Monday, April 15, 2024

መንግሥት በአራት ወራት ውስጥ ያፀደቀው ተጨማሪ በጀት 76 ቢሊዮን ብር ደረሰ

- Advertisement -spot_img

በብዛት የተነበቡ

ጤና ሚኒስቴር 15 ቢሊዮን ብር ጠይቋል

ለመጪው ዓመት እስከ 70 ቢሊዮን ብር ተጨማሪ በጀት ይመደባል  

መንግሥት ባጋጠመው የገቢ መቀነስና የወጪ ጭማሪ ሳቢያ ዓርብ ግንቦት 14 ቀን 2012 ዓ.ም. በሚኒስትሮች ምክር ቤት የፀደቀውን የ48 ቢሊዮን ብር አካቶ፣ በአራት ወራት ውስጥ ያፀደቀው ጠቅላላ ተጨማሪ በጀት 76 ቢሊዮን ብር ደረሰ፡፡ የ48 ቢሊዮን ብር ተጨማሪ በጀት በመጪው ሳምንት ለሕዝብ ተወካዮች ምክር ቤት ቀርቦ እንደሚፀድቅ ይጠበቃል፡፡

በየካቲት ወር የፀደቀው የ28 ቢሊዮን ብር ተጨማሪ በጀት በወቅቱ ሲያጋጥሙ የነበሩ ኢኮኖሚያዊ ችግሮችን ለመቅረፍና የአገር በቀል ኢኮኖሚ ማሻሻያ አጀንዳዎችን ለማስፈጸም የተጠየቀ እንደነበር ይታወሳል፡፡ ሰሞኑን በሚኒስትሮች ምክር ቤት የፀደቀው 48 ቢሊዮን ብር ተጨማሪ በጀት ግን፣ በአብዛኛው በኮሮና ወረርሽኝ ሳቢያ እያጋጠመ ያለውን ጫና ለመቋቋም ተብሎ እንደሆነ ገንዘብ ሚኒስቴር አስታውቋል፡፡

የገንዘብ ሚኒስትር ዴኤታ ኢዮብ ተካልኝ (ዶ/ር) በተለይ ከሪፖርተር ጋር ባደረጉት ቆይታ እንዳስታወቁት፣ ተጨማሪ በጀት ያስፈለገው በኮሮና ሳቢያ የመንግሥት ገቢ እየቀነሰ በመምጣቱና ወጪውም በከፍተኛ መጠን በመጨመሩ ነው፡፡ መንግሥት እየተጠናቀቀ ላለው በጀት ዓመት ከ387 ቢሊዮን ብር በላይ በጀት መመደቡ ይታወሳል፡፡

ይህም ሆኖ ኮሮና እያስከተለ ባለው ጫና ሳቢያ ለሕክምና ቁሳቁሶች ግዥዎች የሚለውን ጨምሮ ለአስቸኳይ የምግብ ዕርዳታ፣ ለጥቃቅንና አነስተኛ ኢንዱስትሪዎች፣ ለአነስተኛ ገንዘብ ተቋማት፣ እንዲሁም ለኅብረት ሥራ ማኅበራትና ለሌሎችም መስኮች የሚውል ተጨማሪ 48 ቢሊዮን ብር ማስፈለጉን ኢዮብ (ዶ/ር) አብራርተዋል፡፡

በዋቢነት ከተጠቀሱት ከእነዚህ የወጪ መስኮች መካከል ጤና ሚኒስቴር፣ በየጊዜው የሚወስደው 15 ቢሊዮን ብር ተጨማሪ በጀት እንደሚያስፈልገው ማስታወቁን ሚኒስትር ዴኤታው ገልጸዋል፡፡ ‹‹ምክር ቤቱ ያፀደቀው የበጀት ማስተካከያ ያስፈለገው ወጪያችን በከፍተኛ መጠን ጨምሮ ገቢያችን በመቀነሱ ነው፡፡ በሽታውን ለመከላከል የምናወጣቸው ከፍተኛ ወጪዎች አሉ፡፡ ለምሳሌ ጤና ሚኒስቴር በየጊዜው የሚወስደው ሆኖ 15 ቢሊዮን ብር ጠይቋል፤›› ያሉት ኢዮብ (ዶ/ር)፣ በርካታ ያልታሰቡ ወጪዎች በማጋጠማቸው ተጨማሪ በጀት ማፅደቅ እንዳስፈለገ ገልጸዋል፡፡

ለምግብ ዕርዳታ የሚውል የ600 ሺሕ ሜትሪክ ቶን ስንዴ የግዥ ጨረታ በቅርቡ መውጣቱን ያስታወሱት ኢዮብ (ዶ/ር)፣ መንግሥት ቀደም ብሎ ባስቀመጠው ትንበያ መሠረት 15 ሚሊዮን ተጨማሪ ዜጎች የምግብ ዕርዳታ ሊያስፈልጋቸው እንደሚችል ይጠበቃል ብለዋል፡፡

በሴፍቲኔት እየተረዱ የሚገኙትን ጨምሮ በጠቅላላው 30 ሚሊዮን ዜጎች ከአስቸኳይ ምግብ ዕርዳታ ሊዳረጉ እንደሚችሉ ይጠበቃል፡፡ ለዚህ የሚያግዝ የ600 ሺሕ ሜትሪክ ቶን ስንዴ በ4.1 ቢሊዮን ብር ወይም በ128 ሚሊዮን ዶላር ግዥ ለመፈጸም እንቅስቃሴ ላይ የሚገኘው የመንግሥት ግዥና ንብረት ማስወገድ አገልግሎት፣ በዓመቱ ግዥ እንዲፈጽም ጥያቄ የቀረበለት ጠቅላላ የስንዴ መጠን 800 ሺሕ ሜትሪክ ቶን እንደሆነ ማስታወቁ ተዘግቧል፡፡

በተጨማሪም ለጥቃቅንና አነስተኛ ኢንዱስትሪዎች፣ ለአነስተኛ የገንዘብ ተቋማት፣ እንዲሁም ለኅብረት ሥራ ማኅበራት ዩኒየኖች የሚውል በአጠቃላይ 4.5 ቢሊዮን ብር ማስፈለጉን፣ ሦስቱ ዘርፎች እያንዳንዳቸው 1.5 ቢሊዮን ብር ድጋፍ እንደሚያስፈልጋቸው ታሳቢ መደረጉን ከሚኒስትር ዴኤታው ገለጻ ለመረዳት ተችሏል፡፡

እንዲህ ያሉትን ጨምሮ መንግሥት በበጀት ዓመቱ ካስፈለገው 76 ቢሊዮን ብር በተጨማሪ፣ በመጪው ዓመት ተቀራራቢ ጭማሪ የሚደረግበት ተስፋፊ የፊስካል ፖሊሲ እንደሚኖር ኢዮብ (ዶ/ር) አስታውቀዋል፡፡ በመጪው ዓመት ከ60 እስከ 70 ቢሊዮን ብር ጭማሪ የሚደረግበትና ከወትሮ የበጀት ድልድይ በተለየ አካሄድ የሚዘጋጅ በጀት ሊኖር እንደሚችል ጠቁመዋል፡፡

እስካሁን በነበረው አካሄድ መንግሥት ጥብቅ የፊስካል ፖሊሲ በመከተል በጀት ሲደለድል ቆይቷል፡፡ ይሁን እንጂ የኮሮና ቫይረስ ወረርሽኝ ሥርጭት ተስፋፍቶ የሚታይበት ወቅት ገና እንደሚመጣ ትንበያዎች ስለሚያሳዩ ችግሩም እየባሰ እንደሚሄድ ስለሚታሰብ፣ ‹‹ለአስቸኳይ ጊዜ ምላሽ መስጠት የሚችል ከወትሮው ይልቅ ተስፋፊ በጀት ይኖረናል፤›› ብለዋል፡፡ 

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -