Monday, June 17, 2024
- Advertisement -
- Advertisement -

የተመረጡ ፅሑፎች

መጨረሻ የሌለው ጥበቃ!

እነሆ ጉዞ ከፒያሳ ወደ ሜክሲኮ። ምድር ትውልድን በትውልድ እየተካች የደከመውን በሞት ሸኝታ፣ ለጋውን እያሳደገች ፋታ አሳጥታ ታራውጠናለች። ተስፋ አይሞትምና እውነት ለመሰለን ሁሉ እየደከምን በባዶ እንደ መጣን በባዶ እስክንሸኝ እንደክማለን። ዕርቃናችን እንደ መጣን ዕርቃናችንን እንቀበራለን። በዚህ የጅማሬና የፍጻሜ ዘመኑ በሰው የሕይወት ቆይታ የሚታየው እጅግ አድካሚ ሠልፍ ብቻ ነው። ገሚሱ ተርፎት ሲደርብ ገሚሱ አንዳችን ሳይኖረው፣ አንዱ ሞቆት ሲጨነቅ ያኛው በውርጭና በማጣት ሰቀቀን ጭምር እየተቀጣ ይኖራል። አንዱን ሥጋ አንቆት ሲያወራጨው ሌላውን የሥጋ አምሮት ያንፈራፍረዋል፡፡ የሰው ልጅ ዘመኑ እዚህ የደረሰው እሴቱን ሲሸራርፍ ነው:: ነገር ግን አንዱ ሲገነባ ሌላው እያፈረሰ ብቻ ሳይሆን፣ በተገነባው ላይ የበለጠ እየጨመረና ከዘመኑ አስተሳሰብና ፍላጎት ጋርም እያሰናሰለ፣ በእሴት ላይ ተጨማሪ እሴት እየፈጠረ የሥልጣኔ ጮራ መሆኑም መዘንጋት የለበትም፡፡ ደግ ደጉን ተቀብሎ ክፉ ክፉውን እያስወገዱ ዳገት የሆነባቸው ግን አንድ ዕርምጃ ወደፊት ስንራመድ ሁለት ዕርምጃ ወደ ኋላ እየጎተቱን ነው፡፡ በመጎተት ብቻ ሳይመለሱ ትውልዱን እየመረዙ ጉዟችንን ሲያደናቅፉብን፣ የሕይወት ትርጉሙ ይጠፋብናል የሚሉ መበርከታቸው ይህንን እውነት ይገልጻል፡፡ ልክ ነው!

መተሳሰብ ጠፍቶ ለራስ ብቻ የሚሮጠውን ከጎዳናው ላይ ቆመው ሲያዩት ያሳቅቃል። ምንም ባልበደለ ከፍጥረቱ በድህነት የሚማቅቀውን ዓይተን ሳንጨርስ ያለ ፅድቁ ንዋይ ተርፎት በድሎት የሚንፈላሰሰውን ስናይ ጉድ ማለት ብቻ ነው፡፡ ማጣትና ማግኘት የጎዳናው ነባር አራጋቢዎች ናቸው። ከዚህ ሁሉ በላይ ስሜት የሚያደማ ሀቅ ቢኖር ልጅነት ሲገረጅፍ፣ አበባነት ሲጠወልግ ማየት ነው። ይኼም ቢሆን የራሱ የሆነ ፖለቲካዊ ማብራሪያ አያጣም። ማብራሪያው ሁሉ የፖለቲካ አጥር የሚታከክ ነው። የማጣትም ሆነ የማግኘት፣ የደስታና የሐዘን ስሜቶች ሳይቀሩ ሁሉም መነሻቸው ከዚያ ፖለቲካ አጥር ሥር ነው። አገዛዝ ሲያደቃት በኖረ አገር ጥያቄዎች ሁሉ የፖለቲካ መሆናቸው ምን ይገርማል? ‹‹ጥያቄዎቻችን ከመበርከታቸው የተነሳ ማን ይሆን የሚመልሳቸው?›› የሚል ድምፅ ይሰማል፡፡ ‹‹ግድባችንን እየሞላን ከጥያቄ ይልቅ ትብብር ላይ ቢተኮር እኮ መልሱ አይቸግርም…›› የሚል ሌላ ድምፅ ተከተለ፡፡ እንዲህ እያልን አንዱ ሌላውን ማብረድ ቢለማመድ መልካም ነው!  

ታክሲያችን መንቀሳቀስ ከመጀመሯ ፀጉሩን የመፍተል የእጅ አመል ያስቸገረው ወያላችን ሒሳብ ይል ጀምሯል። ‹‹ብንሰጥህስ ሌላ ሥራ ይዘህ ለመቀበል እንዴት ይመችሃል?›› ይሉታል አንድ አዛውንት እየሳቁ። ወያላው የንግግራቸው አቅጣጫ የት ጋ ሄዶ እንዳረፈ ገብቶታል። ‹‹አይ ሰው! ስንት የሚተሳሰብበት ነገር እያለ ነቀፌታ ላይ ጊዜውን ያጠፋል። እንዲያው ምን ይሻላል?›› ይላል ወያላው በምፀት እየሳቀ ወደ ሾፌሩ ሰገግ ብሎ። ሾፌራችን፣ ‹‹ኧረ በጣም! ትንሽ ፂምህ ሲረዝም ፀረ ልማት የማትመስለው፣ ፀጉርህ ከፍ ሲል ከዘመኑ ዴሞክራሲ ሽሽት እንደ ጀመርክ አድርጎ የማይቆጥርህ እኮ የለም፤›› ሲለው ወያላው ቀበል አድርጎ፣ ‹‹የዴሞክራሲውን ነገር እንኳን ተወው። ግን እንዳልከው በገዛ ራስህ ተፈጥሮና ኑሮ ለተከዝከው የሚተረክዝብህ ብዙ ነው። እውነት የፀጉር መንጨባረርን የሚጠላውን ያህል ጽንፈኝነትን ቢጠላ ይህ ሕዝብ የት በደረሰ ነበር?›› ይላል። ወግ ወጉንማ ይዘነዋል!

‹‹ታዲያስ እንደ እሱ ያለው ቁም ነገር ላይ ሚዛን የሚደፋ ድጋፍና ጥላቻ ቢኖረንማ ስንት ነገር አስተካክለን ነበር እስካሁን። ምን ዋጋ አለው ስንት ሥራ እያለ ሰው ሥራው ስለሰው ሆነ እንጂ። ድራማውም ፖለቲካውም ሰው በሰው. . .›› እያለ አንድ ጎልማሳ አስተያየቱን ያዋጣል። ‘ስለሰው ስለሰው ቀድጄ ልልበሰው’ ብሎ ወያላው ዜማውን ጩኸት አድርጎ ያንባርቅብናል። ‹‹ኧረ ተረጋጋ! ሥራ ላይ መሆንህን አትርሳ፤›› ይለዋል ሾፌሩ። ‹‹ምን ላድርግ ብለህ ነው? ሁሉም የራሱን ነገር እያዋደደ ሲያወራ ስለምበሽቅ እኮ ነው። ከእኔ ወንድሜ ይሻላል፣ ልጄ ይሻላል ይባላል እንጂ ከአብራካቸው እንዳልወጣን ለምንድነው እንዲህ የሚጨፈጭፉን?” ሲል የምሩን መናደዱ ታወቀበት። ‹‹እነ ማን ናቸው እነሱ እንዲህ የሚያናግሩህ?›› ሲለው ጎልማሳው፣ ‹‹ካለኛ ፖለቲከኛ፣ ተመራጭ፣ ባለራዕይ፣ ለሕዝብ አሳቢ፣ ዴሞክራት፣. . . የሚሉን ናቸዋ!›› ብሎ ወያላው ሒሳብ ለሚሰጡት ሰዎች መልስ ማዘጋጀት ነበረበት። አዛውንቱ በትዝብት ከመመልከት ሌላ ቃላት ሲቀምሩ አይታዩም። ሌላ ማንም ሊናገር የዳዳው የለም። ትዝብት ብቻ ነው ፊቱ ላይ የሚታየው። መተዛዘብ ብቻ!

ታክሲያችን እየፈጠነች ነው። ጨዋታችንም ቀስ በቀስ ሥር ሰደደ። ‹‹ወይ አዲስ አበባ! ተተኮሰች እኮ እናንተዬ?!›› ትላለች ሦስተኛ ወንበር ላይ የተቀመጠች ወጣት። ‹‹በምን?›› ይላታል ከአጠገቧ። ‹‹በልማት ነዋ። የግድቡን፣ የባቡርና የአስፋልት መንገድ ሥራውን፣ የሕንፃውን ግንባታ አታየውም እንዴ ከተማው ሁሉ ተለዋውጦ?›› ትለዋለች በየዋህነት ምን ይጠይቀኛል ዓይነት። ‹‹እኔን የሚገርመኝ ግን አገር ለዕድገት ስትነሳሳ እያደቡ የሚያደናቅፏት ከየሥርቻው መፈልፈላቸው ነው። ለመሆኑ የኢትዮጵያ ህዳሴ ግድብ ፕሮጀክትና ሌሎች ሲታከሉበት እኮ ድህነትን ደህና ሰንብት ለማለት እንቃረብ ነበር፡፡ ምን ያደርጋል ታዲያ አገር ላይ የተነሱ ምቀኞች አስቸገሩ እንጂ…›› ሲል ከመጨረሻ ወንበር አንዱ፣ ‹‹እኛ በሚረባውም በማይረባውም እየተለካከፍን ነው እንጂ ፊታችንን ብናዞርባቸው ጭብጥ አይሞሉም፡፡ መቶ ሳይሞሉ መቶ ሚሊዮን ሕዝብ እንዲያምሱ የፈቀድንላቸው እኛ መሆናችንን አንርሳ፡፡ አሁንም መዋጮአችንን አጠናክረን ግድባችንን በቶሎ አጠናቀን ፊታችንን ወደ ሌሎች ታላላቅ ፕሮጀክቶች እናዙር…›› ብሎ ንግግሩን ገታ፡፡ እንዲህ ነው እንጂ!

‹‹ስለመዋጮ ተወራ እንዴ?›› ሲል የቀደመው ተናጋሪ፣ ‹‹ያው ነው ከዓባይ ሌላ ቀሪው የኢትዮጵያ ክፍል የልማት ሥራ የለውም ካላልን በስተቀር፣ ድህነት በምን እንደሚመጣብን እናውቃለን አይደል? በዓለም ላይ ያሰቡትን በተግባር ለማሳየት የሚቸግራቸው ጊዜ ስንት ጀግኖች እኮ ነው ያሉን…›› የምትለው ከሾፌሩ ጀርባ ያለች የቀይ ዳማ ናት። ‹‹ራዕይ ሲበዛማ ጥሩ ነው። ራዕይ አስፈጻሚ ሥራ ፈቶ ስብሰባ ሲያበዛ ግን ችግር ነው…›› ብሎ ሳይጨርሰው ጎልማሳው፣ ‹‹ለማንኛውም ለመዋጮ መጨነቅ ድሮ ቀርቷል። ሕዝባችን ገንዘቡ ሥራ ላይ እየዋለ መሆኑን በማወቁ መዋጮውን አጠናክሮ እየቀጠለ ነው…›› ይላል አጠገቧ የተቀመጠ ተሳፋሪ። ‹‹ወይ አገሬ ምንም እንኳ በአንድ ወቅት የሌቦች ሠራዊት ቢዘርፋትም፣ ከሌላው የአፍሪካ አገር አገር ጋር ስትተያይ አሁን በጣም የተሻለ ደረጃ ላይ ናት፡፡ ቢያንስ እዚህ አንድ ፕሮጀክት የወጣበትና የተሠራው ላይመጣጠን ይችል ይሆናል፡፡ ሌላው ዘንድ እኮ ጭራሽ በጀቱ የት እንደገባ ይታወቃል? ናይጄሪያና ኬንያን ያላየ ብዙ ያወራል. . .›› እያለ ያጉተመትማል፡፡ ዝብርቅርቅ በሚመስለው የታክሲያችን ጭውውት በቀጫጭኑ ተፈትለው የሚታዩት የሽሙጥ አገላለጾች ብቻ ናቸው። ልብ ለሚል ሕዝባችን ውስጥ ብዙ ሐሳቦች አሉ፡፡ ከማይረቡ ፖለቲከኞች ሕዝባችን ውስጥ ያሉ ምልከታዎች ከበድ ያለ ዋጋ አላቸው፡፡ ዋናው ቁምነገር ጠጋ ብሎ ማዳመጥ ነው፡፡ ይሰማል አይደል!

ሾፌሩን አንዳች የሚያቁነጠንጠው ነገር ሰቅዞ ይዞታል። ምቾት አጥቶ እረፍት የነሳት ዶልፊን ታክሲያችን ቅጥ ባጣ አካሄድ ወሰድ መለስ ትላለች። ወያላው ጭምር ግራ ገባው መሰል ‹‹ምነው?›› ይለዋል። ‹‹ምን እባክህ ይኼ ቀበቶ እኮ ሊመቸኝ አልቻለም። እዚህ አገር አዋጁና ሕጉ ሁሉ ሰው ማሰሪያ ነው…›› ብሎ ይመልሳል ሾፌራችን። ‹‹እንዴ በትራፊክ አደጋ የሚቀድመን አገር እንደሌለ እያወቅክ ቀበቶ አስሮ ማሽከርከርን ነፃነት ከማጣት ጋር ታወዳድራለህ?›› ትለዋለች አጠገቡ የተቀመጠች ወጣት። ‹‹ኧረ ተይኝ እባክሽ። አሁንስ አላሠራ ያለን ይኼ ጥቃቅንና አነስተኛ ሕግ ነው። ሕዝብ በትራንስፖርት ዕጦት ዕርምጃው ተገትቶ፣ እንዳሻው እንዳይሮጥ ታስሮ የማይታያቸው ሁሉ ይህችን ቀበቶ አድርጉ፣ አታድርጉ እያሉ ላይ የሚበረቱት ናቸው የሚገርሙኝ…›› እያለ ወይ አንደኛውን ቀበቶ ማድረግን ያወገዘ ንግግር አልተናገረ፣ ወይም ጥቃቅኑ ነገር ላይ የሚያተኩረውን ሕግ አውጪና አስከባሪ አካል አልተቸ እንዳሻው ደባልቆ ይቀደዳል። የአንዳንዱ ጩኸት ምክንያቱን ለመስማት የሚያስጠላ ነው፡፡ ጥንቃቄን እየናቁ በትራፊክ አደጋ ዕልቂት የሚያደርሱ ግዴለሾች ሲያዛጉብንማ ያበግናል፡፡ በስንቱ እንብገን!

‹‹ስለ ትራንስፖርት ችግር ያነሳኸው እውነት ቢሆንም መንገድ ትራንስፖርት ሥራዬ ብሎ መፍትሔ ሊሰጠው የሚገባ ጉዳይ እንደሆነ ቢታወቅም፣ ቀበቶ ከማሰር ጋር የሚያገናኘው ነገር የለም። መጀመርያ የራስን ኃላፊነት መወጣት ነው። እውነት እንዲህ የእኛ ተሠልፎ መዋል የሚያሳስባችሁ ከሆነ እናንተስ የምትሠሩት ልክ ነው እንዴ? ተው! አንተዛዘብ ተው!››  የሚለው ደግሞ ወፍራም ኮስታራ ተሳፋሪ ነው። ሾፌሩ ምንም መልስ አልሰጠም። ነገሩ ባላሰበው አቅጣጫ እየዞረ ነበር። መሀል የተቀመጠች መጠጥ ያለች ወይዘሮ፣ ‹‹ክፉ ልምድ!›› ትላለች በሹክሹክታ። ‹‹የራስን ቀበቶ ሳያጠብቁና የራስን ቀዳዳ ሳይደፍኑ ሌላው ላይ ለመፍረድ መሽቀዳደም። በሐሰተኛ ወሬና በአሉባልታ የብዙዎችን ቀልብ በመሳብ አገር ላይ ማሴር፣ ከሰው እንዳልተወለድን ሰብዓዊ ፍጡራንን መግደልና መዝረፍ። እንዴት ያለ እርግማን ነው እናንተዬ?›› ስትል ምሬቷ ጣራ የነካ ይመስል ነበር፡፡ ምሬትማ የሰፊው ሕዝብ ቀለብ ከሆነ ቆየ እኮ!

ወደ መዳረሻችን እየተቃረብን ነው። መገናኛ ቅልጥ ያለ ደማቅ የጎዳና ገበያ ከሆነ ቆይቷል። ‹‹የሚገርመኝ ትናንት የነበረውን ዛሬ ሳጣው፣ ዛሬ ያጣሁትን ነገ ሳገኘው ነው…›› ትላለች አንዷ ወይዘሮ። ‹‹እውነት ለመናገር ለውጡ እየታየ ነው። ዓለም ራሱ ጊዜው የአፍሪካ ነው አይደል እያለ ያለው?›› ብሎ ከመጨረሱ ጎልማሳው፣ ‹‹እውነት ነው። የቁሳዊውንና የመንፈሳዊውን ሥልጣኔና ዕድገት ብናጣምረው ደግሞ. . .›› ብሎ ከመጨረሻ ወንበር አንድ ወጣት ሲናገር ይሰማል። የልማቱና የለውጡ የይበል ጨዋታ በአንድ ጊዜ ተቀይሮ ምሬትና ትችት ለማድመጥ አሁንም ደቂቃ አልፈጀም። አንዱ ስልኩ እንቢ ብሎት ‘ኔትወርኩ’ን እያማረረ ቴሌን ያሳጣል። አንዷ፣ ‹‹አሁን ደግሞ ከዚህ ስንት ሰዓት ይሆን ታክሲ ጠብቄ ተሳፍሬ የምሄደው?›› እያለች ስትጨነቅ ይሰማል። ወዲያው ከወደ ጋቢና፣ “በየወሩ ነው እንዴ የቤት ኪራይ የሚጨምሩት እርስዎ ሰውዬ?” እያለ በስልክ ያጮሃል። ተንፍሰን ሳንጨርስ የሚያካልበን የችግር አባዜ ጉልበቱን አድሶ በየአቅጣጫው ተሳፋሪውን ሲወጥረው፣ ‹‹እንዲያው ምን ተሻለን እናንተ? መፍትሔው ሁሉ ጊዜያዊ ነው፣ እሱንም የሚሰማ ሲገኝ። ኧረ እንዴት ልንኖር ይሆን ወደፊት?› ይባባሉ ጀመር ተሳፋሪዎች። ታክሲያችን ጠርዝ ይዛ ስትቆምና ወያላው፣ ‹‹መጨረሻ! ውስጥ አይገባም!›› ብሎ ሲያወርደን አንዲት ወጣት ተሳፋሪ፣ ‹‹ሌላ ሌላውን የምጠብቀው አንሶን መፍትሔ ስንጠብቅ ዘመናችን ይለቅ? መጨረሻ የሌለው ጥበቃ እኮ ደስ አይልም…›› ያለችው ጆሮአችን ውስጥ ገባ። ‘መጨረሻ የሌለው ጥበቃ እስከ መቼ?’ እንበልና ወደ ሚቀጥለው ጉዞ እንሻገር እንጂ፡፡ እህ ምን ይደረጋል? መልካም ጉዞ! 

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት