Saturday, June 22, 2024
- Advertisement -
- Advertisement -
ስፖርትየአዲስ አበባ ስታዲየም ለፕሪሚየር ሊጉ የመጨረሻ ጨዋታዎች አይደርስም ተባለ

የአዲስ አበባ ስታዲየም ለፕሪሚየር ሊጉ የመጨረሻ ጨዋታዎች አይደርስም ተባለ

ቀን:

በዕድሳት ምክንያት ስፖርታዊ ክንውኖችን ማስተናገድ ያቆመው የአዲስ አበባ ስታዲየም፣ በስታዲየሙ ጀኔሬተር አቅም ምክንያት የኢትዮጵያ ፕሪሚየር ሊግ የመጨረሻዎቹ ሳምንታት ጨዋታዎች  እንደማያስተናግድ ታውቋል፡፡

በአዳማና በድሬዳዋ ሲካሄድ ቆይቶ በአሁኑ ወቅት በሐዋሳ ዩኒቨርሲቲ ስታዲየም እየተከናወነ የሚገኘው የፕሪሚየር ሊጉ ጨዋታዎች ማጠቃለያዎቹ በአዲስ አበባ ስታዲየም እንደሚደረጉ ቀደም ሲል መታቀዱ ይታወሳል፡፡

የሊጉ ቀሪ ሦስት ጨዋታዎች ማለትም ከ27ኛ እስከ 30ኛ ሳምንት ያሉት ውድድሮች ከሰኔ 6 ቀን 2016 ዓ.ም. ጀምሮ በዚያው በሐዋሳ ዩኒቨርሲቲ ስታዲየም እንዲቀጥሉ መወሰኑን የኢትዮጵያ ፕሪሚየር ሊግ አክሲዮን ማኅበር ሥራ አስኪያጅ አቶ ክፍሌ ሰይፈ ተናግረዋል፡፡

አንጋፋውና ንጉሠ ነገሥቱ እንዳስገነቡት የሚነገርለት የአዲስ አበባ ስታዲየም፣ ዓለም አቀፉ እግር ኳስ ማኅበር (ፊፋ) ዝቅተኛውን መሥፈርት (ስታንዳርድ) አያሟልም በሚል ማንኛውንም አኅጉራዊና ዓለም አቀፋዊ ውድድሮች ማስተናገድ አይችልም በማለት ከአራት ዓመታት በፊት መታገዱ አይዘነጋም፡፡

ይህንኑ ተከትሎ መንግሥት ስታዲየሙን ለማደስ የሁለት ዓመት ጊዜ ብቻ እንደሚያስፈልገው በወቅቱ ቢገልጽም፣ ሳይጠናቀቅ አራት ድፍን ዓመታትን አስቆጥሯል፡፡ በሜዳ ምክንያት የኢትዮጵያ ብሔራዊ ቡድን ይህ ዘገባ እስከተጠናቀረበት ድረስ ለአፍሪካም ሆነ ለዓለም ዋንጫ ማጣሪያዎች የጎረቤት አገሮችን ሜዳ መጠቀም ግድ ብሎት ቆይቷል፡፡ እስከ ቅርብ ጊዜ ድረስ ለ2026 የዓለም ዋንጫ ማጣሪያ በሜዳው ማድረግ የነበረበትን ጨዋታ ያከናወነው ለጎረቤትም ሆነ ራቅ ላሉት አገሮች እየከፈለ መሆኑ ይታወቃል፡፡

በየዓመቱ የግንባታው የዕድሳት መጠን በመቶኛ እየተሰላ ሲነገርለት የቆየው የአዲስ አበባ ስታዲየም፣ ከወራት በፊት የባህልና ስፖርት ሚኒስትሩ አቶ ቀጀላ መርዳሳና ሌሎች ከፍተኛ ባለሥልጣናት ከጎበኙት በኋላ ጋዜጣዊ መግለጫ ሰጥተው ነበር፡፡ በወቅቱ የኢትዮጵያ ፕሪሚየር ሊግ የመጨረሻዎቹ ሳምንታት ጨዋታዎች ፍጻሜያቸውን የሚያገኙት በዚሁ በአዲስ አበባ ስታዲየም እንደሚሆን ሚኒስትሩ መናገራቸው አይዘነጋም፡፡

ይሁንና ብሔራዊ ቡድኑ ባለበት የዓለም ዋንጫ ማጣሪያ ምክንያት እንዲቋረጥ የተደረገው የኢትዮጵያ ፕሪሚየር ሊግ፣ ቀደም ሲል በተገባው ቃል መሠረት ቀሪዎቹ ጨዋታዎቹ በአዲስ አበባ ስታዲየም እንደማይቀጥሉ ምክንያት የተደረገው የዕድሳቱ ጉዳይ ሳይሆን የስታዲየሙ ጀኔሬተር ለማታ ጨዋታ አቅሙ አይችልም የሚል ነው፡፡

የአዲስ አበባ ስታዲየም ‹‹የሸገር ደርቢ›› በሚል የሚታወቁትን አንጋፋው ቅዱስ ጊዮርጊስና ኢትዮጵያ ቡናን ጨምሮ የበርካታ ክለቦች መገኛ ብትሆንም፣ የከተማዋ ነዋሪዎችም ሆነ የክለቦቹ ደጋፊዎች በከተማዋ የሚደረጉ የእግር ኳስ ጨዋታዎችን ለመመልከት ሳይታደሉ አራት ዓመታትን አስቆጥረዋል፡፡

 ቀጥሎ ደግሞ የጀኔሬተሩ ዕድሳት እንደ ሜዳው ሁሉ በመቶኛ እየተሰላ ሊነገር ይሆን? የሚል ጥያቄ ማጫሩ አልቀረም፡፡

የአዲስ አበባ ስታዲየምን የዕድሳት ጉዳይ በመከታተል፣ ግንባታው የሚገኝበትን ደረጃ እየተከታተለ በማኅበራዊ ትስስር ገጹ አማካይነት ማብራሪያ ሲሰጥ የሚታወቀው የባህልና ስፖርት ሚኒስቴር፣ እስካሁን ባለው ሁኔታ ስታዲየሙ ቀሪ ጨዋታዎችን የማያስተናግድበትን ምክንያት አላሳወቀም፡፡ በጉዳዩ ማብራሪያ ለማግኘት ያደረግነው ጥረትም አልተሳካም፡፡                          

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የንብረት ማስመለስ ረቂቅ አዋጅና የሚስተጋቡ ሥጋቶች

ከሰሞኑ ለሕዝብ ተወካዮች ምክር ቤት የቀረበው የንብረት ማስመለስ ረቂቅ...

የመጨረሻ የተባለው የንግድ ምክር ቤቱ ምርጫና የሚኒስቴሩ ውሳኔ

በአገር አቀፍ ደረጃ ደረጃ የንግድ ኅብረተሰቡን በመወከል የሚጠቀሰው የኢትዮጵያ...

ሚስጥሩ!

ጉዞ ከካዛንቺስ ወደ ስድስት ኪሎ፡፡ የጥንቶቹ አራዶች መናኸሪያ ወዘናዋ...