Friday, May 24, 2024
- Advertisement -
- Advertisement -

የተመረጡ ፅሑፎች

ነገር ብናበርድስ!

ሰላም! ሰላም! ባሻዬ ሬዲዮናቸውን ይዘውቢያቸውን አጣፍተው ይለፈልፋሉ። ብርዱ ነው ወይስ የሰሞኑ ጉድ እንዳትሉኝ። ምን የማያስለፈልፈን ነገር አለ? ዘንድሮ ሁሉም ለፍላፊ ሆነና አዳማጭ ጠፋ እንጂ። እና ጠጋ ብዬ ሳዳምጣቸው፣አንድ ቋንቋ አላግባባን ብሎ እየተደነቋቆርን ጭራሽ አዲስ ቋንቋ?” ይላሉ።ለግዕዝ ቋንቋ ትኩረት አልተሰጠምየሚል ፕሮግራም ሥራዬ ብለው እያዳመጡ። ቋንቋው ቀርቶ ዜጋው ትኩረት የተሰጠው ይመስል፣ አሁን እስኪ በዚህ ሰዓት ይኼ ይወራል? ማለቴ ሰሚ ያለ ይመስል ለማለት ነው። እና ጠጋ ብዬ፣ባሻዬ ምናለበት ቢተውት? ይልቅ ስለሰሞኑ ጉድ ምን አስበዋል?” ብዬ ወሬ ጀመርኩ። እሳቸው ግን የሰሙኝ አይመስሉም።ሰማህ? ስማ! ስማ! ጀርመን እስከ ማስተርስ ድረስ የግዕዝ ቋንቋን እንደምታስተምር ታውቅ ነበር? ስማ! ስማ! ሰማህ? ለካ ጀርመኖች የደረሱበት የሕክምና ጥበብ በሙሉ የተገለበጠው በግዕዝ የተጻፉ ድርሳናትን መርምረው ነው? ስማ! ስማ!” እያሉ ልቤን ሲያወልቁት ቆዩና ድንገት ዕንባ በዓይናቸው ግጥም ብሎ ግድግዳውን ተደግፈው ዓይናቸውን ጨፈኑ። አለ ነገር!

ደንግጬ፣አመመዎ እንዴ? ሰው ልጥራ?” እያልኩ ስወራጭ፣ማንን ትጠራለህ ልጅ አንበርብር? ሰው ያለ ይመስል ሰው ልጥራ የምትለኝ? ሰው ቢኖርማ ያለ ጥፋታችን ሕመም በጅምላ ይታደለን ነበር? ቁጭት በደቦ እንሰፍር ነበር? ሰው ልጥራ? ሰው ያለ ይመስል…እያሉ ተደግፈውኝ ተነስተው ወደ መኝታ ክፍላቸው ገቡ። እኔም የመጣሁበትን የልቤን ጉዳይ በይደር ከድኜ ወደ ሥራዬ ከነፍኩ። በሽለላና በቀረርቶ ብቻ ሕዝብ ከእኔ በላይ፣ ባህል ከእኔ በላይ፣ ሥልጣኔ ከእኔ በላይ የሚልን  በዕንባና ከንፈር በመምጠጥ ይገሩታል እንዴ? እና ይኼ አሁን ባሻዬ ሳይገባቸው ቀርቶ ነው ወይስ እኔ ሐሞቴ ፈሷል? ያልፈሰሰበት ያለ ይመስል ምን ትጠይቀናለህ አትሉኝም? ፈሰሰ እንጂ!

የሐሞትን ነገር ሐሞት ያነሳዋልእንበልና እንቀጥል እስኪ። የዘንድሮ ወኔ መቼም ከአፍ አያልፍም።ሁሉም ወኔ… ወኔ… ይላል…” አለኝ በቀደም ዕለት ምሁሩ የባሻዬ ልጅ።ወይኔ! ወይኔ! ለማለት ፈልጎ ይሆናላ!” አለው እንደ እኔው ደላላ የሆነው ወዳጄ እየቀለደ። ድሮም ሐሳብ ጠፍቶበት በስሜት ልጥ በአጀብ ለታሰረ ሰው ከዘራፍ ሌላ ምን መላ ይታየዋል ብላችሁ ነው? ናደው፣ ደርምሰው፣ ገንጥለው፣ እጨደውይላሉ። ዞሮ በራሳቸው የማይደርስ የሚመስላቸው ቀልደኞች ሁላ። ይኼን የምላችሁ ምክንያት ስላለኝ ነው። በቀደም  አንዱ መጣና ያውም ቤቴ ድረስ፣እኔ የምለው በቃ ለምን ዓባይን መገደብ ለጊዜው አናቆመውም? በዚህ የኑሮው ውድነት ሜጋ ፕሮጀክቶቻችን ከቀጠሉ መጨረሻችን ምን እንደሚሆን አስበኸዋል?” አለኝ ብላችሁ ታምኑኛላችሁ? ደሜ ፈላ፡፡ እንዴት ነው እዚህ አገር እንደ አንድ ዜጋ አብረን የምንኖረው የሚለው ሐሳብ ሽው እያለብኝ፣ “አንተ በግብፅ ተገዝተህ ነው እንዴ ይህንን የምትናገረው?” ብለው፣ አንዳችም ኮሽታ ሳያሰማ ከአጠገቤ ፈረጠጠ፡፡ አናዳጅ!

ቆይ ግን እኔ ደላላው አንበርብር ምንተስኖት እንኳን በዓባይ ግድብ፣ እንኳን በአገር ሉዓላዊነት ስለቤቴ ጉዳይ ብቻዬን እወስናለሁ እንዴ? ዘመኑ የእኩልነት ነው፣ ጠንካራ ሆነም አልሆነ የብዙ ሰዎች ሐሳብ ጥቂቶችን የሚያሸንፍበት ነው። በአጭሩ የዴሞክራሲ ነው። ካልጠፋ ሰው አምቶ ሊያሳማኝ ካልሆነ በቀር ቤቴ ድረስ መጥቶ የልማቱን ግስጋሴ ለጊዜው ካላቆምን በረሃብ እናልቃለን የሚለኝ በጤናው ይመስላችኋል? እንዲህ ድንገት ከተፍ ይሉባችሁና ቀልባችሁን ይገፉታል፡፡ በቀደም ዕለት ማታ መንግሥት ድንገት ቀልባችንን የገፈፈው እንዲህም አልነበር? እስኪ አስቡት። ጤነኛ ሰው ሥራ ይቁም፣ ራዕይ ይቁም ብሎ ቤታችሁ ድረስ ይመጣል? እኔ በአገሬ ቀልቡ ያልራቀው ሰው ሲል የማውቀው፣የአገራችን ጉዳይ የት ደረሰ? ለሰላም ተብሎ ሲወሰንስ ሕዝብ አውቆት ነው ወይ? በአገር ጉዳይ መመካከር ምነው ዳገት ሆነ? ከበድ ያሉ ውሳኔዎች ሲወሰኑስ በልብ ድካም ሊጎዱ ስለሚችሉ ወገኖች አይታሰብም ወይ? ቀልባችንን ሲገፈፍ ምን ሊፈጠር ይችላል አይባልም እንዴ?” ሲል ነው። አንዱ ደግሞ፣አንበርብር ወኔ የለውም…ብሎኝ አረፈው አሉ። “ምክንያቱ ምን ይሆን?” ሲባል ደግሞ፣ “እርብትብት ነው…” አለ፡፡ ወይ ዘንድሮ!

ፊቴን ወደ ሥራ መለስ ከማድረጌ ሳላስበው አየር በአየር አንድ ሙሉ ኮንቴይነር መወልወያ አሻሻጥኩ። በዚህ አጋጣሚ ስገረም ወድቆ የተነሳ አንድ ሲኖትራክ ጆሮውን ተባለ። የፈጠረኝ ጌታ እኮ ከላይ አለ። የኑሮን ነገር ለሚያውቀው መቼም የፈጣሪን ቸርነትና ረድኤት አይረሳውም። አንዱ፣ ‹‹የልማቱን ነገር ተውት፣ ሆድ ይፍጀው። እኛ ልማት ሲባል አገር ማልማት መስሎን እንጂ፣ ሰው እያመነመኑ አንዳንዶች ብቻ የሚለሙበት ልማት መሆኑን ቀደም ተብሎ ቢነገረን እኮ ወራጅ እንል ነበር በሰላም። እኛ ካልወረድን እነሱ አይወርዱማ። እናም ኪሴ አበጥ ሲል ወደ ባንክ ሄድኩ። ላስገባ ነዋ። እህ ስል ሠልፍ። ምንድነው ስል ሲስተም የለም። እናንተ እንጂ እኛ ከጥንትም ሲስተም ነበረን። ስልቻ ውስጥ ጎተራ ውስጥ መሬት ቆፍረን እየቀበርን ብዙ ሺሕ ዓመታት ኖረናል። ይብላኝላችሁ ለእናንተ…›› ሲል እኔ ድግሞ ወደ ባሻዬ ሄድኩ። ለጥሞና ስል እሳቸው ዘንድ መሄድ ደስ ይለኛል፡፡ ደስ የሚያሰኝ ያጋጥማችሁ!

እንዲህ ዓይነት አጋጣሚ ላይ ባሻዬ ናቸው ተቀብለው የሚያስቀምጡልኝ። አባት አያሳጣችሁ መቼም። ማለቴ ሲስተም ከሌለው አባት ምንም ማድረግ የማይችል ደግ አሳቢ ሰው ለማለት ነው። ኧረ ተውኝ ዘንድሮ። እና ባሻዬ ዘንድ ስደርስ ባሻዬ፣ ‹‹ምን ጉድ ነው ዘንድሮ?›› እያሉ ከሞባይላቸው ጋር ይታገላሉ። ‹‹ምነው ተበላሸች?›› ስላቸው፣ ‹‹አድርጎት ነው። እኔ እኮ እንደ ድሮዬ በፖስታ ብጻጻፍ ይሻለኛል። ዝም ብላችሁ ነው እናንተ ልጆች ዕዳ የምታስገቡኝ…›› ብለው ወቀሳ ጀመሩ። ‹‹ምን ሆኑ?›› ብዬ ስልካቸውን ሳየው የጽሑፍ መልዕክት ነው።ይኼን ቁጥር በመላክ ስኬታማ ትዳር እንዲኖርዎት ያድርጉ። ስለመልካም ትዳር ወሳኝ እውነታዎችን እንነግርዎታለን…’ ይላል። ነገሩ ገባኝ። ባሻዬ ዘመኑ በፍጥነትና በቴክኖሎጂ ስም እያሳበበ አንዳንድ ነገሮችን ያለ ቦታቸው ሲያስቀምጣቸው አይመቻቸውም። ግን ችግሩ ባሻዬ ተመቻቸውም አልተመቻቸውም ዘመኑ ገንዘብ ማሳደጃ ነው። አይደለም እንዴ? ታዲያ ባሻዬ ድንገት ስልካቸው አንጫረረና አነሱት፡፡ ከወዲያ ወገን ያሉት ጡረተኛ ወዳጃቸው፣ ‹‹ባሻ የምሰማው እውነት ነው እንዴ?›› ብለዋቸው ኖሮ፣ “ሳጅን ይኼ የሚወራው በስልክ ሳይሆን በአካል ስንገናኝ ነው…” ብለው ነገሩን ቋጩት፡፡ መቋጨት አለመቻል ነው የበደለን!

እኔና ባሻዬ ይህንን ጉድ ለማረሳሳት የባጥ የቆጡን ስቀባጥር፣ ‹‹ወይ ትዳር? ትዳር እንዲህ በጽሑፍ መልዕክትና ጥቅስ ስምር ሲል። ኧረ ለመሆኑ ስኬትና ትዳር ምንድነው የሚያገናኛቸው? ቋንቋውን ከየት ነው የሚያመጡት?›› እያሉ ቆይተው አንድ ነገር አጫወቱኝ። ምናሉኝ መሰላችሁ? በአንድ ቀዬ ትዳራቸው የሚያስቀና አካላቸው ቢያረጅም ከሚስታቸው ጋር ያላቸው ፍቅር እያደር የወጣት የሆነ አዛውንት ነበሩ አሉ። መቼም አበባ ካለ ንብ ያንዣብባል። ስኬታችሁና ደስታችሁ እያደር ምቀኛ ሲያፈራ ስታዩ፣ ጽጌሬዳ ጉያ እሾህ ጠፍቶ እንደማያውቅ አስታውሱ። ማስታወስ ስል ምን ትዝ አለኝ መሰላችሁ? አንዱ ቸኩሎ ቁርሱን ሳይበላ ይወጣና መንገድ ከጀመረ በኋላ ትዝ ብሎት ወንድሙ ጋ ይደውልና ፋንታውን እንዲያስቀምጥለት ይነግረዋል፡፡ ወንድምየው እየሳቀ፣ “ዘገየህ እባክህ…” ሲለው፣ “ምን ማለት ነው ዘገየህ ማለት… አሁን አይደል እንዴ ከቤት የወጣሁት…” ብሎ ሲጮህበት፣ “እግርህ ከመውጣትህ ነው ሁሉንም ጠርጌ የበላሁት..” ብሎ መለሰለት፡፡ እኛም እንዲህ የሆንን አይመስላችሁም? ከምርጫ መልስ ዞር ስንል የነበረው እንዳልነበረ ሆነብን እኮ፡፡ ወይ ጣጣ!

ወደ ባሻዬ ወግ ስንመለስ አንድ ቅናተኛ የአዛውንቱን ጎጆ ማፍረሻ መላ ሲፈልግ (መቼም ኑሮ ያልተወደደበት መሆን አለበት የገንዘብ መላ ትቶ ፍቅር ማፍረሻ መላ ሲፈልግ ጊዜ የሚያጠፋው) ሰነባብቶ ማምለጫውንም አዘጋጅቶ (የቀናተኛም ብሩህ አለው ማለት ነው? ይታያችሁ እንግዲህ) ጠጋ ብሎአንቱ! ኧረ ይህች ሚስትዎ ትሄዳለች። ምን ሆና ነው?” ይላቸዋል።አይተሃታል?” ይላሉ በቸልታ።በዓይኔ በብረቱ…” ይመልሳል። ሰውዬው ሚስታቸውን ወዲያው ጠርተው፣ሰማሽ ስምሽን? ሂያጅ ነች ይሉሻል። ይኼው ወሬኛው ፊት ጠየቅኩሽ…” ሲሏቸው ሚስታቸውን ወሬኛው ጣልቃ ገብቶ፣አንቱ! እንዴት ያሉ ሰው ነዎት ግን? ትሄዳለች ስልዎ በሐሳብ ትነሆልላች ማለቴ እንጂ ትወሰልታለች መቼ ወጣኝ?” ብሎ ሲቆጣ፣በል ተወው ወንድሜ። ያለ ዛሬም ሐሳብ ሲወሽም አልሰማሁም…ብለው አባረሩት። ላልደረሰበት የቃላት ጨዋታ አይመስልም አሁን ይኼ ታሪክ? ያልደረሰበትማ ምን ይገባዋል? አልገባ ያለን እኮ ለዚህ ነው!

በሉ እንሰነባበት። ከትናንት ወዲያ የጠፋ መብራት ዛሬ ገና መምጣቱ ነው። ትናንት የሄደችው ውኃችን ነገ ወይ ከነገ ወዲያ ትመጣለች ተብሎ ይጠበቃል። ለዝርዝሩ መብራትና ውኃ ክፍልን አነጋግሩ አልላችሁም መቼስ? መልስ በሌለበት አገር ጥያቄ ማብዛት ራስን ማስጠቆር ብቻ እንደሆነ ላለፉት ሃያ ምናምን ዓመታት ዓይተነዋል። ዓይተነው ዓይተነው ዓይናችን አለመጥፋቱ፣ ሰምተነው ሰምተነው ጆሯችን አለመደንቆሩ በራሱ ተዓምር ነው።ሰማይ ያለ ባላ መቆሙ ምን ያስደንቅሃል? እኛ አለን እኮ ያለ ምግብና ውኃ፣ ያለ በቂ ትራንስፖርት አቅርቦትና የዜጋ አክብሮት ወጥተን እየገባን ሠርተን እየገበርን የምንዘረፍ፣ ተዘርፈን የማንጠይቅ፣ ጠይቀን የማይሳካልን። መልሰን ራሳችን ራሳችንን የምንዘርፍ…አለኝ በቀደም ምሁሩ የባሻዬ ልጅ። እንግዲህ አስቡት ይኼን የሚያነፃፅርልኝ ካለባላ ከቆመው ሰማይ ጋር ነው።አንዳንድ ነገሮች ብዙ ያስገርሙኛልነበር ድሮ ዘፈኑ። አሁን መገረማችሁ አስገርሟችሁ ዘፈን ካላደረጋችሁት በቀር፣ አንዳንድ ነገሮች ዛሬም የሚያስገርሟችሁ ከሆነ እናንተ ገና አዲስ ጀማሪ ናችሁ ማለት ነው። አብራራው ስትሉ ሰማሁ መሰለኝ።ይቅርታ ሲስተም የለም፣ ትንሽ ይጠብቁኝ አደራ፣ አንድ ሳምንት ብቻ…’ እንዳልል አቅሙ የለኝም፡፡ ማን ነበርየበረቱትማ እያዩሽ አለፉ፣ ሳይሽ የምደክመው እኔ ነኝ ሰነፉ…’ ያለው? እንዳላየን አልፈን ነገር ብናበርድስ? ቀልባችንም ተገፎ ማለት ነው፡፡ መልካም ሰንበት!

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት