Saturday, May 18, 2024
- Advertisement -
- Advertisement -

ይድረስ ለሪፖርተርይድረስ የፈጣሪን ስም ለጠሩት ጠቅላይ ሚኒስትር

ይድረስ የፈጣሪን ስም ለጠሩት ጠቅላይ ሚኒስትር

ቀን:

በ44 ዓመታት ጊዜ ውስጥ የኢትዮጵያ መሪ በመሆን ለመጀመርያ ጊዜ ‹‹ፈጣሪ ኢትዮጵያንና ሕዝቦቿን ይባርክ››  እያሉ ንግግርዎን ሲያሳርጉ ዓይቶ ሕዝበ ኢትዮጵያ በደስታ ተሞልቷል። እኔ ግን እያሉ ያሉት ይህ የማሳረጊያ ቃል በሕዝብ ፊት ብቻ ሳይሆን፣ በአምላክ ፊት ምንና ምንን በኃላፊነት ሊያስጠይቅዎ እንደሚችል የነገሩ ክብደት እጅግ አሳስቦኛል።

የፈጣሪ ስም ከተነሳ ዘንዳ ይህ ፈጣሪ የሚሰጠን በረከት ምንነት ይታወቅ ዘንድ ያስፈልጋል። “ኢትዮጵያ እጆቿን ወደ እግዚአብሔር ትዘረጋለች” ሲባል ዝንተ ዓለም አሳልፈን ዛሬን ደረስን። እስከ ዛሬ ‹‹ትዘረጋለች›› ከማለት አልፈን፣ ‹‹ዘረጋች›› ወደ ማለት ሳንሸጋገር ሦስት ሺሕ ዓመታት ጠበቅን። በዚህ ጽሑፌ ይህ 3,000 ዓመታት ያስቆጠረው ትንቢት ‹‹ተፈጸመ›› የሚያስብለው ሁኔታ ምን እንደሆነና፣ የፈጣሪን በረከት የጠየቁት እርስዎ ስለዚህ በረከት ሊኖርዎት የሚገባውን ግንዛቤ ለመጠቆም እሞክራለሁ። የዚህ ጉዳይ ተጠያቂነት ሁላችንንም የሚመለከት ስለሆነ የእኛን ድርሻም ለማመላከት እሞክራለሁ።

ይህ ጉዳይ ከሃይማኖት የሚወግን አይደለም። ሃይማኖት የግል ነው፡፡ አገር የጋራ ነው። ሁሉም ሰው ልቡ የፈቀደውን እምነት በነፃነት እንዲለማመድ አምላክ ለሰው ልጆች የሰጠው ነፃ ምርጫን ነው። ስለዚህ መንግሥት ሁሉንም ሃይማኖቶች ያለ አድልዎ በእኩልነት የሚያስተናግድ መሆን አለበት። ኢትዮጵያ ልጆቿ በተለያዩ ቤተ እምነት ጥላ ሥር ናቸው። ነገር ግን በአብዛኛው ሁሉም ፈሪሃ ፈጣሪ እንዳላቸው መገንዘብ ይቻላል። ሰላምታ በተሰጣጡ ቁጥር እንኳን ይህንን ፈጣሪ በሰላምታቸው ውስጥ ሳያስገቡ አያልፉም።

- Advertisement -

የጥንት ነገሥታት የአምላክን ስም እንደሚጠሩ ሁላችንም የምናውቀው እውነት ነው። የአምላክን ስም ሲጠሩ ግን የኢትዮጵያን መለኮታዊ ጥሪ ያማከለ አልነበረም። እነዚህ ነገሥታት የኢትዮጵያን መለኮታዊ ጥሪ አግተው፣ በምትኩ መለኮታዊ ጥሪን በራሳቸው ዘውድ ላይ እንዲያጠነጥን አደረጉ። ስለዚህም የሰለሞን ሥርወ መንግሥት በመባል የሚታወቀውና የንግሥና ሥልጣናቸውን ከእስራኤሉ ንጉሥ ስለሞንና ኢትዮጵያዊቷ ንግሥት ሳባ የዘር ቆጠራ ጋር ያቆራኙ በርካታ ነገሥታት በምድራችን እንደ ነገሡ ታሪክ ይነግረናል። ከዚህም በላይ የዛጉዬ ሥርወ መንግሥት የሚባለው የንግሥና ሥልጣናቸውን ለማረጋገጥ በእስራኤሉ ሙሴና ኢትዮጵያዊቷ ሲፓራ ዘር ቆጠራ ይደገፉ እንደነበር ይታወቃል። 

የኢትዮጵያ መለኮታዊ ጥሪ ግን በአንድ ሰው መሪና በእርሱም ንግሥና የሚተረጎም አይደለም። ኢትዮጵያ (ሕዝቧ ሁሉ እንደ አንድ ሆነው) እጆቿን እንደምትዘረጋ የታየላት። የኢትዮጵያ ጉዳይ ከእስራኤል ታሪክም የተለየ ነው። የእስራኤል ታሪክ በግለሰብ ላይ ያጠነጠነ ነበር። ጥንት አንድ ግለሰብ የሆነው አብርሃም እጆቹን ወደ ፈጣሪው ስለዘረጋ፣ ዛሬ አይሁድ ሙስሊምና የክርስትና እምነት ተከታዮች ሁሉም አብርሃምን አባታችን ነው ብለው እንደ አዕማድ ያዩታል። የኢትዮጵያ ታሪክ ግን በሕዝብ ላይ ያጠነጠነ ነው። ስለዚህም የኢትዮጵያ ሕዝብ እንደ አንድ ሰው ሆኖ፣ ኢትዮጵያ እጆቿን ወደ ፈጣሪ በዘረጋች ጊዜ፣ ዓለም ሁሉ በምሳሌነት የሚያያት ምድር እንደምትሆን ነገን የሚደርስ ሰው የሚያየው ጉዳይ ነው። የኢትዮጵያ አብሮነት (መደመር) እንደ ዘር ሆኖ የአፍሪካን አብሮነት (መባዛት) ይፈጥር ዘንድ ማን ያውቃል? 

የኢትዮጵያን ነገሥታት ታሪክ የተደመደመው በጃንሆይ ንግሥና ነበር። ከዚያ በኋላ እስከ ዛሬ ድረስ ያሉት መንግሥታት ራሳቸውን ንጉሥ ብለው አይጥሩ እንጂ፣ የኢትዮጵያ ሕዝብ ባለሥልጣን ሆኖ አገልጋዩ እንዲሆን መንግሥትን ለመምረጥ ስላልታደለ፣ እነዚህ መንግሥታት ንጉሦች እንደሆኑ መቁጠር እንችላለን። በአመፅ ወይም በውርስ ነግሠዋልና።

የኢትዮጵያ መለኮታዊ ጥሪ መቼ ይፈጸማል? ይህ መለኮታዊ ጥሪ እንዲፈጸም አንድ መንግሥት አዋላጅ መንግሥት ለመሆን መወሰን አለበት። ይህም አዋላጅ መንግሥት ሥልጣንን ለሕዝብ አስረክቦና ሕዝብን ንጉሥ አድርጎ፣ ንጉሥ የሆነው ሕዝብ በተራው አገልጋይ የሚሆነውን መንግሥት በሀቅ ምርጫ እንዲመርጥ ዕድል ሲያገኝ ነው። ያኔ ይህ ንጉሥ ለመሆን የሚታደለው የኢትዮጵያ ሕዝብ፣ በምርጫው ፈጣሪን የምድራችን ንጉሥ እንደሆነ ዕውቅና ለመስጠት ፋታ ያገኛል። ያኔ ኢትዮጵያ እጆቿን ዘረጋች ተብሎ የዕፎይታ ዘመን ጅማሬ ይሆንልናል።

ሃይማኖትና መንግሥት ለየቅል ሆነውና ክህደት ተስተናግዶ ሲያበቃ፤ ለመጀመርያ ጊዜ ፈጣሪ ኢትዮጵያን እንዲባርክ በባለሥልጣናት ጉባዔ የተጠየቀበት ጊዜ ቢኖር ዛሬ ነው። ዶ/ር ዓብይ አህመድ ‹‹ፈጣሪ ኢትዮጵያንና ሕዝቦቿን ይባርክ›› በማለት ለሚቀጥሉት መሪዎቻችን ፈር ቀዳጅና ፋና ወጊ ሆነዋል። ይህ አባባል የራስዎን ግንዛቤ እንደ ግለሰብ የሚያሳይ ብቻ ሳይሆን፣ በሕዝብ ልብ ውስጥ ያለውን የጋራ ግንዛቤ ማስተጋባትዎ እንደሆነ ጭምር መቆጠር አለበት። ከእንግዲህ የመንግሥትም ሆነ የተፎካካሪ ፓርቲ መሪዎች ይህንን የፈጣሪ በረከት ለመጠየቅ ህሊናቸው ብቻ ፈቃድ ይስጣቸው። ይሁንና ከእነርሱ በላይ ባለሥልጣን የሆነ የኢትዮጵያ አምላክ እንዳለ ተዓምረኛዋ ኢትዮጵያ ይታወቅላት።

ታዲያ ለመጀመርያ ጊዜ ዶ/ር ዓብይ ይህንን የፈጣሪ ስም ሲጠሩ፣ እንደ ቀድሞ የእግዚአብሔርን ስም ይጠሩ እንደነበሩ ንጉሦች የመንግሥትን ንግሥና ለማስቀጠል ሳይሆን፣ ሕዝቡ ንጉሥ የሚሆንበት አዲሲቷ ኢትዮጵያ እንድትወለድ፣ አዋላጅ ባለሥልጣን መሆንን ብቸኛ ተልዕኮዎ እንደሆነ መቁጠር ይገባዎታል። ለዚህም በሕዝብ ዘንድ እንደ ስጦታ እየተቆጠሩ እንደሆነ የኢትዮጵያ ልጅ የሆኑት ዶ/ር ዓብይ አህመድ እርስዎም የሚያውቁት ይመስለኛል።

የተቃዋሚ ፓርቲዎችን ተፎካካሪ ብለው እንደጠሩ ተሰምቶ ደስ አለን። ግን እነዚህን ፓርቲዎች ተፎካካሪ ስለተባሉ እውነትም ተፎካካሪ ሊሆኑ አይችሉም። የዴሞክራሲ ምኅዳሩ ከሌለ አማራጭ ኃይል ለመሆን በሐሳብ ዙሪያ ለመሰብሰብ አይችሉም። ያላቸው ምርጫ ዴሞክራሲ እስኪወለድ ድረስ መቃወም ነው። ስለዚህ ሌሎች ተፎካካሪ ፓርቲዎች እንዲሆኑ፣ በመጀመርያ ዴሞክራሲን የሚያዋልዱ አዋላጅ ለመሆን ቆርጠው መነሳት ይኖርብዎታል። አዲሲቷ ኢትዮጵያ የምትወለደው ልጆቿ ሁሉ ሲሳተፉ ስለሆነ፣ በመጀመርያ ዴሞክራሲ መወለድ አለበት። ያኔ ተፎካካሪ ፓርቲዎች ተባባሪ አዋላጅ ሆነው ይገለጣሉ። በመጨረሻም አዲሲቷ ኢትዮጵያ በሕዝቧ ንጉሥነት ትወለዳለች። በዚያን ጊዜ ኢትዮጵያ ወደ ፈጣሪ እጆቿን ለመዘርጋት የምርጫ ነፃነት ይኖራታል። እስካሁን ግን ለዘመናት የንጉሣውያን መንግሥታት እስረኛ እንደሆነች አለች።

የኢትዮጵያ ሕዝብ ንጉሥ የመሆን ዕድል ካገኘ፣ ፈጣሪን የምድራችን ንጉሥ እንደሆነ ዕውቅናን በደስታ እንደሚሰጥ የሚያውቅ የኢትዮጵያ አምላክ፣ እስካሁን ኢትዮጵያን ከጥፋት እየጠበቀ ዛሬ ደረስን። ዘረኝነት ከፋፍሎን እንዳያጠፋን ሥጋት ውስጥ ገብተን ነበር። ዛሬ ፍቅር አሸንፎ በአንድ ልብ እንደ አንድ ቤተሰብ ለመሆን እየተሠራንና እየተያያዝን ያለንበት ወቅት ነው። የሁሉም ነገር ማሰሪያ ፍቅር እንዲሆን እያደረግን፣ ምድራችን በዴሞክራሲ፣ በፍትሕ፣ በመልካም አስተዳደርና በልማት እንድትመነጠቅ ሁላችንም ለበጎ ሥራ ተግተን አዲስ ታሪክ ይሠራ።

ዶ/ር ዓብይ አህመድ ይህንን ታላቅ ተልዕኮ እንዲወጡ፣ ሁላችንም ወደ ፈጣሪ እሳቸውን በፀሎትና በምልጃ የምናቀርብበት ጊዜ ነው። ኢትዮጵያ በምጥ ላይ ነችና ሁላችንም አብረን በምጥ ሆነን ወደ ፈጣሪ እንቃትት ዘንድ ይገባል።

ትልቁ የፈጣሪ በረከት ለዚህ ሁሉ ተልዕኮ መሠረት የሆነውን የኢትዮጵያ ሕዝብ ቤተሰብነት ወደ ብርሃን ማምጣት ነው። ይህንንም በተመለከተ አንድ ነገር ልበልና ልቋጭ፡፡ አሜሪካኖች ስለ አሜሪካ One Nation Under God (በአምላክ ሥር ያለ አንድ ሕዝብ) ይላሉ። ኢትዮጵያ ደግሞ One Family Under God (በፈጣሪ ሥር ያለ አንድ ቤተሰብ) ይሁንልን! እግዚአብሔር ኢትዮጵያን አሰበ፡፡ እግዚአብሔር ኢትዮጵያን ይባርካታልም፡፡

 (/ ዘላለም እሸቴ፣ ከአዲስ አበባ)

በተባበሩት መንግሥታት ያለው ብልሹ የቅጥር አሠራር ይስተካከል

በኢትዮጵያ የተባበሩት መንግሥታት የተለያዩ ቅርንጫፎች የአብሮ አደግ መረዳጃ የቤተሰብ ዕድር እየሆኑ ነው፡፡ በኢትዮጵያ ከ20 በላይ የተመድ መሥሪያ ቤቶች አሉ፡፡ ተቋማቱ በጤና፣ በትምህርት፣ በግብርናና በፋይናንስ ዘርፍ ወዘተ ይሠራሉ፡፡

ተቋማቱ እግጅ ከፍተኛ የሰው ኃይልም ይቀጥራሉ፡፡ ቅጥሩም በሁለት ዓይነት የሚፈጸም ነው፡፡ አንዱ ዓለም አቀፍ ቅጥር ሲሆን፣ ከመላው ዓለም የሚቀጠሩ ሠራተኞች ናቸው፡፡ ሁለተኛው የአገር ቤት ቅጥር ሲሆን፣ የሚቀጠሩት ኢትዮጵያውያን ናቸው፡፡ በእነዚህ ተቋማት ለሠራተኛ የሚከፈለው ክፍያ እጅግ በጣም ከፍተኛ ነው፡፡ ጥቅማ ጥቅሙ ከራስ አልፎ ለቤተሰብ የሚተርፍ ነው፡፡ እነዚህ የተመድ መሥሪያ ቤቶች በጀታቸው በመቶ ሚሊዮን ዶላሮች ነው፡፡ ዋነኛ ሥራቸውም በተሠማሩበት መስክ የተለያዩ ሥልጠናዎችንና ዕርዳታዎችን መስጠት ነው፡፡ ለምሳሌ ዩኒሴፍ በሕፃናት፣ ወርልድ ባንክ በፋይናንስ፣ ደብሊውኤችኦ በጤና፣ ፋኦ በግብርና፣ አይኦኤም በስደተኞች ዙሪያ ወዘተ የሚሠሩ ናቸው፡፡

በእነዚህ ተቋማት ተቀጥረው አገራቸውን መጥቀም የሚችሉ ከፍተኛ የትምህርት ዝግጅትና የሙያ ብቃት ያላቸው ዜጎች ቢኖሩም፣ እነዚህ ተቋማት ውስጥ የመቀጠርን ዕድል ግን በፍጹም አያገኙም፡፡ በእነዚህ መሥሪያ ቤቶች ቀደም ብለው የገቡ ኢትጵያዊያን ዘር ማንዘራቸውን በመሰብሰብ ተቆጣጥረውታል፡፡ በእዚህ መሥሪያ ቤቶች አባትና ልጅ፣ እናትና ልጅ፣ የአክስትና የአጎት ልጆች፣ የባል ወይም የሚስት እህት፣ ወንድም፣ በአንድ መሥሪያ ቤት ተቀጥረው ሲሠሩ ማየት እጅግ በጣም የተለመደና የማያስደንቅ ነው፡፡ የተቋማቱ የቅጥር ኮሚቴ በውጭ አገር ዜጎች ጭምር የተውጣጣና ፈተናዎቹም ደረጃቸውን የጠበቁ ቢሆንም፣ ጥያቄዎቹ ቀድመው በዘመድ ለሚመጡ ሰዎች እንዲደርሱ ይደረጋል፡፡ ይህ ሊታረም የሚገባው አስነዋሪ ተግባር ነው፡፡ በእነዚህ ተቋማት ሁሉም ኢትዮጵያዊ በእኩል ዓይን እየታየ የሥራ ዕድል እያገኘ አይደለም፡፡

በመሆኑም የመልካም አስተዳደርና የብልሹ አሠራር ጉዳይ ያለው በመንግሥት ቤት ብቻ አይደለም፡፡ በመንግሥታዊ ያልሆኑ ድርጅቶችና በተመድ ቤት እጅግ ይብሳል፡፡ ከፍተኛ ሀብት በዜጎች ስም ተለምኖ መጥቶ ጥቂቶች በቤተሰብና በዘርማንዘር ሲቀራመቱት ይታያል፡፡

የዚህ ትዝብት ጸሐፊ በኢትዮጵያ ዩኤንዲፒ ውስጥ በመርፌ ቀዳዳ የመሹለክ ያህል ሾልኬ የምሠራ ነኝ፡፡ ያየሁትን አሳዛኝ ነገር ለማካፈል የፈለኩትም ወገን ዘመድ የሌለውም በሙያው ሠርቶ መኖር እንዲችል ነው፡፡

(ታዛቢ፣ ከአዲስ አበባ)

 

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ