Monday, October 3, 2022
ሌሎች ዓምዶች
    - ማስታወቂያ -
    - ማስታወቂያ -

    ኖህ ሪል ስቴት የገነባቸውን ቤቶች ለማስረከብ የውኃና የመብራት ችግር ተጋርጦብኛል አለ

    - ማስታወቂያ -

    ተዛማጅ ፅሁፎች

    የውኃ ጉድጓድ መቆፈር ግድ እንዳለው ሲገልጽ 200 ቤቶች ለማስረከብ መዘጋጀቱን አስታውቋል

    ኖህ ሪል ስቴት ኃላፊነቱ የተወሰነ የግል ማኅበር በርካታ መኖሪያ ቤቶችን በመገንባት ውጤታማ ሥራ ቢያከናውንም፣ የመብራትና የውኃ አቅርቦት ችግር  ሊቀረፍለት እንዳልቻለ ገለጸ::

    አቶ ራቴነህ ፋሲል የኖህ ሪል ስቴት የሽያጭ ክፍል ምክትል ኃላፊ እንደገለጹት፣ ውኃና መብራት የአገሪቱ መሠረታዊ ችግር እንደሆነ አውስተው፣ ኩባንያው ይህንን ችግር ለመቅረፍ የውኃ ጉድጓዶችን በመቆፈር የአቅርቦት ችግሩን ለመወጣት እየሞከረ ይገኛል፡፡ በመብራት በኩልን ‹‹በአገር ውስጥ የሚመረቱትን ትራንስፎርመሮች ለመግዛት የተሰጠን መብት ውሱን በመሆኑና የኢትዮጵያ ኤሌክትሪክ አገልግሎት የሰጠን ፈቃድም ትራንስፎርመር ከውጭ እንድናመጣ ቢሆንም ባለው የውጭ ምንዛሪ እጥረት ለማስገባት ባለመቻላችን ትግል ውስጥ ነው ያለነው፤›› ያሉት አቶ ብዙነህ ታደሰ ናቸው፡፡

    ይህ የተገለጸው የኖህ ሪል ስቴት ኃላፊዎች፣ ረቡዕ ግንቦት 21 ቀን 2011 ዓ.ም. በሰጡት ጋዜጣዊ መግለጫ ወቅት ነው። በተለምዶ ፊጋ እየተባለ የሚጠራውና ሰሚት አካባቢ የተገነቡትን ‹‹ኖህ ጋርደን የመኖሪያ አፓርትመንቶች›› እሑድ ግንቦት 25 ቀን 2011 ዓ.ም. ለቤት ገዢዎች እንደሚያስረክብ በመግለጫው ወቅት ይፋ አድርጓል፡፡ ባለአራት ፎቅ 200 የመኖሪያ አፓርትመንቶችን ያካተተው ይህ ፕሮጀክት፣ ባለሁለትና ሦስት መኝታ ቤቶች የተገነቡበት ነው፡፡፡ ባለሁለት መኝታ ቤቱ 93 ካሬ ላይ ሲያርፍ፣ ባለሦስት መኝታው ደግሞ 110 እና 115 ካሬ ላይ አርፏል፡፡ የኖህ ጋርደን የመኖሪያ አፓርትመንቶች ከ1.1 እስከ 2.5 ሚሊዮን ብር የመሸጫ ዋጋ እንደወጣላቸው ተገልጿል፡፡

    55,000 ካሬ ሜትር ላይ ያረፈው ኖህ ጋርደን የመኖሪያ አፓርትመንት፣ መካከለኛ ገቢ ያላቸውን ቤት ገዥዎች ታሳቢ ያደረገ ፕሮጀክት እንደሆነ ከኖህ ሪል ስቴት ኩባንያ አስተዳደር አካላት ውስጥ አንዱ የሆኑት አቶ ዓብይ ኃይለ ማርያም በመግለጫው ወቅት ገልጸዋል፡፡

    ‹‹አሁን እንደ ዓላማ ይዘን የተነሳነው መካከለኛ ገቢ ላላቸው ሰዎች መጠነ ሰፊ ፕሮጀክቶችን በማቅረብ ተደራሽ ማድረግ ነው፤›› በማለት ገልጸው፣ ስለአከፋፈል ሁኔታው ሲናገሩም፣ ‹‹ቅድሚያ ከ10 እስከ 15 በመቶ ከቤቱ ሙሉ ክፍያ ላይ በመክፈል ቀሪውን ያለምንም ወለድ በሦስት ዓመት ውስጥ መክፈል የሚቻልበት ሁኔታ ይኖራል፡፡ እንዲሁም ከተለያዩ ባንኮች ጋር በማገናኘት፣ በውጭ ለሚኖሩ ትውልደ ኢትዮጵያውያን የሚሆን የሞርጌጅ ብድር በአነስተኛ ወለድ ከ20 እስከ 25 ዓመታት ውስጥ የሚመልሱበትን አካሄድ እያመቻቸን ነው፡፡ የዚህ ጥቅም ቤት ገዢዎች ተጨማሪ ንብረታቸውን ማስያዝ ሳይኖርባቸው የሚበደሩበት ዕድል በመኖሩ ነው፤››  በማለት አብራርተዋል፡፡

    የዚህ ፕሮጀክት ቁጥር ሁለት ግንባታ 1,900 ቤቶችን እንዳካተተ ገልጸው፣ እ.ኤ.አ 2019 መጨረሻ ተጠናቆ ለገበያ እንደሚውል አክለዋል፡፡ ‹‹ያልተገነባ አንሸጥም!›› በሚለው መርሁ የሚታወቀው ኖህ ሪል ስቴት፣ ከስድስት ዓመታት በፊት የተቋቋመ ሲሆን፣ እስካሁንም ከ20 በላይ ፕሮጀክቶችን ይዞ በመንቀሳቀስ ላይ ይገኛል። ከእነዚህ ውስጥ ዘጠኙን  ፕሮጀክቶች አጠናቆ ለቤት ገዢዎች ሲያስረክብ፣ የስድስቱን ፕሮጀክቶች ግንባታ ከ60 በመቶ በላይ አጠናቋል። እንዲሁም እ.ኤ.አ እስከ 2019 መጨረሻ አምስት ፕሮጀክቶች ተጠናቀው ለርክክብ ዝግጁ ይሆናሉ፡፡ በመጪው ዓመትም ሦስት ፕሮጀክቶች ይጠናቀቃሉ ተብሏል፡፡

    ኖህ ሪል ስቴት ከተቋቋመ ጀምሮ እስካሁን ከ4,000 በላይ የአፓርታማ ቤቶችን እንዲሁም የንግድ ሱቆችን ለደንበኞች አስረክቧል፡፡

    - Advertisement -spot_img

    የ ጋዜጠኛው ሌሎች ፅሁፎች