Wednesday, July 24, 2024
- Advertisement -
- Advertisement -
የሳምንቱ ገጠመኝየ ሳ ም ን ቱ ገ ጠ መ ኝ

የ ሳ ም ን ቱ ገ ጠ መ ኝ

ቀን:

ባለፈው ሳምንት ቅዳሜ ቀን ከጠዋቱ ሁለት ሰዓት ሲሆን የሞባይል ስልኬ ተንጫረረ፡፡ አንስቼ ሳየው ቁጥሩን አላውቀውም፡፡ ነገር ግን መልስ መስጠት ነበረብኝ፡፡ ‹‹ሃሎ ማን ልበል?›› አልኩ፡፡ ደስ የሚል የዜማ ቅኝት ያለው የአንዲት ሴት ድምፅ ተሰማኝ፡፡ ‹‹ሰላም ወንድም ያሬድ እኔ ራሔል እባላለሁ፡፡ ከአሜሪካ ለእረፍት ነው የመጣሁት፡፡ ወንድምህ ዮናስ ዕቃ ስለላከልህ የት ተገናኝተን ልስጥህ?›› አለችኝ፡፡ ወንድሜን ከሦስት ቀናት በፊት በስልክ አግኝቼው ስለዚህ ጉዳይ አልነገረኝም፡፡ ከስልኩ በተጨማሪም በትዊተር (X) መልዕክት ተለዋውጠናል፡፡ ዕቃ እንደሚልክልኝ የነገረኝ ነገር የለም፡፡ ያም ሆነ ይህ ከድምፀ መረዋዋ ሴት ጋር የዚያኑ ዕለት ለመገናኘት ተቃጠርን፡፡ አቤት ደምፅ እስካገኛት ቸኩያለሁ፡፡ ቸኩያለሁ ከማለት ይልቅ አቅሌን ስቻለሁ ብል ይቀላል፡፡

ምን እንደሆነ ባላውቀውም የሆነ ነገር ወንድሜን እንዳገኘው በጣም ውስጤን ስለገፋፋው፣ ስልኬን ከፍቼ በኢሜይል ወይም በፌስቡክ ላገኘው ስሞክር ዋይፋይ አይሠራም፡፡ በስልኬ ዳታ ደጋግሜ ስሞክር አገልግሎቱ የለም፡፡ ምክንያቱ ገባኝ፡፡ በኮሪደር ልማቱ ምክንያት መቆራረጥ ገጥሞን ነው የሰነበተው፡፡ ሲሰለቸኝ ተውኩትና ሌሎች ተግባራትን ማከናወን ቀጠልኩ፡፡ ከቀኑ ሰባት ሰዓት ሲሆን ወደ ልጅት ጉዞዬን ቀጠልኩ፡፡ የቀጠርኳት ቦሌ የሚገኝ በጣም ዘመናዊ ካፌ ነው፡፡ ልክ ስምንት ሰዓት በቀጠሮው መሠረት ስደርስ ካፌው በወጣቶች ጢም ብሎ ሞልቷል፡፡ እንደ ምንም ብዬ ጥግ ላይ ቦታ አግኝቼ የአሜሪካዋን መልዕክተኛ መጠባበቅ ጀመርኩ፡፡

ወዲያው ከመቀመጤ ሁለት በሃያዎቹ አጋማሽ ላይ የሚገኙ ቆንጅዬዎች እኔ ያለሁበትን ጠረጴዛ ለመጋራት በፈገግታና በትህትና ጥያቄ ሲያቀርቡልኝ፣ በደስታ ውስጥ ሆኜ ፈቃደኝነቴን ገለጽኩላቸው፡፡ ጥሎብኝ ቆንጆ እወዳለሁ፡፡ ወይ አንዳንዱ ቀን? ድምፀ መረዋ በስልክ፣ እነዚህ ውቦች ደግሞ በአካል ሲከቡኝ ደስታው ሞቅታ ውስጥ ከቶኛል፡፡ ያቺ ድምፀ መረዋ አሥር ደቂቃ ያህል ዘግይታ አልመጣችም፡፡ ምነው ዘገየሽ ለማለት ስልኬን ከኪሴ አውጥቼ ለመደወል ስሞክር፣ የመልዕክት መቀበያና መላኪያ ማሳያው ገቢ መልዕክት እንዳለ ጠቆመኝ፡፡ ከፍቼ ሳነበው፣ ‹‹መንገዱ በትራፊክ ስለተጨናነቀ የተወሰኑ ደቂቃዎች ስለምዘገይ እባክህ ታገሰኝ…›› ይላል፡፡ በዘንድሮ የመኪናና የኔትወርክ መጨናነቅ መታገስ ይነሰን?

ድምፀ መረዋዋ እስክትመጣ የመጣልኝን ማኪያቶ መጠጣት ስጀምር ከቆንጅዬዎቹ አንደኛዋ፣ ‹‹ወንድም ተጫወት፣ ብቸኝነትን መላመድ ጥሩ አይደለም…›› ብላ ግብዣ አቀረበችልኝ፡፡ ከሁለቱ ውቦች ጋር እየተሳሳቅን የባጥ የቆጡን መቀባጠር ጀመርን፡፡ ሁለቱ በነፍስ ወከፍ አንዳንድ ክለብ ሳንዱችና ጁስ አዘዋል፡፡ በተጨማሪ የልደት ኬክና ፓናቶኒ ‹‹ቴክ አዌይ›› እንዲዘጋጅ ትዕዛዝ ሰጥተዋል፡፡ መልካቸው ቆንጆ፣ አለባበሳቸው ውብ፣ ፈገግታቸው ገዳይ ሆኖብኝ የጦፈ ወሬ ይዤ ሌላ ዓለም ውስጥ ገብቻለሁ፡፡

ክለብ ሳንዱቻቸው መጥቶ ጁሱ ከተከተለ በኋላ የተለመደው የ‹‹እንብላ›› ግብዣ ቀረበልኝ፡፡ ቁርሴንና ምሳዬን ረፋዱ ላይ ብበላም ከድምፀ መረዋዋ ጋር ምሳ ለመብላት ዕቅድ በመያዜ ‹‹የተባረከ ይሁን…›› ብዬ ከግብዣው ራሴን አቀብኩ፡፡ እነ ውቢት በሚገርም ፍጥነትና የአበላል ቅልጥፍና ክለብ ሳንዱቻቸውንና ጁሳቸውን ካጣጣሙ በኋላ ማኪያቶ አዘዙ፡፡ ማኪያቶቻቸውን ካጋቡ በኋላ ‹‹ቴክ አዌይ›› ብለው ያዘዙትን የልደት ኬክና ፓናቶኒ አስመጡ፡፡ አስተናጋጁ ያመጣውን አንደኛዋ ተቀብላ መኪና ውስጥ ለማስገባት ብላ ሄደች፡፡ ሁለተኛዋ ቢሉን ተቀብላ በስልኳ ካልኩሌተር ካሰላች በኋላ ገንዘብ ለማውጣት ቦርሳዋን መደባበስ ጀመረች፡፡ በዚህ መሀል ስልኳ ጮኸ፡፡ ቦርሳዋን በእጇ እንደያዘች እየሳቀች ማውራት ጀመረች፡፡ በዓይኗ ጠቀስ አድርጋኝ ቢሉን አሳየችኝ፡፡ ግራ ገብቶኝ እየተቁለጨለጭኩ ሳያት ንግግሯን ገታ አድርጋ፣ ‹‹ሒሳቡን እንደገና አስላው…›› አለችኝ፡፡ ቢሉን እያየሁ እኔም በስልኬ ካልኩሌተር ማስላቱን ተያያዝኩት፡፡

የበሉትን፣ የጠጡትንና ይዘው የሚሄዱትን ጭምር አስልቼ ሳጠናቅቅ ድምሩ 2,542 ብር መጣ፡፡ ከኪሴ ብዕር አውጥቼ ቢሉ ጀርባ ላይ 2,542 ብር በማለት ጽፌ ሪፖርት ላቀርብ ቀና ስል ውቢት የለችም፡፡ በስልክ እየተነጋገረች ስለነበር እስከምትመለስ የአሜሪካዋን ድምፀ መረዋ መጠበቅ ጀመርኩ፡፡ ‹‹ቴክ አዌይ›› ይዛ የሄደችው አልተመለሰችም፡፡ በስልክ ስታወራ የነበረችው ጭራሹኑ ለዓይን አትታይም፡፡ የራሳቸው ጉዳይ ብዬ ወጪና ገቢውን ሳይ ሰዓቱ ነጎደ፡፡ አሁን ከቀኑ ዘጠኝ ሰዓት ተኩል ሆኗል፡፡ ስልኬን አውጥቼ ድምፀ መረዋዋ ዘንድ ደወልኩ፣ ስልኳ ዝግ ነው፡፡ ልቤ የሆነ ነገር ጠረጠረ፡፡  እኔ ሁሌም ጠርጣሪ በመሆኔ የአሁኑ ሁኔታ አላስደሰተኝም፡፡ አስተናጋጁን በፍጥነት ጠርቼ የማኪያቶ ሒሳብ ለመክፈል ቢል አምጣ ስለው፣ የእነዚያን ቆነጃጅት ሒሳብ አንድ ላይ ደምሮ 2,632 ብር ክፈል ሲለኝ ሳቅኩበት፡፡ የእኔ ሒሳብ አይደለማ፡፡

አስተናጋጁ እንደ ወፈፌ እያየኝ፣ ‹‹ወንድሜ ሴቶቹ ሒሳቡን የሚዘጋው እሱ ነው ብለው ሄደዋል፡፡ በዚያ ላይ ሒሳቡን እንደ ራስህ አድርገህ ስትደምር ነበር፡፡ የማያገባህ ከሆነ ለምን ሒሳቡን ደመርክ? ጀርባው ላይስ ለምን ጻፍክ? አንድ ሰው የማይመለከተው ከሆነ የሰው ቢል የማየትም ሆነ የመንካት መብት የለውም…›› እያለ ማብራሪያ ሲሰጠኝ ጥፋቴ ገባኝ፡፡ ማንም የማያታልለኝ አራዳ ጉድ ሆኛለሁ፡፡ ዛሬ ከጠዋት ጀምሮ የተሸወድኩት ነገር እንዳለ ገባኝ፡፡ ወንድሜ ያልነገረኝ መልዕክተኛ ከአሜሪካ እንዴት መጣሁ አለች? ለምን ስልኳን አጠፋች? በቃ ተሸውጄያለሁ፣ ተናደድኩ፡፡ ሳላንገራግር ሒሳቡን ከእነ ቲፑ ዘግቼ ራሴን እየረገምኩ ወደ ቤት ሄድኩ፡፡ ቤት ስደርስ ሁለት እህቶቼ በሳቅ ተቀበሉኝ፡፡ ‹‹ምን ሆናችኋል?›› ስላቸው፣ ‹‹እኔን ማንም ሊያታልለኝ ወይም ሊሸውደኝ አይችልም የምትለውን የጉራህን ልኬት ለማወቅ ነው…›› ብለው በጓደኞቻቸው መቀለጃ መሆኔን አረዱኝ፡፡ በአራድነቴ አገር ያወቀኝን ጮካ ተሳለቁብኝ፡፡ እህቶቼ የተበላውን ገንዘቤን ቢመልሱልኝም ጉራዬ ግን ለአንዴና ለመጨረሻ ጊዜ ተኖ ቀረ እላችኋለሁ፡፡ ‹‹ያራዳ ልጅ ድሮ ቀረ›› ብዬ ብቻዬን ማውራት ጀምሬያለሁ፡፡ ያለ እኛ ማን አለ ማለት አይደል እንዴ በየደረስንበት ሲያስቸግረን ኖሮ ይኼው አገርን ችግር ውስጥ እየከተተ ያለው፡፡ የድሮ አራዳ በዘንድሮ አራዶች ሲበላ እኮ በግላጭ እየታየ ነው፡፡ በእኔ የደረሰ አይድረስባችሁ፡፡

(ያሬድ ነቢያት፣ ከግንፍሌ)

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

“ከሁለት ሳምንት በፊት ወደ ኤርትራ የማደርገውን በረራ እንዳሳድግ ተጠይቄ ነበር” የኢትዮጵያ አየር መንገድ

ኢትዮጵያ አየር መንገድ ወደ ኤርትራ የሚያደርገውን በረራ እንዲያሳድግ የሚጠይቅ...
00:06:46

የኤርትራ አቪዬሽን ባለሥልጣን የኢትዮጵያ አየር መንገድ በረራዎችን ማገዱን አስታወቀ

የኢትዮጵያ ሲቪል አቪዬሽን ባለሥልጣን ጉዳዩን እያጣራሁ ነው ብሏል በኤርትራ ትራንስፖርትና...

[ክቡር ሚኒስትሩ ከተቋሙ የሠራተኞች ማኅበር አመራር ጋር እየተወያዩ ነው]

ጤና ይስጥልኝ ክቡር ሚኒስትር? ሰላም! በአስቸኳይ እንደፈለጉኝ መልዕክት ደርሶኝ ነው የመጣሁት። አዎ።...

የሱዳን ጦርነትና የኢትዮጵያ ሥጋት

የሱዳን ጦርነት ከጀመረ አንድ ዓመት ከአራት ወራት አስቆጠረ፡፡ ጦርነቱ...