Friday, September 30, 2022
ሌሎች ዓምዶች
    - Advertisement -
    - Advertisement -
    ስፖርትገንዘቤ ዲባባና ሞ ፋራህ ለዘንድሮው የዓለም ኮከብነት ታጩ

    ገንዘቤ ዲባባና ሞ ፋራህ ለዘንድሮው የዓለም ኮከብነት ታጩ

    ቀን:

    ኢትዮጵያዊቷ ገንዘቤ ዲባባና እንግሊዛዊው ሞ ፋራህ ለዘንድሮው (እ.ኤ.አ. 2015) የዓለም ምርጥ አትሌትነት ሽልማት በመካከለኛና በረዥም ርቀት ምድብ የመጀመርያውን ዙር ማጣሪያ በከፍተኛ ድምፅ ማለፋቸውን፣ የዓለም አቀፉ አትሌቲክስ ፌዴሬሽኖች ማኅበር በድረ ገጹ ዘገበ፡፡

    ገንዘቤ በ1,500 ሜትር በቤጂንግ የዓለም ሻምፒዮን፣ በዚሁ ርቀት ከሻምፒዮናው አንድ ወር ቀደም ብሎ ሞናኮ ላይ የዓለም ክብረ ወሰንን በ3 ደቂቃ 50.07 ሰብራለች፡፡ እንዲሁም የአዳራሽ ውስጥ 5,000 ሜትርን በ14 ደቂቃ 18.86 ሰከንድ ስትሰብር፣ በዓለም ሻምፒዮና የነሐስ ሜዳሊያ ማግኘቷ ይታወሳል፡፡

    ፋራህ በ5,000 ሜትርና በ10,000 ሜትር የዓለም አትሌቲክስ ሻምፒዮንነት ክብሩን በቤጂንግ ዳግም በማሸነፍ ያረጋገጠ ሲሆን፣ በ3,000 ሜትር የዓለምን ፈጣን ጊዜ 7 ደቂቃ 34.66 ሰከንድ አስመዝግቧል፡፡ በሁለት ማይል የአዳራሽ ውስጥ ሩጫ በ8 ደቂቃ 03.40 ሰከንድ የዓለም ምርጥ ጊዜንና የአውሮፓን ግማሽ ማራቶን ሪከርድን በ59 ደቂቃ 32 ሰከንድ መጨበጡን ዘገባው አመልክቷል፡፡

    በተያያዘ ዜናም በአጭር ርቀት ምድብ በመጀመርያው ዙር ማጣሪያ ከፍተኛ ድምፅ ጃማይካዊው ዩሴን ቦልትና ሆላንዳዊቷ ዳፍኔ ሺፐርስ (Dafne Schippers) መመረጣቸውን ማኅበሩ አስታውቋል፡፡ ቦልት በቤጂንግ ዓለም ሻምፒዮና በ100 ሜትር፣ በ200 ሜትርና 4በ100ሜ ዱላ ቅብብል ሻምፒዮንነቱን ያስጠበቀ ሲሆን፣ ሺፐርስ ደግሞ በቤጂንግ በ200 ሜትር የአውሮፓን ሪከርድ ስታሸንፍ በ100 ሜትር ብር ሜዳይ አግኝታለች፡፡

    የዓለም አቀፍ አትሌቲክስ ፌዴሬሽኖች ማኅበር ቤተሰብ ባለፈው ወር ዘጠኝ ወንዶችና ዘጠኝ ሴቶች ከአጭር ርቀት፣ ከመሰናክል፣ ከመካከለኛና ረዥም ርቀት፣ ከጎዳና ሩጫ፣ ከዕርምጃ፣ ከዝላይ፣ ከውርወራ፣ ከድብልቅ ውድድሮችና ከተራራማና ከሸለቋማ ውድድሮች እንዲለዩ በጠየቀው መሠረት በአጭርና በመካከለኛና ረዥም ርቀት ከተለዩት አራቱ አትሌቶች በተጨማሪ፣ ቀሪዎቹ በቀጣዮቹ ቀናት እንደሚታወቁ ተገልጿል፡፡

     አሥር ባለሙያዎችን ያቀፈው ዓለም አቀፍ መድረክ ከየፆታው ሦስት ወንዶችና  ሦስት ሴቶች የሚመርጥ ሲሆን፣ ስማቸውም ኅዳር 7 እና 8 ቀን 2008 ዓ.ም. ይፋ ይደረጋል፡፡

    ከእነዚህ የፍፃሜ ተወዳዳሪዎች መካከል የዓመቱ የወንድና የሴት ምርጥ አትሌቶችን የሚመርጠው የኢንተርናሽናል አትሌቲክስ ፋውንዴሽን ምክር ቤት ሲሆን፣ አሸናፊዎቹ በይፋ የሚገለጹት ቅዳሜ ኅዳር 18 ቀን 2008 ዓ.ም. በሞናኮ በሚዘጋጀው ልዩ ሥነ ሥርዓት ላይ መሆኑ ታውቋል፡፡

    የዓመቱ ምርጥ አትሌት ሽልማት በዓለም አቀፍ አትሌቲክስ ፌዴሬሽኖች ማኅበር ሥር የሚገኘው ኢንተርናሽናል አትሌቲክ ፋውንዴሽን የሚዘጋጅ ሲሆን፣ በ1981 ዓ.ም. ሲጀመር በሁለቱም ፆታዎች ያሸነፉት አሜሪካውያኑ ካርል ሉዊስና ፍሎረንስ ግሪፊዝ ጆይነር ነበሩ፡፡

    የመጀመሪያው ኢትዮጵያዊና አፍሪካዊ በመሆን በ1991 ዓ.ም. ለዚህ ሽልማት የበቃው ኃይሌ ገብረ ሥላሴ ነው፡፡ በስድስተኛው ዓመት ላይ በማከታተል ሁለት ጊዜ በ1997 ዓ.ም. እና 1998 ዓ.ም. ያሸነፈው ሌላው ኢትዮጵያዊ ቀነኒሳ በቀለ ነበር፡፡ በሴቶች መሠረት ደፋር በ2000 ዓ.ም. የዓመቱ ምርጥ አትሌት በመሰኘት ብቸኛዋ ኢትዮጵያዊት ነች፡፡ ዘንድሮ የታጨችው ገንዘቤ ዲባባ ውጤት በኅዳር አጋማሽ ላይ ይታወቃል፡፡

    - Advertisement -

    ይመዝገቡ

    spot_img
    spot_img