Saturday, May 18, 2024
- Advertisement -
- Advertisement -

ማኅበራዊየሃይማኖት ተቋማት ጉባዔ የመንግሥትን ድጋፍ ጠየቀ

የሃይማኖት ተቋማት ጉባዔ የመንግሥትን ድጋፍ ጠየቀ

ቀን:

የኢትዮጵያ የሃይማኖት ተቋማት ጉባዔ በጠንካራ መሠረት ላይ ቆሞ የሚጠበቅበትን አገራዊ ፋይዳ እንዲወጣ መንግሥት ድጋፍ እንዲያደርግለት ጠየቀ፡፡

ጉባዔው የመንግሥት ሕንፃ ተከራይቶ እንደሚሠራ፣ የራሱ የሆነ ሕንፃ ለመገንባት ከአዲስ አበባ ከተማ አስተዳደር እየጠየቀ ያለው የሕንፃ ፈቃድ ግንባታ እንዲፋጠንለት፣ የጉባዔው ዋና ጸሐፊ ሊቀ ትጉሃን ታጋይ ታደለ ጥያቄ አቅርበዋል፡፡

የሃይማኖት ተቋማት በሚጠበቅባቸው ልክ በሰላም ጉዳዮችና በግጭት አፈታት ረገድ እያከናወኑት ያለው ሥራ፣ አገሪቱ የገባችበትን የዜጎች የሰላም ዕጦት የሚፈታ እንዳልሆነ አስረድተዋል፡፡

- Advertisement -

በመሆኑም ጉባዔው በአገሪቱ የሚከሰቱ አለመግባባቶቸን በጥናት ላይ ተመሥርቶ እንዲፈታ የሚያስችለው አቅም እንደሚያስፈለገው ዋና ጸሐፊው ገልጸዋል፡፡ የሃይማኖት ተቋማቱ ለበጎ አድራጎት ተግባራት በየፊናቸው የሚያደርጉትን አስተዋጽኦ አንድ ተራድኦ ድርጅት በማቋቋም፣ የተጎዱ ሕፃናትንና ስደተኞችን መድረስና መርዳት እንደሚያስፈልግ ዋና ጸሐፊው ተናግረዋል፡፡

በቂ የፋይናንስ ምንጭ እንደሌላቸውና በትንሹም ቢሆን በኢትዮ ቴሌኮም በኩል ግለሰቦች በአጭር ኮድ መልዕክት እየላኩ ገንዘብ የሚያገኙበት አካሄድ ለመጠቀም ሲሞከር፣ ለጉባዔው ምቹ ሁኔታዎች አልተፈጠሩለትም ሲሉ ዋና ጸሐፊው ገልጸዋል፡፡

ሊቀ ትጉሃን እንደሚሉት፣ ጉባዔው በተለያዩ የአገሪቱ ክፍሎች የተከሰቱ ግጭቶችን የሚያጠና ግብረ ኃይል ልኮ እያስጠና ነው፡፡ ጥናቱ እንዳለቀ ለሕዝብ እንደሚቀርብ ተናግረዋል፡፡

የኢትዮጵያ የሃይማኖት ተቋማት ጉባዔ የተመሠረተበትን አሥረኛ የምሥረታ በዓል ባለፈው ሳምንት፣ የሃይማኖት አባቶችና የመንግሥት ኃላፊዎች በተገኙበት አክብሯል፡፡

በሥነ ሥርዓቱ ላይ ንግግር ያደረጉት የጉባዔው ዋና ጸሐፊ፣ የኢትዮጵያ ሕዝብ በአብዛኛው አማኝና በእምነት ውስጥ እንዳለ የሚነገርለት ቢሆንም፣ ከማኅበራዊ የሞራል እሴት ግንባታ አንፃር ቤተ እምነቶች የሚጠበቅባቸውን ሚና እየተወጡ እንዳልሆነ ተናግረዋል፡፡

በሥነ ሥርዓቱ ላይ የተገኙት ፕሬዚዳንት ሳህለወርቅ ዘውዴ በበኩላቸው፣ ‹‹ኢትዮጵያውያን  በእምነት ቀደምትነት ቦታ የያዝን ሆነን፣ በእምነት ታንፀን፣ ፈሪኃ እግዚአብሔር ኖሮን፣ ጠንካራ የሃይማኖት አባቶች ያሉን የታደልን ዜጎች ሆነን፣ ጭካኔ አንዳንዴም አረመኔነት የተሞላበት የሰው ልጅ ሕይወትን ማጥፋት እየተለመደ መምጣቱ፣ የወንድም ጠባቂ ለመሆን አለመፈለግና መታየት የሌለባቸው ድርጊቶች ዓይኖቻችን ሥር ተከስተዋል፤›› ብለዋል፡፡

‹‹ዛሬ አገራችን ልማትን፣ ከድህነት መውጣትን፣ ዕርቀ ሰላምን፣ የወጣቶችን የሰብዕና ግንባታ፣ የአገር ፍቅርና ግብረ ገብነት ያስፈልጋታል፡፡ ስለሆነም የሃይማኖት አባቶች ዓብይ ተግባር መሆን አለበት፤›› ሲሉ ፕሬዚዳንቷ አሳስበዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ