Monday, June 17, 2024

ለክቡር ሚኒስትሩ የቀድሞ ሚኒስትር ስልክ ደወሉላቸው

[ክቡር ሚኒስትሩ ከደላላ ወዳጃቸው ጋር ቢሯቸው እያወሩ ነው]

  • ይገርማል ክቡር ሚኒስትር፡፡
  • ምኑ ነው የሚገርመው?
  • በቃ ተተኮስን፡፡
  • ማን ነው የተተኮሰው?
  • በአንድ ጀንበር እኮ ነው የተተኮስነው፡፡
  • ምንድነው የምታወራው?
  • ተቸበቸበ እኮ፡፡
  • ምኑ?
  • ችግኙ ነዋ፡፡
  • ምን ጥያቄ አለው?
  • እኔ እንደዚህ ይሆናል ብዬ አልጠበኩም፡፡
  • እንዴት?
  • ያው ሕዝቡ አልተደመረም ብዬ ነዋ ክቡር ሚኒስትር፡፡
  • ሕዝቡ እኮ በልቡ ተደምሯል፡፡
  • እሱንማ አሁን በሚገባ አረጋግጫለሁ፡፡
  • እንዴት?
  • ይኼን ያህል ሕዝብ በችግኝ ተከላው ይሳተፋል ብዬ አልጠበኩማ፡፡
  • ሕዝቡ እኮ ለውጥ የተራበ ነው፡፡
  • አዎን ግን አሁን አሁን እኮ ለውጡን እየተጠራጠረው ነበር፡፡
  • እንዴት ሆኖ?
  • በቃ አብዛኛው ሰው ለውጡ አቅጣጫውን ስቷል እያለ ነበራ፡፡
  • እንዴት አድርጎ ነው ለውጡ አቅጣጫውን የሳተው?
  • ክቡር ሚኒስትር አገሪቱ እኮ ከነበረችበት ችግር የባሰ እየገጠማት ነው የሄደችው፡፡
  • ይህ የፀረ ለውጡ አራማጆች ሐሳብ ነው፡፡
  • በመሬት ላይ ያለውም ሀቅ ግን እንደዚያው ነው፡፡
  • እንዴት?
  • ማለቴ ኢኮኖሚው አይሉ ፖለቲካው ሁሉም ነገር ተቃውሶ ነበር፡፡
  • ያው ሊነጋጋ ሲል ይጨልማል አይደል የሚባለው?
  • ቢሆንም ክቡር ሚኒስትር አገሪቱ እኮ የመፍረስ ጫፍ ላይ ናት፡፡
  • እ…
  • ይኸው በየጊዜው የሚፈናቀለው ሕዝብ ብዛት ከዓለም ራሱ አንደኛ አድርጎናል እኮ፡፡
  • ምን ይደረግ ታዲያ?
  • በዚህ ሁሉ ቀውስ ውስጥ ታዲያ እንዲህ ዓይነት የሕዝብ ንቅናቄ በጣም ያስገርማል፡፡
  • ሕዝቡማ ለአገሩ ያለውን ፍቅር በሚገባ አስመስክሯል፡፡
  • ለማንኛውም ክቡር ሚኒስትር እኛ በግርግሩ አምልጠናል፡፡
  • ጥሩ ተሸቀለ?
  • ምን ጥያቄ አለው፡፡
  • ለነገሩ በችግኝ ተከላው እኮ የራሳችንንም ሪከርድ ሰብረነዋል፡፡
  • ሰሞኑን ምን ያልተሰበረ ሪከርድ አለ?
  • ደግሞ ሌላ የምን ሪከርድ ተሰበረ?
  • እርስዎም ሪከርድ ሰብረዋል፡፡
  • የምን ሪከርድ?
  • የኮሚሽን!

[ክቡር ሚኒስትሩ ከአንድ የፖለቲካ ተመራማሪ ጋር ተገናኝተው እያወሩ ነው]

  • በጣም ደስ ይላል ክቡር ሚኒስትር፡፡
  • ምኑ?
  • የሰሞኑ የችግኝ ተከላ እንቅስቃሴ ነዋ፡፡
  • እኛ እኮ የተግባር ሰዎች ነን፡፡
  • እርሱን እንኳን ተውት፡፡
  • ምነው?
  • አሁን የፖለቲካ ዲስኩርዎትን እንዲያሰሙኝ አልፈልግማ፡፡
  • ይኼ እኮ ዲስኩር ሳይሆን ሀቅ ነው፡፡
  • ክቡር ሚኒስትር እናንተ እኮ የምትተቹት እንዲያውም በዚህ ነው፡፡
  • በምን?
  • የተግባር ሰዎች አይደሉም ተብላችሁ ነዋ፡፡
  • ይኸው አረጋገጥን አይደል እንዴ?
  • በእርግጥ በችግኝ ተከላው ጥሩ ሥራ ነው የተሠራው፡፡
  • ገና ሌላ ብዙ እንሠራለን፡፡
  • ለጊዜው ጉራውን ተውትና ሕዝቡን ማመስገን አለባችሁ፡፡
  • እሱማ ግዴታ ነው፡፡
  • ሕዝቡ የፖለቲካ ልዩነቱን ወደጎን ትቶ እንዲህ በነቂስ ወጥቶ በችግኝ ተከላው በመሳተፉ ሊመሰገን ይገባዋል፡፡
  • እውነት ብለሃል፡፡
  • ግን ክቡር ሚኒስትር ሕዝቡ ምን ያህል አገሩን እንደሚወድ አላያችሁም፡፡
  • በደንብ ነው እንጂ ያየነው፡፡
  • ታዲያ ለምን ታባሉታላችሁ?
  • እ…
  • አሁን ይኼን ታሪክ የሠራ ሕዝብ በብሔር ከፋፍላችሁ ማባላቱ ጠቃሚ ነው ትላላችሁ?
  • ኧረ እኛ መቼ አባላነው?
  • ተው እንጂ ክቡር ሚኒስትር፡፡
  • ምነው?
  • ሰው መቼ ከቦታ ቦታ እንደፈለገው ተንቀሳቅሶ ይኖራል፡፡
  • ይኼ እኮ የአንዳንድ ጠባቦች ሴራ ነው፡፡
  • ይኸው በቅርቡ እንኳን በክልልነት ጥያቄ ቀውስ ስንቶች አይደል እንዴ የተጎዱት?
  • ልክ ነህ፡፡
  • አሁን ደግሞ ሕዝቡ አገራዊ ጥሪ ሲቀርብለት መቼ አሳፈራችሁ?
  • እኛም ከጠበቅነው በላይ ነው የሆነብን፡፡
  • ታዲያ እናንተ ለፖለቲካ ቁማራችሁ እያላችሁ ሕዝቡን ማለያየቱ አይቀርባችሁም?
  • ምን እያልክ ነው?
  • ክቡር ሚኒስትር አገሪቱ ወዳልተፈለገ አቅጣጫ እያመራት ያለችው በእናንተ ፖለቲከኞች ስግብግብነትና ራስ ወዳድነት እንጂ ሕዝቡ መቼም ቢሆን ለአገሩ ቅድሚያ እንደሰጠ ነው፡፡
  • እሱንማ አሁን በሚገባ ተረድተናል፡፡
  • ለማንኛውም ሕዝቡን በብሔር እየከፋፈሉ ማባላት ለማንም አይጠቅምም፡፡
  • እ…
  • ስለዚህ ልዩነታችንን ለጊዜው ወደጎን ትተን መተባበሩ ይጠቅመናል፡፡
  • እውነት ነው፡፡
  • አገሪቱ ላለችበት ችግርም መፍትሔው ተገኝቷል፡፡
  • ምንድነው?
  • አንድነት!

[ክቡር ሚኒስትሩ ከአንድ የፖለቲካ ፓርቲ መሪ ጋር ተገናኝተው እያወሩ ነው]

  • ለመሆኑ ተሳተፍክ?
  • በምኑ?
  • በችግኝ ተከላው ነዋ፡፡
  • ምን ዓይነት ጥያቄ ነው?
  • ምኑ ነው ያልገባህ?
  • ጥያቄው ነዋ፡፡
  • እንዴት?
  • ችግኝ መትከል እኮ አገራችንን ነው የሚጠቅመው፡፡
  • እኔም እኮ ለዚያ ነው የጠየቅኩህ?
  • ተክያለሁ ክቡር ሚኒስትር፡፡
  • ያው የፖለቲካ ልዩነት ስላለን ምናልባት ላትተክል ትችላለህ ብዬ ነው፡፡
  • ክቡር ሚኒስትር ችግኝ እኮ ፓርቲ የለውም፡፡
  • ቀልደኛ ነህ መቼም?
  • መቼ ነው ግን የሚለወጠው ክቡር ሚኒስትር?
  • ምኑ?
  • የፖለቲካ ሥርዓታችን ነዋ፡፡
  • እንዴት?
  • አገራዊ አጀንዳ ላይ እኮ አንድ ላይ እንተባበራለን ብለን ማሰብ ካልቻልን ያሳዝናል፡፡
  • ያው የፖለቲካ ሥርዓታችን እኮ ሴራ ላይ የተመሠረተ በመሆኑ ነው፡፡
  • ለነገሩ በብቃትና በአቅም ላይ ቢመሠረት ኖሮ አገራችን አሁን ያለችበት ችግር ውስጥ ባልተዘፈቀች ነበር፡፡
  • የምን ችግር ነው?
  • ምን ችግር ውስጥ ያልተዘፈቀ ነገር አለ፡፡
  • እ…
  • ፖለቲካው ቢሉ ኢኮኖሚው፣ ሁሉ ነገር መላ ቅጡ ጠፍቶታል አይደል እንዴ?
  • ያው ለውጥ ላይ ስለሆንን ነዋ፡፡
  • ክቡር ሚኒስትር ለሁሉም ችግር እኮ ለውጡ ሰበብ መሆን አይችልም፡፡
  • ምን?
  • የሆነ ችግር ሲመጣ ለውጥ ላይ ስለሆንን እየተባለ መድበስበስ የለበትም፡፡
  • ለውጡን አትደግፈውም ማለት ነው?
  • ለውጡን ሳይሆን በአገሪቱ ያለውን ቀውስ ነው የማልደግፈው፡፡
  • እ…
  • እናንተ አሁን አሁን ለውጡን እንደ ማርያም መቀነት እያደረጋችሁት ነው፡፡
  • ምን?
  • ለሁሉም ችግር ለውጡ ላይ ነው የምታላክኩት፡፡
  • የለውጡ ተቃዋሚ መሆንህን በሚገባ ተረድቻለሁ፡፡
  • እንዳይመስልዎት ክቡር ሚኒስትር፡፡
  • ስለዚህ በቅርቡ ተደራጅታችሁ መንቀላችሁ አይቀርም፡፡
  • ምንድነው የምንነቅለው?
  • የተተከሉትን ችግኞች ነዋ፡፡
  • ክቡር ሚኒስትር በአገሪቱ ከችግኝ ነቀላ በላይ የሚያሳስብ ነገር አለ፡፡
  • ምን?
  • የሕዝብ ነቀላ!

[ለክቡር ሚኒስትሩ የቀድሞ ሚኒስትር ስልክ ደወሉላቸው]

  • እንኳን ደስ አለዎት ክቡር ሚኒስትር፡፡
  • ለምኑ?
  • ለሪከርዱ፡፡
  • እኛ እኮ ሪከርድ መስበር የለመደብን ነን፡፡
  • ለነገሩ 100 ፐርሰንት ምርጫ በማሸነፍ ሪከርድ የያዝን ፓርቲ ስለሆንን ይኼኛው ብዙም ላያስደንቅ ይችላል፡፡
  • ምን?
  • ምነው ክቡር ሚኒስትር?
  • አሁን የእኛን ስም ለማጠልሸት ነው ከማይነፃፀር ነገር ጋር ይኼን የችግኝ ተከላ የምታነፃፅረው?
  • ምን ችግር አለው ክቡር ሚኒስትር?
  • እንዴት ችግር የለውም?
  • 100 ፐርሰንት ፓርላማ ማሸነፋችንን ያፍሩበታል ማለት ነው?
  • እ…
  • እናንተ ቀጣዩ ምርጫ በተያዘለት ፕሮግራም ላይካሄድ ይችላል እያላችሁ አይደል እንዴ?
  • ማን አለ?
  • እሱን እንኳን ተውት፡፡
  • ምን?
  • ለማንኛውም  እንኳን ደስ አለዎት፡፡
  • ለመሆኑ አንተ ችግኝ ተክለሃል?
  • እኔማ ከትጥቅ ትግል ጀምሮ ነበር የምተክለው፡፡
  • የምቆርጠው ማለትህ ነው?
  • ምን እያሉ ነው ክቡር ሚኒስትር?
  • እናንተ አይደላችሁም እንዴ አገሪቱን ባዶ ያስቀራችኋት፡፡
  • ምን?
  • የአገሪቱን ደን እየጨፈጨፋችሁ ስትሸጡ ነበር እኮ፡፡
  • ማን ነው ያለው?
  • እናንተ መቁረጥ እንጂ መትከል አትችሉም፡፡
  • እ…
  • ባይሆን በመትከል የታወቃችሁበት ነገር አለ፡፡
  • ምን በመትከል ነው የታወቅነው?
  • ችግር!

በብዛት የተነበቡ ፅሁፎች

- Advertisment -

ትኩስ ፅሁፎች

የምግብ ዋጋ ንረት አጣዳፊ ዕርምጃ ያስፈልገዋል!

መንግሥት የሚቀጥለውን ዓመት በጀት ይዞ ሲቀርብ በአንገብጋቢነት ከሚነሱ ጉዳዮች...

ከባለአንድ ዋልታ ወደ ባለብዙ ዋልታ የዓለም ሥርዓት የመሸጋገራችን እውነታ

በአብዱ ሻሎ አንገት ማስገቢያ እ.ኤ.አ. በፌብሩዋሪ 2022 የሩሲያ መንግሥት በዩክሬን ‹‹ልዩ...

የኢትዮጵያ ኦርቶዶክስ ተዋሕዶ ቤተ ክርስቲያን የውጭ ግንኙነት የሺሕ ዘመናት ታሪኳና እሴቶቿን የሚመጥን መሆን ይኖርበታል

(ክፍል አንድ) በተረፈ ወርቁ (ዲ/ን) እንደ መንደርደሪያ ለዛሬው የግል ትዝብቴንና ታሪክን ላዛነቀው...

ከአገር ግንባታ ጋር የተያያዙ ወሳኝ የቅርብ ታሪካችን አንጓዎች

በታደሰ ሻንቆ በአያሌው የተመረጡና ልጥ የሌላቸው ነጥቦች የተደራጁበት ይህ ታሪክ...
spot_img

ተዛማጅ ፅሁፎች

[ክቡር ሚኒስትሩ በመንግሥት የሚታወጁ ንቅናቄዎችን በተመለከተ ባለቤታቸው ለሚያነሱት ጥያቄ ምላሽ ለመስጠት እየሞከሩ ነው]

እኔ ምልህ? እ... ዛሬ ደግሞ ምን ልትይ ነው? ንቅናቄዎችን አላበዙባችሁም? የምን ንቅናቄ? በመንግሥት የሚታወጁ ሕዝባዊ ንቅናቄዎችን ማለቴ ነው። ምን ታወጀ? አንዴ ከዕዳ ወደ ምንዳ አላችሁ፡፡ እሺ? የእሱን ውጤት እየጠበቅን ሳለ ደግሞ... እ...? ኢትዮጵያ ታምርት...

[ክቡር ሚኒስትሩ ሰሞኑን በተጀመረው አገራዊ የምክክር መድረክ ላይ ስለተላለፉ መልዕክቶች በተመለከተ ከባለቤታቸው ጋር እያወጉ ነው] 

እኔ ምልህ? እ... አንቺ የምትይው? አለቃህ በምክክር መድረኩ ላይ ያስተላለፉትን መልዕክት አደመጥክ? አዎ፡፡ የሚገርም እኮ ነው አልተገረምክም? ምኑ ነው የሚያስገርመው? ለኢትዮጵያ የሚበጀውን ምከሩና አምጡ ብለው የምክክር መድረክ እንዲዘጋጅ ካደረጉ በኋላ...

[የክቡር ሚኒስትሩ ባለቤት የኬንያው ፕሬዚዳንት ያስተላለፉትን መልዕክት ተመልክተው ባለቤታቸውን በነገር ይዘዋቸዋል]

የኬንያው ፕሬዚዳንት ከሕዝባቸው ለቀረበባቸው ቅሬታ የሰጡትን ምላሽ ሰማህ? እንኳን ምላሻቸውን ቅሬታውንም አልሰማሁም። እንዴት? አልሰማሁማ? የምን ቅሬታ ቀርቦባቸው ነው? ሰሞኑን ወደ አሜሪካ ለመጓዝ ውድና ቅንጡ አውሮፕላን ተከራይተዋል የሚል ቅሬታ...