Saturday, May 18, 2024
- Advertisement -
- Advertisement -

የተመረጡ ፅሑፎች

የሰላም የህልውና ዋጋችን በእጃችን

ሰላም የሁሉ ነገር መሠረት ነው፡፡ ሁሉ የሚሆነው ሰላም ሲኖር ነው፡፡ ሰላም ከሌለ ወደፊት መራመድ አይቻልም፡፡ ፋብሪካ ገንብቶ ዜጎች ከሥራ አጥነት እንዲላቀቁ ማድረግ አይቻልም፡፡ የተሻለ አስቦ የተሻለ አገር መገንባትም አይሆንም፡፡

ሰላም ከሌለ ሸምቶ መግባት፣ ሸጦ መለወጥ ይቸግራል፡፡ ስለዚህ ሰላማችንን ለሚያበዛ ጉዳይ ዋጋ እንስጥ፡፡ ለሰላም የምንሰጠው ቦታ እንደ አገር የሰፋ መሆን አለበት፡፡ አገራችን የመለወጥና የማደግ ተስፋዋ ሰፊ በመሆኑ፣ ከልብ ከሠራን ወደምንፈልገው ከፍታ ለመድረስ ዕድሎች አሉን፡፡ ይሁን እንጂ ለብዙዎች ያልተገለጠና አልታይ ያላቸው ነገር አለ፡፡ በዓለም ደረጃ ኢትዮጵያ እያገኘች ያለችው ተቀባይነትና መልካም ዕይታ ነገሮች ብሩህ ስለመሆናቸው የሚያመለክቱ ቢሆኑም፣ እነዚህን መልካም አጋጣሚዎች ተጠቅመን ለመለወጥና ሰው የደረሰበት ለመድረስ የግድ ሰላምና አብሮነት ያስፈልገናል፡፡

በዕለት ተዕለት እንቅስቃሴያችን ውጤታማ ለመሆን፣ ሠርቶ ለመለወጥ የሚደረጉ መፍጨርጨሮችን የሚጎዱ ሁከቶችና ግጭቶች ብሎም ደም አፋሳሽ እኩይ ተግባራትን እያስተናገድን እንገኛለን፡፡ በረባ ባረባው ሰላምን የሚያደፈርሱ ተግባራት  ዋጋ እያስከፈሉን ነው፡፡ ዓለምም የሰጠንን ግምትና ክብር በውርደት እንዲቀይረው የመወትወት ያህል የኋልዮሽ እያንጋደደን ነው፡፡

በትንሹም በትልቁም ሰላማችንን የሚያደፈርሱ ክስተቶች እየገጠሙን አንዱን ስንፈታ ሌላው እየተተካ ለህልውናችን አደጋ የመሆኑ ጉዳይ ሊያሳስበን ይገባል፡፡ ግጭቶቹንና አለመግባባቶቹን በማስቆም የወደፊታችን ላይ ዛሬ ካልተረባረብን ነገራችን ሁሉ የእንቧይ ካብ መሆኑ አያጠያይቅም፡፡ ችግሮቻችንን በሠለጠነ መንገድ መፍታት ያስፈልገናል፡፡ ሰላም በሚያሳጡን እንቅፋቶች ላይ ሰከን ብለን ልንመክር፣ ያጠፋም እንደጥፋቱ ሊቀጣ፣ የተበደለም እንደበሉ ሊካስ የሚችልበት ልበ ገብ ሥርዓት ያስፈልገናል፡፡ ሁልጊዜ እንደ ወራጅ ውኃ በመጣ በሄደው መንገድ መነዳት ከአሁኑም በላይ ጠባሳ ያሳርፍብናል፡፡ በመሆኑም ሰላማችንን ከሚነሱ ተግባራት መቆጠብ እንዳለ  ሆኖ ለሰላም መደፍረስ ምክንያት የሚሆኑ ወገኖችንም አደብ ማስገዛት ካልተቻለ የነገው ወጋገናችን ይጨልማል፡፡ የልማት ሽላችን ይጨነግፋል፡፡

ስለዚህ እንደ አገር ወዳድ ሕዝብ ተባብረንና ተጋግዘን ለመቀጠል ሰላማችን መጠበቅ አለበት፡፡ ዜጎች ያለ ሥጋት መንቀሳቀስና መሥራት መቻል አለባቸው፡፡ ከዛሬ ነገ መንገድ እየተዘጋ ምን ይመጣብኝ ይሆን በማለት ከመሳቀቅ መውጣት አለብን፡፡ አጉራህ ተናኝ ዓይነት መፈራገጥ ለማናችንም አይበጀንም፡፡ መብትን ለመጠየቅና የልዩነት አቋምን ለመግለጽ መንገድ መዘጋት መፍትሔ አይሆንም፡፡ ኢኮኖሚያዊ እንቅስቃሴዎችን መግታት ጉዳቱ ለሁሉም ነው፡፡ ጥያቄ ያለው በሰላማዊ መንገድ መጠየቅ፣ እምቢኝ ያለውንም በየመረጃ ማሰራጫ ዘዴዎች ማሳጣት እየተቻለ እምቦቀቅላ ሕፃናት ሳይቀር በነውጥ መካከል ተውጠው እንዲኖሩ ማድረግ ከሰብዓዊነት ማነስ ነው፡፡ ብትርና ድንጋይ እየያዙ በየመንገዱ ማስፈራራት፣ ጎማ እያቃጠሉ አገር ማሸበር ውሎ አድሮ ትልቅ አደጋ ይጋብዛል፡፡

ዜጎች አሻጋሪ የሆነ አመለካከት እንዲኖራቸው፣ መፍትሔ ሰጪዎች እንዲሆኑ ሁሉም የኅብረተሰብ ክፍል የድርሻውን መወጣት አለበት፡፡ ችግሮችን በሕግ አግባብ መፍታትና ሥርዓት ማክበር ለሁሉም ይበጃል፡፡ ችግሮች በተፈጠሩ ቁጥር የምንከፍለው ያልተገባ ዋጋ በተለይ ክቡር የሆነውን የሰው ሕይወት መቀጠፉና ንብረት መውደሙ ለማንም አይጠቅምም፡፡ ቂምም እያተረፈ ለአስከፊ ውርደት የሚያንደረድር ሰቆቃ ውስጥ ይከታልና እስኪ ጥቂት ሰከን እንበል፡፡

ወደፊት እንድንጓዝ ብዙዎች እየደገፉን ነው፡፡ በርካታ ቀዳዳዎችና የተከማቹ ችግሮቻችንን ሊያቃልሉ የሚችሉ ዕርዳታዎችን በተለያዩ መንገዶች እያገኘን ነው፡፡ ለአገራችን ወሳኝ የሚባሉ ሥራዎችን ማስፈጸሚያ ድጋፎች እያገኘን በመሆናችን ለሥራ መታተር አለብን፡፡ ከወዲሁ ተስፋ የሚሰጡ ውጤቶችንም እያየን ነው፡፡ አንዳንዶቹንም ነገ የምናያቸው ናቸው፡፡

አገር በድጋፍና በሌሎች እገዛ ብቻ ብዙ አትራመድም፡፡ መሠረቷ ዜጎቿ ናቸው፡፡ ችግራችንን እኛው በዘለቄታው ካልፈታን በቀር የውጭ ድጋፍ ከወረት አያልፍም፡፡ በዚህ መቀጠል እንደማይቻል ልብ ያለው ይገነዘበዋል፡፡ ሠርተን በላባችን በጋራ አገራችን ውስጥ የምናፈራው ሀብት፣ አምርተን የምንጋራው ወረት ሊኖረን ይገባል፡፡ ለዚህ ጊዜው አሁን ነው፡፡ ዜጎች ከዕለት ጉርስ ጀምሮ ሌሎችም ፍላጎታቸውን ለማሟላት የሚችሉት ከልብ ሲሠሩና ሲተባበሩ ነው፡፡ ቅያሪ አገር የለን፡፡ ባለችን እንተጋገዝና እንደግ እንጂ ጃል፡፡ ብዙ ሥራ የሚጠብቃት ይህች ኢትዮጵያችን ወደምትፈልገው ከፍታ ወጥታ ሕዝቦቿም ከድህነት ምሳሌ እንዲላቀቁ ሰላማችን መብዛትና መለያችን መሆን መቻል አለበት፡፡ አለያ በትርምስ የደቀቀ ኢኮኖሚያችን ጭርሱኑ እንዳናጠፋውና እኛም እንዳንጠፋ አስጊ ነው፡፡

እንዳለመታደል ጭላንጭሉ መታየት የጀመረውን ተስፋ የሚያደበዝዙ፣ በተገቢው ፍጥነት መራመድ እንዳንችል የሚጋርዱ ሰላም አደፍራሽ ድርጊቶች ይቺን አገር እያሳመሟት ነው፡፡ የሕፃናት ልቅሶና ዋይታ እየበረከተ ነው፡፡

ሕፃናት ወተት የማይጠጡበት፣ ለሸማች የተጫኑ ምርቶች መንገድ እየተዘጋባቸው በየቦታው ሲቆሙ ማየት ከከፋም ሲቃጠሉ መታዘብ ልማድ እየሆነ መጥቷል፡፡ ይህ ሁሉ ክፋት ብዙ መዘዝ እንዳያመጣብን ከራሳችንም ከምድራችን እንታረቅ፡፡

በምንም ሁኔታ እንዲህ ያለው አጉራ ዘለልነት መገታት አለበት፡፡ በየአካባቢው የጎበዝ አለቃ እየሆኑ መንገድ የሚዘጉ ጎረምሶች፣ ሰላም የሚያውኩ እኔ አውቅልህ ባዮች፣ የእኛ ድምፅ ካልተሰማ በቀር የሙጥኝ ያሉ ወገኖች የተሻለውን እንዲያዩ ብቻም ሳይሆን፣ ሕግንም እንዲያውቁ መደረግ አለባቸው፡፡ አገር የጋራችን ነች፡፡

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት