Friday, December 9, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር

    [ክቡር ሚኒስትሩ ከአንድ አፍሪካዊ አምባሳደር ጋር ስብሰባ ላይ ተገናኝተው ሻይ እየጠጡ ነው]

    • እንኳን ደስ አለዎት ክቡር ሚኒስትር፡፡
    • ለምኑ?
    • ያው ከተሾሙ አላገኘሁዎትም ብዬ ነው፡፡
    • አሁንማ ሰነባበትኩ፡፡
    • እንዴት ነው ሥራ?
    • ይኸው ተያይዘነዋል፡፡
    • ከቀድሞው ሚኒስትር ጋር እኮ ብዙ ሥራ እንሠራ ነበር፡፡
    • ምን ዓይነት ሥራ?
    • የሁለትዮሽ ሥራ፡፡
    • በአገሮቹ መካከል ያለ ሥራ ነው?
    • በአገሮቹም መካከል፣ በእኛም መካከል ሊሆን ይችላል፡፡
    • አልገባኝም፡፡
    • አሁን ክቡር ሚኒስትር ይኼ ይጠፋዎታል?
    • በእውነት ግራ ተጋብቼ ነው፡፡
    • እኔ በፊት ሚኒስትር ነበርኩኝ፡፡
    • እሺ፡፡
    • ሚኒስትር በነበርኩበት ወቅትም የምታወቅበት ነገር ነበር፡፡
    • ምንድን ነው እሱ?
    • ለተለያዩ አገሮች ሚኒስትሮች መሬት አገሬ እንድትሰጥ አደርግ ነበር፡፡
    • እ…
    • ክቡር ሚኒስትር በጣም እጠቅመዎታለሁ፡፡
    • ምን?
    • ከቀድሞ ሚኒስትር ጋር እኮ እጅና ጓንት ነን፡፡
    • ተው እንጂ?
    • እሳቸው እኮ እዚህ አገር ቦታ አሰጥተውኛል፡፡
    • ምን?
    • በነገራችን ላይ በጣም ቀልጣፋ ሚኒስትር ነበሩ፡፡
    • እውነት?
    • እኔማ በጣም ስለሚመቹኝ ቢዝነስ አብረን እንድንሠራ እየተነጋገርን ነው፡፡
    • እ…
    • እኔ አገር ውስጥም ኪስ የሆነ ቦታ ነው ያሰጠኋቸው፡፡
    • ወይ ጣጣ፡፡
    • ምነው ግራ ገባዎት ክቡር ሚኒስትር?
    • ሁሉ ነገር ገርሞኝ ነዋ፡፡
    • ምኑ ነው የገረመዎት?
    • የሚሠራው ሥራ፡፡
    • የተለመደ እኮ ነው፡፡
    • ምኑ ነው የተለመደው?
    • እከክልኝ ልከክልህ የሚለው አሠራር ነዋ፡፡
    • የተሾምነው እኮ ሕዝብ ለማገልገል ነው፡፡
    • እኛም እኮ የሕዝብ አካል ነን፡፡
    • በጣም ያሳዝናል፡፡
    • በነገራችን ላይ ክቡር ሚኒስትር…
    • ምንድን ነው?
    • መንግሥታችሁ የደመወዝ ማሻሻያ አደረገ እንዴ?
    • ኧረ አልተደረገም፡፡
    • ታዲያ ኑሮን በደመወዝ ብቻ እንዴት ሊገፉት ነው?
    • እ…
    • ያው መጀመሪያ ላይ እኛም ሀቀኛ ለመሆን ሞክረን ነበር፡፡
    • ከዚያስ?
    • ከዚያማ ምንም ጠብ የሚል ነገር ስናጣ ተዘፈቅንበታ፡፡
    • ምኑ ውስጥ?
    • ጥቅሙ ውስጥ፡፡
    • እ…
    • ሳይመሽ ያስቡበት፡፡
    • ምኑን?
    • መመረቅ አለብዎት፡፡
    • ቤተሰቦቼ መርቀውኛል፡፡
    • ከሚኒስትርነትም መመረቅ አለብዎት፡፡
    • ወደ ምን?
    • ወደ ኢንቨስተርነት!

    [ክቡር ሚኒስትሩ ከስብሰባ ወጥተው ከሾፌራቸው ጋር ወደ ቢሮ እየሄዱ ነው]

    • ምነው ክቡር ሚኒስትር?
    • ምነው?
    • በጣም የተናደዱ ይመስላል፡፡
    • አንዱ አስገርሞኝ ነው፡፡
    • ምን አደረገ?
    • አንዳንዱ ሰው ሌብነቱን በአደባባይ በድፍረት ነው የሚያወራው፡፡
    • አብዛኛው ሰው ይበሉ እንጂ?
    • እ…
    • የሰው ዋና ሥራ ሌብነት ከሆነ ሰነባበተ፡፡
    • እኔ እኮ የሚገርመኝ መስረቃቸው ሳይሆን ድፍረታቸው ነው፡፡
    • አሁን እኮ ንፁህ ከሆኑ ነው መደበቅ ያለብዎት፡፡
    • የሚገርም ጊዜ ላይ ነን፡፡
    • የባሰ አታምጣ ነው ክቡር ሚኒስትር፡፡
    • እኔ ከአቅሜ በላይ ሆኗል፡፡
    • ምን ጠብቀው ነበር?
    • እኔ በዚህ ደረጃ ሌብነት ይኖራል ብዬ አላስብም ነበር፡፡
    • የቤተ ክርስቲያን መሪ ሆነው አይደለም እኮ የተሾሙት?
    • በዚህ ዓይነትማ እዚያስ ሌብነት ይጠፋል ብለህ ነው?
    • ለነገሩ እዛ ቢብስ ነው፡፡
    • ምን ሆነህ ነው አንተ?
    • ምን ሆንኩ ክቡር ሚኒስትር?
    • ፂምህ እንደዚህ የጎፈረው?
    • በምን ልቆረጥ?
    • በቶንዶስ ነዋ፡፡
    • መብራት የለማ፡፡
    • ሳምንቱን ሙሉ?
    • አዎን ክቡር ሚኒስትር፡፡
    • እ…
    • አንዴ ትራንስፎርመር ተቃጠለ ይላሉ፡፡
    • እሺ፡፡
    • ሌላ ጊዜ የትራንስሚሽን መስመሩ ይላሉ፡፡
    • ወይ ጣጣ፡፡
    • ሌላ ጊዜ በትራንስፎርሜሽን ዕቅዱ ግድብ ይመረቃል ይላሉ፡፡
    • ኡፍፍ…
    • ብቻ ግራ ያጋቡናል፡፡
    • ለነገሩ እኔ ራሴ ውኃ ተቸግሬያለሁ፡፡
    • እንዴት?
    • በቃ የምትመጣው ሌሊት ሌሊት ነው፡፡
    • እ…
    • ትናንት ራሱ ከሚስቴ ጋር ጀሪካን ስደቅን ነው ያደርኩት፡፡
    • ኪኪኪ…
    • ምን ያስገለፍጥሃል?
    • ጀሪካን ስደቅን ሲሉኝ ነዋ፡፡
    • እውነቴን እኮ ነው፡፡
    • እንዴ?
    • ምነው?
    • አንዳንዴ ይረሱታል ልበል?
    • ምኑን?
    • ሚኒስትር መሆንዎን፡፡
    • ብሆንስ?
    • የቀድሞ ሚኒስትር ቤት ውኃ ቢጠፋ ራሱ ኃይላንድ እኮ ነው በርሜሉ የሚሞላው፡፡
    • ምን?
    • ክቡር ሚኒስትር ግን ቢያስቡበት ይሻላል?
    • ምኑን?
    • ምረቃውን!

    [የክቡር ሚኒስትሩ አማካሪ ቢሯቸው ገባ]

    • ሰላም ክቡር ሚኒስትር፡፡
    • አዘጋጀህ ያዘዝኩህን?
    • የስድስት ወራት ዕቅድ ተዘጋጅቷል፡፡
    • በጣም ጥሩ፡፡
    • አይተውት አስተያየት ይስጡኝ፡፡
    • ሌላ ምን ሪፖርት አለህ?
    • ስለምን ክቡር ሚኒስትር?
    • ስለቢሮ፡፡
    • ያው በርካታው ሰው በለውጡ ደስተኛ ነው፡፡
    • ማለት?
    • አዲሱ ሽግሽግ በርካታ ቀዳዳዎችን በመድፈኑ ተደስተዋል፡፡
    • ዋናው ዓላማችን እሱ አይደለ እንዴ?
    • በዛኑ ልክ በጣም የተቆጡ አሉ፡፡
    • እ…
    • የሚበሉበት ቀዳዳ ስለተደፈነ ሥራ እያደናቀፉ ነው፡፡
    • እነዚህንማ በማስረጃ አስደግፎ ፍርድ ቤት መገተር ነው፡፡
    • እንዲህ ቀላል ላይሆን ይችላል፡፡
    • ብቻ በርታ!

    [የክቡር ሚኒስትሩ ጸሐፊ ቢሯቸው ገባች]

    • ዕቃ መጥቶልዎታል ክቡር ሚኒስትር፡፡
    • የምን ዕቃ?
    • ስጦታ ነው መሰለኝ፡፡
    • የምን ስጦታ ነው?
    • የገና ስጦታ፡፡
    • ገና አይደል እንዴ ገና?
    • የፈረንጆቹ ገና ስጦታ ነው፡፡
    • እ…
    • በየዓይነቱ እኮ ነው የሚመጣለዎት፡፡
    • ማለት?
    • ይህ የስጦት ወቅት ነው፡፡
    • ኧረ እኔ አልፈልግም፡፡
    • አይባልም ክቡር ሚኒስትር፡፡
    • ለምን አይባልም?
    • ለነገሩ አንዳንድ ስጦታ ራሱ እምቢ አያስብልም፡፡
    • ማለት?
    • ቪ8 ሲመጣ እምቢ ይባላል?
    • ቪ8 በስጦታ ይመጣል?
    • በባንክ እኮ ከዛ በላይም ይተላለፋል፡፡
    • እ…
    • የሚያስፈልገው ራስን ማዘጋጀት ነው፡፡
    • እኔ አልፈልግም አልኩሽ፡፡
    • ክቡር ሚኒስትር እንኩ ይክፈቱት?
    • እኔ አልከፍተውም አልኩሽ፡፡
    • እኔ ልክፈተው?
    • እንደፈለግሽ፡፡
    • ይኸው ከፈትኩት፡፡
    • እ…
    • ዋው በጣም የሚያምር ስጦታ፡፡
    • ምንድን ነው?
    • አይፎን 7!

    [ክቡር ሚኒስትሩ ቢሮ የሰው ኃይል አስተዳደር ኃላፊው ገባ]

    • ቅጥሩን ምን አደረስክ?
    • አራት ኤክስፐርቶች በአፋጣኝ መቀጠር አለባቸው፡፡
    • ማስታወቂያ አወጣችሁ?
    • የመንግሥት ሚዲያ እንጠቀም?
    • ለምን ተብሎ?
    • ያው የተለመደው አሠራር በመንግሥት ሚዲያ መጠቀም ነው፡፡
    • መውጣት ያለበት በተነባቢ ጋዜጣና በተደማጭ ሬዲዮ ላይ ነው፡፡
    • ካሉ ምን ይደረጋል?
    • አሠራራችን ግልጽ መሆን አለበት፡፡
    • ሌላው የሥራ ማስታወቂያው ይዘት ላይ እንድንነጋገር ነበር፡፡
    • ይዘቱ ምን መሆን አለበት?
    • የብሔር ተዋጽኦ ምን መምሰል አለበት ይላሉ?
    • ምን?
    • ከዚያም ባለፈ የፓርቲ ታማኝነታቸው ምን ይሁን የሚለውም መታየት ያለበት መሰለኝ?
    • ለፓርቲ አባልነት አይደለም እኮ የምንመለምለው?
    • በፊት የነበረው አሠራርን ነው የምነግርዎት፡፡
    • አሠራራችን ተቀይሯል!

    [የሰው ኃይል አስተዳደሩ ኃላፊ ስልክ ተደውሎለት አናገረ]

    • ክቡር ሚኒስትር ውይይታችን ብዙም አስፈላጊ አልነበረም መሰለኝ፡፡
    • ለምን ሲባል?
    • አሁን የተደወለው ስልክ ቅጥሩን አስመልክቶ ነው፡፡
    • ቅጥሩ ምን ይሁን?
    • አራት ሰዎች እንዲቀጠሩ ተልከዋል፡፡
    • ምን?
    • ስለዚህ በቀጥታ ሰዎቹን መቅጠር ነው፡፡
    • ማን ነው የላከው?
    • የበላይ አካል፡፡
    • አሁንም በእንትን ሰው መቅጠር አልቀረም እንዴ?
    • በምን?
    • በወንዝ!

     

    በብዛት የተነበቡ ፅሁፎች

    በሰባት የመንግሥት ተቋማት ላይ ሰፊ የወንጀል ምርመራ እየተካሄደ መሆኑ ተሰማ

    በስምንት የመንግሥት ዩኒቨርሲቲዎች ላይ የወንጀል ምርመራ እንዲጀመር ተወስኗል ከ1.4 ቢሊዮን...

    ጎህ ቤቶች ባንክ ወደ ቤት ልማት ለመግባት ብሔራዊ ባንክን ፈቃድ ጠየቀ

    በስምንት ወራት ውስጥ 7.9 ሚሊዮን ብር ማትረፉን አስታውቋል ኢትዮጵያ ውስጥ...

    ወጋገን ባንክ ከገጠመው ቀውስ በማገገም በ2014 የሒሳብ ዓመት የተሻለ ትርፍ አገኘ

    ለሁለት ዓመታት የዘለቀው የሰሜን ኢትዮጵያ ጦርነት የቢዝነስ እንቅስቃሴያቸው ከተስተጓጎለባቸው...

    ሒጂራ ባንክ የ143 ሚሊዮን ብር ኪሳራ አስመዘገበ

    በኢትዮጵያ ሙሉ ለሙሉ ከወለድ ነፃ ባንክ አገልግሎት ለመስጠት ወደ...
    - Advertisment -

    ትኩስ ፅሁፎች

    በኦሮሚያ ክልል የተፈጸመው ጭፍጨፋና ሥጋቱ

    ኦሮሚያ ክልል ከቀውስ አዙሪት መላቀቅ ያቃተው ይመስላል፡፡ ከ200 በላይ...

    እናት ባንክ ካፒታሉን ወደ አምስት ቢሊዮን ብር ለማሳደግ ወሰነ

    መጠባበቂያን ሳይጨምር የባንኩ የተጣራ ትረፍ 182 ሚሊዮን ብር ሆኗል እናት...

    ቡና ባንክ ዓመታዊ ትርፉን ከአንድ ቢሊዮን ብር በላይ ማሻገር ቻለ

    ቡና ባንክ በ2014 የሒሳብ ዓመት ዓመታዊ የትርፍ ምጣኔውን ለመጀመርያ...

    ወጋገን ባንክ ከገጠመው ቀውስ በማገገም በ2014 የሒሳብ ዓመት የተሻለ ትርፍ አገኘ

    ለሁለት ዓመታት የዘለቀው የሰሜን ኢትዮጵያ ጦርነት የቢዝነስ እንቅስቃሴያቸው ከተስተጓጎለባቸው...
    spot_img

    ተዛማጅ ፅሁፎች

    [ክቡር ሚኒስትሩ በዕረፍት ቀናቸው እርጅና የተጫጫናቸው አጎታቸውን ለመጠየቅ ቢሄዱም ሚኒስትሩ ራሳቸው ተጠያቂ ሆነዋል]

    ዛሬ እንዴት ትዝ አልኩህ ክቡር ሚኒስትር? ልትመዛት ያሰብካት ነገር አለች ማለት ነው? እንዴት? ክቡር ሚኒስትር ብለህ ጠራኸኛ?! ክቡር ሚኒስትር አይደለህም እንዴ? እንደዚያ ብለህ በጠራኸኝ ቁጥር አንድ ያልተዋጠለህን ነገር ታነሳለህ።...

    [በተቋሙ ሠራተኞች የተወከሉ አንድ ባልደረባ ሚኒስትሩን ለማነጋገር ቀጠሮ ይዘው ወደ ቢሯቸው ገቡ]

    ጤና ይስጥልኝ ክቡር ሚኒስትር? ሰላም ሰላም ... ተቀመጥ! አመሠግናለሁ ክቡር ሚኒስትር! ቀድሜ ቀጠሮ እንዲያዝልኝ ስጠይቅ እንደገለጽኩት በተቋሙ ሠራተኛ ተወክዬ ነው የመጣሁት። እንዴ? አንተ የእኛ ተቋም ባልደረባ አይደለህም...

    [የተቃዋሚ ፓርቲው ትይዩ ሚኒስትር ክቡር ሚኒስትሩ ጋ ደውለው መንግሥት በሙሰኞች ላይ ለመውሰድ ስላሰበው የሕግ ዕርምጃ ሐሳብ እየተለዋወጡ ነው]

    ሄሎ… ማን ልበል? ጤና ይስጥልኝ ክቡር ሚኒስትር? ጤና ይስጥልኝ… ማን ልበል? የእርስዎ ትይዩ ነኝ፡፡  አቤት? ያው ፓርቲዬን ወክዬ የፍትሕ ሚኒስትሩ ትይዩ ነኝ ማለቴ ነው፡፡ ኦ... ገባኝ… ገባኝ...  ትንሽ ግራ አገባሁዎት አይደል? ትይዩ...