Monday, June 17, 2024
- ማስታወቂያ -
- ማስታወቂያ -

ሁዋዌ ‹‹5G›› የሞባይል ኔትወርክን በአፍሪካ ለማስተዋወቅ ፍላጎት አለኝ አለ

spot_img

ተዛማጅ ፅሁፎች

– የኔትወርክ መቆራረጥን በአጭር ጊዜ ውስጥ ይቀርፋል አለ

በዓለም የቴሌኮም ኢንዱስትሪ ውስጥ ተጠቃሽ ከሆኑት አንዱ የሆነው የቻይናው ሁዋዌ ቴክኖሎጂስ፣ በአፍሪካ የ‹‹5G›› የኔትወርክ ቴክኖሎጂን የማስተዋወቅ ዓላማ እንዳለው የኩባንያው ከፍተኛ ኃላፊ ለሪፖርተር ገለጹ፡፡

ሰሞኑን ሲካሄድ በነበረው የአፍሪካ ኅብረት በኮሙዩኒኬሽንና በኢንፎርሜሸን ቴክኖሎጂዎች ላይ ሲመክር የሰነበተው ልዩ የቴክኒክ ኮሜቴ ስብሰባ ላይ የተገኙት የሁዋዌ ቴክኖሎጂስ ምክትል ፕሬዚዳንት ቻርልስ ዲንግ ናቸው፡፡

ምክትል ፕሬዚዳንቱ በተለይ ከሪፖርተር ጋር ባደረጉት ቆይታ እንዳብራሩት፣ ገና በሙከራ ደረጃ ላይ የሚገኘው ‹‹5G›› የሞባይል ኔትወርክ ቴክኖሎጂ በፍጥነቱ እስካሁን ከተዘረጉት ሁሉ ከፍተኛው ነው፡፡ በቻይና ከተሞች መሞከር የጀመረው ይኼ ቴክኖሎጂ በአሁኑ ወቅት ከቤተ ሙከራ ወጥቶ በመስክ ፍተሻ እየተደረገበት ሲሆን፣ በቅርቡም ተግባራዊ እንደሚሆን ይጠበቃል፡፡

ይህንን ቴክኖሎጂ ወደ አፍሪካ ከማምጣት ባሻገር ኩባንያው ለአፍሪካ ወጣቶች የሥልጠናና የሥራ ዕድሎችን እያመቻቸ እንሚገኝም ዲንግ ገልጸዋል፡፡ ሁዋዌ በአፍሪካ በከፈታቸው ሰባት የሥልጠና ማዕከላት እስካሁን ለ15 ሺሕ የአፍሪካ መሐንዲሶች ሥልጠና መስጠቱን ያስታወቁት ዲንግ፣ ‹‹ሲድስ ኦፍ ዘ ፊውቸር›› በተሰኘው የሥልጠናና የሥራ ዕድል ፕሮግራምም ለ1,000 አፍሪካውያን ወጣቶች ቻይና በሚገኘው ዋና መሥሪያ ቤቱ ሥራ ለመፍጠር እየተንቀሳቀሰ እንደሚገኝ አስረድተዋል፡፡

በኢትዮጵያ ከቴሌኮም መሠረተ ልማትና ዝርጋታ በተጨማሪ የስማርት ስልኮች ገበያ ላይ እየጎላ የመጣው ሁዋዌ፣ በተደጋጋሚ እየተከሰተ ያለውን የኔትወርክ መቆራረጥ ችግር በአጭር ጊዜ ውስጥ ለመቅረፍ እየተንቀሳቀሰ ይገኛል ብለዋል፡፡ ኩባንያው በአሁኑ ወቅት በአዲስ አበባ የ‹‹4G›› ኔትወርክ በመዘርጋት ለአግልግሎት ማብቃቱ ይታወቃል፡፡

በሌላ በኩል ከአፍሪካ ኅበረት ጋር የመግባቢያ ሰነድ ስምምነት ያደረገው ይህ ኩባንያ፣ ለኅብረቱ አባል አገሮች የቴሌኮም መሠረተ ልማት ከመዘርጋት በተጨማሪ ለባለሙያዎች ሥልጠና ለመስጠት ተስሟምቷል፡፡ በአፍሪካ ኅብረት የመሠረተ ልማትና የኢነርጂ ኮሚሽነር ልዩ ረዳት የሆኑት ባራካት ኤፍ ኤ አህመድ በበኩላቸው፣ የቻይና መንግሥት ዓምና ከአፍሪካ ኅብረት ጋር ባደረገው ስምምነት መሠረት በመንገድ፣ በባቡር መስመርና በአቪዬሽን መስኮች ላይ ድጋፍ ይሰጣል፡፡ በእነዚህ ዘርፎች ውስጥ ሁሉ የቴሌኮም መሠረተ ልማት ታሳቢ መደረጉንም ጠቅሰዋል፡፡ በእዚህ መስክ ሁዋዌን ጨምሮ ሌሎች ኩባንያዎች ተሳታፊ እንደሚሆኑ ይጠበቃል፡፡

ከልዩ ረዳቷ ገለጻ ለመረዳት እንደተቻለው፣ የአፍሪካ ኅብረት ሊተገብራቸው ከሚንቀሳቀስባቸው ሥራዎች መካከል የአባል አገሮችን የኢንተርኔት ልውውጥ ማዕከል መክፈት አንዱ ነው፡፡ ይህም በአሁኑ ወቅት አንዱ አገር ከሌላኛው ጋር በኢንተርኔት ለመገናኘት ወደ ሌሎች አገሮች አልፎ የሚሄደውን የኢንተርኔት ትራፊክ የጊዜ ብክነትና ወጪ ተግባራዊ የተደረገው ለመቀነስ የሚያስችል ሥራ ነው፡፡ እስካሁን በ15 አገሮች ውስጥ ይህ አሠራር ከ30 በላይ አገሮች ውስጥ እንዲካሄድ የአፍሪካ ኅብረት እየሠራ እንደሚገኝ ገልጸዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች