Wednesday, July 24, 2024
- Advertisement -
- Advertisement -
ማኅበራዊየአርበኞች ማኅበር በ130 ሚሊዮን ብር ሕንፃ ሊያስገነባ ነው

የአርበኞች ማኅበር በ130 ሚሊዮን ብር ሕንፃ ሊያስገነባ ነው

ቀን:

የጥንታዊት ኢትዮጵያ ጀግኖች አርበኞች ማኅበር በ130,000,000 ብር ባለ አሥር ወለል ሕንፃ ሊያሠራ ነው፡፡ የመጨረሻው ወለል ጣሪያ ላይ ከዋክብትንና ሰማይን አጉልቶ የሚያሳይ መሣሪያ (ፕላኒተሪየም) የሚገጠምለት ባለተሽከርካሪ ዶም እንደሚተከል የማኅበሩ ፕሬዚዳንት ተናግረዋል፡፡

ፕሬዚዳንቱ ልጅ ዳንኤል ጆቴ መስፍን እንደገለጹት፣ ከማኅበሩ ጽሕፈት ቤት በስተጀርባ ባለው ቦታ ላይ የሚገነባው ሕንፃ ሲጠናቀቅ ቤተ መጻሐፍት፣ የተለያዩ የስብሰባ አዳራሾች፣ ሙዚየምና ሌሎች ለገቢ ማስገኛ የሚውሉ ልዩ ልዩ ክፍሎችን ያካትታል፡፡

በመጨረሻው ፎቅ አናት ላይ የሚገጠመው ባለተሽከርካሪ ዶም በፕላኒተሪየሙ  አማካይነት ከዋክብቱን ወይም ሶላር ሲስተምን አጉልቶ ለማሳየት እንደሚረዳ፣ ሰዎች መጠነኛ ገንዘብ እየከፈሉ በማየት ራሳቸውን ሊያዝናኑ እንዲሁም ሊማሩ እንደሚችሉና ይህም ለማኅበሩ ከሚውሉ የገቢ ማስገኛ ዘዴዎች አንዱ መሆኑን ገልጸዋል፡፡

የሕንፃው ዲዛይን ከተሠራ ጥቂት ዓመታት ማስቆጠሩን ገልጸው ግንባታው ሊጓተት የቻለው ማኅበሩ በአቅራቢያው የሚገኝና የማንም ያልሆነ ከ300 ሜትር ካሬ የሚልቅ ክፍት ቦታን በይዞታ ባለቤትነት እንዲጠቀምበት መንግሥትን ጠይቆ ምላሽ ሳያገኝ በመቅረቱ መሆኑን አስረድተዋል፡፡

አሁን የአዲስ አበባ ከተማ አስተዳደር ምክትል ከንቲባ ወ/ሮ አዳነች አቤቤ የተጠየቀውን ቦታ ለማኅበሩ በነፃ እንዲሰጠው በመፍቀዳቸው ግንባታው በቅርብ ጊዜ ይጀመራል ተብሎ እንደሚጠበቅ ልጅ ዳንኤል ጆቴ ጠቁመዋል፡፡

ማኅበሩ ያለውን ተቀማጭ ገንዘብ አሟጦ ለግንባታው ማከናወኛ እንደሚያውለው፣ ይኽም በቂ ስላልሆነ የጠቅላይ ሚኒስትር ጽሕፈት ቤትን፣ የኢትዮጵያ አየር መንገድን፣ ኢትዮ ቴሌኮምን፣ መብራት ኃይልንና የአዲስ አበባ ከተማ አስተዳደር ከንቲባ ጽሕፈት ቤትን በሮች ማንኳኳቱ እንደማይቀር አክለዋል፡፡

የማኅበሩ አባል የሆኑ አርበኞች ስንት ይሆናሉ? ተብሎ ለቀረበላቸው ጥያቄ ልጅ ዳንኤል ሲመልሱ፣ ‹‹በሕይወት ያሉት የጥንታዊት ኢትዮጵያ አርበኞች ከ300 አይበልጡም፡፡ ከነዚህም መካከል አብዛኞቹ ከቤት የማይወጡና አልጋ ላይ የዋሉ ናቸው፡፡ በየወሩ ከ900 እስከ 1,000 ብር ድጎማ ይሰጣቸዋል፡፡ በአዲስ አበባ የሚገኙት አርበኞች የመድኃኒትና የሕክምና አገልግሎት በነፃ ያገኛሉ›› ብለዋል፡፡

ድጎማው ላለፉት ሁለት ዓመታት ያህል በኮቪድ-19 ወረርሽኝና የቦታው በተፈጠረው አለመረጋጋት የተነሳ ተቋርጦ እንደነበር አስታውሰው፣ አሁን መቀጠሉን፣ ያለፈውን የትንሣዔ በዓል ምክንያት በማድረግም ለአርበኞች በነፍስ ወከፍ 2,000 ብር እንደተሰጣቸው ገልጸዋል፡፡

ማኅበሩ ለታላቁ የኢትዮጵያ ህዳሴ ግድብ የአንድ ሚሊዮን ብር ቦንድ መግዛቱን እንዲሁም በሰሜኑ የአገራችን ክፍል ሕግ በማስከበር ላይ ለሚገኘው መከላከያ ሠራዊት  አንድ ሚሊዮን ብር ዕርዳታ ማበርከቱን አመልክተዋል፡፡

እንደ ልጅ ዳንኤል ጆቴ መንግሥት ለማኅበሩ በየዓመቱ 12 ሚሊዮን ብር ይደጉማል፡፡ ሆኖም የገንዘብ እጥረት ገጥሞታል፡፡ ስለሆነም መንግሥት በየዓመቱ የሚሰጠውን የድጎማ መጠን ከፍ እንዲያደርገው ለገንዘብ ሚኒስቴርና ለጠቅላይ ሚኒስትር ጽሕፈት ቤት በተደጋጋሚ ጥያቄ አቅርቧል፡፡ ጥያቄው በቅርቡ አዎንታዊ ምላሽ ያገኛል የሚል እምነት አላቸው፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

“ከሁለት ሳምንት በፊት ወደ ኤርትራ የማደርገውን በረራ እንዳሳድግ ተጠይቄ ነበር” የኢትዮጵያ አየር መንገድ

ኢትዮጵያ አየር መንገድ ወደ ኤርትራ የሚያደርገውን በረራ እንዲያሳድግ የሚጠይቅ...
00:06:46

የኤርትራ አቪዬሽን ባለሥልጣን የኢትዮጵያ አየር መንገድ በረራዎችን ማገዱን አስታወቀ

የኢትዮጵያ ሲቪል አቪዬሽን ባለሥልጣን ጉዳዩን እያጣራሁ ነው ብሏል በኤርትራ ትራንስፖርትና...

[ክቡር ሚኒስትሩ ከተቋሙ የሠራተኞች ማኅበር አመራር ጋር እየተወያዩ ነው]

ጤና ይስጥልኝ ክቡር ሚኒስትር? ሰላም! በአስቸኳይ እንደፈለጉኝ መልዕክት ደርሶኝ ነው የመጣሁት። አዎ።...

የሱዳን ጦርነትና የኢትዮጵያ ሥጋት

የሱዳን ጦርነት ከጀመረ አንድ ዓመት ከአራት ወራት አስቆጠረ፡፡ ጦርነቱ...