Friday, December 9, 2022
ሌሎች ዓምዶች
    - ማስታወቂያ -
    - ማስታወቂያ -

    ፌዴራል ፖሊስ የ28 ሪል ስቴቶች ዕገዳ ጊዜያዊ መሆኑን አስታወቀ

    - ማስታወቂያ -

    ተዛማጅ ፅሁፎች

    የፌዴራል ፖሊስ ከወር በፊት የ28 ሪል ስቴት ኩባንያዎች የሽያጭና ተያያዥነት ያላቸው ሥራዎች እንዳይከናወኑ ያገደው በጊዜያዊነት መሆኑን አስታወቀ፡፡

    የፌዴራል ፖሊስ ኮሚሽን የወንጀል ምርመራ ቢሮ ጥር 15 ቀን 2011 ዓ.ም. ለመሬት ምዝገባና መረጃ ኤጀንሲ በጻፈው ደብዳቤ እንዳስታወቀው፣ 28ቱ የሪል ስቴት ኩባንያዎች የሽያጭና ተያያዥነት ያላቸው ሥራዎች ለ48 ሰዓታት እንዳይሠሩ የታገዱት የሰብዓዊ መብት ጥሰትና የሙስና ወንጀል ፈጽመው በምርመራ ላይ የሚገኙ ተጠርጣሪዎች፣ በሪል ስቴቶቹ ውስጥ የመኖሪያ ቤቶችና የአክሲዮን ድርሻ እንዳላቸው እስኪጣራ ድረስ ነበር፡፡

    ሆኖም በርካታ አገልግሎት ፈላጊዎች ዕግድ በመኖሩ ልንስተናገድ አልቻልንም የሚል አቤቱታ እያቀረቡ መሆኑን የገለጸው ፌዴራል ፖሊስ፣ ዕግዱ ጊዜያዊ መሆኑንና አገልግሎት ፈላጊዎች ኤጀንሲው ባለው ሕጋዊ መሠረት አገልግሎት መስጠት እንደሚችል ጠቁሟል፡፡

    የፌዴራል ፖሊስ የሪል ስቴት ኩባንያዎቹ ለ48 ሰዓታት አገልግሎት እንዳያገኙ ያገደው ታኅሳስ 16 ቀን 2011 ዓ.ም. ሲሆን፣ የአዲስ አበባ ከተማ አስተዳደር ምክትል ከንቲባ ታከለ ኡማ (ኢንጂነር) ከሁለት ሳምንት በፊት በሪል ስቴት ኩባንያዎቹ ላይ የተጣለው ዕገዳ እንዲነሳ መመርያ መስጠታቸው ይታወሳል፡፡

    ምክትል ከንቲባው ከሪል ስቴት ኩባንያዎች ኃላፊዎች ጋር ጥር 8 ቀን 2011 ዓ.ም. ባደረጉት ስብሰባ ወቅት፣ የሪል ስቴት ኩባንያዎቹን ፍርድ ቤት እንጂ የፌዴራል ፖሊስ የማገድ ሥልጣን ስለሌለው ሥራቸውን እንዲቀጥሉ መመርያ ሰጥተው ነበር፡፡

    የሪል ስቴት ኩባንያዎቹ የዕገዳ ውዝግብ የጀመረው የአዲስ አበባ ከተማ አስተዳደር በሕገወጥነት የጠረጠራቸውን 28 የሪል ስቴት ኩባንያዎች፣ ከታኅሳስ 8 ቀን 2011 ዓ.ም. ጀምሮ ለ15 ቀናት የመሬት ልማትና ማኔጅመንት ቢሮ የመሬት ባንክና ማስተላለፍ ጽሕፈት ቤት አገልግሎት እንዳይሰጥ መመርያ ሲያስተላልፍ ነው፡፡ ከዚያም የፌዴራል ፖሊስ ታኅሳስ 9 ቀን 2011 ዓ.ም. ለአዲስ አበባ ከተማ አስተዳደር የመሬት ተቋማት በጻፈው ደብዳቤ፣ 28 ሪል ስቴት ኩባንያዎች እንዲታገዱና ከእነሱ ጋር የተገናኘ መረጃ እንዲላክለት ጠይቋል፡፡

    የፌዴራል ፖሊስ ለተቋማቱ በጻፈው ደብዳቤ፣ ‹‹የፀረ ሙስና ልዩ ሥነ ሥርዓት ማስረጃና ሕግ አዋጅ ቁጥር 434/97 አንቀጽ 8(4) (በአዋጅ ቁጥር 882/2007 አንቀጽ አምስት እንደተሻሻለው) መሠረት ታግዶ ሕንፃዎች በማን ስም እንደሚገኙና የቦታዎችን አሰጣጥ ሕጋዊነት፣ እንዲሁም ቦታዎቹ ከተጠርጣሪው ግለሰብ ወደ ሦስተኛ ወገን ተላልፈው ከሆነ ለማንና እንዴት እንደተላለፈ አጠርታችሁ ላኩ፤›› በማለት መጠየቁ ይታወሳል፡፡

    ባለፉት ዓመታት የተለያዩ ውጣ ውረዶችን ሲያልፍ የቆየው የሪል ስቴት ዘርፍ፣ በቅርቡ በተፈጠረው ዕግድ ሳቢያ የሪል ስቴት ገበያ ተቀዛቅዞ ዳግም ቀውስ ውስጥ መግባቱ ይታወሳል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች