Thursday, April 18, 2024
- Advertisement -
- Advertisement -
ማኅበራዊድምፀ ነጐድጓዱ ጎምቱ ጋዜጠኛ ዳርዮስ ሞዲ (1938 - 2007)

ድምፀ ነጐድጓዱ ጎምቱ ጋዜጠኛ ዳርዮስ ሞዲ (1938 – 2007)

ቀን:

ዳርዮስ ሞዲ በትውልዶች መካከል ጎልቶ የሚታወቅ ስም ነው፡፡ በሬዲዮ ጋዜጠኛነቱ በተለይም ከ20 ዓመታት በላይ ባስቆጠረው የዜና አንባቢነቱ የአድማጮችን ቀልብ በሚገዛው ነጐድጓዳማ ድምፁ የሚታወስ ጎምቱ ጋዜጠኛ ነበር፡፡

ዳርዮስ በብዙኃኑ አድማጮች ዘንድ ከልሂቅ እስከ ደቂቅ የሚታወስበት አጋጣሚ የቀድሞው መንግሥት ፕሬዚዳንት የነበሩት ኮሎኔል መንግሥቱ ኃይለ ማርያም አገር ጥለው መሄዳቸውን የገለጹበት የግንቦት 13 ቀን 1983 ዓ.ም. ዕለተ ማክሰኞ ዜናው ነበር፡፡

የግንቦት 20 የኢሕአዴግ ድል ባለፉት 24 ዓመታት ሲዘከር የቀድሞው መሪ ኩብለላ ይወሳ የነበረው በዳርዮስ ሞዲ ድምፅ ነበር፡፡

- Advertisement -

Video from Enat Bank Youtube Channel.

በቀድሞው ብሥራተ ወንጌል ሬዲዮ ጣቢያ፣ በአብዮታዊት ኢትዮጵያ ድምፅ ዓለም አቀፍ አገልግሎት፣ በኢትዮጵያ ሬዲዮና በኢትዮጵያ ዜና አገልግሎት በጥቅሉ ለ30 ዓመታት ያገለገለው ዳርዮስ ሞዲ ድምፁ አሁን የለም፡፡ በአፀደ ሥጋ ተለይቷል አርፏል፡፡

የቤተ መንግሥት ፎቶ አንሺና የፎቶግራፍ ቤት ከነበራቸው ከፋርሳዊ (ኢራን) አባቱና ከኢትዮጵያዊት እናቱ  በአዲስ አበባ ከተማ ራስ መኰንን ድልድይ አካባቢ በ1938 ዓ.ም.የተወለደው ዳርዮስ የሁለተኛ ደረጃ ትምህርቱን ያጠናቀቀው በዳግማዊ ምኒልክ ትምህርት ቤት ነበር፡፡

በቀዳማዊ ኃይለ ሥላሴ ዩኒቨርሲቲ ከፍተኛ ትምህርቱን መከታተል ቢጀምርም በወቅቱ በነበረው የተማሪዎች ንቅናቄ ሳቢያ ጓደኛው የዩኒቨርሲቲ ተማሪዎች ማኅበር ፕሬዚዳንት የነበረው ጥላሁን ግዛው መገደልን ተከትሎ ትምህርቱን ማቋረጡን ገጸ ታሪኩ ያመለክታል፡፡

በመካነየሱስ ቤተ ክርስቲያን ሥር የነበረውና በዓለም ሉተራን ፌዴሬሽን በሚረዳው የዘመኑ ታዋቂ የሬዲዮ ጣቢያ ብሥራተ ወንጌል ሬዲዮ በ1964 ዓ.ም. በመቀጠር ጣቢያውን ደርግ እስከ ወረሰበት ጊዜ ድረስ ሠርቷል፡፡ ድኅረ አብዮት በአብዮታዊት ኢትዮጵያ ድምፅና በብሔራዊ ሬዲዮ እስከ 1980ዎቹ መገባደጃ ድረስ በዜና አንባቢነት፣ በፕሮግራም አዘጋጅነት የሠራ ሲሆን፣ ጡረታ እስከወጣበት 1994 ዓ.ም. ድረስ ያገለገለው በኢትዮጵያ ዜና አገልግሎት የውጭ ቋንቋ ዴስክ ነበር፡፡

ስለዳርዮስ ሙያ ከዓመታት በፊት ይታተም በነበረ አንድ መጽሔት ላይ አስተያየት የሰጠው ዓለምነህ ዋሴ፣ ‹‹ዳርዮስ ከፍተኛ የትርጉም ችሎታ አለው፤ ቃላትን መፈብረክም ይችልበታል፡፡ ዛሬም ድረስ በሬዲዮ የምንሰማቸው ሙያዊ ቃላት በርካቶቹ የርሱ ፋብሪካ ውጤቶች ናቸው፡፡

በዘመነ ደርግና በኢሕአዴግም መንግሥታዊ መግለጫዎችንና አዋጆችን ከሚያቀርቡት አንዱ የነበረው ዳርዮስ ሞዲ ከሁለት ዓመታት ወዲህ ባደረበት ሕመሙ ሕክምናውን ሲከታተል የቆየው ዳርዮስ ያረፈው ሰኔ 13 ቀን 2007 ዓ.ም. ሲሆን፣ ሥርዓተ ቀብሩ በጉራራ ቅዱስ ገብርኤል ቤተ ክርስቲያን ሰኔ 1 ቀን ተፈጽሟል፡፡

ጋዜጠኛ ዳርዮስ ባለትዳርና የሰባት ልጆች አባት ነበር፡፡      

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ሰላማዊ የፖለቲካ ትግልና ፈተናው

የኦሮሞ ነፃነት ግንባር (ኦነግ) የፖለቲካ ኦፊሰር የአቶ በቴ ኡርጌሳን...

አበጀህ ማንዴላ! አበጀሽ ደቡብ አፍሪካ!

በአየለ ት. የፍልስጤም ጉዳይ የዓለም አቀፍ ፖለቲካንም ሆነ የተባበሩት መንግሥታትን...

የውጭ ባለሀብቶች ለኢትዮጵያውያን ብቻ በተፈቀዱ የንግድ ዘርፎች እንዲገቡ የመወሰኑ ፋይዳና ሥጋቶች

ጠቅላይ ሚኒስትር ዓብይ አዓመድ (ዶ/ር) የውጭ ኩባንያዎች በጅምላና ችርቻሮ...