Monday, May 20, 2024
- ማስታወቂያ -
- ማስታወቂያ -

በደቡብ ወሎ ሁለት ሐይቆች ላይ በደረሰ የኦክስጂን እጥረት በብዙ ሺሕ የሚቆጠሩ የዓሳ ዝርያዎች መሞታቸው ተሰማ

spot_img

ተዛማጅ ፅሁፎች

በአማራ ክልል ደቡብ ወሎ ዞን ሐይቅ ከተማ አካባቢ ሐርደበ እና ሎጎ በተባሉ ሐይቆች በአየር መበከል ምክንያት፣ በብዙ ሺሕ የሚቆጠሩ የዓሳ ዝርዎያች መሞታቸው ተነገረ፡፡

ከጥር ወር መጨረሻ ጀምሮ እስከ የካቲት 5 ቀን 2013 ዓ.ም. ድረስ በነበሩ ጥቂት ቀናት ብቻ፣ በውኃ አካላቱ የነበሩ የዓሳ ዝርያዎች ባለፉት 12 ዓመታት ውስጥ ታይቶ በማይወቅ ሁኔታ በብዛት የመሞት አደጋ እንደደረሰባቸው ተነግሯል፡፡

በወሎ ዩኒቨርሲቲ የኃይድሮሎጂ መምህር አሰፋ ተሰማ (ዶ/ር) ለሪፖርተር እንደገለጹት፣ ለዓሳዎቹ መሞት ትልቁ ምክንያት ጥልቀት ያላቸው ሐይቆቹ በአየር ንብረት መዛባት ምክንያት በሚኖረው የውስጥ እንቅስቃሴ፣ ዓሳዎቹ ማግኘት የነበረባቸውን የኦክስጂን መጠን ባለማግኘታቸው ነው፡፡

በተለምዶ ዓሳዎቹ ለመኖር የሚያስፈልጋቸው የኦክስጅን መጠን (Dissolved Oxygen) አራት ሚሊ ግራም ሲሆን፣ አሁን በሁለቱ ሐይቆች ለዓሳዎቹ መሞት ትልቁ ምክንያት የኦክስጂን መጠኑ ከ1.6 ሚሊ ግራም በታች በመሆኑ ነው ሲሉ አሰፋ (ዶ/ር) ተናግረዋል፡፡

ከዚህ ባለፈ በሐይቆቹ አካባቢ ያለው ተጠግቶ የማረስና የእንክብካቤ እጥረት ወደ 88 ሜትር ጥልቀት የነበረው የሎጎ ሐይቅ፣ በደለልና በሌሎች ሰው ሠራሽ ምክንያቶች ጥልቀቱ 81 ሜትር መድረሱ ለዓሶቹ ሞት የራሱ የሆነ አስተዋጽኦ እንዳለው አክለው ገልጸዋል፡፡

በሁለቱ ሐይቆች የደረሰውን የዓሳ ሀብት ውድመት አጠቃላይ ሁኔታ እያጠናው ያለው የወሎ ዩኒቨርሲቲ ሲሆን፣ የተከሰተው ችግር አሁን ቀለል ያለ ቢሆንም በቀጣይነት ተገቢ የሆነ ክትትል ሊደረግበት ይገባል ሲሉ አሰፋ (ዶ/ር) ጠይቀዋል፡፡

ከዚህ በተጨማሪ በሕገወጥ የዓሳ ማስገር ላይ የተሰማሩ አካላትን ሕጋዊ እንዲሆኑና ሥርዓቱን ጠብቀው እንዲንቀሳቀሱ ቢደረግ፣ የተሻለ ለውጥ ማምጣት እንደሚቻል አመላክተዋል፡፡

በፌዴራል ደረጃ እየተዘጋጀ ያለው በውኃ አካላት አካባቢ ሊተገበር የሚችል የጥብቅ ድንበር (Buffer Zone) አልቆ ወደ ሥራ ቢገባ፣ እየታዩ ያሉ ችግሮችን ማቅለል እንደሚቻል አሰፋ (ዶ/ር) ተናግረዋል፡፡

በኢትዮጵያ ለዓሳ ሀብት ዘርፍ ልማት እየተሰጠ ባለው ትኩረት ማነስ፣ እየተገኘ ላለው ምርት ከጊዜ ወደ ጊዜ እየቀነሰ ለመሄዱ ምክንያት እንደሆነ መረጃዎች ያመለክታሉ፡፡

የዓሳ ሀብት በዓለም ላይ ፈጣን ዕድገት እያሳየ መምጣቱና ተጠቃሚነቱ ቢጨምር፣ በኢትዮጵያ በአቅርቦትም ሆነ በተጠቃሚነት ደረጃም ዝቅተኛ እንደሆነ ይነገራል፡፡

በአጠቃላይ በዓሳ ምርት ዘርፍ ለሚታየው መቀዛቀዝ የክትትል ማነስ፣ የሕገወጥ አስጋሪዎችና ነጋዴዎች መብዛትና በቂ የሆነ የሕግ ማዕቀፍ አለመኖራቸው እንደሆነ በተለያዩ አካላት ይወሳል፡፡        

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች