Thursday, June 20, 2024
- Advertisement -
- Advertisement -

ዜናከነጋዴ ጋር በመመሳጠር ከ15 ሚሊዮን ብር በላይ ጉዳት አድርሰዋል የተባሉ የሜቴክ ኃላፊዎች...

ከነጋዴ ጋር በመመሳጠር ከ15 ሚሊዮን ብር በላይ ጉዳት አድርሰዋል የተባሉ የሜቴክ ኃላፊዎች ተከሰሱ

ቀን:

በብረታ ብረትና ኢንጂነሪንግ ኮርፖሬሽን (ሜቴክ) ሥር የተቋቋመው ኅብረት ማኑፋክቸሪንግና ማሽን ግንባታ ኢንዱስትሪ ዋና ሥራ አስኪያጅና ምክትል ሥራ አስኪያጅ የነበሩ ኃላፊዎች ከአንድ ነጋዴ ጋር በመመሳጠር በፈጸሙት ሕገወት ግዥ፣ በሕዝብና በመንግሥት ላይ ከ15 ሚሊዮን ብር በላይ ጉዳት አድርሰዋል ተብለው ሰኞ ጥር 27 ቀን 2011 ዓ.ም. ክስ ተመሠረተባቸው፡፡

ተከሳሾቹ ዋና ሥራ አስኪያጅ የነበሩት ሌተና ኮሎኔል ተሰማ ግደይና ምትክል ሥራ አስኪያጅ የነበሩት ሻለቃ መስፍን ሥዩም ናቸው፡፡ የኮርፖሬሽኑን የግዥ መመርያ በመጣስ ለኢትዮጵያ ስኳር ኮርፖሬሽን ሠርቶ ሊሰጥ የተገባውን ውል በመተው፣ አቶ ክፍላይ ንጉሤ ከሚባሉ ነጋዴ ጋር በጥቅም በመመሳጠር ለውኃ መርጫ አገልግሎት የሚውሉ መሣሪያዎች በቀጥታ ግዥ በመፈጸም ጉዳት እንዲደርስ ማድረጋቸውን፣ የፌዴራል ዓቃቤ ሕግ ለፌዴራል ከፍተኛ ፍርድ ቤት ልደታ ምድብ 15ኛ ወንጀል ችሎት ያቀረበው ክስ ያስረዳል፡፡

ኃላፊዎቹ ግዥውን የፈጸሙት የኮርፖሬሽኑን የግዥ መመርያ በመጣስ ብቻ ሳይሆን፣ ነጋዴው የማምረትም ሆነ የማቅረብ ፈቃድ እንደሌላቸው እያወቁ መሆኑን ዓቃቤ ሕግ በክሱ አስታውቋል፡፡

- Advertisement -

ሜቴክ በሥሩ ባለው ኢንዱስትሪ አምርቶ ለማቅረብ ከስኳር ኮርፖሬሽን ጋር ውል የፈጸመ ቢሆንም፣ በውሉ መሠረት ስምምነቱን መፈጸም ሲገባው በሜቴክ አጋር ሆኖ ካልተመዘገበ ድርጅትና በዘርፉ ፈቃድ ከሌለው ግለሰብ በመግዛት፣ በአጠቃላይ 15,707,301 ብር ጉዳት በማድረሳቸው የመንግሥትን ሥራ በማያመች አኳኋን መምራትና በመንግሥት ሠራተኛ ብቻ በሚፈጸም ወንጀል ላይ ልዩ ተካፋይ በመሆን ከባድ የሙስና ወንጀል ክስ አቅርቦባቸዋል፡፡

የሻለቃ መስፍንና የአቶ ክፍላይ ንጉሤ ጠበቆች ደንበኞቻቸው በመርህ ደረጃ የቀረበባቸው ክስ ዋስትና ስለማይከለክል የዋስ መብታቸው እንዲፈቀድላቸው አመልክተዋል፡፡ ዓቃቤ ሕግ ደግሞ ተከሳሾች የጠየቁትን ዋስትና በመቃወም ተከራክሯል፡፡

የግራ ቀኙን ክርክር የሰማው ፍርድ ቤት የዋስትና ጥያቄውን ውድቅ በማድረግና በማረሚያ ቤት ሆነው ጉዳያቸውን እንዲከታተሉ ትዕዛዝ በመስጠት፣ የክስ መቃወሚያ ለመጠባበቅ ለየካቲት 6 ቀን 2011 ዓ.ም. ቀጠሮ ሰጥቷል፡፡  

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የንብረት ማስመለስ ረቂቅ አዋጅና የሚስተጋቡ ሥጋቶች

ከሰሞኑ ለሕዝብ ተወካዮች ምክር ቤት የቀረበው የንብረት ማስመለስ ረቂቅ...

የመጨረሻ የተባለው የንግድ ምክር ቤቱ ምርጫና የሚኒስቴሩ ውሳኔ

በአገር አቀፍ ደረጃ ደረጃ የንግድ ኅብረተሰቡን በመወከል የሚጠቀሰው የኢትዮጵያ...

ሚስጥሩ!

ጉዞ ከካዛንቺስ ወደ ስድስት ኪሎ፡፡ የጥንቶቹ አራዶች መናኸሪያ ወዘናዋ...