Thursday, June 20, 2024
- ማስታወቂያ -
- ማስታወቂያ -

የጠለፋ ዋስትና ሰጪው ‹‹አፍሪካ ሪ›› አዲስ አበባን ጨምሮ ለስምስት የአፍሪካ ከተሞች የ3.3 ሚሊዮን ዶላር ድጋፍ አደረገ

spot_img

ተዛማጅ ፅሁፎች

ኢትዮጵያ በባለድርሻነት የምትሳተፍበትና በአፍሪካ ቀዳሚው የጠለፋ መድን ሰጪ  ‹‹አፍሪካ ሪ›› የተሰኘ ድርጅት፣ አዲስ አበባን ጨምሮ ስምንት ከተሞች የተካተቱበትና ለኮሮና የሚውል የ3.3 ሚሊዮን ዶላር ድጋፍ መስጠቱን አስታውቋል፡፡

ኩባንያው ለሪፖርተር በላከው መግለጫ መሠረት፣ ለባለድርሻ አካላት የሚውለው ገንዘብ የኮሮና ወረርሽኝን ለመከላከል በማሰብ የሚከፋፈል ነው፡፡ የገንዘብ ድጋፉን የሚያገኙ ከተሞች፣ አፍሪካ ሪኢንሹራንስ ወይም በድርጅቱ አጠራር ‹‹አፍሪካ ሪ›› በጠለፋ መድን ሰጭነት በሚንቀሳቀስባቸው አገሮች ውስጥ ቢሮ የከፈተባቸው ስምንት ከተሞች በጠቅላላው የሁለት ሚሊዮን ዶላር ድጋፍ ያገኛሉ፡፡ ኩባንያው አዲስ አበባን ጨምሮ በሌጎስ፣ በጆሀንስበርግ፣ በናይሮቢ፣ በአቢጃን፣ በካዛብላንካ፣ በሞሪሺዬስ ጽሕፈት ቤቶች ከፍቶ እየተንቀሳቀሰ ይገኛል፡፡

እነዚህ ከተሞች የሁለት ሚሊዮን ዶላር ድጋፍ የሚያገኙ ሲሆን፣ አዲስ አበባ የ250 ሺሕ ዶላር ድጋፍ እንደሚደርሳት ይጠበቃል፡፡ ከዚህ በተጨማሪ የአፍሪካ መድን ድርጅቶች ማኅበር የ820 ሺሕ ዶላር ሲያገኙ፣ የአፍሪካ የበሽታ መከላከልና መቆጣጠር ድርጅት (አፍሪካ ሲዲሲ) የ500 ሺሕ ዶላር ድጋፍ ይደረግለታል፡፡

በአፍሪካ የመድን ኢንዱትሪና የጠለፋ ዋስትና እንቅስቃሴ በኮሮና ወረርሽኝ ተፅዕኖ ሳቢያ መቀዛቀዝ እንደሚታይበት ያመለከተው ተቋሙ፣ የአፍሪካ ጤና ተቋማት አቅም እንዲገነባ በማድረግ ከበሽታው ወረርሽኝ በቶሎ ማገገም የሚቻልበት ሥራ መሥራት እንደሚያስፈልግ አመላክቷል፡፡

እ.ኤ.አ. በ1976 በቀድሞው የአፍሪካ አንድነት ድርጅትና በአፍሪካ ልማት ባንክ  የተቋቋመው አፍሪካ ሪኢንሹራንስ ኮርፖሬሽን፣ ከአፍሪካ ባሻገር በመካከለኛው ምሥራቅ አገሮችም በመንቀሳቀስ ላይ የሚገኝ ተቋም ሲሆን፣ እስካለፈው ዓመት ኢትዮጵያን ጨምሮ 41 አገሮችን በዋና የአክሲዮን ባለድርሻነት በማሳተፍ እየተንቀሳቀሰ ይገኛል፡፡ እነዚህ አገሮች ‹ክላስ ኤ›› የተሰኘው የአክሲዮን ድርሻ ያላቸው ናቸው፡፡ ‹‹ክላስ ቢ›› የተሰኘውን የአክሲዮን ድርሻ በመያዝ ስምንት በመቶ ድርሻ ያለው የአፍሪካ ልማት ባንክ ሲሆን፣ 117 የመድን ድርጅቶች የ35 በመቶ ድርሻ በመያዝ ክላስ ሲ ባለድርሻ ሲባሉ፣ ሦስት አኅጉር አቀፍና አንድ ዓለም አቀፍ የጠለፋ መድን ሰጪ ኩባንያዎች የ23 በመቶ ድርሻ የያዙበት ወይም በየዓመቱ የትርፍ ድርሻ ክፍፍል የሚያገኙበት የ‹‹ክላስ ዲ›› ድርሻ አላቸው፡፡

በኢትዮጵያ መድን ድርጅት በኩል ኢትዮጵያ የምትወከልበት ይህ ኮርፖሬሽን፣ እ.ኤ.አ. በ2019 የ845 ሚሊዮን ዶላር የዓረቦን ገቢ ሲያስመዘገብ፣ የ945 ሚሊዮን ዶላር ከባለድርሻዎች ፈንድ ማሰባሰብ የቻለ ትልቅ ተቋም ነው፡፡ በአሁኑ ወቅት የ40 ቢሊዮን ዶላር የገንዘብ ዋስትና በመስጠት በጠለፋ መድን አቅራቢነት የሚጠቀስ ሲሆን፣ ከኢትዮጵያም የመድን ሰጪ ድርጅቶች ጋር በመሥራት የሚጠቀስ ነው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች