Saturday, November 26, 2022
ሌሎች ዓምዶች
    - ማስታወቂያ -
    - ማስታወቂያ -

    ከ17 ሚሊዮን ዶላር በላይ ድጋፍ የሚደረግላቸው የማር ጥራት መፈተሻ ላቦራቶሪዎችን ለማስፋፋት ታቅዷል

    - ማስታወቂያ -

    ተዛማጅ ፅሁፎች

    የማር ጥራት መፈተሽ ላቦራቶሪዎችን ለማማስፋፋትና ያሉትንም ለማሻሻል የሚያግዝ የ17.3 ሚሊዮን ዶላር ድጋፍ የሚደረግባቸው ፕሮጀክቶች እንደሚገነቡ ተገለጸ፡፡ ለዚሁ ሥራ የንግድና ኢንዱስትሪ ሚኒስቴር ከኢትዮጵያ ግብርና ትራንስፎርሜሽን ኤጀንሲ ጋር የመግባቢያ ስምምነት ተፈራርመዋል፡፡

    ስምምነቱ ሐሙስ ሰኔ 13 ቀን 2011 ዓ.ም. ሲፈረም፣ የሁለቱ አካላት ስምምነት የማር ጥራት መመርመሪያ አዳዲስ ላቦራቶሪዎችን ለማቋቋምና በሥራ ላይ ያሉትንም ለማሻሻል እንደሚረዳ ተጠቁሟል፡፡

    ስምምነቱን የፈረሙት የኢትዮጵያ ግብርና ትራንስፎርሜሽን ኤጀንሲ ዋና ሥራ አስፈጻሚ ካሊድ ቦንባ (ዶ/ር) እና የንግድና ኢንዱስትሪ ሚኒስቴር ሚኒስትር ዴኤታ አቶ እሸቴ አስፋው ናቸው፡፡ ሁለቱ ተቋማት በጋራ በመሆን የግልና የሕዝብ ኢንተርፕራይዞችን በገንዘብና በቴክኒክ በመደገፍ በዓለም አቀፍ ደረጃ ዕውቅና የሚኖራቸው የማር ጥራት መመርመሪያ ላቦራቶሪዎችን እንደሚደግፉ አስታውቀዋል፡፡

    አንድ የመንግሥትና አንድ የግል የጥራት ምርመራ ላቦራቶሪዎች በአቅም ግንባታና መሰል ጉዳዮች ድጋፍ እንዲደረግላቸው ስምምነት መደረጉን ካሊድ (ዶ/ር) በስምምነቱ ወቅት አስታውቀዋል፡፡

    የኢትዮጵያ ቡና በዓለም አቀፍ ገበያ እንዳገኘው የተቀባይነት ደረጃ በማሩም በኩል መድረስ እየተቻለ፣ ሙሉ አቅምን መጠቀም ባለመቻሉ ምክንያት ምርቱ ወደ ኋላ እንደቀረ የገለጹት ካሊድ (ዶ/ር)፣ ችግሩን በመቅረፍ የኢትዮጵያ ማር ሰፊ ዓለም አቀፍ ገበያ እንዲያገኝ ለማስቻል ‹‹ይህ ስምምነት በጣም ወሳኝ ነው፤›› ብለዋል፡፡

    በኢትዮጵያ ግብርና ትራንስፎርሜሽን በኩል ሁለት የማርና ሰም ፕሮጀክቶች እንደሚደገፉ ተጠቅሷል፡፡ አንዱ በዓለም ባንክ የሚደገፍ ሲሆን፣ ከ7,000 አርሶ አደሮች ጋር የሚሠራ ፕሮጀክት ነው፡፡ ሁለተኛው ደግሞ ኢኤኤፒ (EAAP) የሚባል ፕሮጀክት ሲሆን፣ አነስተኛና መካከለኛ መጠን ያላቸው ኢንተርፕራይዞችን ከ6,000 አርሶ አደሮች ጋር የሚያገናኝ እንደሆነ ካሊድ (ዶ/ር) ገልጸዋል፡፡

    የማር ምርት በዘጠኝ የጥራት መፈተሻ መሥፈርቶች አማካይነት ደረጃውና ጥራቱ የሚመረመር ሲሆን፣ ኢትዮጵያ ሁሉንም መስፈርቶች በማሟላት ለመርመር የሚያስችል ብቁ ላቦራቶሪ የላትም ተብሏል፡፡

    ‹‹በአገር ውስጥ ያሉት ላቦራቶሪዎች ሁሉንም መስፈርቶች አሟልተው መመርመር የማይችሉ በመሆናቸው፣ የማር ናሙናዎችን ከየተቋማቱ በመሰብሰብ ወደ ጀርመን በመላክ ወደ አውሮፓ ገበያ መግባት መቻል አለመቻላቸውን በመመርመር የሚልኩት ሰርተፍኬትን መሠረት በማድረግ ነበር ወደ ውጭ የሚላከው፤›› ያሉት አቶ እሸቴ፣ ይህ ትልቅ ክፍተት በመሆኑ ጥራትን ለመመርመር የተሟላ አቅም ያለው ላቦራቶሪ አገር ውስጥ በመገንባት የሚፈለገውን ጥቅም ማስገኘት እንደሚቻል ተናግረዋል፡፡

    ይህንን ፕሮጀክት መነሻ በማድረግ፣ በኢትዮጵያ ግብርና ትራንስፎርሜሽን ኤጀንሲ በኩል ሁለቱ ተቋማት የ400 ሺሕ ዶላር ዕገዛ ሲደረግላቸው፣ በዓለም ባንክ በኩልም ከሌሎች ፕሮጀክቶች ጋር በጠቅላላው የ17.3 ሚሊዮን ዶላር ድጋፍ እንደሚደረግላቸው ታውቋል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች