Friday, June 21, 2024
- Advertisement -
- Advertisement -

የተመረጡ ፅሑፎች

ከማቀርቀር ቀና እንበል!

ሰላም! ሰላም! እህ? እንዴት ነው ጃል? ማግኘት ያበጃጃል ማጣት ያገረጅፋል አትሉም? አሁንማ ሁሉም ነገር በማግኘትና በማጣት መረብ ላይ የተዘረጋ በመሆኑ እኮ ነው መወጣጠር የበዛው። በአንድ በኩል ሲታጨድ በሌላው መበተን እየተለመደ ነው መስማማት ያቃተው። ‹‹አፈር ናችሁና ወደ አፈር ትመለሳላችሁ›› ስንባል ራሱ በመገኘትና በመታጣት ንድፈ ሐሳብ ላይ ተመሥርቶ መሆኑን ልብ በሉ። ‹‹ማግኘትም አልከፋ ማጣቱም አልከፋ፣ እኔን የጨነቀኝ አንዱ ብቻ ከፋ፤›› ብሎ አንድ ደላላ ወዳጄ አንጎራጎረ። ‹‹ምነው ትዝታ ውስጥ የገባህ ትመስላለህ?›› ብለው፣ ‹‹እንዴት ቢሆን ነው ማግኘትና ማጣት ጥግ ድረስ እየሄዱ የሚያሳስቡን?›› ብሎ መልሶ ጠየቀኝ። እኔ ትዝታን በተመለከተ ከዘፈን ጀምሮ ብዙ ትውስታዎች አሉኝ፡፡ ሁሌም የማረሳው ግን፣ ‹‹ሰው ማርጀቱን የሚያውቀው በተስፋ መኖር ትቶ በትዝታ መኖር ሲጀምር ነው፤›› የሚለውን ዘመን ተሻጋሪ ጥቅስ ነው፡፡ ‹‹ትዝታሽ ዘወትር ወደእኔ እየመጣ. . . ›› ማለት ስጀምር ማንጠግቦሽ ወጣትነቷ እየታሰባት ነው መሰል በንዴት፣ ‹‹በቃህ!›› ስትለኝ እደነግጣለሁ፡፡ ማን ማርጀትን በዋዛ ይቀበላል? ወገብ ሲንቀጠቀጥ እግር መራመድ ሲያቅተው ይታያችሁ! ለዚህ መስሎኝ በስተርጅና ፖለቲከኞቻችን እንደ ሠፈር ጎረምሳ ይዋጣልን እያሉ የሚውረገረጉት፡፡

ቀስ እያልን የተለመደውን የፖለቲካ ጨዋታ ከጓደኛዬ ጋር አነሳነው። ያለ ውጤት እንደ መረብ ኳስ ጨዋታ ኳሱን አየር ላይ ስንቀባበለው 2011 ዓ.ም. ሊጋመስ ነው። ሕዝባዊ አጀንዳ በሰነቁና ድንፋታ በታጠቁ ፖለቲከኞች ምክንያት የአገራችን ችግር እየባሰበት ነው። ምን ታደርጉታላችሁ? ካልጎደለ ስለማይሞላ ካልሞላም ስለማይጎድል ሚዛኑን ለማስጠበቅ መባዘናችንን ግን አልተውነውም። ይኼን የተፈጥሮ ሕግ ጨዋታ ሚዛን ለማሳካት የሚስገበገበውን በጋራ ክንድ እጁን መቆንጠጡ ላይ ብንበረታ፣ ስንቱን ነውጠኛ አደብ ባስገዛን ነበር። ‹‹አሁን አሁንማ ባንክ መዝረፍ የጀመሩ መዥገሮች እንደ ማፊያ አገር ማመሳቸው የሚቆም አይመስለኝም፤›› አለኝ ጓደኛዬ። ‹‹ምን ያድርጉ ብላችሁ ነው ለነገሩ? እኛስ ከግዴታ ይልቅ  መብትን ጠንቅቀን የምናውቀውን ያህል መቼ ዘመትንባቸው? ከጭቆና ተገላገልን ስንል ለባሰ ጭቆና ለመዳረግ የተነሱ አውሬዎችን መታገስ የለብንም. . .›› አለኝ ወዳጄ እየተብሰለሰለ፡፡

 እግረ መንገዴን አንድ ያጋጠመኝን ጉዳይ ላጫውታችሁ። በአንዱ ዕለት ማለዳ ምሁሩ የባሻዬ ልጅ ከቤቱ ወጥቶ ወደ ሥራ ሲጣደፍ አገኘኝ። ደህና አደርክ ሳይለኝ የለበጣ ሳቅ እየሳቀ፣ ‹‹አንበርብር እንደ አርሰናል በገዛ ሜዳዬ ነጥብ የመጣል አባዜ አስቸገረኝ እኮ!›› አለኝ ሁለት እጁን በኪሱ ከቶ አንገቱን እየነቀነቀ። በነገራችን ላይ የባሻዬ ልጅ ቀንደኛ የአርሰናል ደጋፊ ነበር። የአርሰናል ወጣቶችን እንደሚደግፈው ራሱን ቢደግፍ ይኼኔ የት በደረሰ ነበር ያስብላችሁ ነበር። ነው ያልኩት? ‹‹ምነው ሰላም አላደርክም? እንዴት አደርክ ማለት አይቀድምም?›› ስለው፣ ‹‹ደመወዝ በወር ኑሮ በዕለት ሆኖ መፈናፈኛ አጥተን እንዴት ሰላምታ ይቅደም?›› አለኝ። ምሁሩ የባሻዬ ልጅ እጁን ተስሞ የሚሠራ ታታሪ ሠራተኛ እንደሆነ ባውቅም የገቢው ነገር ዘወትር ሲያሸማቅቀው አያለሁ። ‹‹ደመወዜ ከማነሱ ቀኑ እንደ ምጥ መርዘሙ ነው የሚገርመኝ፤›› አለኝ፡፡ ‹‹እንዴት?›› ብዬ ስጠይቀው፣ ‹‹ቀኑ እንዴት እንደሚከንፍ፣ የደመወዝ ቀን ግን እንዴት ሰውን እንደሚያንቆራጥጠው አታይም? ከታክሲ ጥበቃና ከፍትሐዊ የሀብት ክፍፍልና ዳኝነት ጥበቃ በተጨማሪ የመጣልንን ለውጥ መጠበቅ  አቅቶን እየተናጀስን የደመወዝ ቀን ጥበቃ ሲጨመር አይጣል ነው፤›› አለኝ ጭንቅ ብሎት። ‹‹አይዞህ ማጣትም ቢሆን ከልኩ አያልፍም፤›› አልኩና 500 ብር አውጥቼ ደመወዝ ስትቀበል ትሰጠኛለህ በሚል ሸጎጥኩለት። ጥሩ አይደል? ታዲያ ወገን ለወገኑ መቼ ነው የሚደርሰው? ተግባር የማያውቅ ባዶ የተስፋ ቃል መስማት አልሰለቻችሁም? በትንሽ በትልቁ ተጋግዘን አገር እናቀናለን ስንል የሥልጣን ጥም ያቃጠላቸው አስመሳይ ፖለቲከኞች ሲያወናብዱን ይነደኛል፡፡

‹‹ኧረ ኩሉን ማን ኩሏታል. . .›› በሚባልበት በወርኀ ጥር ቀርቶ፣ አሁን አሁን እንኳ ለሠርግና ለፍቺ ጊዜ መመምረጥ ቀርቷል፡፡ ለፖለቲከኛም ቢሆን፡፡ አንድ የሠፈራችን የተከበሩ ሀብታም ልጃቸውን ለመዳር ሽር ጉድ ሲሉ እንደከረሙ ሳላጫውታችሁ የቀረሁ አይመስለኝም። የሠፈሩ ሰው ታዲያ እኝህን ሰው እጅግ ፈርቷቸው ሰነበተ። ስለሳቸው አዳዲስ የወጡ መረጃዎችን የሚሰጡ ጥቃቅንና አነስተኛ ምላሶች ሠፈሩ ውስጥ በረከቱ። ሁሉም የየግሉን ኤፍኤም ጣቢያ የጀመረ መስሎን ነበር። የሚዲያ ነገር ሲነሳ ፌስቡክን አለማስታወስ ነውር ይመስለኛል። በዚሁ ፌስቡክ ስለአገር የምንሰማው ያው ተቀላቅሎ መሆኑ አያከራክረንም። መፈክሩም ‹‹ምርጥ ምርጡን ለሕዝባችን›› የሚል ነው ተብሎ በአንዳንድ ስላቅ ቀማሪዎች ይታማል። ታዲያ ሐሜት ነው? ‹‹ጆሮ ለባላቤቱ ባዳ ነው›› እንዲሉ ፖለቲከኞቻችንም የሕዝብ አስተያየት ሲያዳምጡ ‹‹ምርጥ ምርጡን›› ነው። ‹‹እውነቱን ተናግሮ ከመሸበት ማደር በአርበኞች ጊዜ ቀረ፤›› ሲሉ የሰነበቱት ባሻዬ ናቸው። ባሻዬ አልቀረም የሚሉት አንድ ነገር ብቻ እንደሆነ ነግረውኛል። እርሱንም ‹‹ና ወዲህ!›› ብለው በጆሮዬ፣ ‹‹አንበርብር ዛሬም ትናንትም ያለውና የነበረው ስለራሳችን እውነቱን ስንሰማ እንደ ወባ ታማሚ የሚያንዘረዝረን ነገር ነው፤›› ነበር ያሉኝ። ታዲያ እኔም በጆሯችሁ ነው ሹክ ያልኳችሁ እሺ? አንዴ በጦር ጄት ሌላ ጊዜ በሔሊኮፕተር የታገዘ ጥቃት መፈጸሙን አንበርብር ተናገረ ቢባል በፍጹም እንዳታምኑ፡፡ ወሬኛ ሁሉ እንጀራው የሚጋገረው ፌስቡክ ላይ መሰለ እኮ!

 የሠፈራችን ትልቁ ባለሀብት በነዋሪዎች ላይ የለቀቁትን ከራስ ይዞታና ከቀበሌ ቤት የማፈናቀል የማሸበር ስሜት አልቃይዳ እንኳ ሊፈጥረው የሚችለው አልነበረም። ሰውዬው በመንደራችን፣ ‹‹የቴረሪዝምን ቲዎሪ በደንብ ሊያስተዋውቁ የቻሉ፤›› ተብለዋል። ‹‹እንዳሻውና በአሻቸው ጊዜ ሕግ የሰሙትን ገልብጠው የማውራት ሱስ ያለባቸው ይኼንን በተመለከተ ሊያስቡበት የሚገባ ነገር አለ። አገር በሥራ እንጂ በነውጥ አታድግም የሚለውን ደግሞ አድሮ ቃሪያ ለሆኑት ፖለቲከኛ ተብዬዎችና አክቲቪስት ነን ባዮች በሉልን፤›› አለኝ አንድ በጉልበቱ ለፍቶ አዳሪ ወጣት ኮስተር ብሎ። ምንም እንኳ ደላላ እንጂ የፖለቲከኞች ተወካይ ባልሆንም፣ ‹‹እኔ ምን አገባኝ?›› ሳልል በጥሞና አዳመጥኩት። ባለሀብቱ፣ ‹‹ልጄ መዳር ያለባት የዳኸችበትና የሮጠችበት እዚህ መሬት ላይ ነው። ምንም እንኳ ዛሬ ሞልቶኝ በሾፌር ገብታ ስትወጣ ዓይኗን ለማየት ባትችሉም፣ እኔ እንደ እናንተ ሳለሁ (ደሃ ሳለሁ ለማለት ነው)  ከእኩዮቿ ልጆቻችሁ ጋር አፈር ፈጭታ አድጋለች፤›› አሉ ተባለ። ‹‹እናስ?›› ተብሎ ሲጠየቅ ለከተማው አስተዳደር አካባቢውን ለማልማት እንዲሰጣቸው ማመልከቻ አስገቡ ማለትን የሰሙ ነዋሪዎች ሰላማዊ ሠልፍ ለማድረግ ይመካከሩ ጀመረላችሁ። ‹‹ወጪና ጉልበት ቆጣቢ በሆነው ፌስቡክ ካልሆነ ለጊዜው ሰላማዊ ሠልፉ አልተፈቀደም፤›› ያለው ሰው ባይታወቅም፣ በዚሁ አንድምታ አዛውንቶች ሳይቀሩ ኢንተርኔት ካፌውን አጨናንቀው ሰነበቱ። የኢንተርኔት ካፌው በር ወይም የፌስቡኩ ፔጅ መጨናነቁን ሥራ ወጥሮን ማረጋገጥ ሳንችል ቀረን፡፡ ዘንድሮ እኮ ማረጋገጥ ሳይሆን ማጋጋል ነው ተመራጩ፡፡

እንግዲህ እኔ ይኼን ሁሉ በሩጫዬ መካከል በትዝብት እከታተልላችኋለሁ። ግማሹ፣ ‹‹የዘንድሮ ባለሀብት የተነሳበትን ለመርሳት የሚቀድመው የለም፤›› ሲል ሌላው ይቀበልና፣ ‹‹አገር የሚጠቅም ስንት ዓይነት ፋብሪካ መትከል እየቻለ ከተማ የሚበጠብጠውን ማን ያርቅልን?›› ሲል እሰማዋለሁ። ባሻዬ በበኩላቸው፣ ‹‹አሁን እሱ ሕንፃ ልገነባ ነው ብሎ ቤታችንን አፍርሶ ሲያበቃ እዚህ ዳስ ጥሎ ሠርግ ሊደግስ ነው ያሰበው። ብልጥ ለብልጥ ዓይን ፍጥጥ አለ ያገሬ ሰው። አይ የተነሱበትን አለማወቅ! ትናንትን እንደመርሳት የመሰለ ክፉ በሽታ የለም። አናውቅም እንዴ እንዴት እንዴት ብሎ ሀብቱን እንዳጋበሰው. .  .››  እያሉ በዕድሜ እኩያቸው ስለሆኑት ባለሀብት ብዙ ሚስጥሮች ሲዘከዝኩልኝ ሰነበቱ። ሰው ከሰነበተ የማይሰማውና የማያሰማው የለም። በመጠላለፍ ሕግ አንዱ ሲያመልጥ ሌላው ወዳቂ ነው። እንደምታዩት ዛሬ ይኼ የጨዋታ ሕግ ፖለቲካውን አጨናንቆት ምድረ አስመሳይ ወጠጤ ሲያልፍለት ሀቀኛው እያለፈበት ከውድድር ውጪ የሚሆነው በዛ። ጤናማ ፉክክር የዕድገት አንቀሳቃሽ እንደሆነ በእኔም ሕይወትና ሙያ ስለማስተውለው እጅግ እደግፈዋለሁ። ሆኖም የትናንት ታሪካቸውን እየረሱ ለወገን ባዕዳን የሚሆኑትን ሳይ ልቤ ይቆስላል። ለአገር ዕድገትና ብልፅግና መረዳዳት፣ መተጋገዝና መተሳሰብ ሲገባን ለመበላላት መሯሯጥ ያስከፋል። የባሻዬ ልጅ፣ ‹‹ይኼ ነው አንዱ የሥርዓተ አልበኝነት ጦስ፤›› የሚለኝ ነገር ከቶውንም ባይገባኝም በከፊል ግን የተወላገደው የዓለም የፖለቲካ ሥርዓት ለዚህ ያለውን አስተዋጽኦ አላጣውም። አሥር ሳንቲሞች ተጠራቅመው ሚሊዮኖችን እንዴት እንደሚታደጉ ማስረዳት እንደሚቻል አላውቅም። ‹‹ዋናው ጠላታችን የክፋት የጀርባ አጥንት የሆነው ራስ ወዳድነት ነው፤›› ብለው የሚነግሩን እስኪወለዱ እንጠብቅ ይሆን? ደጅ መጥናት አይታክተን መጥኔ!  

መቼ ዕለት በጥድፊያዬ መሀል ውዷ ባለቤቴ ማንጠግቦሽ ደወለችልኝ። ምን ገጥሟት ይሆን እያልኩ በጥድፊያ ስልኬን አነሳሁት። እንደ እኔ ስልካችሁ መጥራቱ በመቻሉ ብቻ ፈጠን ብላችሁ ማንሳት ይኖርባችኋል። ‹‹እንዴት?›› እንደማትሉ ተስፋ አደርጋለሁ። ምክንያቱም የአገራችን ኔትወርክ ጉዳይ እንደ አዲስ የሚወራ አይደለምና ነው። ‹‹ሎተሪ ቢደርሰኝ ከሚሰማኝ የደስታ ስሜት እኩል ሲደወለልኝና የደወልኩት ስልክ ሲጠራ እደሰታለሁ፤›› ያለኝ ደላላው ጓደኛዬ ነው። እውነቱን ነው የደላላ ስልክ ካልሠራ ገቢ የለም፡፡ ‹‹ኖ መኒ ኖ ፈኒ›› ሆነ ማለት ነው፡፡ ልክ ስልኩን አንስቼ ሳነጋግራት፣ ‹‹ለጥምቀት ጭፈራ በእጮኝነት ዘመናችን ትወስደኝ እንደነበረው ናና አሁንም ጃንሜዳ ይዘኸኝ ሂድ፤›› አለችኝ። ወይ ማንጠግቦሽ? አያችሁ ትዝታ መልሶ ሲወስዳት፡፡ ትዝታን ብንሸሸው መልሶ ጉያው ውስጥ ይከተናል ማለት ነው? እኔም ዘመኑ የሥራ መሆኑን ነግሬ ሳበቃ ብቻዋን ብትሄድ እንደማልከፋ ነገርኳት። በሐርሞኒካ ጭፈራ ማንጠግቦሽ የሚችላት ስላልነበር ስንቱን ታውረገርገው እንደነበር ደጋግማ ጥምቀት በመጣ ቁጥር አጫውታኛለች። ዛሬ እርጅና እየመጣ ጉልበት እንደ ልጅነት አልሆን ቢልም ሰው ነንና የሚያምረን ብዙ ነው። በአጉል አምሮት ውስጥ ደግሞ መሳቀቅ አለ። እናማ ብቻሽን ብትሄጂ ብዬ ማለቴ አንገብግቧት ነው መሰለኝ በጥምቀት ምድር ዘግታኝ ዋለች። ከባህልና ከልማድ ጋር የዘመኑ ሩጫ እንዲህ ሲያላትም ጊዜ ይፈታዋል ከማለት ውጪ አማራጭ ይኖራል? የደላቸው ሦስት ቀን እንደነገሩ ሠርተው አራት ቀን ያርፋሉ፡፡ ገንዘቡ ከየት ይሆን የሚገኘው? ይኼ የስፖንሰርሺፕና የዘረፋ ገንዘብ ከቅንጦት አልፎ ደም እያፋሰሰ ነው የሚባለው እኮ እውነት ነው! ባይሆንማ ኖሮ የሁለት ግለሰቦች ጠብ የብሔር ግጭት አይቀሰቅስም ነበራ!

አዕምሮዬ በአንድ በኩል በማንጠግቦሽ ሰሞነኛ የመነጫነጭ አመል፣ በሌላ በኩል ለማሻሻጥ እየሮጥኩለት በነበረው አምስት ዓመት የሠራ ባለተጎታች ቦቴ ምክንያት ተወጥሮ ነበር። ከኋላዬ ‹‹አንበርብር!›› የሚል ድምፅ ብሰማ ወዲያው ዞርኩ። በቅርቡ ከወንድሙ ጋር ተጋግዞ ሬስቶራንት የከፈተ የቀድሞ ደላላ ወዳጄ ድምፅ ነበር። ቤቱን አይቼለት ስለማላውቅ እግረ መንገዴን ጎራ አልኩ። ስለሥራው እያጫወተኝ ቆይቶ ድንገት የመገረም ፈገግታ አሳየኝና፣ ‹‹‹ጤና ተቆጣጣሪዎች መጥተው መፀዳጃ ቤቱን ለማየት ገቡና ፅዱና ደረጃውን ያሟላ መሆኑን ዓይተው ሲያበቁ፣ ‹ይኼንን ባለ ሳህን መቀመጫ አንስተህ የመሬቱን ነው ማድረግ ያለብህ፤› አይሉኝ መሰለህ? ለምን? ስላቸው ‹አዲስ የወጣ መመርያ ነው። በሁሉም ላይ ተግባራዊ እናደርገዋለን› አሉኝ። እኔም ደሜ ፈልቶ ባለ አምስት ኮከብ ሆቴሎችንም? ስላቸው እርስ በርሳቸው ይተያዩ ጀመር። እኔምለው አንበርብር ደንብና መመርያ የሚያወጣው በደመነፍስ ነው እንዴ?›› በማለት አስደመመኝ። የአንዳንዱ መመርያ ‹‹ላም በሌለበት ኩበት ለቀማ፤›› የአንዳንዱ ደግሞ ‹‹ልፋ ያለው ገለባ ይወቃል፤›› ዓይነት ሲሆን ስናይ አግራሞታችን ያይላል፡፡ ‹‹ግራ ተጋብተው ግራ የሚያጋቡ ባይበዙ እኮ የጀመርነው የዘጠኝ ወራት የዴሞክራሲ ጉዞ ለምሥራቅ አፍሪካ ይተርፍ ነበር፤›› ያለኝ ምሁሩ የባሻዬ ልጅ ነው፡፡ ወይ ነዶ!  

በሉ እንሰነባበት። በለስ ቀንቶኝ ቦቴውን አሻሽጬ ጠቀም ያለ ገንዘብ ቆጠርኩ። ያሻሻጥኩለት ሰው የዕድሜውን ግማሽ ነዳጅ ሲያመላልስ ቢኖርም፣ ነዳጅ መፈለግ እንጂ በበቂ መጠን ማግኘት ያቃተን ምስኪኖች ስለሆንን ቅር እንዳይልህ ብሎ ያሰበልኝ ኮሚሽን ከበቂ በላይ ሆኖብኛል። አባባሉ የብዙዎቻችንን ምኞት ይወክል ይሆን ብዬ መብሰልሰሌ ግን አልቀረም። ይኼንን ጥያቄ የተለመደችው ግሮሰሪያችን ቀዝቃዛ ቢራችንን እየተጎነጨን፣ ‹‹በድርቅና በረሃብ ምክንያት የጠቆረው ስማችን ወደ ዴሞክራሲ መንገድ ስጀምር በግጭት መነሳት ጀምሯል፡፡ አሁን የቀረን አንድ ነገር ብቻ ነው፤›› አለኝ የባሻዬ ልጅ፡፡ ቀና ብዬ፣ ‹‹ምንድነው እሱ?›› በማለት ጥያቄ አቀረብኩለት፡፡ ‹‹በኢትዮጵያዊ ጨዋነት የታጀበ ብሔራዊ አንድነት፡፡ ከጥላቻና ከንቀት የተላቀቀ መከባበር፡፡ ሁሉም በእኩልነትና በባለቤትነት ስሜት የሚኖርባትን ዴሞክራሲያዊት አገር ዕውን ማድረግ፡፡ ከዚያ ዜጎች በአገራቸው አንገታቸውን ቀና አድርገው እንዲራመዱ ምኅዳሩን ማመቻቸት፡፡ ዋናው አንገትን አንዴ ቀና ማድረግ ነው። ከዚያ በኋላ ጉዞው አባጣ ጎርባጣ የሌለበት ሜዳ ነው፤›› ብሎኝ ሲያበቃ ቺርስ ተባባልን። እስቲ ፖለቲከኞችም ቂም በቀላቸውን ትተው ቺርስ ይባባሉ፡፡ የተወጠረው አየር ተንፈስ ብሎ እኛም ንፁህ አየር እንማግ፡፡  ስለዚህ የተኳረፋችሁ፣ ጀርባ ለጀርባ የተሰጣጣችሁ፣ በአሉባልታና በሐሜት የተለያያችሁ፣ በጠመንጃ አገር ለማፍረስ የምትባዝኑና ባልበሰለ አስተሳሰብ ታሪክ የምታዛቡ ተቀራረቡና ቺርስ ተባባሉ፡፡ ብትፈልጉ በውኃ፣ በወይን፣ በፈለጋችሁት፡፡ እናንተንም ቺርስ ብያለሁ! ከማቀርቀር ቀና እንበል! መልካም ሰንበት!

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት