Tuesday, May 21, 2024
- Advertisement -
- Advertisement -

የተመረጡ ፅሑፎች

ከዘመቻ መልስ እንዴት እንመላለስ?

በመላ ኢትዮጵያ የሚካሄደው የዛፍ ችግኝ ተከላ በአብዛኛው የሁላችንን ትኩረት ስቦ ሰንብቷል፡፡ ሚዲያዎችም በሰፊው የሚያስተጋቡት ዓብይ ጉዳይ ሆኗል፡፡ ሐምሌ 22 ቀን 2011 ዓ.ም. በአንድ ቀን 200 ሚሊዮን ችግኞችን ለመትከልም ዝግጅቶች ተጠናቀዋል፡፡

በአገሪቱ ዳርቻዎች ሁሉ ሲደረጉ የሰነበቱ ዝግጅቶች የታቀደውን በሙሉ ድርሻ ለመተግበር እንደሚያስችሉ ይታመናል፡፡ ይህ አገራዊ ንቅናቄ ጠቀሜታው አያጠያይቅም፡፡ ለሌሎች የጋራ ተነሳሽነታችን ምሳሌ እንደሚሆን መናገር ይቻላል፡፡ አገርን በጋራ ተባብሮ ማልማት እንደሚቻልም ማሳያ ነው፡፡ ኢትዮጵያ ከምትገኝበት የተመናመነ የደን ሽፋን አኳያ ዘመቻው በዘንድሮው ክረምት ብቻ እንደማይወሰን፣ ይልቁንም የወደፊት የቤት ሥራችን የትዬለሌ እንደሆነ የምንገነዘብበት አጋጣሚ ነው፡፡

የችግኝ ተከላው ከዚህ ቀደም ይደረጉ ከነበሩት በተለየ ቅንጅትና ትብብር መከናወኑ መልካም ውጤት እንድንጠብቅ የሚያነሳሳ በጎ ጅምር ነው፡፡ ተደጋግሞ እንደገተለጸውም ችግኝ መትከሉ ብቻም ሳይሆን ተንከባክቦ በማሳደግ ውጤት ማምጣቱ ላይም የሙጥኝ ማለት ይገባል፡፡ ይህ ሲደረግ ወደ ፊት ለሚሠሩ የኅብረትና የአንድነት ሥራዎች ውጤታማነት ብርታት ይሰጣል፡፡

ተንከባክቦ ማሳደግን በተመለከተ የሚቀርቡ ትንታኔዎችና አስተያየቶች ለሚዲያ ፍጆታ ብቻ የምናውለው የአንድ ሰሞን ስብከት እንዳይሆን መጠንቀቅ ያስፈልጋል፡፡ የችግኝ ተከላ በትንሹ ከ11 ቢሊዮን ብር በላይ ወጪ የሚደረግበት በመሆኑ፣ ከሕዝብ ጉልበት ባሻገር የአገር ሀብት የሚፈስበት በመሆኑ በሚገባ ሊታሰብበት ያስፈልጋል፡፡ ውጤቱም እንደጅማሮው ትኩረት ይሻል፡፡  

ይህ ሁሉ የሰው ጉልበትና የአገር ሀብት በከፍተኛ ደረጃ ኢንቨስት ተደርጎ የዘንድሮ ችግኝ ተከላ ለወደፊቱም በትጋት እንዲቀጥል፣ ከመትከል ባሻገርም የአንድ ሰሞን ግርግር ሳይሆን፣ ለዘለቄታው በመንከባከብ አገር የማከም ታላቅ ተልዕኮ እንደሆነ የሚያስገነዝብ መልዕክት ሊተላለፍ ይገባል፡፡ ሚዲያውም ከሰሞንኛ ዲስኩር በመለስ፣ የደን ሽፋን ምንነትና ጠቀሜታን በሚገባ ሊያስገንዘቡ የሚችሉ ትምህርቶችና አስረጂዎችን በማቅረብ ይትጋ፡፡  

የችግኝ ተከላውን በተመለከተ የሚቀርቡትን ፕሮግራሞች ስንመለከት ዘንድሮ የሚተከሉት ችግኞች ባለቤት እንዳላቸው መገለጹ መልካም ነው፡፡ በባለቤትነት ችግኞቹን የተከሉ አካላት ኃላፊነታቸውን በአግባቡ እንዲወጡ ይደረጋል ተብሏል፡፡ እንዲህ ከሆነ ከኢትዮጵያ ሚሊኒየም መባቻ ጀምሮ የነበረውን አካሄድ በመቀየር ውጤታማ የዛፍ ተከላ ሥራ ይካሄዳል ብለን እናምናለን፡፡ የተከሉትን ችግኞች ለከርሞውም አድገው ተመንድገው የምናይበት ዕድል እናገኛለን፡፡

ግን ደግሞ እንደተባለውና እንደሚነገረው ባይሆንስ? ለሚለው መጠይቅ ሥጋት ፈርጣማ ቆፍጣና ምላሽ ያስፈልጋል፡፡ ጉዳት የሚያደርሱ አካላትን የምንቆጣጠርበት፣ ሆን ተብለው በተጎዱ ችግኝ ምትክ፣ ያጠፉ አካላት አብዝተው ችግኞችን የሚተክሉበትና የሚንከባከቡበት የቁጥጥር አሠራር መዘርጋትም ተገቢ ይሆናል፡፡ በወንጀል ከመቅጣትና ከማሠር በተጨማሪ እንዲህ ያለውን አስገዳጅ ሥርዓት መዘርጋት ለውጤት ሊያበቃ ይችላል፡፡  

 በተጨማሪም የወደፊቱ የሚዲያዎች ዜና፣ ዛሬ የተተከሉት ችግኞች እንዴት በክብካቤ እንዳደጉ ተከታትለው የሚያሳወቁ መሆን ይኖርባቸዋል፡፡

ኢትዮጵያ አሁን ባለችበት ሁኔታ የአረንጓዴ ሽፋኗን ለመመለስ በየዓመቱ ያልተቋረጠ ትጋት የሚጠብቃት አገር እንደመሆኗ የችግኝ ተከላው ከዚህም በላይ ታስቦበት ሊሠራበት ይገባል፡፡ የአረንጓዴ ሽፋኗ ተመናምኖ አረንጓዴያማነት ብርቅ እየሆነ ወደ መምጣቱ በረሃማነት ከሚገባው በላይ እየተስፋፋ በመጣበት ወቅት፣ የነገውን በማሰብ የወደፊት ልጆቻችንና የኢትዮጵያችን ተረካቢዎችን በማሰብ እንደ ችግኝ ተከላ ያለውን መልካም ተግባር ባህል ማድረግ ይኖርብናል፡፡

የተራቆተውን የኢትዮጵያን መልከዓ ምድራዊ ገጽታ ለመመለስና የተቀረውንም ለማስጠበቅ፣ የተጎዱ አካባቢዎችም እንዲያገግሙ ለማድረግና አረንጓዴ አካባቢዎችን መፍጠር የመንግሥት ኃላፊነትና ውትወታ ብቻ መሆን የለበትም፡፡ ለዚህ ተግባር  የመንግሥት እጅ ብቻውን አይበቃም፡፡ ሆኖም አረንጓዴ ቦታዎችን ለማስፋፋት ዜጎች የሚበረታቱበት ሕግ ግን ሊኖረው ይገባል፡፡ ደን የሚያለሙ ግለሰቦችና ተቋማት ሲኖሩ የሚደፉበት ሥርዓት ያስፈልጋል፡፡ እንደ ኢንቨስትመንትም መታየት ይኖርበታል፡፡ ለተለያዩ መገልገያዎች ከውጭ የሚገቡ የእንጨት ውጤቶች ምን ያህል የውጭ ምንዛሪ እየሚወጣባቸው ከተረዳን፣ ያለ ችግር እዚሁ ተስማሚ የደን ልማት ኢንቨስትመንትን በመተግበር ውጤት የምናገኝበትን አሠራር መቀየስ፣ ያለውንም መተግበር አለብን፡፡

እንዲህ ያለው ልምምድ ከዳበረ፣ ከዚህ የተሻለ ሥራ ተሠርቶ ውጤትም ይገኝበታል፡፡ ከችግኝ ተከላው ጎን ለጎንም በከተሞች አካባቢ አረንጓዴ ሥፍራዎችን ማስፋፋትና ለአየር ብክለት መቀነስ የሚያግዙ ሥራዎችን ማበራከቱ ትኩረት ሊሰጠው ይገባል፡፡

በተለይ እንደ አዲስ አበባ ያሉ ከተሞች የበለጠ ትኩረት ይሻሉ፡፡ የዛሬዋን አዲስ አበባ ከአየር ላይ ለመመልከት ዕድሉን ያገኘ መታዘብ የሚችለው፣ የምንኖረው በምድረ በዳ ውስጥ እንደሆነ ይገነዘባል፡፡ አዲስ አበባችን አረንጓዴ ሥፍራዎችን የተጠየፈች ትመስላለች፡፡ አረንጓዴ ሥፍራዎች የሉም፡፡ ይህንን ለመለወጥ ከሠራን ቀጣዩ ዕርምጃ ስንዴ የሚያበቅለውን መሬታችንን በሰፋፊ እርሻዎች ሸፍነን በዶላር የምንገዛውን ስንዴ ማስቀረት ማስቀረቱ ይሆናል፡፡

በችግኝ እያደረግነው እንዳለው ርብርብ ሁሉ መሬታችንን በመጠቀም ከስንዴ ሸመታ ራሳችንን ማውጣት ነው፡፡ ብርቱዎች ተጋግዘው ይህንን እንደሚያደርጉ ተስፋ አለን፡፡ ስለዚህ ለችግኝ ተከላውም ሆነ ንፁህ ሥፍራን በማደርጀት ረገድ የሚያግዙ ሕጎችን መቅረፅ፣ ካሉም አሻሽሎ መተግበር ይጠበቅብናል፡፡ የከተማዋ አስተዳደርም አረንጓዴ ሥፍራዎችን በመለየት አዲስ ገጽታ መፍጠር አንዱ ተግባሩ ሊሆን ይገባል፡፡ እርግጥ ከወዲሁ ለአዲስ አበባ የተወጠኑት ተግባራት ለውጤት ከበቁ አዲስ አበባ ምን ያህል እንደምትቀየር ያመላክታሉ፡፡

ሌላው ቀርቶ ነገን ባለማሰብ በማስተር ፕላኑ ለአረንጓዴ ሥፍራነት የተተከሉ ቦታዎቿ በሰበብ አስባቡ የተነጠቀችው አዲስ አበባ፣ ምትክ ቦታዎች ሊዘጋጁላት ይገባል፡፡ ይህ አንዱ ጉዳይ ሲሆን ከዚህ ባሻገር ግን የግንባታ ሕግጋቶችንም አረንጓዴነትን ለማስፋት የሚረዱ መሆን አለበት፡፡ ያለችውንም አረንጓዴ ሥፍራ አጥርተው የሚሠሩ ሕንፃዎችን አገነባብ ሥልት ተፈጥሮን ታሳቢ ያደረገ እንዲሆን ማበረታታት ያስፈልጋል፡፡

ስለዚህ ችግኝ ተከላና እንክብካቤው እንዲህ ትኩረት እንደተሰጠው ሁሉ በከተማ አካባቢንም ታሳቢ ያደረገ አረንጓዴ ሥፍራ ማበርከት ላይ መንግሥት አስቦበት ቢሠራ ውጤቱ የበለጠ ያማረ ይሆናል፡፡

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት