Thursday, June 20, 2024
- ማስታወቂያ -
- ማስታወቂያ -

መሰቦ ሲሚንቶ ከመቶ ሚሊዮን ብር በላይ ወጪ ያደረገበትን የባዮማስ ቴክኖሎጂን ሊተገብር ነው

spot_img

ተዛማጅ ፅሁፎች

መሰቦ ሲሚንቶ ፋብሪካ የኃይል አጠቃቀሙን ወጪ ቆጣቢ ከማድረግ ባሻገር ብክለትን እንዲቀንስ የሚያስችል ባዮማስን  ተጠቅሞ ኃይል የሚያመነጭ ቴክኖሎጂ ሥራ ላይ ሊያውል መቃረቡን ገለጸ፡፡ ለቴክኖሎጂው እስካሁን ከመቶ ሚሊዮን ብር በላይ አውሏል፡፡

የመሰቦ ሲሚንቶ ፋብሪካ ምክትል ሥራ አስኪያጅ አቶ ኪዳነ ተክለሃይማኖት ለሪፖርተር እንዳብራሩት፣ ፋብሪካው የማምረት አቅሙ 2.3 ሚሊዮን ቶን በዓመት ሲሆን በአሁኑ ወቅት 1.97 ሚሊዮን ቶን የማምረት አቅም ላይ ደርሷል፡፡ ሆኖም ከመሐል አገር ከ780 ኪሎ ሜትር በላይ ርቆ መገኘቱ በዋጋ አኳያ ተወዳዳሪነቱ ላይ ተፅዕኖ ስለሚያሳድርና አካባቢ ላይ የሚያደርሰውን የብክለት ጫናን ለመቀነስ በማሰብ ወጪ ቆጣቢ አሠራሮችን መተግበር እንደጀመረ አስታውቀዋል፡፡

ከሰሊጥና ከሌሎች የምግብ ሸቀጦች የሚሰበሰበውን ተረፈ ምርት በማቀነባበር ወደ ኃይል ሰጪ ባዮማስነት የሚቀይር ፋብሪካ ተተክሎ ሙከራ መጀመሩን አቶ ኪዳነ ገልጸዋል፡፡ ፋብሪካው በአዲሱ ዓመት ኃይል የማመንጨት ሥራ እንዲጀምር ለማድረግ መታቀዱንም አስታውቀዋል፡፡ መቶ ሚሊዮን ብር ካፒታል ይጠይቃል የተባለው የባዮማስ ቴከኖሎጂ በአሁኑ ወቅት ከዚህም በላይ ወጪ ሊጠይቅ እንደሚችል መረጋገጡን ገልጸው፣ የባዮማስ ፋብሪካው ሥራ መጀመር ግን ቀስ በቀስ የድንጋይ ከሰል ፍጆታውን እንደሚያስቀርለት አስታውቀዋል፡፡ መሰቦ የኃይል ፍጆታውን ከከባድ ናፍጣ ወደ ከሰል ድንጋይ በመቀየርም በዘርፉ ቀድሞ የሚጠቀስ ፋብሪካ መሆኑን አቶ ኪዳነ ይናገራሉ፡፡

አቶ ኪዳነ እንደሚያብራሩት፣ መሰቦ ሲሚንቶ በአሁኑ ወቅት የማምረት አቅሙ 93 ከመቶ ሊደርስ የቻለው ከሚጠቀምበት ዘመናዊ ቴክኖሎጂ ባሻገር ለሰው ኃይሉ በሰጠው ትኩረት ሲሆን፣ የፋብሪካው ሠራተኞች ባመረቱት ልክ ማበረታቻ ከመስጠት ባሻገር ለአደረጃጀቱ ትኩረት በመስጠቱ ነው፡፡

ጂቡቲ 5000 ቶን ክሊንከር ለሙከራ በመላክ ገበያው ጥሩ እንደሆነ ማረጋገጡንና ወደ ውጭ ገበያ ለመግባት የሚያስችለው አቅም ላይ እንደሚገኝ አቶ ኪዳነ ቢገልጹም፣ በትራንስፖርት ወጪ ከፍተኛነት ሳቢያ እንዳሰበው ለመሥራት አለመቻሉን ከመግለጽ አልተቆጠቡም፡፡ ፋብሪካው መፍትሔ ያደረገውም 200 ያህል የጭነት ተሽከርካሪዎችን በመግዛት የትራንስፖርት ወጪን መቀነስ ሲሆን፣ ለዚህም በጀት እስኪፈቀድለት እየተጠባበቀ እንደሚገኝ አስታውቀዋል፡፡

በማምረት አቅሙ ከደርባ ሲሚንቶና ከዳንጎቴ ቀጥሎ የሚቀመጠው መሰቦ፣ አሁን በሚያመርተው ልክ ሲታይ ቀዳሚ ሆኖ እንደሚመደብ መረጃዎች ይጠቁማሉ፡፡ ከገበያ አኳያ በክረምቱ ወራት መቀዛቀዝ ቢታይም፣ በአገሪቱ ካሉት ፋብሪካዎች አኳያ ሲታይ ግን አቅርቦቱ ከፍላጎት በላይ ወይም ደግሞ ትርፍ ምርት ገበያው ላይ መገኘት እንደነበረበት ጠቁመዋል፡፡ ‹‹ሁሉም ፋብሪካዎች ትልቁን የማምረት አቅማቸውን ተጠቅመው ቢሠሩ፣ ከአገር ውስጥ ገበያ ባሻገር የውጭውን ገበያ ማሰብ እንደሚገባ እናስባለን፤›› ያሉት ኃላፊው፣ ምንም እንኳ የኮንስትራክሽን ሥራ በብዛት ከሚታይበት አዲስ አበባ በብዙ ኪሎ ሜትሮች ርቆ የሚገኘው መሰቦ፣ ሌሎች በአዲስ አበባና በዙሪያዋ የከተሙት ፋብሪካዎች የሚያገኙትን ያህል ትርፍ ለማግኘት እንዳልቻለም ገልጸዋል፡፡ ይህም ሆኖ ‹‹አቅማችንን በተገቢው በመጠቀምና ወጪያችንን ለመቀነስ ጥረት እናደርጋለን፡፡ ውድድሩ ግን ኃይለኛ ነው፤›› ብለዋል፡፡

አራት ዓይነት ሲሚንቶዎችን በማምረት ለገበያ እያቀረበ የሚገኘው መሰቦ ሲሚንቶ፣ የራሱን የምርት ማሸጊያ ፋብሪካ በመጠቀም ሲሚንቶን በብትንና በሰፋፊ ከረጦቶች አሽጎ እያረቀረበ እንደሚገኝ ይታወቃል፡፡ ከደንበኞቹ መካከል ከፍተኛ ግዥ በመፈጸም ዓመቱን አብረው ላሳለፉ ድርጅቶችም ከሠርቲፊኬት እስከ ዋንጫ ሽልማት የሰጠበትን ዓመታዊ የደንበኞች ቀን በመቐለ ከተማ፣ ፕላኔት ሆቴል አካሂዷል፡፡

በአገሪቱ 23 ዩኒቨርሲቲዎችን ጨምሮ፣ ታላቁ የህዳሴ ግድብ፣ አሼጎዳ የነፋስ ኃይል ማመንጫ፣ ግልገል ጊቤ አንድ፣ ሁለትና ሦስት ኃይል ማመንጫ ፕሮጀክቶች፣ የአፍሪካ ኅብረት ዋና መሥሪያ ቤት፣ አዋሽ ድልድይና የህዳሴው ድልድይን ጨምሮ በርካታ ፕሮጀክቶች በመሰቦ ሲሚንቶ የተገነቡ ናቸው፡፡ በአገሪቱ በብዛት ከሚመረቱት ኦርዲናሪ ፖርትላንድ ሲሚንቶ (ኦፒሲ) እና ፖዞላና ፖርትላንድ ሲሚኒቶ (ፒፒሲ) በተጨማሪ ፖርትላንድ ላይምስቶን ሲሚንቶ (ፒኤልሲ) እና ዝቅተኛና ከፍተኛ ሰልፌት ጨው መቋቋም የሚችለው ሲሚንቶ (ኤልኤችኤችኤስ) ሲሚንቶን አስተዋቋል፡፡ ዝቅተኛ ሙቀትንና ከፍተኛ ሰልፌት ጨውን የሚቋቋመው ሲሚንቶ በትልልቅ የግንባታ ሥራዎች ላይ ከፍተኛ ተፈላጊነት ያለው ሲሆን፣ በብዛት ከውጭ ሲመጣ ቆይቷል፡፡ ከዚህ ባሻገር በብትንና 2000 ኪሎ ግራም በሚይዝ የፕላስቲክ ከረጢት ሲሚንቶ የማሸጊያ ፋብሪካ ከተከለም ሰነባብቷል፡፡

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች