Monday, May 20, 2024
- Advertisment -
- Advertisment -

የግብፅን ሴራ ለማክሸፍ ትግሉ ተጠናክሮ ይቀጥል!

ኢትዮጵያ እየገጠሟት ካሉ ፈተናዎች መካካል በታላቁ የህዳሴ ግድብ ምክንያት እየደረሰባት ያለው ጫና፣ የአንበሳውን ድርሻ ይወስዳል ቢባል ማጋነን አይሆንም፡፡ ብዙዎች እንደሚስማሙበት የኢትዮጵያን እጅ በመጠምዘዝ ሸብረክ እንድትል ለማድረግ የተለያዩ ውስጣዊ ችግሮች ቢራገቡም፣ የታላቁ ህዳሴ ግድብ ለመጠናቀቅ መቃረብ በውስጥ ጉዳይዋ ጣልቃ መግባትን መጋበዙ ግልጽ ከሆነ ሰነባብቷል፡፡ ምንም እንኳ የግድቡ ውኃ ሙሌትም ሆነ የኤሌክትሪክ ኃይል ማመንጨት ለኢትዮጵያ ብቻ ሳይሆን ለግብፅና ለሱዳን ጠቀሜታ እንዳለው በተደጋጋሚ ቢገለጽም፣ በተለይ ግብፅ ከእውነታው በማፈንገጥ በማሴር ላይ ያለችው በዓባይ ውኃ በፍትሐዊ መንገድ የመጠቀም መብትን ለማሰናከል ነው፡፡ ግድቡ በአካባቢው አለኝ የምትለውን የበላይነት እንደሚያሳጣት ስለምታምን፣ እሷ በምትፈልገው መንገድ ግስጋሴው እንዲገታና የኢትዮጵያን የመልማት መብት ለማዳፈን ነው፡፡ ሱዳን ግድቡ የሚሰጣትን ጥቅም በሚገባ የምታውቀው ቢሆንም፣ ውስጣዊ ፖለቲካዋ በተለያዩ ፍላጎቶች ተቀፍድዶ የግብፅ ጉዳይ ፈጻሚ በመሆን ያልተገባ ድርጊት ውስጥ ገብታለች፡፡ ሰሞኑን የተባበሩት መንግሥታት ድርጅት (ተመድ) የፀጥታው ምክር ቤት የግድቡ ውዝግብ በግፍ ቢቀርብለትም፣ በአፍሪካ ኅብረት ጥላ ሥር ሦስቱ አገሮች ድርድሩን እንዲቀጥሉ በመሰወኑ ለጊዜው ለኢትዮጵያ ዕፎይታ ሰጥቷል፡፡ ነገር ግን አሁንም መዘናጋት አያስፈልግም፡፡ ግብፅ አሜሪካና የአውሮፓ አገሮች በውስጥ ጉዳያችን በቀጥታ ጣልቃ እንዲገቡና ጫናቸውን እንዲቀጥሉ ታሴራለች፡፡ ለዚህ ሴራ መክሸፍ ትግሉን አጠናክሮ መቀጠል የግድ ነው፡፡

ምዕራባውያን የእኛ የሰብዓዊ መብት መጠበቅና በክብር የመኖር ጉዳይ አሳስቧቸው ሳይሆን፣ ለጥቅማቸው የተሻለ የሚሉትን መርጠው በመንቀሳቀስ የፈለጉትን ጫና ከማሳደር እንደማይመለሱ በመረዳት ራስን ማዘጋጀት ተገቢ ነው፡፡ መንግሥት ኢትዮጵያ ያላትን እውነታ ለዓለም አቀፍ ማኅበረሰቡ ማስረዳትና አዎንታዊ ምላሽ ለማግኘት መልፋት ቢኖርበትም፣ የግብፅን የቁማር ፖለቲካ እግር በእግር በመከታተል እንደ ሰሞኑ ማክሸፍ ይጠበቅበታል፡፡ የአሜሪካም ሆነ የአውሮፓውያኑ የዲፕሎማሲ መርህ ዘላቂ ጥቅማቸውን በማረጋገጥ ላይ የተመሠረተ በመሆኑ፣ ከእነሱ ጥቅም በተቃራኒ የቆመ እውነት ለእነሱ ፋይዳ እንደሌለው በመገንዘብ በግልጽ ምን እንደሚፈልጉ ማወቅ ይገባል፡፡ በተመድም ሆነ በሌሎች አኅጉራዊና ዓለም አቀፋዊ ተቋማት የተከለከለው በአገሮች የውስጥ ጉዳይ ጣልቃ በመግባት የመፈትፈት ፍላጎት አግጦ ሲወጣ፣ እንዲሁም ነገ ተነገ ወዲያ በኢትዮጵያ የምንፈልገው መንግሥት እንዲህ ዓይነት እንዲሆን ነው ተብሎ ለመንገር ዳር ዳር ሲባልና በአጠቃላይ ከዚህ በፊት ከሚታወቁ አላስፈላጊ ባህርያት የገዘፉ ግፊቶችን ለመፍጠር ማስፈራራት ሲጀመር ግራ መጋባት አያስፈልግም፡፡ የምዕራባውያኑ ዓይን ያወጣ የዲፕሎማሲና የኢኮኖሚ ጫና አንድም ገጽታው ተለውጦ መግባባት እንዲፈጠር፣ ካልሆነ ደግሞ ቁርጡ ታውቆ ሌሎች አዋጭ አማራጮች እንዲታዩ ያለ እረፍት አስፈላጊው ጥረት መደረግ ይኖርበታል፡፡ አሁን ባለው ሁኔታ ግን ለማመን የሚያስቸግሩ ጫናዎችን እያስተናገዱ፣ ቆይ እስቲ በማለት ጊዜ ማባከን ተገቢ አይሆንም፡፡ ሰሞኑን በተመድ የፀጥታው ምክር ቤት እንደታየው ቁርጠኛ ሆኖ ባላጋራን መጋፈጥ ያዋጣል፡፡

ግብፅ መሰንበቻውን ሱዳንን ጋሻ ጃግሬ በማድረግ አሜሪካ መራሹን የምዕራባውያን ድጋፍ ተማምና አደባባይ ብትወጣም፣ ኢትዮጵያ እውነት ይዛ በመገኘቷ ብቻ ሳይሆን የግብፅን ጥቃት በብቃት መመከት መቻሏ የሚያኮራ ነው፡፡ የምዕራባውያን የዘመናት የተሳሳተ የውጭ ፖሊሲ በዓለም ዙሪያ ያደረሰውን ጥፋት እያየንና ከመቼውም ጊዜ በላይ የምዕራቡ ዓለም ሚዲያ ሥነ ምግባር የጎደለውን አድሎአዊነት እየታዘብን፣ የጥፋት ሒሳብ ማወራረጃ ሁኑ ሲባል እጅን አጣጥፎ መቀመጥ ተገቢ አይሆንም፡፡ ከኢትዮጵያዊነት የጀግንነትና የአትንኩኝ ባይነት ዘመን ተሻጋሪ እሴቶች አኳያም፣ ይህ ግልጽ የሆነ የወራሪነትና የተስፋፊነት ፍላጎት መሆኑንም መዘንጋት አይገባም፡፡ አሜሪካም ብትሆን የመካከለኛው ምሥራቅ ተላላኪዋ ለሆነችው ግብፅ ፍላጎት መሳካት ስትል በኢትዮጵያ የውስጥ ጉዳይ ዘው ስትል፣ ኢትዮጵያውያን ደግሞ በአንድነት በመቆም ኢፍትሐዊ ዕርምጃዋን እንድታስተካክል ተባብረው መጠየቅና መግታት ይጠበቅባቸዋል፡፡ የአሜሪካ ኢፍትሐዊነት በኢትዮጵያ ላይ እንደማይሠራና በዚህም ምክንያት ከ120 ዓመታት በላይ የዘለቀው ወዳጅነት እንዳይበላሽ ማሳሰብም ያስፈልጋል፡፡ አፍሪካውያን ‹‹ለአፍሪካዊ ችግሮች አፍሪካዊ መፍትሔ›› በሚሉበት በዚህ ዘመን ኢትዮጵያን ማሳዘን፣ የጊዜ ጉዳይ ይሆናል እንጂ አሜሪካ ከመላው አፍሪካ ጋር ጠብ ውስጥ እንደምትገባም ማስረዳት ይገባል፡፡

አገር ወዳድ ኢትዮጵያውያን መቼም ሆነ የትም በአገራቸው ሉዓላዊነት ላይ ተደራድረው አያውቁም፡፡ የሚለያዩባቸው በርካታ ጉዳዮች ቢኖሯቸው እንኳ፣ በአገር ሉዓላዊነት ላይ ግን መቼም ቢሆን የተለያዩ አቋሞችን አያራምዱም፡፡ የውስጥ ጉዳያቸው ተካሮ ወደ ግጭት ቢያመራም፣ የአገር ሉዓላዊነትን የሚደፍር የውጭ ጠላት ሲነሳ ግን በአንድነት ለመቆም ተወዳዳሪ የላቸውም፡፡ በታሪክ የሚታወቁትም ለአገራቸው ባላቸው ወሰን የሌለው ጥልቅ ፍቅር ነው፡፡ በጊዜያዊ ጠብ ሲኮራረፉ እንኳ ወሳኙ ጊዜ ሲመጣ ስምምነት ፈጥረው አንድ ላይ እንደሚቆሙ ታሪክ ህያው ምስክር ነው፡፡ ኢትዮጵያውያን በአገር ሉዓላዊነት ቀልድ የለም ሲሉ መልዕክቱ ግልጽ ነው፡፡ ለእነሱ የኢትዮጵያ ሉዓላዊነት ማለት ብሔራዊ ጥቅም፣ ደኅንነት፣ ነፃነት፣ መብትና ክብር ማለት ነው፡፡ በኢትዮጵያ ሉዓላዊነት ማንም ጣልቃ መግባትም ሆነ መወሰን አይችልም፡፡ ኢትዮጵያውያን ከታላቁ የዓድዋ የጀግንነት ድል ታሪክ የቀሰሙት፣ ሉዓላዊነትን በአንድነት ቆሞ ማስከበር ነው፡፡  ኢትዮጵያውያን በገዛ ጉልበታቸውና ገንዘባቸው ያለ ማንም አጋዥ በሚገነቡት ታላቁ የህዳሴ ግድባቸው ላይ የተስተዋለው ጣልቃ ገብነት፣ መቼም ቢሆን የማይታገሱትና የማይደራደሩበት እንደሆነ በግልጽ አቋማቸውን እየገለጹ ነው፡፡ በሉዓላዊነት ቀልድ የለምና፡፡

በታላቁ ህዳሴ ግድብ ግንባታ ምክንያት ኢትዮጵያ በግብፅ የደረሰባት የዘመኑ ፈተና ብቻ ሳይሆን፣ ከግንባታው በፊት በነበሩ የተለያዩ መንግሥታት ወቅት ከፍተኛ በደሎች ተፈጽመውባታል፡፡ በኢትዮጵያ በኩል የነበረው ችግር እንደ ግብፅ ፈጣን አለመሆን ነው፡፡ የግድቡ ግንባታ ሲበሰር የነበረው የሕዝቡ የዘመናት የቁጭት ስሜት መቼም አይረሳም፡፡ ግድቡ የኢትዮጵያዊያን ብሔራዊ ፕሮጀክት እንደሆነ የጋራ መግባባት በመፈጠሩ፣ በውጭ በተቃውሞ የነበሩ ኃይሎች ሳይቀሩ ከፍተኛ ድጋፍ እያደረጉ ከመሆናቸውም በላይ፣ ግድቡን እንደ ብሔራዊ ምልክታቸውና የማንነት ዓርማቸው ነው የሚቆጥሩት፡፡ ይህንን ብሔራዊ ፕሮጀክት ዳር ለማድረስ በጠንካራ መሠረት ላይ መቆም ያስፈልጋል፡፡ በሳልና ጠንካራ ዲፕሎማቶች፣ የተካኑ የውኃና የጂኦ ፖለቲካ ባለሙያዎች፣ አሉ የተባሉ የሕግ ባለሙያዎችና ሊጠቅሙ የሚችሉ በተለያዩ ዘርፎች የተሰማሩ ልሂቃንን አሁንም ለዚህ ዓላማ ተግቶ ማሠለፍ በእጅጉ አስፈላጊ ነው፡፡ ግብፅ አንዱ አልሳካ ሲላት ሌላ ግንባር እየፈጠረች በገዛ ራሷ ዛቢያ ውስጥ ስታሽከረክረን የምትጎዳው ኢትዮጵያ ናት፡፡ በዓለም አቀፍ ሕግና በሞራላዊ አስተሳሰብ ብቻ ስንተማመን፣ ራሳችንን ከመቼውም ጊዜ በላይ ከተለያዩ ጫናዎች የማላቀቅ ኃላፊነት እንዳለብን መገንዘብ አለብን፡፡ ሰሞኑን በተመድ የፀጥታው ምክር ቤት የታየው የኢትዮጵያ ብቃት ተጠናክሮ ይቀጥል፡፡

ኢትዮጵያዊያን የአገር ብሔራዊ ደኅንነትና ጥቅም የሚከበረው በአንድነት በመቆም ብቻ መሆኑን ሊረዱ ይገባል፡፡ ከአገር ሉዓላዊነት በፊት የሚቀድም ምንም ነገር እንደሌለ በመረዳት፣ ለኢትዮጵያ ደኅንነትና ጥቅም ሙሉ ጊዜያቸውን መሰዋት ይጠበቅባቸዋል፡፡ ኢትዮጵያ ከድህነት ካልወጣች ማንም አያከብራትም፡፡ በዓለም አደባባይ ተደማጭነት የሚገኘው በተባበረ ክንድ ከድህነት በመውጣት ብቻ ነው፡፡ ውስጣዊ ችግሮችን በሰላማዊና በዴሞክራሲያዊ መንገድ በመፍታት፣ ለታላቁ ህዳሴ ግድብ ግንባታ በስኬት መጠናቀቅ መረባረብ የግድ ነው፡፡ ግብፅ አሜሪካን ከጎኗ በማሠለፍ ጫና የምትፈጥረው ግድቡ እንዳይጠናቀቅ ለማድረግ ነው፡፡ የኢትዮጵያን አንገት በማስደፋት በአካባቢው ብቸኛ ኃይል በመሆን ለማንበርከክ ነው፡፡ ኢትዮጵያዊያን ደግሞ እንዲህ ያለውን ውርደት የማይቀበሉ መሆናቸውን በግልጽ ማሳየት የሚቻለው፣ ውስጣዊ ችግሮችን በሰላማዊ መንገድ መልክ አስይዘው ሲተባበሩ ብቻ ነው፡፡ የሰሞኑ ጠንካራ አንድነትና የአገር ፍቅር ስሜት ግለቱ ይቀጥል፡፡ የግብፅና የደጋፊዎቿን ሴራ ለማክሸፍ ትግሉ ተጠናክሮ ይቀጥል!

በብዛት የተነበቡ ፅሁፎች

- Advertisment -

ትኩስ ፅሁፎች

በሥጋ ላይ አላግባብ እየተጨመረ ያለውን ዋጋ መንግሥት ሊቆጣጠረው ይገባል

በአገራችን የግብይት ሥርዓት ውስጥ ኢኮኖሚያዊ ያልሆኑ ወይም ያልተገቡ የዋጋ...

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት...

የፖለቲካ ቅኝቱ የሕዝባችንን ታሪካዊ ትስስር ለምን አያከብርም?

በንጉሥ ወዳጅነው የዓብይ አህመድ (ዶ/ር) መራሹ የ2010 ዓ.ም. የለውጥ መንግሥት...

ዛሬም ኧረ በሕግ!

በገነት ዓለሙ በዚህ በያዝነው ሚያዝያ/ግንቦት ወይም ሜይ ወር ውስጥ የተከበረው፣...

በስድስተኛው ዙር ጠቅላላና ድጋሚ ምርጫ የሚሳተፉ ፓርቲዎች በገዥው ፓርቲ ላይ ተቃውሞ እያቀረቡ ነው

በ2013 ዓ.ም. ስድስተኛው ምርጫ ባልተካሄደባቸው ክልሎች በጠቅላላና በድጋሚ ምርጫ...
spot_img

ተዛማጅ ፅሁፎች

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት ብትችል፣ ከበርካታ ታዳጊ አገሮች የተሻለ በዕድገት ጎዳና የመገስገስ እምቅ አቅም እንዳላት የሚያጠራጥር አይደለም፡፡ ይህንን የመሰለ...

የመግባቢያ አማራጮችን ተባብሮ መፈለግ ከጥፋት ይታደጋል!

በአሁኑ ጊዜ ሕዝብና አገርን ጤና የሚነሱ በርካታ ችግሮች በየቦታው እንደ አሸን ፈልተዋል፡፡ ችግሮቹ ከመጠን በላይ እየተለጠጡ ቅራኔዎች ሲበረክቱ ሰከን ብሎ ከመነጋገር ይልቅ፣ የጉልበት አማራጭ...

አገርን ከቀውስ ውስጥ ማውጣት ብሔራዊ አጀንዳ ይሁን!

የአገራቸው መፃኢ ዕድል የሚያሳስባቸው በአገር ውስጥም ሆነ በውጭ የሚኖሩ ወገኖች፣ በየቀኑ የሚሰሟቸው ማቆሚያ ያጡ ልብ ሰባሪ የግጭትና የጦርነት ዜናዎች እንቅልፍ ይነሷቸዋል፡፡ በዚህም ምክንያት ማንኛውም...