Monday, July 22, 2024
- ማስታወቂያ -
- ማስታወቂያ -

ሚድሮክ ወርቅ ማዕድን ዘርፉን በማያውቁ አካላት ክሶች እየቀረቡበት መሆኑን ተናገረ

ተዛማጅ ፅሁፎች

ሚድሮክ ወርቅ ማዕድን እስከ ምክር ቤት ድረስ ባሉና የወርቅ ማዕድን ዘርፉን በማያውቁ አካላት ክሶች እየደረሱበት መሆኑን ገለጸ፡፡

ይህ የተገለጸው የኢትዮጵያ የተስማሚነት ምዘና ድርጅት ሚድሮክ ወርቅ ማዕድን በአካባቢ ጥበቃ የ‹‹ISO 14001:2015 Environmental Management System›› መሥፈርቶችን ማሟላቱን አስታውቆ፣ ማክሰኞ ሰኔ 25 ቀን 2016 ዓ.ም. የአካባቢ ጥበቃ ሥርዓት ዓለም አቀፍ ዕውቅና ያለው ሰርተፊኬት በሰጠበቅ ወቅት ነው፡፡

በመድረኩ የተገኙት የሚድሮክ ኢንቨስትመንት ግሩፕ ዋና ሥራ አስፈጻሚ አቶ ጀማል አህመድ፣ በመንግሥት ሥር ሲተዳደር የነበረውን የለገደንቢ የወርቅ ማዕድንን ሚድሮክ በተረከበበት ጊዜ፣ ከስዊድን ባስመጣቸው ባለሙያዎች ጥናት በማስጠናት ጥቅም ላይ ሲውል የነበረውን የሜሪኩሪ ኬሚካል፣ ሶዲየም በሳይናይድ ኬሚካል መተካቱን ገልጸዋል፡፡

በመሆኑም በተለያዩ ጊዜያት የአካባቢ ጉዳት እያስከተለ ነው በሚል ክሶች ቢቀርቡበትም፣ ኩባንያው ግን ኬሚካሉን ተጠቅሞ እንደማያውቅ ተናግረዋል፡፡ ‹‹የፖለቲካ ተፅዕኖ ለመፍጠር ሐሳብ ያላቸው ምስክሮች እየመጡ ሲከሰስ ቆይቷል፤›› ያሉት አቶ ጀማል፣ በአካባቢው ሜርኩሪ የተሰኘውን ኬሚካል የሚጠቀሙ የመንግሥትም ሆኑ የግልም ተቋማት በመኖራቸው፣ አካባቢው ላይ ለሚደርስ ጉዳት ሚድሮክ የወርቅ ማዕድን ተጠያቂ ሲደረግ መቆየቱን አመላክተዋል፡፡

አክለውም ዘርፉን የማያውቁና እስከ ምክር ቤት ድረስ ያሉ አካላት፣ አሁንም ክሶችን እንደሚያቀርቡበት ገልጸው፣ ለእነዚህ ክሶች መልስ የሚሆን ከሦስተኛ ወገን የተዓማኒነት ምስክር ወረቀት፣ ከተስማሚነትና ምዘና ድርጅት በማግኘቱ ድርጅቱን አመስግነዋል፡፡  

ኩባንያው ከሚሠራው የወርቅ ምርት ባልተናነሰ በአካባቢ ጥበቃ ዙሪያ ኃላፊነት ወስዶ እንደሚሠራ ጠቁመው፣ የኩባንያው የማዕድን ዘርፍ ምክትል ዋና ሥራ አስፈጻሚ አቶ ዱላ መኮንን ወደ አካባቢው የሚለቀቀው ተረፈ ምርት ሦስት ደረጃዎችን ያለፈ እንደሆነና ጉዳት የማያስከትል መሆኑ ከተጣራ በኋላ መሆኑን ገልጸዋል፡፡

አክለውም ከተስማሚነትና ምዘና ድርጅት የተሰጠው ሰርተፊኬት፣ በሚድሮክ ወርቅ ማዕድን ሥር የሚገኙ ሁሉንም ፕሮጀክቶች የሚመለከት መሆኑን ጠቁመዋል፡፡                                                                       

የምስክር ወረቀቱ ከተገኘ በኋላ ክትትሉ እንደማይቆም የገለጹት ደግሞ የተስማሚነትና ምዘና ድርጅት ምክትል ዳይሬክተር አቶ ጋሻው ተስፋዬ ናቸው፡፡ ምክትል ዳይሬክተሩ ከሦስት ዓመታት በኋላም ድጋሚ ፍተሻ እንደሚያካሂድ ጠቁመዋል፡፡ በዚህም ከአካባቢ ጥበቃ አኳያ ያሉ ፍተሻዎች ብቻም ሳይሆን ኩባንያው የአካባቢ ጥበቃውን በማካሄዱ ምን እንዳተረፈ ጭምር እንደሚጠየቅ ገልጸዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች