Friday, December 9, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር

    [የክቡር ሚኒስትሩ ሾፌር ከቤታቸው ሊወስዳቸው ሲመጣ ግቢው ውስጥ ድንኳን ተጥሎ ይመለከታል]

    • ሰላም አይደለም እንዴ ክቡር ሚኒስትር?
    • በጣም ሰላም ነው፡፡
    • የምን ለቅሶ ነው?
    • ምንድን ነው የምታወራው?
    • ማን ሞቶ ነው ድንኳን የተጣለው?
    • ምን ዓይነት ሟርተኛ ነህ?
    • የምን ሐዘን ነው ብዬ ነዋ?
    • ኧረ እኔ ቤት ፌሽታ ነው እንጂ ሐዘን የለም፡፡
    • አገር ሐዘን ላይ ሆኖ የምን ፌሽታ ነው?
    • ስማ እኔ ጋ ሁሌም ፌሽታ ነው፡፡
    • አገር እንደዚህ እየተበጠበጠ?
    • የእኔ ፀረ ሰላም፣ አገሪቷ ራሷ ሰላም ናት አልኩህ እኮ፡፡
    • በአገሪቷ የሉም እንዴ?
    • የእኔ ቤት አገሪቷ ውስጥ አይደል እንዴ ያለው?
    • አልመሰለኝም ክቡር ሚኒስትር፡፡
    • እንዴት ማለት?
    • ታዲያ የምን ፌሽታ ነው ቤትዎ ያለው?
    • የፆም መያዣ ነዋ፡፡
    • ምን?
    • ስማ በውስኪ ተራጨን፡፡
    • እየቀለዱ ነው?
    • አትሰማም እንዴ በውስኪ ታጠብን አልኩህ እኮ?
    • እኔ የምታጠብበት ውኃ አጥቼ በዝናብ ውኃ እየታጠብኩ ነው፤ እርስዎ…
    • ምን ታደርገዋለህ? ይታደሉታል እንጂ አይታገሉትም ሲባል አልሰማህም?
    • እርሱስ ልክ ብለዋል፤ የታደሉ ክቡር ሚኒስትር፡፡
    • ስማ ድል ያለ ድግስ ደግሼ ነበር፡፡
    • እስቲ ትንሽ ይንገሩኝ?
    • ትልቅ የሐረር ሠንጋ ነው ያረድኩት፡፡
    • እሺ፡፡
    • ከዛ በቃ በብላክ ሌብል ነው የተጀመረው፡፡
    • ብላክ ሌብል ሲሉ ጥቁር ፊሊተሩን ማለትዎ ነው?
    • ምን ይላል ይኼ ውስኪ ነው እንጂ?
    • እ…የሀብታሞችን ፊሊተር ነው የሚሉኝ?
    • ከዛ በቃ ብሉ ሌብልና ጐልድ ሌብል ነበር ሲጠጣ የነበረው፡፡
    • ጐልድ ሌብል?
    • አዎን፡፡
    • ወርቅም ትጠጣላችሁ?
    • ስማ ከተመቸህማ አልማዝም ልትጠጣ ትችላለህ፡፡
    • እሺ፡፡
    • ከዛ ደግሞ መሀል ላይ አንድ ሁለት ሙክት ታረደ፡፡
    • ይኖሩታል እኮ ክቡር ሚኒስትር፡፡
    • ስማ ኢንቨስተር በል ባለሥልጣን ቤቴ ሲጋፉ ነበር፡፡
    • እንዴ እርስዎ ቤት ነበራ ታዲያ ሰላማዊ ሠልፉ የነበረው?
    • የምን ሰላማዊ ሠልፍ ነው?
    • ይቅርታ እርስዎ መቼ እንደዚህ ዓይነት ነገር ይገባዎታል?
    • እኔ ልማት ብቻ ነው የሚገባኝ፡፡
    • ክቡር ሚኒስትር እንዴት ግን አልጠሩኝም?
    • የት ነው የምጠራህ?
    • እንደዚህ ዓይነት ድግስ ሲደግሱ ነዋ፡፡
    • ማንን?
    • እኔን ነዋ፡፡
    • በምን አስታውሼህ?
    • አያስታውሱኝም?
    • ኧረ በፍጹም፡፡
    • ለነገሩ በእንትንስ ተረስቼ የለ?
    • በማን?
    • በመንግሥት!

    [ክቡር ሚኒስትሩ ከአንድ ባለሀብት ጋር በከተማችን ውስጥ በቅርቡ በተከፈተ ሆቴል ምሳ እየበሉ ነው]

    • እየበሉ ክቡር ሚኒስትር?
    • ሰላጣው ይቅርብኝ ብዬ ነው፡፡
    • ለምን?
    • ያው አተት ምናምን ብዬ ነው፡፡
    • መተት ማለትዎት ነው?
    • የምን መተት ነው?
    • ማለቴ መደበኛ ተቅማጥና ትውከት ነዋ፡፡
    • ቀልደኛ ሆነሃል ልበል?
    • ክቡር ሚኒስትር በዚህ ዓመት በጣም ቀናዎት አይደል?
    • እኔ ሁሌም እንደቀናኝ ነው፡፡
    • አይ ክቡር ሚኒስትር፣ እርስዎ ግን የሚገርም የቢዝነስ ጭንቅላት ነው ያለዎት፡፡
    • ለምን ይምስልሃል እንደዚህ የከበርኩት?
    • ሁሉም ባንኮች እኮ የሚገርም ትርፍ ነው የተንበሸበሹት?
    • ስማ ያኔ ሼር ግዛ ብዬ ነግሬህ ነበር እኮ፡፡
    • ክቡር ሚኒስትር የእርስዎንማ ምክር ሰምቼ ቢሆን ኖሮ፣ እንደ እርስዎ አሁን ከአምስትና ከስድስት ባንኮች ዲቪደንዴን በተቀበልኩ ነበር?
    • ምክሬን ስማ የምልህ ለዚህ ነው፡፡
    • አሁን ነው የገባኝ፡፡
    • ሁሉንም እንቁላሎችህን በአንድ ቅርጫት አታስቀምጥ ሲባል አልሰማህም?
    • ኧረ ሰምቻለሁ፡፡
    • ስለዚህ ኤክስፖርቱ ሲቀዘቅዝ፣ ባንኩ ይደግፍሃል፡፡
    • ብልህ እኮ ነዎት ክቡር ሚኒስትር፡፡
    • ሞኝ መሆንማ አያዋጣም፡፡
    • ጠፍተዋል ግን ክቡር ሚኒስትር?
    • ዕድገቱ ነዋ፡፡
    • ውርደቱ ማለትዎ ነው?
    • የምን ውርደት ነው? የአገር ዕድገት ነው ያጠፋን፡፡
    • ኧረ ብዙ ውርደት ሊኖር ይችላል፡፡
    • የምን ውርደት?
    • ለምሳሌ ኦሊምፒክ ተጀምሯል፡፡
    • ኦሊምፒክ ተጀምሯል እንዴ?
    • እንዴ መጀመሩን አልሰሙም?
    • ስማ ስንት ነገር እያለ እሱን ልከታተል?
    • ለነገሩ ሥራ ይበዛብዎታል፡፡
    • በነገራችን ላይ አንድ ነገር በራልኝ፡፡
    • ምን ክቡር ሚኒስትር?
    • መጋዘኖች አሉ አይደል?
    • አሉ ክቡር ሚኒስትር፡፡
    • ታዲያ ማተሚያ ማሽኖች ለምን አናስመጣም?
    • የምን ማተሚያ ማሽን?
    • የቲሸርት ማተሚያ ነዋ፡፡
    • እንዴ ክቡር ሚኒስትር እያወቁት?
    • ምኑን?
    • ኤልሲ እኮ ችግር ነው፡፡
    • እሱንማ በእኔ ጣለው፡፡
    • ለነገሩ እርስዎ ምን ተስንዎት?
    • ስሜ ራሱ ምንተስኖት ነበር መባል ያለበት፡፡
    • ለነገሩ ቲሸርት ማተሚያ ማሽን ምን ያደርግልናል?
    • ኦሊምፒክ ተጀምሯል አልከኝ እኮ?
    • እሱማ ተጀምሯል፡፡
    • ስለዚህ ወርቅ የሚያመጣውን አትሌት ፎቶ በቲሸርት አትመን መቸብቸብ ነዋ፡፡
    • ክቡር ሚኒስትር ወርቅ ባናመጣስ?
    • ብር ያመጣውን ፎቶ እንሸጣለና፡፡
    • እንዴ ብር ባናመጣስ?
    • ነሀስ ማምጣታችን አይቀርማ፡፡
    • እሱንስ ባናመጣ?
    • ለእንትን ብለን እንሸጣለን፡፡
    • ለምን?
    • ለተሳትፎ!

    [የክቡር ሚኒስትሩ ጸሐፊ ቢሯቸው ገባች]

    • ያ ሰውዬ መጥቷል ክቡር ሚኒስትር፡፡
    • የቱ ሰውዬ?
    • የኮርፖሬሽን ኃላፊው፡፡
    • የምን ኮርፖሬሽን?
    • የኪራይ ሰብሳቢ ኮርፖሬሽን ምናምን የሚለው፡፡
    • እ… የፀረ ኪራይ ሰብሳቢ ኮርፖሬሽን ኃላፊው?
    • አዎን፡፡
    • አስገቢው፡፡

    [የፀረ ኪራይ ሰብሳቢ ኮርፖሬሽን ኃላፊው ቢሯቸው ገባ]

    • በቃኝ ክቡር ሚኒስትር፡፡
    • መቼ ብላ አልኩህ?
    • በቃኝ፣ በቃኝ አልኩኝ፡፡
    • መቼ ብላ ተባልክ?
    • እኮ አልበላም ነው የምለው፡፡
    • መጀመሪያስ ማን ብላ አለህ?
    • የሚበሉትም ግን ማቆም አለባቸው፡፡
    • ምን?
    • ሁሉም እኮ ነው የሚበላው፡፡
    • ምንድን ነው የምታወራው?
    • ከላይ እስከ ታች ኪራይ ሰብሳቢ ነው፡፡
    • እኔን ጨምሮ?
    • አዎን ክቡር ሚኒስትር፡፡
    • ምን?
    • ሁሉም እዚህ መሥሪያ ቤት ያለ ሰው ኪራይ ሰብሳቢ ነው፡፡
    • እና ምን ልታደርግ ነው?
    • በቃ ለበላይ ኃላፊዎች አጋልጣለሁ፡፡
    • ከዛስ?
    • የሚሆነውን ማየት ነዋ፡፡
    • ስማ እንዲህ ቀላል አይደለም፡፡
    • እንዴት?
    • ምንም አታመጣም፡፡
    • ካላመጣሁማ በቃ እለቃለሁ፡፡
    • አንዴ ከገባህማ መልቀቅም በቀላሉ አይቻልም፡፡
    • በቃኝ አልኩኝ አልሠራማ፡፡
    • ቀላል አይደለም አልኩህ እኮ፡፡
    • ካልሆነ ኮርፖሬሽኑ ይፍረስ?
    • እንዲያውም ይኼ ኮርፖሬሽን ፈርሶ ሌላ ኤጀንሲ ማቋቋም አለብኝ፡፡
    • ምን የሚሉት?
    • ሙስናን የሚያሳልጥ ኤጀንሲ!

    [የክቡር ሚኒስትሩ የእህት ልጅ ደወለችላቸው]

    • ወይኔ ጋሼ፤ ወይኔ ጋሼ፡፡
    • ምን ሆነሻል?
    • ወሰዱት እኮ?
    • ማንን ነው የወሰዱት?
    • ልጄን ወሰዱት ጋሼ፡፡
    • ማን ነው የወሰደው?
    • ወሰዱት ጋሼ፣ ወሰዱት፡፡
    • በስኮላርሽፕ ነው የወሰዱት?
    • ወሰዱት ልጄን ወሰዱት፡፡
    • በፌሎሺፕ ነው የወሰዱት?
    • ኧረ ፌዴራሎች ነው የወሰዱት፡፡
    • ፀረ ሰላም ነው እንዴ ልጅሽ?
    • ኧረ ሰላማዊ ነው፡፡
    • ታዲያ እንዴት ወሰዱት?
    • ወሬ ሊያይ ወጥቶ ነው የወሰዱት፡፡
    • ሥራ እንጂ ወሬ ምን ያደርጋል?
    • ሥራ የለውማ ጋሼ፡፡
    • ለምን የለውም?
    • ምን ወጣቱ ሁሉ ተመርቆ ቁጭ ብሏል አይደል እንዴ?
    • ታዲያ የአንቺ ልጅ እንዴት ሥራ ያጣል?
    • ሥራ የለማ፡፡
    • እኔ ሥራ እሰጠዋለኋ፡፡
    • ለማንኛውም አስረውታል፡፡
    • ምን አድርጐ?
    • ከሌሎቹ ጋር ነው ቀላቅለው የወሰዱት፡፡

    [ክቡር ሚኒስትሩ ፖሊስ ጋ ደወሉ]

    • ማን ልበል?
    • ማን ልበል እንዴት ትለኛለህ?
    • ማን ልበል ጌታዬ?
    • ክቡር ሚኒስትር ነኝ፡፡
    • እንዴ ክቡር ሚኒስትር ምን ልርዳዎት?
    • ምን እየሠራችሁ ነው?
    • ሥራችንን ነዋ፡፡
    • ሰው ዝም ብላችሁ ማፈስ ጀመራችሁ?
    • የበጠበጡትን ነው ያሰርነው፡፡
    • ሰላማዊ የእኔ ሰዎች ታስረዋል፡፡
    • ሰላማዊ ከሆኑ ብጥብጡ ውስጥ ምን ያደርጋሉ?
    • ሰላማዊውንና ፀረ ሰላሙን ማጣራት አለባችሁ፡፡
    • እሱን ማጣራት ከባድ ሆኗል፡፡
    • እንዴት?
    • በመንግሥት ውስጥ ራሱ ሰላማዊውን ከፀረ ሰላሙ መለየት ከባድ ሆኗል፡፡
    • አሁን በአስቸኳይ ልቀቁት፡፡
    • ማንን?
    • የእኔን ሰው፡፡
    • እሱማ አይቻልም፡፡
    • ለምን?
    • ማጣራት አለብን!

    [ክቡር ሚኒስትሩ ግራ ተጋብተው ሳሉ፣ ፖሊሱ መልሶ ተንቀሳቃሽ ስልካቸው ላይ ደወለ]

    • ሄሎ ክቡር ሚኒስትር፡፡
    • ማን ልበል?
    • አሁን ተደዋውለን ነበር፡፡
    • እኮ ማን ልበል?
    • ፖሊሱ ነኝ፡፡
    • ይኼ እኮ የግል ስልኬ ነው፡፡
    • ቢሆንስ ታዲያ?
    • እንዴት እዚህ ላይ ትደውላለህ?
    • ሕዝብን ለማገልገል የተሾሙ መሰለኝ፡፡
    • በጣም ተናንቀናል፡፡
    • ቆየን እኮ፡፡
    • ምን ካልን?
    • ከተናናቅን!

    በብዛት የተነበቡ ፅሁፎች

    በሰባት የመንግሥት ተቋማት ላይ ሰፊ የወንጀል ምርመራ እየተካሄደ መሆኑ ተሰማ

    በስምንት የመንግሥት ዩኒቨርሲቲዎች ላይ የወንጀል ምርመራ እንዲጀመር ተወስኗል ከ1.4 ቢሊዮን...

    ጎህ ቤቶች ባንክ ወደ ቤት ልማት ለመግባት ብሔራዊ ባንክን ፈቃድ ጠየቀ

    በስምንት ወራት ውስጥ 7.9 ሚሊዮን ብር ማትረፉን አስታውቋል ኢትዮጵያ ውስጥ...

    ወጋገን ባንክ ከገጠመው ቀውስ በማገገም በ2014 የሒሳብ ዓመት የተሻለ ትርፍ አገኘ

    ለሁለት ዓመታት የዘለቀው የሰሜን ኢትዮጵያ ጦርነት የቢዝነስ እንቅስቃሴያቸው ከተስተጓጎለባቸው...

    ሒጂራ ባንክ የ143 ሚሊዮን ብር ኪሳራ አስመዘገበ

    በኢትዮጵያ ሙሉ ለሙሉ ከወለድ ነፃ ባንክ አገልግሎት ለመስጠት ወደ...
    - Advertisment -

    ትኩስ ፅሁፎች

    በኦሮሚያ ክልል የተፈጸመው ጭፍጨፋና ሥጋቱ

    ኦሮሚያ ክልል ከቀውስ አዙሪት መላቀቅ ያቃተው ይመስላል፡፡ ከ200 በላይ...

    እናት ባንክ ካፒታሉን ወደ አምስት ቢሊዮን ብር ለማሳደግ ወሰነ

    መጠባበቂያን ሳይጨምር የባንኩ የተጣራ ትረፍ 182 ሚሊዮን ብር ሆኗል እናት...

    ቡና ባንክ ዓመታዊ ትርፉን ከአንድ ቢሊዮን ብር በላይ ማሻገር ቻለ

    ቡና ባንክ በ2014 የሒሳብ ዓመት ዓመታዊ የትርፍ ምጣኔውን ለመጀመርያ...

    ወጋገን ባንክ ከገጠመው ቀውስ በማገገም በ2014 የሒሳብ ዓመት የተሻለ ትርፍ አገኘ

    ለሁለት ዓመታት የዘለቀው የሰሜን ኢትዮጵያ ጦርነት የቢዝነስ እንቅስቃሴያቸው ከተስተጓጎለባቸው...
    spot_img

    ተዛማጅ ፅሁፎች

    [ክቡር ሚኒስትሩ በዕረፍት ቀናቸው እርጅና የተጫጫናቸው አጎታቸውን ለመጠየቅ ቢሄዱም ሚኒስትሩ ራሳቸው ተጠያቂ ሆነዋል]

    ዛሬ እንዴት ትዝ አልኩህ ክቡር ሚኒስትር? ልትመዛት ያሰብካት ነገር አለች ማለት ነው? እንዴት? ክቡር ሚኒስትር ብለህ ጠራኸኛ?! ክቡር ሚኒስትር አይደለህም እንዴ? እንደዚያ ብለህ በጠራኸኝ ቁጥር አንድ ያልተዋጠለህን ነገር ታነሳለህ።...

    [በተቋሙ ሠራተኞች የተወከሉ አንድ ባልደረባ ሚኒስትሩን ለማነጋገር ቀጠሮ ይዘው ወደ ቢሯቸው ገቡ]

    ጤና ይስጥልኝ ክቡር ሚኒስትር? ሰላም ሰላም ... ተቀመጥ! አመሠግናለሁ ክቡር ሚኒስትር! ቀድሜ ቀጠሮ እንዲያዝልኝ ስጠይቅ እንደገለጽኩት በተቋሙ ሠራተኛ ተወክዬ ነው የመጣሁት። እንዴ? አንተ የእኛ ተቋም ባልደረባ አይደለህም...

    [የተቃዋሚ ፓርቲው ትይዩ ሚኒስትር ክቡር ሚኒስትሩ ጋ ደውለው መንግሥት በሙሰኞች ላይ ለመውሰድ ስላሰበው የሕግ ዕርምጃ ሐሳብ እየተለዋወጡ ነው]

    ሄሎ… ማን ልበል? ጤና ይስጥልኝ ክቡር ሚኒስትር? ጤና ይስጥልኝ… ማን ልበል? የእርስዎ ትይዩ ነኝ፡፡  አቤት? ያው ፓርቲዬን ወክዬ የፍትሕ ሚኒስትሩ ትይዩ ነኝ ማለቴ ነው፡፡ ኦ... ገባኝ… ገባኝ...  ትንሽ ግራ አገባሁዎት አይደል? ትይዩ...