Monday, December 5, 2022
ሌሎች ዓምዶች
    - ማስታወቂያ -
    - ማስታወቂያ -

    በ88 ሚሊዮን ዶላር የተገነባው አዲስ ቢራ ፋብሪካ በፋሲካ ሰሞን ገበያውን ሊቀላቀል ነው

    - ማስታወቂያ -

    ተዛማጅ ፅሁፎች

    በኢትዮጵያ የካንጋሮ ፕላስት ከሚያስተዳድራቸው ኩባንያዎችና ፋብሪካዎች አንዱ የሆነው አዲሱ የቢራ ፋብሪካ፣ 88 ሚሊዮን ዶላር ወይም በ2.5 ቢሊዮን ብር በሚገመት ኢንቨስትመንት ግንባታው በመጠናቀቁ በቅርቡ እንደሚመረቅና ምርቱንም በፋሲካ በዓል ሰሞን ማቅረብ እንደሚጀምር አስታውቋል፡፡

    ለፋብሪካው ግንባታ ውሏል ተብሎ ከዚህ ቀደም በቀረበው ዘገባ ወቅት የተገለጸው የኢንቨስትመንት መጠን 1.5 ቢሊዮን ብር ተብሎ መገለጹ ይታወሳል፡፡ ይሁንና ትክክለኛው የገንዘብ መጠን 88 ሚሊዮን ዶላር እንደሆነ ኩባንያው አስታውቋል፡፡

    በዓመት 1.6 ሚሊዮን ሔክቶ ሊትር ቢራ የማምረት አቅም እንዳለው የተነገረለትና ከአንድ ወር በኋላ ምርቱን ለገበያ እንደሚያቀርብ ያስታወቀው አዲስ ቢራ ፋብሪካ፣ በቅርቡ ሥራ ለመጀመር የሚያስችለውን ዝግጅት እንዳጠናቀቀ የካንጋሮ ፕላስት የቦርድ ሊቀመንበር እንዲሁም ዩናይትድ ቢቨሬጅስ አክሲዮን ማኅበር ኃላፊ አቶ ኤፍሬም ይርጋ ለሪፖርተር መግለጻቸው ይታወሳል፡፡ የፋብሪካውን ግንባታ መጠናቀቅና ሥራ ለመጀመር መዘጋጀት አስመልክቶ ለሚዲያ አካላት መግለጫ ተሠራጭቷል፡፡

    በይርጋ ኃይሌና ቤተሰቦቹ ሥር ከሚተዳደሩ ኩባንያዎች በተለይ በኢንዱስትሪው መስክ ካንጋሮ ፕላስት ግሩፕሚያስተዳድራቸው አንዱ ሆኖ የተካተተው አዲሱ የቢራ ፋብሪካ ሞሪሸስ ከሚገኘው ዩናይትድ አፍሪካ ቢቨሬጅ ጋር በተደረገ የሽርክና የንግድ ስምምነት አማካይነት በሁለቱ ወገኖች የጋራ ኢንቨስትመንት እንደተገነባ እንደሆነ የገለጹት የአክሲዮን ማኅበሩ ዋና ሥራ አስኪያጅ አቶ ኤፍሬም ይርጋ ናቸው፡፡

    አቶ ኤፍሬም በቅርቡ ለሪፖርተር እንዳስታወቁት፣ በቅርቡ ወደ ገበያ የሚቀላቀለው የዩናይትድ ቢራ ፋብሪካ በላጋር ምርት ይጀመራል፡፡ በሞጆ ከተማ 25 ሔክታር መሬት ስፋት ይዞታ ውስጥ የተገነባው ፋብሪካ ለወደፊት በማልት መጠጦችና በሌሎችም ምርቶች ላይ የማስፋፊያ ግንባታ ለማካሄድ ታስቦ ይህን ያህል ቦታ መረከቡን ገልጸዋል፡፡ ፋብሪካው በዓመት ከሚያመርተው 1.6 ሚሊዮን ሔክቶ ሊትር ቢራ በተጨማሪ፣ 800 ሺሕ ቶን የምርት ማሸጊያዎችን የማምረት አቅም ይዞ እንደመጣም ተጠቅሷል፡፡  

    ፋብሪካው ለቢራ ጠመቃ የሚረዱትን ማሽነሪዎች ክሮነስ ግሩፕ ከተሰኘው የጀርመን ኩባንያ በመግዛት መግጠሙን አስታውቀው፣ በመጠጥ ኢንዱስትሪው መስክ ለአፍሪካ አዲስ የሆነውንና በዲጂታል ሥርዓት የሚመራውን የሲስተም አፕሊኬሽንና የምርት መቆጣጠሪያ የቴክኖሎጂ ሥልት በመጠቀም የምርት ሒደቱን እንደሚመራም ተብራርቷል፡፡

    ሥራ ሲጀምር 240 ሠራተኞች ቋሚና ጊዜያዊ የሥራ ዕድል እንደሚፈጥር የሚጠበቀው ይህ ፋብሪካ፣ የምርቱ መዳረሻ ገበያዎች አዲስ አበባና አካባቢዋን በማድረግ እንደሚጀምርም አስታውቋል፡፡

    ኩባንያው ሥራ ሊጀምር በተቃረበበት ወቅት የቢራ ማስታወቂያዎች ክልከላ መውጣቱ ችግር እንደሆነበት ያስታወቁት አቶ ኤፍሬም፣ ለምርት ግብዓት ግዥ የሚያስፈልገውን በቂ የውጭ ምንዛሪ ማግኘትም ሥጋት ከሆኑበት ጉዳዮች መካከል አንኳር ችግር እንደሆነ ገልጸዋል፡፡ 

    በኢትዮጵያ የቢራ ጣዕምና ይዘቱ ላይ በተደረገ ጥናት ላይ ተመሥርቶ እንዲመረት ይደረጋል ያሉት ቢራ ስያሜው ማን እንደሆነ ከመግለጽ የተቆጠቡት አቶ ኤፍሬም፣ የቢራውን መጠሪያ ወይም ብራንድ ስያሜ ከወር በኋላ ይፋ ለማድረግ እንደተፈለገ አስታውቀዋል፡፡ ከቢራ ስያሜው ጋር በተያያዘ ከዚህ ቀደም ‹‹አይቤክስ ዋልያ›› በሚለው መጠሪያ ሳቢያ የይገባኛል ጥያቄ በሐይኒከንና በካንጋሮ ፕላስት ግሩፕ መካከል ፍርድ ቤት ያዳረሰ ሙግት ተነስቶ እንደነበር ይታወሳል፡፡

    ዩናይትድ ቢቨሬጅ አክሲዮን ማኅበር በካንጋሮ ፕላስት ግሩፕ ሥር ከሚተዳደሩት አንዱ ኩባንያ ሲሆን፣ እነዚህን ጨምሮ ኢትዮ ሲሚንቶ፣ ዩኒቨርሳል ፉድስ፣ እንይ ኢትዮጵያ የአበባ ማምረቻ፣ እንይ ኮንስትራክሽን፣ ስሪኤፍ ፈርኒቸር፣ ፓል ኢትዮጵያ፣ ይርጋ ኃይሌ የገበያ ማዕከልና ሌሎችንም ኩባንያዎች በቤተሰብ ደረጃ የሚተዳደሩ ኩባንያዎች ያቀፈ የግሩፕ ኩባንያዎች ስብስብ ከተሸጋገረ ቆየት ብሏል፡፡

    በአሁኑ ወቅት የአገሪቱ ዓመታዊ የቢራ ምርት 14 ሚሊዮን ሔክቶ ሊትር እንደደረሰ ሲገመት፣ አሥር ያህል ፋብሪካዎችም በሥራ ላይ እንደሚገኙ መረጃዎች ይጠቁማሉ፡፡ የዩናትድ ቢራ ፋብሪካ ሥራ መጀመር የአገሪቱን የቢራ ምርት 15 ሚሊዮን ሔክቶ ሊትር በላይ ከማድረሱም ባሻገር፣ ለብቅልና ገብስ አምራቾች ተጨማሪ ገበያ ይዞ እንደሚመጣ ይታመናል፡፡ 

    አቶ ይርጋ ኃይሌ በመርካቶ አካባቢ ለዘመናት የታወቀ የንግድ መጠሪያ እስከ መሆን የደረሱበትን የንግድና የኢንቨስትመንት እንቅስቃሴዎች ከቤተሰቦቻቸው ጋር በመሆን እስከ ሕልፈታቸው ድረስ ሲያስተዳድሩ ቆይተዋል፡፡ የዩናይትድ ቢራ ፋብሪካ ፕሮጀክት ከጥንስሱ ጀምሮ በታላቅ ወንድማቸው አቶ በላቸው ይርጋ እንደተጀመረ የገለጹት አቶ ኤፍሬም፣ ከወንድማቸው ሕልፈት በኋላየተጀመረውን ፕሮጀክት ከግብ በማድረሳቸው መደሰታቸውንም ሳይገልጹ አላለፉም፡፡ ‹‹ቤተሰባችን ይህንን የቢራ ፋብሪካ ለመክፈት ብዙ ጥሯል፡፡ በወንድሜ በበላቸው ይርጋ የተጀመረው ራዕይ ፍሬ አፍርቶ ለማየት በቅተናል፤” ብለዋል፡፡ 

    ከቅርብ ጊዜ ወዲህ እየታየ የመጣው የማስተዋወቂያ ሥልት ‹‹ቲዚኒግ ካምፔይን›› እየተባለ በተለምዶ የሚጠራው ሲሆን፣ ከሰሞኑ በየአደባባዩ፣ በቴሌቪዥን መስኮቱና ሬዲዮው የሚታየው የኮስታራ አንበሳ ገጽታና እንዳንበሳው የተኮሳተረ ኃይለኛ ወጣት ግድግዳ ጠርምሶ ያለ ክንፍ የሚበርበት ማስታወቂያ እንቆቅልሽ ከዚህ ቢራ ጋር የተያያዘ እንደሚሆን ይገመታል፡፡  

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች