነው ከብሔራዊ ደኅንነትና ከዘላቂ ጥቅም አኳያ ሁሉም ጉዳዮች አደባባይ ላይ መሰጣት ባይኖርባቸውም፣ መንግሥት ባለበት ኃላፊነት መሠረት አሠራሩን ግልጽ በማድረግ ለኢትዮጵያዊያን ተሳትፎ ዕድሎችን ማመቻቸት ይኖርበታል፡፡

በአገር ውስጥም ሆነ በውጭ አገራቸውን ባላቸው ዕውቀትና ልምድ ለማገልገል ከፍተኛ ፍላጎት ያላቸው ኢትዮጵያውያን ብዙ ናቸው፡፡ እነዚህ ወገኖች ያለ ክፍያ ጭምር ለአገራቸው ለመሥራት ዝግጁነትም እንዳላቸው ይታወቃል፡፡ ይህንን የመሰለ ዕምቅ ሀብት ተሸክሞ ወንዝ በማያሻግር የካድሬ ዲስኩርና ፕሮፓጋንዳ መታለል አያስፈልግም፡፡ ኢትዮጵያ በተለይ በዲፕሎማሲው መስክ የተጎዳችው በርካታ ኤምባሲዎቿ የብሔር፣ የድርጅት፣ የጥቅም ሸሪኮች ማሰማሪያ፣ የውለታ መክፈያ፣ መጦሪያና የመሳሰሉት አሳፋሪ ድርጊቶች መቀለጃ በመሆናቸው ነው፡፡ ዘመኑ ለደረሰበት የዲፕሎማሲና የፖለቲካ ጨዋታ ባዕድ የሆኑ ተሿሚዎች መጫወቻ የሆነው የዲፕሎማሲ መስክ ሪፎርም ይደረግበታል መባሉ መልካም ቢሆንም፣ አሁንም የተለመደው ጎጂ ድርጊት እንደማይቀጥል በተግባር ሊረጋገጥ ይገባል፡፡ በሌሎች በርካታ መስኮችም አገርን ወደፊት ሊያራምዱ የሚችሉ ተግባራት ላይ ማተኮር የግድ መሆን አለበት፡፡ ተቋማትን ነፃና ገለልተኛ አድርጎ ከማደራጀት፣ ብቁ አመራሮችንና ባለሙያዎችን ከመመደብ፣ ሕግና ሥርዓት በማስፈን ግልጽነትና ተጠያቂነትን ከማስፈን አኳያ ትልልቅ ሥራዎችን ማቀድ ተገቢ ነው፡፡ የዘፈቀደ አመራር ለብልሹ አሠራሮች ምክንያት በመሆኑ በርካታ ችግሮች አጋጥመዋል፡፡ ኢትዮጵያ ከማንም ጫና መላቀቅ የምትችለው በሥርዓት ስትመራ ብቻ ነው፡፡

ኢትዮጵያ በበርካታ ውጣ ውረዶች ውስጥ አልፋ እዚህ የደረሰች አገር ናት፡፡ ከኢትዮጵያ ታሪክ የሚያመዝኑት በጦርነት ውስጥ የታለፈባቸው በርካታ ኩነቶች ናቸው፡፡ ከዘመነ መሳፍንት ወዲህ ያለችው ኢትዮጵያ አብዛኛውን ጊዜዋን ያሳለፈችው ወራሪዎችንና ተስፋፊዎችን ስትከላከል ነው፡፡ ለዘመናዊ ሥልጣኔ በር ከፋች ነበር የተባለው የተማከለ መንግሥት ምሥረታም ሆነ የአገረ መንግሥት ግንባታ ጅማሬዎች፣ በውስጥም በውጭም ከፍተኛ መስዋዕትነት የተከፈለባቸው ውጊያዎች ተካሂደውባቸዋል፡፡ ኢትዮጵያን አሁን የያዘችውን ቅርፅ አግኝታ እንደ አገር መቆም የቻለችው፣ እንደ ማንኛውም አገር ግዛትን አካሎ ዳር ድንበርን ለማስከበር በተደረገ ተጋድሎ ነው፡፡ በአሜሪካም፣ በአውሮፓም፣ በእስያም ሆነ በሌላ ሥፍራዎች እንደተከናወነው ሁሉ በኢትዮጵያም የሆነው የአገር ምሥረታ ነው፡፡ ለዚህ ስኬት ደግሞ ኢትዮጵያዊያን ተገቢ የሚባል መስዋዕትነት ከፍለዋል፡፡ ለዘመናት አብረው የኖሩትም በዚህ የጋራ ማንነት ማዕቀፍ ውስጥ ነው፡፡ አንዳንዶች እንደሚነዙት የፈጠራ ታሪክ ወይም ማስረጃ አልባ ትንተና ሳይሆን፣ ኢትዮጵያ እዚህ የደረሰችው በአራቱም ማዕዘናት በሚኖሩ ልጆቿ ተጋድሎና መስዋዕትነት ነው፡፡ አንዱ የሌላው ጨቋኝ ሆኖ ሳይሆን ክፉና ደጉን እኩል በመጋራት ነው፡፡

በተለያዩ መስኮች የተሰማሩ ባለሙያዎችና እያንዳንዱ አገር ወዳድ ዜጋ የአገር ብሔራዊ ደኅንነትና ጥቅም የሚከበረው በአንድነት በመቆም ብቻ እንደሆነ ሊረዱ ይገባል፡፡ አሁን ከአገር ሉዓላዊነት በፊት የሚቀድም ምንም ነገር እንደሌለ በመረዳት፣ ለኢትዮጵያ ደኅንነትና ጥቅም ብቻ ሙሉ ጊዜያቸውን መሰዋት ይጠበቅባቸዋል፡፡ ኢትዮጵያ ከድህነት ካልወጣች ማንም አያከብራትም፡፡ በዓለም አደባባይ ተደማጭነት የሚገኘው በተባበረ ክንድ ከድህነት በመውጣት ብቻ ነው፡፡ ውስጣዊ ችግሮችን በሰላማዊና በዴሞክራሲያዊ መንገድ በመፍታት፣ ለታላቁ ህዳሴ ግድብ ግንባታ በስኬት መጠናቀቅ መረባረብ የግድ ነው፡፡ የህዳሴ ግድቡ ግንባታ በግብፅ ተንኮል ተደናቀፈ ማለት ለኢትዮጵያዊያን ውርደት ነው፡፡ ግብፅ የኢትዮጵያ ውስጣዊ ሰላም የምትነሳው አሜሪካን ከጎኗ በማሠለፍ ጫና የምትፈጥረው ግድቡ እንዳይጠናቀቅ ለማድረግ ነው፡፡ የኢትዮጵያን አንገት በማስደፋት በአካባቢው ብቸኛ ኃይል በመሆን ለማንበርከክ ነው፡፡ ኢትዮጵያዊያን ደግሞ እንዲህ ያለውን ውርደት የማቀበሉ መሆናቸውን ማሳየት የሚችሉት፣ ውስጣዊ ችግሮቻቸውን በሰላማዊ መንገድ መልክ አስይዘው ሲተባበሩ ብቻ ነው፡፡ የኢትዮጵያ ሉዓላዊነት በማንም እንደማይገሰስ ለዓለም ማሳየት አለባቸው፡፡

ኢትዮጵያ በታሪኳ በርካታ ችግሮች አሳልፋለች፡፡ በእነዚህ ችግሮች ምክንያትም የተለያዩ ትውልዶች ከሚገባው በላይ ተሰቃይተዋል፡፡ በዘመነ ፊውዳሊዝም አብዛኛው ሕዝብ በገዛ አገሩ ገባር ነበር፡፡ ‹መሬት ላራሹ› የሚባለውን ዝነኛ መፈክር አንግቦ ለማኅበራዊ ፍትሕ የተነሳው ትውልድ፣ በየካቲት 1966 ዓ.ም. አብዮት ንጉሣዊ ሥርዓቱን ከሥር መሠረቱ ፈንቅሎ ቢገረስሰውም፣ አብዮቱ እስከ አፍንጫው ድረስ በታጠቀ ወታደራዊ ኃይል ተቀለበሰ፡፡ የዘመኑ ትውልድ ከታጠቀው ኃይል ጋር ግብግብ ገጥሞ አገሪቱ በደም ታጠበች፡፡ ወታደራዊውን ሥርዓት ለመፋለም በረሃ የገባው ኃይል ከ17 ዓመታት የነፍጥ ትግል በኋላ ሥልጣነ መንበሩን ቢቆጣጠርም፣ ነፃ አውጭነቱ ወደ አምባገነንት ተቀይሮ ለ27 ዓመታት በሕዝብ ላይ ባደረሰው ከፍተኛ መከራ ምክንያት በሕዝባዊ ቁጣ በሌላ አስተዳደር ተተክቷል፡፡ በገዥነት የቆየው ኢሕአዴግ የሚባል ግንባር ከስሞ ታሪክ ሆኗል፡፡ በዚህ ምድር ላይ ምንም ቋሚ ነገር እንደሌለ አልገባ የሚላቸው ግን፣ ዛሬም ያንን መሰል ሥርዓት መልሶ ሕዝብ ላይ ለመጫን የባጥ የቆጡን ሲቀባጥሩ ይሰማሉ፡፡ ለዚህ ዓላማቸው መሳካትም ግጭት በመቀስቀስ አገሪቱን ለማፍረስ እያሴሩ፣ የውጭ ጣልቃ ገብነትን በመጋበዝ ውጥረት ይፈጥራሉ፡፡ አገራቸውን የሚወዱ ኢትዮጵያውያን ግን በዚህ ጊዜ ያላቸው አማራጭ እርስ በርስ መፋጀት ሳይሆን መተባበር ብቻ ነው፡፡

በብዛት የተነበቡ ፅሁፎች

- Advertisment -

ትኩስ ፅሁፎች

በሥጋ ላይ አላግባብ እየተጨመረ ያለውን ዋጋ መንግሥት ሊቆጣጠረው ይገባል

በአገራችን የግብይት ሥርዓት ውስጥ ኢኮኖሚያዊ ያልሆኑ ወይም ያልተገቡ የዋጋ...

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት...

የፖለቲካ ቅኝቱ የሕዝባችንን ታሪካዊ ትስስር ለምን አያከብርም?

በንጉሥ ወዳጅነው የዓብይ አህመድ (ዶ/ር) መራሹ የ2010 ዓ.ም. የለውጥ መንግሥት...

ዛሬም ኧረ በሕግ!

በገነት ዓለሙ በዚህ በያዝነው ሚያዝያ/ግንቦት ወይም ሜይ ወር ውስጥ የተከበረው፣...

በስድስተኛው ዙር ጠቅላላና ድጋሚ ምርጫ የሚሳተፉ ፓርቲዎች በገዥው ፓርቲ ላይ ተቃውሞ እያቀረቡ ነው

በ2013 ዓ.ም. ስድስተኛው ምርጫ ባልተካሄደባቸው ክልሎች በጠቅላላና በድጋሚ ምርጫ...
spot_img

ተዛማጅ ፅሁፎች

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት ብትችል፣ ከበርካታ ታዳጊ አገሮች የተሻለ በዕድገት ጎዳና የመገስገስ እምቅ አቅም እንዳላት የሚያጠራጥር አይደለም፡፡ ይህንን የመሰለ...

የመግባቢያ አማራጮችን ተባብሮ መፈለግ ከጥፋት ይታደጋል!

በአሁኑ ጊዜ ሕዝብና አገርን ጤና የሚነሱ በርካታ ችግሮች በየቦታው እንደ አሸን ፈልተዋል፡፡ ችግሮቹ ከመጠን በላይ እየተለጠጡ ቅራኔዎች ሲበረክቱ ሰከን ብሎ ከመነጋገር ይልቅ፣ የጉልበት አማራጭ...

አገርን ከቀውስ ውስጥ ማውጣት ብሔራዊ አጀንዳ ይሁን!

የአገራቸው መፃኢ ዕድል የሚያሳስባቸው በአገር ውስጥም ሆነ በውጭ የሚኖሩ ወገኖች፣ በየቀኑ የሚሰሟቸው ማቆሚያ ያጡ ልብ ሰባሪ የግጭትና የጦርነት ዜናዎች እንቅልፍ ይነሷቸዋል፡፡ በዚህም ምክንያት ማንኛውም...