Wednesday, June 19, 2024
- Advertisement -
- Advertisement -

የተመረጡ ፅሑፎች

ሸማቾች የሚሰቃዩት በዋጋ ንረት ብቻ አይደለም!

የሸማች ችግር ብዙ ነው፡፡ ሸማቾች የሚፈተኑት ባልተገባ የዋጋ ጭማሪ ብቻ አይደለም፡፡ በየጊዜው እየባሰ የመጣው የዋጋ ንረት የሸማቾች ዋነኛ ችግር ተደርጎ የሚወሰድ ቢሆንም፣ ሌሎች በየዕለቱ የሚፈተኑባቸው በርካታ ስንክሳሮች አሉባቸው፡፡ ለሚከፍሉት ገንዘብ ተመጣጣኝ የሆነ አገልግሎት አለማግኘት በራሱ ዘወትር የሚፈተኑበት ጉዳይ ነው፡፡ ሆን ተብሎ እንዲዛቡ በሚደረጉ ዋሾ የልኬት መሣሪያዎች ይቀሸባሉ፡፡ ተመሳስለው በተሠሩ ምርቶች ይታለላሉ፡፡ ለአንዳንድ አገልግሎቶች በሕግ ከተቀመጠው ታሪፍ በላይ በግዳጅ እንዲከፍሉ ይደረጋሉ፡፡

ከባዕድ ነገሮች ጋር ተደባልቀው ለገበያ የሚቀርቡ አንዳንድ ምርቶችን የሚለዩበት መንገድ ስለሌለ ሸምቶ ችግር ውስጥ ይወድቃሉ፡፡ ለጤና መታወክ ይዳረጋሉ፡፡ ጊዜው ያለፈባቸው ምርቶች የአገልግሎት ዘመናቸውን የሚገልጸው መረጃ ተሰርዞ ጊዜው እንዳላለፈበት በማስመሰል የሚቀርቡ ምርቶች ሸማቾች ከሚጎዱባቸው ድርጊቶች መካከል የሚጠቀስ ነው፡፡ እንዲህ እያሉ በየዕለቱ ሸማቹን ለጉዳት የሚዳርጉ በርካታ ጉዳዮችን መዘርዘር ይቻላል፡፡

በተለይ ግን የታሸጉ ምግብና መጠጥ ነክ ምርቶች ደግሞ የበለጠ ጥንቃቄ የሚያሻቸውና ከሌሎች ምርቶች በተለየ ጥራትና ደረጃቸውን ስለመጠበቃቸው ማረጋገጥ ካልተቻለ ጉዳታቸው የከፋ ይሆናል፡፡ አስገዳጅ ደረጃዎች ሊወጣላቸውና የሚወጥቱትም ደረጃዎች በአግባቡ እንዲተገበር የግድ ያስፈልጋል፡፡ ለእነዚህ ምርቶች የሚወጡ ደረጃዎች በትክክል ስለመተግበራቸውና ተከታታይ ቁጥጥር እየተደረገባቸው ካልሆነም ደረጃ ማውጣቱ ብቻ ትርጉም አይኖረውም፡፡ 

መንግሥት አስገዳጅ ደረጃ ያስፈልጋቸዋል ላላቸው ምርቶች በየጊዜው ደረጃ እንደሚያወጣ የሚጠበቅበት የደረጃዎች ኤጀንሲ የሚያወጣቸው መረጃዎች ቢኖሩም የዚያኑ ያህል አስገዳጅ ደረጃ የሚያስፈልጋቸው ምርቶች ገበያ ውስጥ እንደ ልብ ይቸበችባሉ፡፡ 

በተለይ አንዳንድ ምርቶች በአስቸኳይ ደረጃ ሊወጣላቸው ካልተቻለ ሸማቹ ላይ የሚያደርሱት ጉዳት ከፍተኛ መሆኑ የማያጠያይቅ በመሆኑ ደረጃ የወጣላቸውን ከመቆጣጠር ባሻገር አስገዳጅ ደረጃዎች የሚያስፈልጋቸውን እየለዩ አስገዳጅ ደረጃውን ማውጣት ያስፈልጋል፡፡ ይህንንም ለሸማቹ በተገቢው መንገድ በማሳወቅ በሸመታ ወቅት እንዳይታለል መረጃ መስጠትም የሥራው አንድ አካል መሆን ይገባዋል፡፡

ከዚህ አንፃር ከታሸገ ውኃ ጋር በተያያዘ እየታየ ያለን አንድ ችግር በአስረጂነት ማቅረብ ያስፈልጋል፡፡ በአገራችን የታሸጉ ውኃዎች አስገዳጅ ደረጃ አላቸው፡፡ በዚሁ ደረጃ ልክ ይሠራሉ ተብሎም ይጠበቃል፡፡ ነገር ግን በተለምዶ ‹‹ጃር›› የምንለው ወይም በአብዛኛው በሃያ ሊትር ታሽጎ የሚሸጠው ውኃ ጉዳይ ግን በተለየ ሊታይ የሚገባው ሆኖ አግኝቼዋለሁ፡፡ ሃያ ሊትር በሚይዙ የፕላስቲክ መያዣዎች ታሽገው የሚሸጥ ውኃ በግማሽ፣ በአንድ ሊትርና በሁለት ሊትር ከሚሸጡት የታሸጉ ውኃዎች የሚለይበት መሠረታዊ ጉዳይ የመያዣ ዕቃው በተደጋጋሚ አገልግሎት ላይ የሚውል ስለሆነ የተለየ ነው፡፡ የጃር ውኃ ተጠቃሚዎች ውኃውን የሚገዙት ባዶውን መያዣ በመለወጥ ነው፡፡ አንድ የጃር ውኃ በተደጋጋሚ ሥራ ላይ መዋሉ ደግሞ መያዣ ፕላስቲኩ ጉስቁልና የሚታይበት ያደርገዋል፡፡ ይህም በመሆኑ አንዳንዱ የፕላስቲክ መያዣው ውጫዊ ገጽታ የሚጠጣ ውኃ የያዘ አይመስልም፡፡ እንኳን ይህ ብቻ አይደለም የአንዳንድ የጃር ውኃዎች አስተሻሸግ በትክክል በፋብሪካ የተሞሉ መሆናቸውን እንኳን እንድንጠራጠር የሚያደርጉትን ነገሮች አሉ፡፡ ፍሳሽ ይታይባቸዋል፡፡ ፍሳሹ ከፕላስቲክ አናት ማያዣው ላይ ወይም ከሥር ሊሆን ይችላል፡፡ በአንዱ ፋብሪካ ጃር ሌላው መጠቀም መቻል አለመቻሉን ለማወቅ ቢያስቸግርም በእነዚህ ፕላስቲክ መያዣዎች ላይ የተያዩ ፋብሪካዎች ዓርማና ማስታወቂያ ተደራርበው የመለጠፋቸውም ነገር በራሱ ጥያቄ የሚያስነሳ ነው፡፡ እንዲህ ያሉ ሁኔታዎች ምናልባት በሕገወጥ መንገድ ታሽገው ሊቀርቡ ሊሆኑ ይችላሉ የሚለውን እምነት ሊያጠናክር ይችላል፡፡ በሌላ በኩል ደግሞ ይህ መያዣ በተደጋጋሚ ጥቅም ላይ የሚውል በመሆኑ እርጅና ተጭኖት ተበስቶ ውኃው እንዲፈስ ሊያደርግ እንደሚችልም ይታመናል፡፡ 

በሁለቱም ምክንያት ቢሆን የሚያፈስ መያዣ ከውጭ ቆሻሻ የሚስብና ውኃውን በቀላሉ እንዲበከል የሚያደርግበት ዕድል ሰፊ ነው፡፡ ስለዚህ የጃር ውኃ በአንድም ወይም በሌላ መንገድ በቀላሉ አደጋ ሊያስከትል የሚችልበት ዕድል ስላለ የዚህ ውኃ አመራረት፣ አስተሻሸግና መያዣውን መልሶ መጠቀም የሚችልበትን አሠራር መዘርጋት ይገባል ማለት ነው፡፡ አንዱ መፍትሔ አንድ ጃር ቢሞላስ ምን ያህል ጊዜ መሥራት እንዳለበት አስገዳጅ ደረጃ ማስቀመጥ አንዱ መፍትሔ ይሆናል፡፡ 

ብዙ ሸማቾች ይህንን ውኃ የሚጠቀሙ ከመሆኑ አንፃር የጃር ውኃ አስተሻሸጉ ጀምሮ ደረጃ ሊወጣለት የሚገባው ብዙ ጊዜ የሚያፈስ መያዣ ስለሚያግጥም ብቻ አይደለም፡፡ አሁን እንደሚሰማው የጃር ውኃ የሚያመርቱ ፋብሪካዎች 20 ሊትር ለሚይዘው የፕላስቲክ መያዣ የሚሆን ትክክለኛ ማጠቢያ የላቸውም ስለሚባል ነው ይህ እውነት ከሆነ የጃር ውኃ እንዲያመርቱ ሊፈቀድላቸው አይገባም ነበር ማለት ነው፡፡ ስለዚህ ይህንን ውኃ ለማምረት አንዲ አስገዳጅ ደረጃ ወይም መመዘኛ ለዕቃው ማጠቢያ ይኑራችሁ የሚል ይሆናል፡፡ ኩባንያዎቹም ቢሆኑ ለራሳቸው ሲሉ ይህንን ማድረግ ይኖርባቸዋል፡፡ 

አንዳንድ ምርቶች ደግሞ የውኃ አምራቹን ምልክትና ለሎች መረጃዎችን የያዘው ወረቀት መያዣው ላይ ሲለጥፉ የምናየውም ነገር ጥያቄ እንድናነሳ ያደርጋል፡፡ ይህም ቀድሞ የነበረው ወረቀት ሳይነሳ ሌላ ወረቀት ራሱ ላይ ይደረጋል፡፡ ይህ ለምን እንደሚደረግ ግራ የሚያጋባ ነው፡፡ 

ከዚህ ጋር ተያይዞ በአንደኛው ኩባንያ ላይ የሌላ ኩባንያ ዓርማ መለጠፋስ ያስፈለገበት ምክንያት ምንድነው? በስምምነት የሚደረግም ይሁን አይሁን የሌላው ኩባንያ ዓርማ ሳይነሳ የሌላ ኩባንያ ዓርማ መለጠፋ በራሱ የሚያሳየን የመያዣው ዕቃ በአግባቡ ያልተፀዳ መሆኑ ጭምር ነው፡፡ በአግባቡ ቢታጠብ ቀድሞ የነበረው ወረቀት ይላቀቃል፡፡ ስለዚህ የምርቱን ስያሜ የያዘው ወረቀት ሙሉ ለሙሉ ተወግዶ በአዲስ ይተካ ነበር፡፡ ስለዚህ እንዲህ ያሉም ሁኔታዎች ስለሚታዩ የጃር ውኃዎች በፋብሪካ ተሞልተው የሚወጡ ናቸው ወይ? ብለን ለመጠየቅ የምንገደደውና አስቸኳይ መፍትሐ ያስፈልገዋል የምንለው፡፡ 

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት