Saturday, November 26, 2022
ሌሎች ዓምዶች
    - ማስታወቂያ -
    - ማስታወቂያ -

    የአፍሪካ የቆዳ ዘርፍና የፋሽን ዓውደ ርዕይን ባጣመረው መድረክ ከስምንት ሺሕ በላይ ጎብኚዎች ይጠበቃሉ

    - ማስታወቂያ -

    ተዛማጅ ፅሁፎች

    ፋሽን ሳምንት የተሰኘውን የፋሽን ትዕይንት ከቆዳና ቆዳ ውጤቶች በማጣመር በሚቀርበው ዓውደ ርዕይ ከ8,000 በላይ ጎብኚዎች እንደሚሳተፉበት ይጠበቃል፡፡ ዓውደ ርዕዩ ከጥቅምት 29 እስከ ኅዳር 2 ቀን 2012 ዓ.ም. በሚሊኒየም አዳራሽ ይካሄዳል፡፡

    ከ40 በላይ አገሮች የተውጣጡ 280 የውጭ አምራቾች በሚሳተፉበት ዓውደ ርዕይ፣ በርካታ ምርቶቻቸውና የፈጠራ ውጤታቸውን እንደሚያቀርቡ የዓውደ ርዕዩ አዘጋጅ አቶ እስክንድር ነጋሽ ገልጸዋል፡፡ ይህንን በማስመልከት ማክሰኞ ጥቅምት 25 ቀን 2011 ዓ.ም. በተሰጠው ጋዜጣዊ መግለጫ ላይ ከቆዳ ኢንዱስትሪ አምራቾች እንዲሁም ከጨርቃ ጨርቅ ኢንዱስትሪው ተወካዮች ተገኝተዋል፡፡

    ለአምስተኛ ጊዜ የሚካሄደው የአፍሪካ ፋሽን ሳምንት ትኩረቱን በአብዛኛው በቆዳ ምርቶች ላይ ቢያደርግም በጨርቃ ጨርቅ ውጤቶችና አልባሳት፣ በጫማ፣ በቤት ጌጣጌጥና በፋሽን ዲዛይኖች ላይ እንደሚያተኩር ሲገለጽ፣ ባለፈው ዓመት ከተካሄደው የፋሽን ሳምንት ትዕይንት አኳያ በዚህ ዓመት በሚካሄደው የፋሽን ሳምንት የሚታደሙ የጎብኝዎች ቁጥር በ20 በመቶ እንደሚያድግ፣ ምርቶቻቸውን የሚያቀርቡ ተሳታፊዎች ቁጥርም በተመሳሳይ በ20 በመቶ እንደጨመረ ተገልጿል፡፡

    ከአፍሪካ ፋሽን ሳምንት ጎን ለጎን ለ11ኛ ጊዜ የሚሰናዳው የመላው አፍሪካ የቆዳና የቆዳ ምርቶች ዓውደ ርዕይ፣ አሥር ከደቡብ አፍሪካ የመጡ ቆዳና የቆዳ ውጤት አምራቾች በዓውደ ርዕዩ ምርቶቻቸውን ያቀርባሉ፡፡ ይህ ዓውደ ርዕይ ለአሥረኛ ጊዜ በተካሄደበት ወቅት የተሳተፉት አምራቾች በ20 በመቶ እንዲሁም የጎብኝዎች ቁጥርም በ25 በመቶ ማደጉ ተገልጿል፡፡

    በዘንድሮው ዓውደ ርዕይ ከጀርመን፣ ከፖርቹጋል፣ ከፈረንሣይ፣ ከቻይና፣ ከፓኪስታን እንዲሁም ከምሥራቅ አፍሪካ የተውጣጡ አምራቾች ምርቶቻቸውን ለታዳሚው እንደሚያቀርቡ አቶ እስክንድር ገልጸዋል፡፡

    የኢትዮጵያ ጨርቃ ጨርቅና ኢንዱስትሪ ልማት ኢንስቲትዩት ዋና ዳይሬክተር አቶ ስለሺ ለማ እንደገለጹት፣ ለአምስተኛ ጊዜ የሚካሄደው የአፍሪካ ፋሽን ሳምንት ትልቅ ትኩረት ይሰጠዋል፡፡ አቶ ስለሺ እንዳሉት፣ የፋሽን ሳምንቱ ዋና ዓላማ የአገሪቱን የጨርቃ ጨርቅ ኢንቨስትመንት ማሳደግ፣ የንግድ ትስስሩን ማጠናከር እንዲሁም የቴክኖሎጂ ሽግግሩን ለማስፋፋት ያግዛል፡፡

    ‹‹በጨርቃ ጨርቅ ላይ ትኩረት ያደረግንባቸው የኢንዱስትሪ ፓርኮች ጥሩ ምላሽ እየሰጡን ነው፤›› የሚሉት አቶ ስለሺ፣ እንዲህ ያሉ ዓውደ ርዕዮችም ለዘርፉ ሁነኛ የገበያ ዕድል በመፍጠር አቅም ያላቸው ደንበኞች ወይም ምርት ገዥዎችን ከማግኘት አኳያ ከፍተኛ ሚና ይጫወታል ብለዋል፡፡ አክለውም እንደዚህ ዓይነት ዓውደ ርዕዮች የኢትዮጵያን መጥፎ ምልከታዎች ለመቀየር የሚጫወቱት ሚናም ቦታ እንደሚጠው ገልጸዋል፡፡

    የኢትዮጵያ ቆዳ ኢንዱስትሪ ልማት ኢንስቲትዩት ምክትል ዳይሬክተር አቶ ኃይለ ቂርቆስ ደበሳይ በበኩላቸው፣ ኢትዮጵያ ከዓለም የእንስሳት ሀብት መጠን ስድስተኛ ደረጃ ላይ እንደምትገኝ አውስተዋል፡፡ በዚህ ዘርፍ ላይ የዓለም አገሮች በሰፊው እየተንቀሳቀሱ መሆኑን በመግለጽ፣ ‹‹በገበያ መዳረሻ እንዲሁም በሥራ ፈጠራ የእኛ ድርሻ አነስተኛ ነው፤›› ብለዋል፡፡

    የቆዳ ኢንዱስትሪው ዋናው ማነቆ የግብዓት ትስስር የሚደረግበት መድረክ አለመኖሩ እንደሆነ ገልጸው፣ የቆዳውን ዘርፍ ዕድገት ተከትሎ ዓውደ ርዕዩ ከፍተኛ ሚና እንደሚጫወት ተናግረዋል፡፡ የዚህ ዓውደ ርዕይ አዘጋጁ መቀመጫውን በጀርመንና በኬንያ ያደረገ የንግድ ዓውደ ርዕይ ቡድን ነው፡፡

    በ2011 ዓ.ም. ከጨርቃ ጨርቅ ዘርፉ 155 ሚሊዮን ዶላር የውጭ ምንዛሪ የተገኘ ሲሆን፣ ከቆዳ ዘርፉ 134 ሚሊዮን ዶላር ተሰብስቧል፡፡ ከዚሁ ጋር በተያያዘም ከሳምንት በፊት የጨርቃ ጨርቅ ኢንዱስትሪውን ለመደገፍ የጀርመን ልዑካን ከንግድና ኢንዱስትሪ ሚኒስቴር ጋር የመግባቢያ ሰነድ መፈራረማቸው ታውቋል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች