Tuesday, May 21, 2024
- Advertisement -
- Advertisement -

የተመረጡ ፅሑፎች

የምን መታፈን ነው?

“እኔ የምለው?” አለ አንድ መመሰጥ የሚወድ የሚመስል ሰው፡፡ መቼም ሚዛን የሚደፋ ነገር የሚናገር ሰው ካገኘ ሰው ለማድመጥ ዝግጁ ነው፡፡ የታክሲው ተሳፋሪዎች በሙሉ ማለት ይቻላል “እኔ የምለው?” በማለት ስሙኝ ወዳለው ሰውዬ ትኩረት አደረገ፡፡ ጉዞዋችን ከመገናኛ ሜክሲኮ እንደሆነ ልብ በሉልኝ፡፡ ሌላው ልብ እንዲልልኝ የምፈልገው ነገር ቢኖር፣ በታክሲው ውስጥ ሴቶች የነበራቸው ቦታ ነው፡፡ አብዛኞቹ ወንዶች ተደርበው፣ ሌሎች ደግሞ ጥጋቸውን ይዘው የተቀመጡበት ሁኔታ ነበር፡፡ ‹‹ቅድሚያ ለሴቶች ይሉሀል ይኼ ነው፡፡ በፊት ለነፍሰ ጡሮችና ልጅ ለያዙ እናቶች ብቻ ይሰጥ የነበረው ቅድሚያ፣ አሁን በፆታቸው እንስት ለሆኑ ሁሉ እየተቸራቸው መሆኑን ተመልክቻለሁ፤” ያለው ጥጉን ይዞ የተቀመጠ ወጣት ነበር፡፡ ‹‹እሰየው ይበል የሚያሰኝ ነው፡፡ ዕድሜ ለጠቅላይ ማኒስትራችን፤›› አለችው ከጎኑ የተቀመጠች፡፡

ትኩረታችን ግን “እኔ የምለው?” ወዳለው ሰውዬ ነበር፡፡ “ከተለያዩ አገሮች የታሰሩ ኢትዮጵያዊያን እስረኞች እየተለቀቁ ወደ አገራችን ሲገቡ ከማየት የበለጠ ምን ታላቅ ደስታ አለ?” በማለት ለታክሲው ተሳፋሪዎች በሙሉ ጥያቄ አቀረበ፡፡ የእርሱን ጥያቄ ተከትሎ በርካታ ጥያቄዎች መንሸራሸር ጀመሩ፡፡ በተለይ አንድ እናት፣ “እግዚአብሔር ይመስገን፣ ሞቶ ቀርቷል የጥይት እራት ሆኗል ብዬ አልቅሼ የተውኩት ልጅ በአየር በሮልኝ ሲመጣ ተመልክቼ ደስታ ቢያብነሸንሸኝ ምን ይገርማል? ያውም ጠቅላይ ሚኒስትራችን ሄደው አነጋግረውልን? ለልጆቻችን ጥብቅና ቆመውልን…” በማለት ማመን ተስኗቸው ታላቅ ተመስጦ ውስጥ ገቡ፡፡

ወያላው ሒሳብ እየሰበሰበ ነው፡፡ “እና ማዘር ጠቅላይ ሚኒስትሩ ጠበቃ ሆኑልኝ ነው የሚሉት?” በማለት ጥያቄ አቀረበላቸው፡፡ እንኳን ጠይቅከኝ በሚል ስሜት፣ “እንዴታ እኔ በምን አቅሜ ነበር ላስፈታው የምችለው? እንዲህ ለሕዝቡ ጠበቃ የሚሆን ጠቅላይ ሚኒስትር ስለሰጠን እግዚአብሔር ይመስገን፤” በማለት በምሥጋናቸው ገፉበት፡፡ ሌላ ወሬውን በትኩረት ሲከታተል የነበረ ጎልማሳ፣ “እውነት ብለዋል እናት፡፡ በሊቢያ በግፍ የተገደሉትን አያሌ ኢትዮጵያዊያንን በተመለከተ የዓለም መንግሥታት ድርጊቱን ሲያወግዙ፣ የእኛ መንግሥት ምን ይፈጥርልን ይሆን ብለን ስንጠብቅ መልሳቸው የነበረው ‹ጉዳዩን እያጣራን ነው› በማለት በቁስላችን ላይ እንጨት ሲሰዱበት እንዳልነበረ፣ ዛሬ ደግሞ ነገር ተገልብጦ ይኼንን ወግ ስናይ እግዜሩን ቢያመሠግኑ ምን ይገርማል?” በማለት ከአዛውንቷ ሐሳብ ጋር ተባበረ፡፡

 ይኼ ሁሉ ወሬ ሙሉ ለሙሉ ያልተዋጠለት የሚመስል ሰው፣ “መጀመርያ አገር ቤት ያሉት እስረኞች መቼ ተፈትተው አልቀው ነው ወደ ውጭ መሄድ ያስፈለገው?” በማለት ሐሳቡን ሰነዘረ፡፡ ይኼን ጊዜ አንድ ወጣት ተበሳጭቶ፣ “ምናለበት መልካም ነገር ለማየት ዓይኖቻችንን ብናሠለጥናቸው?” በማለት ተማረረ፡፡ በዚህ መሀል ነዳጅ ለመቅዳት አንድ ማደያ ውስጥ ተኮለኮልን፡፡ ከፊታችን አንድ ሁለት መኪናዎች ነበሩ፡፡ በተለይ አንዲት ቢጫ ቮልስ ከእኛ በጎን በኩል ባለው ማደያ ቆማለች፡፡ ወያላው በጎን በኩል እያያት ይስቃል፡፡ መስኮቱን ከፍቶ ሾፌሩን በነገር መተንኮስ ጀመረ፣ “ማነህ ወንድሜ?” በማለት የቢጫ ቮልሷን ሾፌር ጠራው፡፡ ሾፌሩም ነገሩ ገርሞት ምን ሊለኝ ነው በሚል ስሜት ቀጣዩን ነገር ለመስማት ቋመጠ፡፡ ወያላውም ፈገግ ብሎ በቢጫ ቮልሷ ላይ እየተሳለቀ፣ “ነዳጅ በጄሪካን አይሸጥም፤” በማለት ክትክት ብሎ ሳቀ፡፡ 

‹‹በዓብይ ዘመን ፀብና አታካሮ የለም፡፡ በጄሪካንም ቢገዛ ምናልባት መኪናው ቆማበት ነው እንጂ ለሌላ ዓላማ ሊያውለው ፈልጐ አይደለም፤›› በማለት የወያላው ሽሙጥ ያልገባው የታክሲ ሾፌር ምስኪን አስተያየት የባሰ አስፈገገን፡፡ ይኼንንም የሰማው ሌላ ወጣት፣ “ቅኖች ለዘለዓለም ይኑሩ!” በማለት አንድ ታክሲ ውስጥ መለጠፍ የምትችል ጥቅስ ከሾፌሩ ንግግር ውስጥ ሠራ፡፡ በዚህ መሀል አንድ ፈላስፋ የሚመስል ጎልማሳው ወሬውን ተቀላቀለ፡፡ “ቀጣዩ የጠቅላይ ሚኒስትር ሥራ መሆን ያለበት…” አለ፡፡ ሐሳቡን ሳይጨርስ አንዲት ሴት አቋርጣው፣ “አሁንስ አልበዛም እንዴ? ያም ይኼም እየተነሳ ቀጣዩ የጠቅላይ ሚኒስትሩ ሥራ መሆን ያለበት ይለናል፡፡ እሳቸው የያዙት ስንት አጀንዳ አለባቸው፡፡ ያለፈውም ያገደመውም እየተነሳ የሥራ ዕቅድ ሊሰጣቸው ይፈልጋል እንዴ?” በማለት ተማረረች፡፡

በምሬት የተናገረችውን ወጣት ሐሳብ በአንክሮ ሲከታተል የነበረው ጎልማሳ፣ ምንም ሳያንገራግር አሁንም ሐሳቡን ማስረዳት ቀጠለ፡፡ እንዲህም አለ፣ “ቀጣዩ የጠቅላይ ሚኒስትሩ ሥራ መሆን ያለበት…” ብሎ በድጋሚ ሐሳቡን ለማብራራት ሲጀምር በድጋሚ ሌላ ተቃውሞ ጠበቀው፡፡ ከልጅቷ ሐሳብ ጋር መደመር የፈለገ የሚመስል ሰው፡፡ “እስቲ ለጠቅላይ ሚኒስትሩ ዕቅድ ማውጣት ትተህ፣ የራስህን ሕይወት የምትመራበት ዕቅድ አውጣና ራስህን ለውጥ፡፡ እንዲያው እግዜሩ ያሳያችሁ የራሱን የሕይወት ዕቅድ አውጥቶ መምራት ያቃተው ሰው፣ የጠቅላይ ሚኒስትራችንን ዕቅድ ላውጣ ሲል አይገርምም?” በማለት ልጅቷን ተመለከታት፡፡ እንዴት ነኝ ያላት ይመስላል፡፡

ልጅቷም ተቀብላ፣ “የራሷ ሲያርባት … አለ ያገሬ ሰው…›› በማለት ተረተች፡፡ ይኼንን ሁሉ ወሬ በጥሞና ሲያዳምጥ የነበረው ሰው ምንም ዓይነት መበገርም ሆነ ሐሳብ መቀየር ሳይስተዋልበት ንግግሩን ቀጠለ፣ “ቀጣዩ የጠቅላይ ሚኒስትራችን ሥራ መሆን ያለበት…” ሲል ሁሉም ፈገግ አሉ፡፡ ይህ ሰው ለጠቅላይ ማኒስትሩ ዕቅድ ከማውጣት ማንም እንደማይገታው ስንረዳ፣ እስቲ ይተንፍስና ዕቅዱን እንስማለት በሚል ጆሮ ተሰጠው፡፡ “ጠቅላይ ማኒስትራችን አሁን ደግሞ በአዕምሮ እስር ቤት ታስረው የሚማቅቁትን ኢትዮጵያዊያን ማስፈታት ይኖርባቸዋል፤” በማለት ትንሽ ካሰላሰለ በኋላ ነገሩን ቀጥሎ፣ “እዚህ ኢትዮጵያ ውስጥ ስንት የአዕምሮ እስረኞች ሞልተዋል፡፡ እነሱ ተፈትተው አዲሲቷን ኢትዮጵያ መቀላቀል አለባቸው፤” በማለት  ሐሳቡን ሰነዘረ፡፡ ይኼን ጊዜ ወያላው፣ “እውነት ብለሀል ሊያስፈቱህ ይገባል፤” በማለት ቀለደ፡፡

በመሀል ሾፌሩ፣ “ሰው መንፈስ ነው የሚባለው ነገር ግን እውነት ሳይሆን አይቀርም፤” ሲል ተንሽ ትኩረት አገኘ፡፡ ወያላው፣ “እንግዲህ አንተም ጠቅላይ ሚኒስትሩ ሊያስፈቷቸው ከተገቡት እስረኞች ተርታ ሳላስገባህ ፈጥነህ ሐሳብህን አስረዳ፤” አለው፡፡ ሾፌሩም፣ “ሰውዬው ባለፈው ሳዑዲ ዓረቢያ አልነበሩ እንዴ …” በማለት ጠይቆ፡፡ መልስ ሳይጠብቅ፣ “መቼ ለታ ደምቢዶሎ ታይተዋል ተባለ፡፡” እሺ ይሁን አልኩኝ፡፡ እንደገና ደግሞ ጋምቤላ ደርሰው ከጋምቤላ ማኅበረሰብ ጋር እየተወያዩ ነው ተባለ፡፡ አሁን ራሱ  የት እንዳሉ ለማወቅ እየተቸገርኩ ነው፤” ሲለው ወያላው፣ “አንተም መፈታት አለብህ፤” በማለት መለሰለት፡፡ ሾፌሩም፣ “ተው ግን እንጠርጥር ይኼ ሰው መንፈስ ሳይሆን አይቀርም?” ሲል ለካ ሜክሲኮ ደርሰናል፡፡ ‹‹መጨረሻ›› ተብለን ከታክሲው ወርደን ወደ ጉዳያችን ስንበታተን፣ የሐሳብን ነገር እያሰብኩ ስጓዝ ‹የምን መታፈን ነው?›  የሚል ስሜት ይሰማኝ ነበር፡፡ መልካም ጉዞ!

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት