Sunday, May 19, 2024
- Advertisement -
- Advertisement -

ማኅበራዊ‹‹በገልባጮችና በደላላዎች›› ፈተና ውስጥ የገባው የቁም ከብት ገበያ

‹‹በገልባጮችና በደላላዎች›› ፈተና ውስጥ የገባው የቁም ከብት ገበያ

ቀን:

ነጋዴው የራሱን የድካም ዋጋ ወስዶ ለመንግሥት የሚገባውን ግብር ለመክፈል የሚያስችሉ ምቹ መደላድሎችን ለመፍጠር የቁም ከብት ገበያንም ሆነ እርድን በሕጋዊ መንገድ ማከናወን ወሳኝ ነው፡፡ አሠራሩን በተሳለጠና ቀጣይነት ባለው መልክ ለማከናወን እንዲቻል በቁም እንስሳት ግብይት ውስጥ የሚታዩ ጉራማይሌ አካሄዶችና ሥርዓት አልበኝነት መጥራትና መስተካከል ይገባቸዋል፡፡

ዓምና መጨረሻ ላይ በወጣው የታክስ አሰባሰብ መመርያ ዙሪያ የአዲስ አበባ ልኳንዳ ነጋዴዎች ማኅበር ታኅሣሥ 7 ቀን 2012 ዓ.ም. ከአባላቱ ጋር ያካሄደውን የምክክር ስብሰባ አስመልክተው የማኅበሩ ምክትል ፕሬዚዳንት አቶ ምትኩ ሞሻጐ ለሪፖርተር እንደተናገሩት፣ ጉራማይሌ አካሄዶቹ ካስከተሏቸው በርካታ ችግሮች መካከል የሕግ ክፍተት መፈጠሩ ይገኝበታል፡፡

በተፈጠረው የሕግ ክፍተት ምክንያት ምንም ዓይነት የንግድ ፈቃድ የሌላቸው ሕገወጥ የቁም እንስሳት ነጋዴዎች ተበራክተዋል፡፡ በዚህም ለኮንትሮባንድ ንግድና ጤንነቱ ላልተረጋገጠ ሥጋ አቅርቦት መስፋፋት መንስዔ ሆኗል፡፡ ሕጋዊ የንግድ ፈቃድ ያላቸውም ነጋዴዎች ከተለያዩ አካባቢዎች ገዝተው ያመጧቸውን ሠንጋዎች ራሳቸው መሸጥ ሲገባቸው ለሕገወጥ ነጋዴዎች አሳልፈው ይሰጣሉ፡፡ ሕገወጦቹም የተረከቧቸውን ሠንጋዎች ባሰኛቸው ዋጋ ሲሸጡ ይስተዋላሉ፡፡ ሕጋዊ ነጋዴዎች ገዝተው ያቀረቡትን ሠንጋ እየተረከቡ ባሰኛቸው ዋጋ የሚሸጡ እንደእነዚህ ዓይነቶቹ ሕገወጦች ገበያ ውስጥ ‹‹ገልባጭ›› በሚል መጠርያ ይታወቃሉ ብለዋል፡፡

- Advertisement -

ገልባጮቹ ለሚሸጧቸው ሠንጋዎች ለገዥው ወይም ለልኳንዳ ነጋዴው ደረሰኝ የማይሰጡበት ወይም ደረሰኝ የለኝም የሚሉበት ጊዜ እንዳለ፣ ከብዙ ውጣ ውረድ በኋላ ደረሰኝ ቢሰጡም፣ ልኳንዳ ነጋዴው ግብር አስገቢው መሥሪያ ቤት ሄዶ ሒሳብ በሚያወራርድበት ጊዜ ደረሰኙ አስመስሎ የተሠራ ወይም ሕገወጥ እንደሆነና ተቀባይነት እንደሌለው ከሚነገረው ባሻገር ከሕገወጥ ነጋዴዎቹ ጋር ተመሳጥሮ ያመጣው ነው የሚል ወቀሳ እንደሚደርስበት፣ ይህ ዓይነቱም ሁኔታ በንግድ እንቅስቃሴው ላይ እጅግ ከፍተኛ ጫና እንዳስከተለ አቶ ምትኩ ተናግረዋል፡፡

ችግሩ በዚህ ብቻ ሳይገታ ደላላው የሚያካሂደው እንቅስቃሴ ለሥርዓት አልበኝነት መስፋፋት ተጨማሪ መንስዔ ሆኗል፡፡ ከአንድ ሠንጋ ለደለሉበት ከሸማቹ እስከ 300 ብር ይቀበላሉ፡፡ አልከፍልም ያለ ሸማች ከገበያው ማዕከል እንዲወጣና ሸመታም እንዳያካሂድ ይደረጋል፡፡ ሲቀጥልም እስከ መኖሪያ ቤቱ ድረስ በመሄድ የማስፈራራት ዛቻ ይደርሳል፡፡

በገበያ ሥርዓቱ ውስጥ ከፍ ብለው የተጠቀሱ ችግሮችና የሕገወጥ ደረሰኝ ዝውውሮች እንደሚስተዋሉ በመግለጽ፣ መፍትሔ እንዲበጅላቸው ማኅበሩ ጉዳዩ ለሚመለከታቸው መንግሥታዊ አካላት በጽሑፍ ቢያሳውቅም ምንም ዓይነት መፍትሔ እንዳልተገኘ አቶ ምትኩ ገልጸዋል፡፡

ጽሑፉ ከደረሳቸው መንግሥታዊ አካላት መካከል የአዲስ አበባ ገቢዎች ባለሥልጣን በገበያ ሥርዓቱ ውስጥ ሕገወጥነት መኖሩን አምኖ፣ የትኩረት አቅጣጫው ግን ከገበያው ግብር መሰብሰብ እንጂ ፈቃድ መስጠት እንዳልሆነ፣ የንግድና ኢንዱስትሪ ቢሮ ደግሞ ንግድ ፈቃድ መስጠቱን በአንፃሩ ግን ከደረሰኝ ጋር የተያያዙ ችግሮችንና በአጠቃላይ ሕገወጥነትን ማጥራት ያለበት ገቢዎች ነው የሚል እምነትና አካሄድ ያለው መሆኑን ያስረዳል፡፡

ይህም ሆኖ ግን ሁለቱም መንግሥታዊ አካላት ተጣምረው አለመሥራታቸውና አለመቀናጀታቸው ለሕገወጥ እንቅስቃሴ መስፋፋትና መጠናከር የጎላ ሚና ተጫውተዋል የሚል እምነት እንዳላቸው ምክትል ፕሬዚዳንቱ አመልክተዋል፡፡

አዲስ የወጣው የታክስ አሰባሰብ መመርያም ከፍተኛውን፣ መካከለኛውንና ዝቅተኛውን ልኳንዳ ነጋዴ ገቢ ያላገናዘበ፣ ሁሉንም በአንድ የስሌት ቋት ያስቀመጠ፣ በአጠቃላይ ኢፍትሐዊ እንደሆነና ማኅበሩም በዚህ ዙሪያ ከአዲስ አበባ ገቢዎች ባለሥልጣን እንደተነጋገረ አክለዋል፡፡

በንግግሩም ወቅት ባለሥልጣኑ መመርያው የወረደለት ከገቢዎች ሚኒስቴር መሆኑን ገልጾ፣ የተቀበለውንም መመርያ ወደ መሬት ማውረዱ ግዴታው ከመሆኑ አኳያ አዲስ አበባ ላይ በሙከራ ደረጃ እንዲተገበር ማድረጉን አስረድተዋል፡፡ በቀጣይ በሁሉም የአገሪቱ ክፍሎች ተፈጻሚነት እንዲኖረው የሚደረግ መሆኑን፣ በሙከራ ደረጃ በተካሄደው እንቅስቃሴ የታዩ ክፍተቶችን ለበላይ አካል እንደሚያቀርብ፣ የንግድ ፈቃድ ዕድሳትንም በሚመለከት ከጉዳዩ ጋር አግባብ ካላቸው መንግሥታዊ አካላት ጋር በቅርቡ ተነጋግሮ መፍትሔውን ለማኅበሩ እንደሚያሳውቅ ጠቁሟል፡፡

የማኅበሩ ዋና ሥራ አስኪያጅ አቶ አየለ ሳህሌ አዲስ የወጣው መመርያ 139/2010 በግምት ለመወሰን የሚያስችል መሆኑን ገልጸው፣ መመርያው የሚያስከትለውን ተግዳሮትና ችግር መግለጽና መፍትሔውንም መሻት የሚቻለው በግብታዊነት በመነሳሳት ሳይሆን፣ ጉዳዩ ከሚመለከተው መንግሥታዊ አካላት ጋር የተጀመረውን እንቅስቃሴ በሰከነና በተረጋጋ መንፈስ እንዲቀጥል በማድረግና ለተግባራዊነቱም ማኅበሩና አባላቱ የሚፈለግባቸውን በማበርከት መሆኑን አስረድተዋል፡፡

የኢትዮጵያ የአገር ውስጥ ቄራዎችና ልኳንዳዎች ዘርፍና የአዲስ አበባ ልኳንዳ ነጋዴዎች ማኅበር የቦርድ ሰብሳቢ አቶ ወልደገብርኤል አባተ፣ ‹‹አዲስ የወጣው የታክስ አሰባሰብ መመርያ በፈጠረው ብዥታ ሳቢያ በአንዳንድ ልኳንዳ ነጋዴዎች ዘንድ የሚታየው ልኳንዳ ቤትን የመዝጋት አዝማሚያ ፈጽሞ ተቀባይነት የለውም፤›› ብለዋል፡፡

የችግሩን አሳሳቢነት ለመንግሥት በማሳወቅ፣ በመደማመጥና በመስማማት መፍትሔውን መሻት በእጅጉ አስፈላጊና ዘመናዊነትን የተላበሰ አካሄድ መሆኑንም አመልክተዋል፡፡

በአዲስ አበባ ከተማ አስተዳደር የንግድና ኢንዱስትሪ ልማት ቢሮ የንግድ ኢንስፔክሽንና ሬጉላቶሪ ዳይሬክቶሬት ዳይሬክተር አቶ ሀብታሙ ጥላዬ ስለዚሁ ጉዳይ በስልክ ተጠይቀው፣ በከተማ በተለያዩ አካባቢዎች አራት የቁም እንስሳት ገበያ ማዕከላት መቋቋማቸውን ገልጸው፣ ከእነዚህም መካከል የቄራ የቁም እንስሳት ገበያ ማዕከልና የለገጣፎ የቁም እንስሳት ገበያ ጊዜያዊ ማዕከል ሕገወጥ እንቅስቃሴ ይዘወተርባቸዋል፣ የሸጎሌና አቃቂ የቁም እንስሳት ገበያ ማዕከላት ግን ከፍ ብሎ የተጠቀሰው ችግር እምብዛም አይታዩባቸውም ብለዋል፡፡

በዚህም የተነሳ በቄራና በለገጣፎ ማዕከላት የሚታዩትን እኩይና መጥፎ እንቅስቃሴዎች የማስተካከልና ወደ ሕጋዊ መስመር እንዲገቡ የማድረግ ሥራ ተጠናክሮ መቀጠሉን አመልክተዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

በሥጋ ላይ አላግባብ እየተጨመረ ያለውን ዋጋ መንግሥት ሊቆጣጠረው ይገባል

በአገራችን የግብይት ሥርዓት ውስጥ ኢኮኖሚያዊ ያልሆኑ ወይም ያልተገቡ የዋጋ...

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት...

የፖለቲካ ቅኝቱ የሕዝባችንን ታሪካዊ ትስስር ለምን አያከብርም?

በንጉሥ ወዳጅነው የዓብይ አህመድ (ዶ/ር) መራሹ የ2010 ዓ.ም. የለውጥ መንግሥት...

ዛሬም ኧረ በሕግ!

በገነት ዓለሙ በዚህ በያዝነው ሚያዝያ/ግንቦት ወይም ሜይ ወር ውስጥ የተከበረው፣...