Saturday, May 18, 2024
- Advertisement -
- Advertisement -

ዜናሦስት ቢሊዮን ብር የሚያባክኑ የመሠረተ ልማት ተቋማትን ለማናበብ አዳዲስ ኃላፊዎች ተሾሙ

ሦስት ቢሊዮን ብር የሚያባክኑ የመሠረተ ልማት ተቋማትን ለማናበብ አዳዲስ ኃላፊዎች ተሾሙ

ቀን:

በአዲስ አበባ ከተማ የሚገኙ የመሠረተ ልማት ተቋማት ተቀናጅተው ባለመሥራታቸው ብቻ፣ በየዓመቱ የሚባክነውን ሦስት ቢሊዮን ብር ለማዳንና የነዋሪዎችን ተደጋጋሚ ቅሬታ ለማስቀረት የተቋቋመው የመሠረተ ልማት ቅንጅትና ግንባታ ፈቃድና ቁጥጥር ባለሥልጣን አዳዲስ ኃላፊዎች ተሾሙለት፡፡

የአዲስ አበባ ከተማ አስተዳደር ከንቲባ ጽሕፈት ቤት እንዳስታወቀው፣ ወ/ሮ ትምኒት እሸቱ (ኢንጂነር) የባለሥልጣኑ ዋና ዳይሬክተር ሆነው ሲሾሙ፣ አቶ ሰለሞን ካሳ (ኢንጂነር) እና አቶ ዳዊት ድሪባ (ኢንጂነር) ደግሞ ምክትል ዋና ዳይሬክተር ሆነው ተሾመዋል፡፡

ወ/ሮ ትምኒት በአዲስ አበባ ዩኒቨርሲቲ የሕንፃ ኮሌጅ በመምህርነት፣ በተለያዩ የአገር ውስጥና የውጭ ድርጅቶች አማካሪ ሆነው ሠርተዋል፡፡ የቀድሞ የባለሥልጣኑ ዋና ዳይሬክተር አቶ መለስ አለቃን በመተካት ቢሮውን ተረክበው ሥራ ጀምረዋል፡፡

- Advertisement -

የከንቲባ ጽሕፈት ቤት እንዳስታወቀው፣ በአዲስ አበባ የሚከናወኑ የመሠረተ ልማት ግንባታዎች ባለመናበባቸው ብቻ ከፍተኛ ሀብት ይባክናል፡፡

‹‹አዲሶቹ ተሿሚዎች በከተማው ውስጥ የሚገኙ የመሠረተ ልማት ግንባታዎች ዲዛይንም ሆነ የቁጥጥር ሥራ በአንድ ማዕከል እንዲሆን በማድረግ፣ ለዓመታት የቆዩ ችግሮችን የመፍታት ኃላፊነት አለባቸው፤›› ሲል የከንቲባ ጽሕፈት ቤት አስታውቋል፡፡

የአዲስ አበባ ከተማ የመሬት ልማትና ማኔጅመንት ቢሮ፣ የመንገዶች ባለሥልጣን፣ የውኃና ፍሳሽ ባለሥልጣን፣ በፌዴራል ደረጃ ደግሞ የኢትዮጵያ ኤሌክትሪክ ኃይል፣ የኢትዮጵያ ኤሌክትሪክ አገልግሎት፣ ኢትዮ ቴሌኮምና የግል ኩባንያዎች በየራሳቸው የሚያካሄዷቸው የመሠረተ ልማት ግንባታዎች እርስ በእርስ የሚናበቡ ባለመሆናቸው ከፍተኛ የሀብት ውድመት እያስከተሉ ነው፡፡ 

ይፋ ያልሆነ የአዲስ አበባ ከተማ አስተዳደር ጥናት እንደሚያመለክተው፣ የመሠረተ ልማት ተቋማቱ ባለመናበባቸው ብቻ መንግሥት በየዓመቱ ከሦስት ቢሊዮን ብር በላይ ይባክናል፡፡ ከዚህ በተጨማሪ እየተገነቡ የሚፈርሱ ግንባታዎች የኅብረተሰብ ዋነኛ የቅሬታ ምንጭ ከመሆናቸው በተጨማሪ፣ ለአካል ጉዳተኞች ፈተና ሆነው ቆይተዋል፡፡

የቀድሞ የአዲስ አበባ ከተማ አስተዳደር ከንቲባ አቶ ድሪባ ኩማ፣ ይህንን መሠረታዊ ችግር ለመቅረፍ የመሠረተ ልማት ተቋማት ተናበው እንዲሠሩ ለማድረግ የመግባቢያ ስምምነት እንዲፈራረሙ አድርገው ነበር፡፡ በቅርቡ እንደ አዲስ የተቋቋመው የከተማው የመሠረተ ልማት ቅንጅት፣ የግንባታ ፈቃድና ቁጥጥር ባለሥልጣን ራሱን አደራጅቶ ኃላፊነቱን እስኪረከብ ድረስ፣ የማስተባበር ሥራውን የፌዴራል የተቀናጀ የመሠረተ ልማት ማስተባበሪያ ኤጀንሲ እንዲሠራ አድርገው ነበር፡፡

የአዲስ አበባ ከተማ አስተዳደር የመሠረተ ልማት ቅንጅት፣ የግንባታ ፈቃድና ቁጥጥር ባለሥልጣን ሥራውን መረከብ የሚያስችለውን መዋቅር ሲዘረጋ የቆየ ሲሆን፣ አሁን ደግሞ አዳዲስ ኃላፊዎች የተሾሙለት ስለሆነ የማቀናጀት ሥራውን በቅርቡ ይጀምራል ተብሏል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ