Friday, June 21, 2024
- Advertisement -
- Advertisement -

‹‹በኢትዮጵያ ባህልና ሃይማኖት ተቀባይነት የሌለውን ግብረ ሰዶምና ፆታዊ ጥቃት በመቃወም እየተንቀሳቀስን ነው››

መምህር ደረጀ ነጋሽ፣ ስለ ኢትዮጵያ ዝም አልልም ትውልድን ከግብረ ሰዶም እንታደግ ማኅበር መሥራች

ያለ ዕድሜ ጋብቻ፣ አስገድዶ መድፈርና ግብረ ሰዶም በሕፃናትና በወጣቶች ላይ እየደረሰ መሆኑ በተለያዩ መገናኛ ብዙኃን እየተነገረ ይገኛል፡፡ ከቅርብ ጊዜ ወዲህ ደግሞ በርካታ ዜጎች በግብረ ሰዶማውያን ጥቃት ደርሶባቸዋል፡፡ ይህንን ችግር ለመቅረፍ ‹‹ስለ ኢትዮጵያ ዝም አልልም ትውልድን ከግብረ ሰዶም እንታደግ ማኅበር›› በወንድና በሴት ሕፃናት ላይ እየደረሰ ያለውን ፆታዊ ጥቃትና ግብረ ሰዶማዊ ድርጊት በመቃወም መንግሥታዊና መንግሥታዊ ካልሆኑ ተቋማት ጋር እየሠራ ይገኛል፡፡ መምህር ደረጀ ነጋሽ (ዘወይንዬ) የማኅበሩ መሥራችና ፕሬዚዳንት ናቸው፡፡ ተመስገን ተጋፋው አነጋግሯቸዋል፡፡

ሪፖርተር፡- ‹‹ስለ ኢትዮጵያ ዝም አንልም ትውልድን ከግብረ ሰዶም እንታደግ ማኅበር›› እንዴት ተመሠረተ?

መምህር ደረጀ፡- በኢትዮጵያ ውስጥ እየተፈጠረ ያለውን ፆታዊ ጥቃትና ግብረ ሰዶማዊ ድርጊት በመቃወም የተመሠረተ ማኅበር ነው፡፡ ማኅበሩም አሥር ዓላማዎችን ይዞ የሚንቀሳቀስ ሲሆን፣ ዓላማዎቹንም ከግብ ለማድረስ መንግሥታዊና መንግሥታዊ ካልሆኑ ድርጅቶች ጋር አብረን እየሠራን እንገኛለን፡፡ ከዚህ ጋር ተያይዞም ስለ ሰላምና  አንድነት ለማኅበረሰቡ በማስተማርና ግንዛቤ በመፍጠር ኢትዮጵያ ያለችበትን ችግር ለመታደግ እየሠራን ነው፡፡ በአውሮፓ፣ በአሜሪካ፣ በመካከለኛው ምሥራቅና በአፍሪካ 19 አገሮች በመሄድ እንዲሁም በኢትዮጵያ በተለያዩ ቦታዎች ላይ በመጓዝ ላለፉት 12 ዓመታት ጥናት በማድረግ የተመሠረተ ተቋም ነው፡፡ ቀድሞ በተመሠረተው በማኅበረ ወይንዬ አማካይነት እንቅስቃሴዎችና ሰላማዊ ሠልፎችን በመውጣት ስለ ግብረ ሰዶም አስከፊነት ለማኅበረሰቡ በማስተማር የከረምን ሲሆን፣ ስለኢትዮጵያ ዝም አልልም ማኅበርም ጳጉሜን 3 ቀን 2011 ዓ.ም. ሕጋዊ ፈቃድ አግኝቶ ሊመሠረት ችሏል፡፡

ሪፖርተር፡- ከየትኞቹ ተቋማት ጋር አብረው ይሠራሉ?

መምህር ደረጀ፡- ከሃይማኖት ተቋማት፣ ከሴቶች ሕፃናትና ወጣቶች ሚኒስቴር፣ ከሰላም ሚኒስቴርና ከሚመለከታቸው አካላት ጋር በመቀናጀት አብረን እየሠራን ነው፡፡ የኪነ ጥበብ ባለሙያዎች፣ የሕክምና እና የሕግ ባሙያዎችም ከእኛ ጋር እየሠሩ ነው፡፡ ማኅበሩም እነዚህን ተቋማት በመጠቀም ከዕለት ወደ ዕለት እየተባባሰ የመጣውን ጾታዊ ጥቃት፣ መደፈርና ግብረ ሰዶማዊነትን አጥብቆ በመቃወም በሁሉም ቦታዎች ላይ በመጓዝ በሮችን እያንኳኳ ይገኛል፡፡   

ሪፖርተር፡- የችግሩ አሳሳቢነት የሚጎላው በአዲስ አበባ ነው ወይስ በክልል?

መምህር ደረጀ፡- ችግሩ በኢትዮጵያ በሁሉም ቦታዎች ላይ አለ፡፡ በይበልጥ ግን በአዲስ አበባ በአሥር ቦታዎች ላይ እንደሚጎላ ያደረግነው ጥናት ያሳያል፡፡ ፒያሳ፣ ቦሌ ሃያ ሁለት፣ መገናኛ፣ ወሰንና መርካቶ ችግሩ ከሚጎላባቸው ሥፍራዎች ይጠቀሳሉ፡፡ አካባቢዎቹ ላይ በብዛት መጠጥ ቤቶች መኖራቸው ለግብረ ሰዶምና ጾታዊ ጥቃት ተጋላጭ እንዲሆኑ መንገድ ከፍቷል፡፡ በክልሎች ላይ በሐዋሳ፣ በመቐለ፣ በአርባ ምንጭና በደብረ ዘይት ችግሩ ይታያል፡፡ ይህም የችግሩን አሳሳቢነት ይበልጥ ያጎላዋል፡፡

ሪፖርተር፡- ከክልሎች ጋር በምን ዓይነት መልኩ እየሠራችሁ ነው?

መምህር ደረጀ፡- በኢትዮጵያ በታሪክ፣ በባህልና በሃይማኖት ተቀባይነት የሌለውን ግብረ ሰዶምና ፆታዊ ጥቃት በመቃወምና የችግሩን አሳሳቢነት በመረዳት መንግሥት ትኩረት ሰጥቶ እንዲንቀሳቀስ የማንቂያ ደወል ሥራ እየተሠራ ይገኛል፡፡ ከክልሎች ጋር በመወያየትና ፕሮጀክቶችን በመቅረፅ ኅብረተሰቡ ግንዛቤ እንዲያገኝ እየተደረገ ነው፡፡ ወደ ሃይማኖት ተቋማትና መገናኛ ብዙኃን ጋር በመሄድ በጋራ እየሠራን ነው፡፡ አብዛኛዎቹም ክልሎች የችግሩን አስከፊነት በመረዳት አብሮ ለመሥራት በጎ ፈቃደኝነታቸውን አሳይተውናል፡፡ ይኼም ትልቅ መፍትሔ ስለሚሆን ዘላቂ ሥራዎችን ለመሥራት ላቅ ያለ አስተዋጽኦ ይኖረዋል፡፡

ሪፖርተር፡- ከሕግ አካላት ጋር በምን መልኩ እየሠራችሁ ነው?

መምህር ደረጀ፡- ስለ ግብረ ሰዶም የተጠቀሰው የወንጀል ሕግ እንዲሻሻል፣ መንግሥትም ለጉዳዩ ትኩረት እንዲሰጥ፣ ዕድሜያቸው ከ18 ዓመት በታች በሆኑት ላይ ለሚፈጸመው ግብረ ሰዶማዊ ተግባር ዕድሜ ልክ ጽኑ እስራት እንዲፈረድ እየጠየቅን ነው፡፡ በግብረ ሰዶምም ሆነ በፆታዊ ጥቃት ላይ ያለውን የሕግ ክፍተት በማየት ከፖሊስ፣ ከዓቃቤ ሕግና ከዳኞች ጋር በመወያየት ችግሮችን ለመፍታት የጋራ ስምምነቶች ላይ ደርሰናል፡፡  አስቀድሞም ወንጀልን ለመከላከል እንዲረዳ ለኅብረተሰቡ የግንዛቤ ማስጨበጫ ሥራዎች እየተሠራ ይገኛል፡፡

ሪፖርተር፡- ጥቃቱ ለደረሰባቸው ምን ዓይነት ድጋፍ ታደርጋላችሁ?

መምህር ደረጀ፡- ጥቃት የደረሰባቸው ሰዎች ወደ ሕግ አካል እንዲሄዱና ፍትሕ እንዲያገኙ እየሠራን ነው፡፡ የችግሩን አሳሳቢነት በመረዳትም የተደፈሩ ሕፃናት ልጆች ራሳቸውን ከማኅበረሰቡ እንዳያገሉ በማኅበሩ ሥር በሚገኙ የሕክምና ዶክተሮች አማካይነት የሥነ ልቦና ምክር እንሰጣለን፡፡ በየሳምንቱ ጤናቸውን                                                                                                                                                                                                                                                                                                         እንዲከታተሉ እያደረግን ነው፡፡ የኪነ ጥበብ ባለሙያዎችም እውነተኛ ለቅሶ በማልቀስ ጥቃቱ የደረሰባቸው ሰዎች ቤት ድረስ አብረውን በመሄድ የገንዘብ ድጋፍ አድርገዋል፡፡ ወደፊትም እስከ 50 ለሚደርሱ ከግብረ ሰዶም ሕይወት ውስጥ የወጡ ሰዎች ባሉበት ሆነው ለመርዳት እንቅስቃሴዎች ጀምረናል፡፡

ሪፖርተር፡- ጥቃት የደረሰባቸው ሰዎች ጉዳይ ተሸፋፍኖ እንዳይቀርና ወደ አደባባይ እንዲወጣ ምን እያደረጋችሁ ነው?

መምህር ደረጀ፡- ጥቃቱ የደረሰባቸውን ሰዎች ቀርበን በማናገር፣ ድርጊቱም ወንጀል እንደሆነ በማስረዳትና ሕግ ዋስትና እንደሚሆናቸው በመንገር ከተለያዩ መንግሥታዊና መንግሥታዊ ካልሆኑ ድርጀቶች ጋር በመሆን እየሠራን ነው፡፡ በውስጣቸውም ፍርኃት እንዳያድርባቸው፣ የተደበቀ ጉዳይ አደጋ እንደሚያመጣ በመንገርና ማኅበረሰቡ እንደዚህ ዓይነት ድርጊቶችን ዓይቶ ዝም እንዳይል የግንዛቤ ማስጨበጫ ሥራዎችን ሠርተናል፡፡ ወደፊትም አጠናክረን ለመሥራት የተለያዩ ዕቅዶችን ይዘናል፡፡

ሪፖርተር፡- ማኅበረሰቡ ስለ ፆታዊ ጥቃትና ስለ ግብረሰዶም አስከፊነት እንዲያውቅና ግንዛቤ እንዲኖረው ምን ሠርታችኋል?

መምህር ደረጀ፡- ከዚህ ቀደም ግብረ ሰዶማውያን ከውጭ መጥተው ኢትዮጵያን ሊጎበኙ  ነው በተባለ ጊዜ ማኅበረሰቡ ድምፁን እንዲያሰማና ድርጊቱ በኢትዮጵያ ባህልና እምነት የማይፈቀድ መሆኑን እየገለጽን በተለያዩ ቦታዎች ላይ ግንዛቤ አስጨብጠናል፡፡ በቅርቡ ደግሞ በመገናኛ ብዙኃን ላይ ከተነገረው አስደንጋጭ ፆታዊ ጥቃት፣ ሰዎች ራሳቸውንም ሆነ ቤተሰቦቻቸውን እንዲጠብቁ ግንዛቤ ሰጥተናል፡፡ ይህንንም ቀጣይነት ባለው መልኩ ለመሥራት ዝግጅቶችን አድርገናል፡፡

ሪፖርተር፡- ‹‹ስለ ኢትዮጵያ ዝም አንልም ትውልድን ከግብረ ሰዶም እንታደግ ማኅበር›› ከፆታዊ ጥቃትና ከግብረ ሰዶም በተጨማሪ ምን ይሠራል?

መምህር ደረጀ፡- ስለ ኢትዮጵያ ዝም አንልም ማኅበር ቀጣይነት ያለው ነው፡፡ ማኅበሩም አሥር ዓላማዎችን ይዞ ይሠራል፡፡ ስለ ግብረ ሰዶም፣ ፆታዊ ጥቃትና መደፈር በማስተማርና ግንዛቤ በመፍጠር የሚንቀሳቀስ ነው፡፡ ወደፊትም በኢትዮጵያ የሚኖሩ ማኅበራዊና ኢኮኖሚያዊ ችግሮች እንዲፈቱ የሚሠራ ይሆናል፡፡

ተዛማጅ ፅሁፎች

- Advertisment -

ትኩስ ፅሁፎች ለማግኘት

በብዛት የተነበቡ ፅሁፎች

ተዛማጅ ፅሁፎች

ለቀድሞ የኢትዮጵያ ጦር ሠራዊት የቆመው የብርጋዲየር ጄኔራል ለገሠ ፋውንዴሽን

የቀድሞ የኢትዮጵያ የጦር ሠራዊት አባላት ለአገራቸው የሕይወት መስዋዕትን ለመክፈል የወደዱ፣ ለአገራቸው ክብር ዘብ የቆሙና ውለታን የዋሉ ናቸው፡፡ እነኚህ የአገር ጌጦች በአገሪቱ በተከሰተው የሥርዓት ለውጥ...

ገደብና አፈጻጸም የሚሹ የአየር ሙቀት መጠንና የካርቦን ልቀት

የአየር ንብረት ቀውሱን ለመቋቋም የዓለም ከተሞች ከንቲባዎችን የሚያስተሳስረው ቡድን (ግሩፕ) ሲ-40 (C-40) ተብሎ ይታወቃል፡፡ ከተቋሙ ድረ ገጽ መገንዘብ እንደሚቻለው፣ አዲስ አበባን ጨምሮ የ40ዎቹ ከተሞች...

ሕፃናትን ከመስማት ችግር የሚታደገው የቅድመ ምርመራ ጅማሮ

‹‹መስማት ለኢትዮጵያ›› በጎ አድራጎት ማኅበር በጨቅላ ሕፃናት ደረጃ የመስማት ችግር እንዳይከሰትና በሕክምናውም ዙሪያ በዘመኑ ሕክምና መሣሪያዎች በመታገዝ ሕክምና ለመስጠት ሚያዝያ 2014 ዓ.ም. የተመሠረተ ነው፡፡...