Thursday, April 18, 2024
- ማስታወቂያ -
- ማስታወቂያ -

የ130 ቡና ገዥዎችን ገበያ የሚጠባበቁት የቡና ጥራት ውድድር አሸናፊዎች

ተዛማጅ ፅሁፎች

በመጪው ሳምንት ይፋ እንደሚደረግ ለሚጠበቀው ዓለም አቀፍ የቡና ጨረታ ገበያ የጥራት ውድድር አልፈው የሚጠባበቁ ቡናዎች ከተለዩ ቀናት አስቆጥረዋል፡፡ 

ለመጀመርያ ጊዜ በኢትዮጵያ ሊስተናገድ ቀን ተቆርጦለት በኮሮና ቫይረስ ምክንያት ተሰርዞ በአሜሪካ በተካሔደው የቡና ጥራት ቅምሻ ውድድር ላይ ከተሳተፉ 40 ያህል ቡናዎች መካከል የመጨረሻዎቹ 28 ቡናዎች ባመጡት ውጤት ተለይተው በኢንተርኔት ለሚካሄደው የጨረታ ግብይት አልፈዋል፡፡ እንደ አዘጋጆቹ ከሆነም እነዚህን ከፍተኛ ጥራት ያላቸው ቡናዎች ለመግዛት ብቃት ያላቸው ከ130 በላይ ኩባንያዎች የጨረታውን ቀን እየተጠባበቁ ይገኛሉ፡፡

ከፍተኛ ውጤት ያመጡ ሦስት ቡናዎችን ጨምሮ 28 ቡናዎች፣ በመጪው ሳምንት ሰኔ 18 ቀን 2012 ዓ.ም. በጨረታ እንደሚሸጡ የውድድሩ አዘጋጅ፣ አሊያንስ ፎር ኮፊ ኤክሰለንስ የተሰኘው የአሜሪካ ድርጅት ይፋ አድርጓል፡፡ ለውድድሩ በጠቅላላው ከ22 ሺሕ ኪሎ ግራም ያላነሰ ታጥቦ የተቀሸረና በፀሐይ የደረቀ የተፈጥሮ ቡና እንደቀረበ አዘጋጁ አስታውቋል፡፡

‹‹ካፕ ኦፍ ኤክሰለንስ›› በሚል ስያሜ በቡና አምራችነታቸው በሚታወቁ አገሮች ውስጥ ሲካሄድ የቆየው፣ ይህ የጥራት ውድድር በአሜሪካ እስካሁን ተካሂዶ ባያውቅም፣ በኮሮና ምክንያት ግን አሜሪካ ዳኝነቱን በመውሰድና ዝግጅቱን በማሰናዳት የኢትዮጵያን ቡናዎች የጥራት ደረጃ መዝናለች፡፡ በዚህም መሠረት ከፍተኛ ውጤት በማስመዝገብ ማለትም ከ90 በመቶ በላይ የጥራት መለኪያውን ውጤት ካገኙት መካከል አቶ ንጉሤ ገመዳ የተባሉ ቡና አብቃይ ያቀረቧቸው የሲዳማ ቡናዎ 91.3 በማግኘት ቀዳሚ ሆነው ተመዝግበዋል፡፡ ከሲዳማ ባሻገር፣ የምዕራብ አርሲ፣ እንዲሁም የምዕራብ ጉጂ ቡናዎች አብዛኛውን የጥራት ውድድር ያሸነፉ ናቸው፡፡

አቶ ንጉሤ ውጤቱን ተከትሎ ከሚመጣውና ጠቀም ያለ የገበያ ዋጋ ከሚያስገኘው የጨረታ ሽያጭ ለመቋደስ እየተጠባበቁ ይገኛሉ፡፡ በሁለተኛ ደረጃ ሩሙዳሞ የቡና ኢንዱስትሪ ንግድ ኃላፊነቱ የተወሰነ የግል ኩባንያ ያቀረባቸው ቡናዎች፣ 90.89 ከመቶ ውጤት በማስዝገብ ከፍተኛ የጥራት አሸናፊ ተብለዋል፡፡ በሦስተኛ ደረጃም ይኸው ድርጅት ያቀረባቸው ቡናዎች አሸናፊ መሆናቸው ተረጋግጧል፡፡ 90.25 በመቶ አስመዝግበዋል፡፡ የተቀሩት ቡናዎች በሙሉ ከ87 በመቶ በላይ የጥራት ውጤት በማስመዝገብ ለጨረታ ሽያጭ ብቁ መሆናቸውን አወዳዳሪው አካል ይፋ አድርጓል፡፡

በአሊያንስ ፎር ኮፊ ኤክሰለንስ በታሪኩ ብዛት ያላቸውን ቡናዎች ለማወዳደር የቻለው ከኢትዮጵያ እንደሆነ ማስታወቁ ይታወሳል፡፡ ለውድድሩ ከ1,400 በላይ ቡናዎች ለውድድር ቀርበው፣ ለመጨረሻው ዙር 40 ቡናዎች መመረጣቸው አይዘነጋም፡፡ ከ40ዎቹም ለሽያጭ ተለይተው ለመጨረሻው ውጤት የበቁት 28 ቡናዎች በመጪው ሳምንት ለሽያጭ ይቀርባሉ፡፡

በአምስት ዙር የተካሄደ የቅምሻና የጥራት ምዘና ሒደት አልፈው አሸናፊ ለመሆን የበቁት ቡናዎች፣ እነዚህ ግብይት ከፍተኛ ጥራት ያስመዘገቡት ቡናዎች ከፍተኛ ዋጋ እንደሚያወጡ ይጠበቃል፡፡

የኮሮና ቫይረስ በመከሰቱ አገሮች እንቅስቃሴዎችን መገደባቸው በፈጠረው ጫና ሳቢያ፣ ከኢትዮጵያ ወደ አሜሪካ ተጓጉዘው፣ አሊያንስ ፎር ኮፊ ኤክሰለንስ ዋና መሥሪያ ቤቱ በሚገኝበት ሜሬላንድ ግዛት፣ ኦሪገን ከተማ ሲካሄድ የቆየው የጥራት ውድድር፣ ከኢትዮጵያ ቡናዎች ባሻገር፣ የኒካራጓ አሸናፊ ቡናዎችን በጨረታ ለማገበያየት ወረፋ አሲይዟቸዋል፡፡ 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች