Monday, June 17, 2024
- ማስታወቂያ -
- ማስታወቂያ -

ልማት ባንክ በትግራይ ለሚገኙ 78 ፕሮጀክቶች የሰጠውን ብድር ከጤናማ ወደ ተበላሸ የብድር መደብ አዘዋወረ

spot_img

ተዛማጅ ፅሁፎች

ብሔራዊ ባንክ በትግራይ ክልል የሚገኙ ፕሮጀክቶች የብድር ሁኔታ በድጋሚ እንዲመዘን ባሳለፈው ውሳኔ መሠረት፣ የኢትዮጵያ ልማት ባንክ በትግራይ ለሚገኙ 78 ፕሮጀክቶች የሰጠውን ብድር ከጤናማ ወደ ተበላሸ ብድር ምድብ እንዲዛወር አደረገ።

ልማት ባንክ የ2016 በጀት ዓመት የዘጠኝ ወራት የሥራ አፈጻጸም ሪፖርቱን ባለፈው ማክሰኞ ለሕዝብ ተወካዮች ምክር ቤት ባቀረበበት ወቅት የባንኩ ፕሬዚዳንት ዮሐንስ አያሌው (ዶ/ር) ባደረጉት ገለጻ፣ በትግራይ ክልል ለሚገኙ ፕሮጀክቶች የተሰጠው ብድር ላይ ማስተካከያ መደረጉን ጠቁመዋል።

በክልሉ የሚገኙት 78 ፕሮጀክቶች ከልማት ባንክ ወስደው ያልመለሱት አጠቃላይ የብድር ክምችት መጠን 737.9 ሚሊዮን ብር መሆኑን ያስረዱት የባንኩ ፕሬዚዳንት፣ ለእነዚህ ፕሮጀክቶች በተሰጠው ብድር ላይ ብሔራዊ ባንክ ባሳለፈው ውሳኔ መሠረት ድጋሚ ምዝና ተሠርቶ (re-assessment) ከጤናማ ወደ ተበላሽ ብድር ሁኔታ መቀየራቸውን ገልጸዋል።

ድጋሚ በተካሄደው ምዘና ብድሩን የወሰዱት ባለቤቶች ወደ ክልሉ ገብተው ፕሮጀክቶቹን ማስቀጠል የሚችሉበት ሁኔታ አመቺ እንዳልሆነ መረጋገጡንም አስረድተዋል።

‹‹ብድሩን የወሰዱት አብዛኞቹ ባለቤቶች ወደ ክልሉ ገብተው ፕሮጀክቱን ማስቀጠል የሚችሉበት ሁኔታ ምቹ አይደለም፡፡ አንዳንዶቹ ፕሮጀክቶች ደግሞ በሁለቱም በኩል ድንበር ላይ የሚገኙ ናቸው፤›› ሲሉ ዮሐንስ (ዶ/ር) ለምክር ቤቱ ገልጸዋል።

ለእነዚህ ፕሮጀክቶቹ የተሰጠው ብድር የተበላሸ ብድር ተብሎ የተመደበው፣ ‹‹ለእኛ ለጥንቃቄ ሲባል የተወሰነ እንጂ በፕሮጀክቶቹ እንቅስቃሴ (ኦፕሬሽን) ምክንያት የመጣ አይደለም፤›› ብለዋል። 

በትግራይ የሚገኙት 78 ፕሮጀክቶች ብድራቸው ወደ ተበላሸ ብድር እንዲቀየር በመደረጉ፣ የባንኩ አጠቃላይ የተበላሸ ብድር እ.ኤ.አ. መጋቢት 31 ቀን 2024 ከነበረበት 6.8 በመቶ የተወሰነ ጭማሪ ማሳየቱን አስረድተዋል።

ልማት ባንክ ከጥቂት ዓመታት በፊት የነበረበት የተበላሸ ብድር መጠን ከ40 በመቶ በላይ የነበረ ሲሆን፣ ባለፉት ዓመታት በባንኩ ውስጥ በተካሄደው ሰፊ የሪፎርም ሥራ ከተበላሸ የብድር ክምችቱ ውስጥ ሊሰበሰብ የሚችለውን በመሰብሰቡ፣ የተበላሸ ብድር ክምችቱን በከፍተኛ ደረጃ ቀንሷል። ይህንንም ተከትሎ ባንኩ በአሁኑ ወቅት የመክፈያ ጊዜያቸው የደረሰ ብድሮችን ብቻ ወቅቱን ጠብቆ እየሰበሰበ መሆኑን ፕሬዚዳንቱ ተናግረዋል። 

በማሳያነትም በአፍሪካ ለሚገኙ ልማት ባንኮች ከተቀመጠው የ15 በመቶ የተበላሸ ብድር ጥመርታ መሥፈርት አንፃር፣ የልማት ባንክ የተበላሸ ብድር መጠን ሲመዘን አነስተኛ ወይም 7.8 በመቶ ብቻ መሆኑን ገልጸዋል።

ባንኩ በዝናብ ለሚለሙ የግብርና ፕሮጀክቶች በተለይም በጋምቤላና በቤንሻንጉል ጉሙዝ ለሚገኙ እርሻዎች አበድሮ ሊመለስለት ያልቻለው የተከማቸ የተበላሸ ብድር መፍትሔ ቢያገኝ ኖሮ፣ አጠቃላይ የተበላሸ ብድር ክምችቱ ወደ 3.7 በመቶ ሊወርድ እንደሚችልም ጠቁመዋል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች