Monday, June 17, 2024

ለዘመኑ በማይመጥን ዕሳቤ አገር ማተራመስ ይብቃ!

ዘመኑ እጅግ ድንቅ የሚባሉ የሥልጣኔ ትሩፋቶችን በረቀቁ ቴክኖሎጂዎች እያቋደሰ ነው፡፡ ለልማትና ለዕድገት የሚማስኑ የኑሮን ጫና ቀለል የሚያደርጉ ቴክኖሎጂዎችን በብዛትና በስፋት ሲጠቀሙ፣ ያላደላቸው ደግሞ እርስ በርስ የሚያባሉና የሚያፋጁ ቴክኖሎጂዎችን ያግበሰብሳሉ፡፡ አሜሪካም ሆነች ጀርመን፣ ቻይናም ሆነች ቱርክ፣ ደቡብ ኮሪያም ሆነች እንግሊዝ ለሸማች አገሮች እንደ አቅማቸውና ፍላጎታቸው የተፈበረኩ የቴክኖሎጂ ምርቶችን በስፋት እያቀረቡ ፉክክራቸውን እያጧጧፉት ነው፡፡ በዚህ ፈጣን ዘመን ያለቀለት ምርት ተቀባይ ከመሆን ይልቅ፣ አምራች ሆኖ የገበያውን በረከት መቋደስ የሚቻለው ለፉክክሩ ቅርብ በመሆን ነው፡፡ እንደ ኢትዮጵያ ያሉ በወጣት የሰው ኃይል የታደሉ አገሮች ያላቸው ተስፋ፣ ውስጣዊ ችግሮቻቸውን በሠለጠነ መንገድ ፈተው ለዘመኑ የሚመጥን ቁመና መያዝ ነው፡፡ ኢትዮጵያውያን ለበርካታ ዓመታት ከተዘፈቁበት ድህነት ውስጥ ለመውጣት አቋራጩ መንገድ ሰላም ብቻ ነው፡፡

ከተሞች በተዋቡ ሕንፃዎችና መንገዶች ቢያጌጡ፣ በሚያጥበረብር ብርሃን ቀንና ሌሊታቸውን መለየት ቢያቅት፣ መናፈሻዎችና ፓርኮች በየቦታው ቢሰደሩና ለዓይን ማራኪ ዕይታዎች ቢበዙ ኢኮኖሚውን የሚደግፍ ግዙፍ ገቢ አመንጪ መሆን ይጠበቅባቸዋል፡፡ ግብርናው በተለያዩ የእህል ሰብሎች፣ ጥራጥሬዎች፣ የቅባት እህሎች፣ አትክልትና ፍራፍሬዎች፣ ዶሮዎች፣ በጎች፣ ፍየሎች፣ ላሞች፣ በሬዎች፣ ግመሎች፣ ወተት፣ ቅቤ፣ ዓይብ፣ ወዘተ ምርቶች ተጥለቅልቆ ለአገርና ለውጭ ገበያዎች መትረፍረፍ አለበት፡፡ ኢንዱስትሪው ተኪ ምርቶችን በብዛት በማምረት ከጎረቤት እስከ ሩቅ አገሮች ድረስ በስፋት ማዳረስ ይኖርበታል፡፡ በትምህርት፣ በጤና፣ በትራንስፖርት፣ በሪል ስቴትና በሌሎችም ዘርፎች አስደናቂ እመርታ ማሳየት የግድ መሆን አለበት፡፡ የልማቱና የዕድገቱ መነሻና መድረሻ ድህነትን ከመቅረፍ በዘለለ አስተማማኝ የሆነ ሀብት ፈጣሪ ሊሆን ይገባዋል፡፡ እነዚህን ምኞቶች ለማሳካት ግን በእኩልነትና በመከባበር ላይ የተመሠረተ የጋራ ራዕይ ያስፈልጋል፡፡

በዚህ ዘመን በዓለማችን ከፍተኛ የዕድገት ግስጋሴ ከሚያሳዩ አገሮች በግንባር ቀደምትነት የምትወሳው ቻይና ናት፡፡ ቻይና ከአሜሪካ በመቀጠል የዓለም ኢኮኖሚ ቁጥር ሁለት የነበረችውን ጃፓን ቦታ ካስለቀቀች ቅርብ ዓመታት ቢሆኑም፣ ተፅዕኖ ፈጣሪነቷ ግን ከጊዜ ወደ ጊዜ በፍጥነት እየተመነደገ ነው፡፡ አሜሪካና ብርቱ የሚባሉትን የአውሮፓ አገሮች በብዙ መስኮች ከመገዳደር አልፋ፣ በወታደራዊ አቅሟም እጅግ አስፈሪ የሚባል ደረጃ ላይ እየደረሰች ነው፡፡ ግማሽ ክፍለ ዘመን በማይሞላ ጊዜ ውስጥ የተገኘው ይህ ሁሉን አቀፍ ጥንካሬ፣ በከፍተኛ ዕቅድና በጥብቅ ዲሲፕሊን ላይ የተመሠረተ ለመሆኑ ምንም አያጠራጥርም፡፡ ለዚህ ስኬት ደግሞ አገሪቱን ከሚመሩት ልሂቃን እስከ ተርታው ሕዝብ ድረስ፣ ለአገር ልማትና ዕድገት በጋራ መቆም የማይደራደሩበት ስለነበረ ነው፡፡ እንደ ምዕራባውያን ፕሮፓጋንዳ ቢሆን ኖሮ ግን ውጤቱ ተቃራኒ ይሆን ነበር፡፡

የኢትዮጵያ ጉዳይ በዚህ መጠነኛ ማሳያ ላይ በመመሥረት ሲጤን እጅግ አድካሚ ቢመስልም፣ በከፍተኛ ትዕግሥትና አርቆ አሳቢነት ሰከን ማለት ከተቻለ የማይፈቱ ችግሮች አይኖሩም፡፡ ለአገር አንድነትና ህልውና ተባብሮ መቆም ከጥንትም የነበረ አኩሪ ባህል በመሆኑ፣ በመናኛ ሰበቦች የተፈጠሩም ሆኑ የሚፈጠሩ መገፋፋቶች ከኩርፊያ በላይ የሚዘሉ መሆን የለባቸውም፡፡ ኩርፊያና ቅያሜው ሲያልፍ ለአገር በአንድነት ተሠልፎ የውጭ ጠላትን ማባረር የሚያስችል አኩሪና ዘመን ተሻጋሪ እሴት ባላት ኢትዮጵያ ውስጥ፣ ቢያንስ በደም ፍላት እየተነሳሱ በመታኮስ ሕዝብ ማሸበርና አገር ማተራመስ ማቆም ሊያቅት አይገባም፡፡ ባዕዳን ‹ማንም አሸናፊ የማይሆንበት የጦር ሜዳ ፍልሚያ…› እያሉ የንግግርና የድርድር አስፈላጊነትን ሲለፍፉ፣ አገር በቀል የጋራ መታወቂያ የሆኑ የግጭት አፈታት ሥልቶችን መናቅ ለማንም አይጠቅምም፡፡ ዘመኑ ለደረሰበት ዕድገትም አይመጥንም፡፡

ኢትዮጵያውያን በዓለም አደባባይ በኩራት አንገታቸውን ቀና አድርገው መራመድ የሚችሉት ጦርነትን ለአንዴና ለመጨረሻ ጊዜ ሲያስቆሙ፣ ለልማትና ለዕድገት እጅ ለእጅ ተያይዘው ሲነሱ፣ በመከባበርና በእኩልነት ስሜት በብሔራዊ ጉዳዮቻቸው ላይ በጋራ ሲመክሩ፣ ለሰብዓዊና ለዴሞክራሲያዊ መብቶች መጣስ ምክንያት የሚሆኑ ብልሹ ድርጊቶችን በቁርጠኝነት ሲያስወግዱ፣ ሌብነትና ዝርፊያን ያለ ምንም ሰበብ በጥንካሬ ሲታገሉ፣ ለድህነትና ለተመፅዋችነት ምክንያት የሚሆኑ ሰው ሠራሽና የተፈጥሮ ችግሮችን በትብብር ሲቀርፉና የመሳሰሉትን በተግባር ሲያሳዩ ነው፡፡ ከዚያ ውጪ ጽልመት የመሰለ ገጽታ ተላብሶ ለመብለጭለጭ ማሰብም ሆነ መሞከር አያዋጣም፡፡ ለዚህም ነው ከመንግሥት ጀምሮ የአገር ጉዳይ በቀጥታም ሆነ በተዘዋዋሪ የሚመለከታቸው በሙሉ፣ ኢትዮጵያን ከአውዳሚ ጦርነትና ከከንቱ ትርክቶች በማፅዳት ወደ ሥልጣኔ ጎዳና የማስገባት ኃላፊነት የሚኖርባቸው፡፡ በግዥና በእርጥባን በሚገኝ የቴክኖሎጂ በረከት መኩራራት ዘለቄታዊ ዕድገት አያስገኝም፡፡

ኢትዮጵያ ምንም ሳይጎድልባት ለዘመናት የድህነት መጫወቻ የሆነችው ስክነት፣ ትዕግሥት፣ አርቆ አሳቢነት፣ ትህትና፣ ቅንነት፣ መከባበርና መተሳሰብ የዘወትር ተግባሩ የሆነው በአራቱም ማዕዘናት የሚገኘው ጨዋ ሕዝቧ በፖለቲካ ልሂቃኑ በመናቁ ነው ቢባል ማጋነን አይሆንም፡፡ ይህንን የመሰለ ሕግ አክባሪ፣ ሃይማኖተኛና አገሩን አፍቃሪ ሕዝብ ፍላጎቱና ምኞቱ እየታወቀ አየሩን የሞሉት ግን ኃላፊነት የማይሰማቸውና ስግብግቦች ናቸው፡፡ ለወጣቱ ትውልድ አርዓያ መሆን የሚገባቸው በአፍቅሮተ ሥልጣንና ነዋይ ሰክረው ጦር ሲነቀንቁና ጎራዴ ሲመዙ እንጂ፣ አንድም ቀን በታሪክም ሆነ በመጪው ትውልድ መጠየቅ እንዳለ ማስታወስ አይፈልጉም፡፡ እንዲህ ዓይነቶቹ እነሱንና ቢጤዎቻቸውን እስከተስማማቸው ድረስ የሕዝብ ማለቅ፣ መፈናቀልና የአገር ሀብት መውደም ደንታቸው አይደለም፡፡ ከጦርነት ውስጥ መውጣትም አይፈልጉም፡፡ ለዘመኑ በማይመጥን ዕሳቤ አገር ማተራመስ ይብቃ!    

በብዛት የተነበቡ ፅሁፎች

- Advertisment -

ትኩስ ፅሁፎች

የምግብ ዋጋ ንረት አጣዳፊ ዕርምጃ ያስፈልገዋል!

መንግሥት የሚቀጥለውን ዓመት በጀት ይዞ ሲቀርብ በአንገብጋቢነት ከሚነሱ ጉዳዮች...

ከባለአንድ ዋልታ ወደ ባለብዙ ዋልታ የዓለም ሥርዓት የመሸጋገራችን እውነታ

በአብዱ ሻሎ አንገት ማስገቢያ እ.ኤ.አ. በፌብሩዋሪ 2022 የሩሲያ መንግሥት በዩክሬን ‹‹ልዩ...

የኢትዮጵያ ኦርቶዶክስ ተዋሕዶ ቤተ ክርስቲያን የውጭ ግንኙነት የሺሕ ዘመናት ታሪኳና እሴቶቿን የሚመጥን መሆን ይኖርበታል

(ክፍል አንድ) በተረፈ ወርቁ (ዲ/ን) እንደ መንደርደሪያ ለዛሬው የግል ትዝብቴንና ታሪክን ላዛነቀው...

ከአገር ግንባታ ጋር የተያያዙ ወሳኝ የቅርብ ታሪካችን አንጓዎች

በታደሰ ሻንቆ በአያሌው የተመረጡና ልጥ የሌላቸው ነጥቦች የተደራጁበት ይህ ታሪክ...
spot_img

ተዛማጅ ፅሁፎች

የምግብ ዋጋ ንረት አጣዳፊ ዕርምጃ ያስፈልገዋል!

መንግሥት የሚቀጥለውን ዓመት በጀት ይዞ ሲቀርብ በአንገብጋቢነት ከሚነሱ ጉዳዮች መካከል አንዱ፣ የዋጋ ንረትን ለመቀነስ ምን ታስቧል የሚለው ጥያቄ ነው፡፡ በጀት ለተለያዩ መንግሥታዊ ወጪዎች ሲደለደል...

ባለሥልጣናት የሚቀስሙት ልምድ በጥናት ይታገዝ!

ሰሞኑን በጠቅላይ ሚኒስትር ዓብይ አህመድ (ዶ/ር) የተመራ የከፍተኛ የመንግሥት ባለሥልጣናት ልዑክ፣ ከሲንጋፖር ጉብኝት መልስ በሁለት ክፍሎች በቴሌቪዥን የተገኘውን ልምድ በተመለከተ ሰፊ ማብራሪያ ሰጥቷል፡፡ ለአገር...

የዘመኑ ትውልድ ለአገሩ ያለውን ፋይዳ ይመርምር!

በዚህ በሠለጠነ ዘመን ኢትዮጵያን የሚያስፈልጓት ብዙ ነገሮች አሉ፡፡ ከብዙዎቹ በጣም ጥቂቱን አንስተን ብንነጋገርባቸው ይጠቅሙ ይሆናል እንጂ አይጎዱም፡፡ ኢትዮጵያም ሆነች ብዙኃኑ ሕዝቧ ያስፈልጓቸዋል ተብለው ከሚታሰቡ...