Monday, June 17, 2024
- ማስታወቂያ -
- ማስታወቂያ -

የአውሮፕላን ጥገና ፈቃድ ለግል አየር መንገድ ለመጀመርያ ጊዜ ተሰጠ

spot_img

ተዛማጅ ፅሁፎች

የኢትዮጵያ ሲቪል አቪዬሽን ባለሥልጣን ለመጀመርያ ጊዜ ዋን ኤምአርኦ ለተሰኘ የግል ኩባንያ በግሉ ዘርፍ የመጀመሪያ የሆነውን የአውሮፕላን ጥገና ፈቃድ ሰጠ፡፡

ዋን ኤምአርኦ ኩባንያ ፈቃድ ያገኘበት የአውሮፕላን ጥገና (Maintenance, Repair and Operation) አገልግሎት፣ በኢትዮጵያ አየር መንገድ ብቻ ሲሰጥ የነበረ ሲሆን፣ አየር መንገዱ ለግል የበረራ አየር መንገዶችም የጥገና አገልግሎት አቅራቢ ነው፡፡

የአውሮፕላን ጥገና አገልግሎቱ በአየር መንገዱ ራሱን የቻለ ክፍል ሲኖረው፣ ለሌሎች አየር መንገዶች የሞተር ጥገና፣ የአውሮፕላን አካል ክፍሎች ጥገናና የምህንድስና ማሻሻያዎች በማድረግ ይታወቃል፡፡

በሲቪል አቪዬሽን ባለሥልጣን የአውሮፕላን ምዝገባና የበረራ ብቃት ማረጋገጫ ዳይሬክተር አቶ ዮናስ ታደሰ፣ ኩባንያው የወሰደው ፈቃድ አውሮፕላኑ ካረፈ በኋላ መንገደኞች የሚሳፈሩበት ቦታ እንደቆመ አነስተኛ የጥገና ሥራዎች ላይ ሜንተናንስ ማከናወን የሚያስችል መሆኑን ለሪፖርተር ገልጸዋል፡፡

ዋን ኤምአርኦ የአውሮፕላን ጥገና ፈቃድ ለማግኘት የመጀመሪያው የግል ኩባንያ ቢሆንም፣ በዘርፉ ፈቃድ ለማግኘት ለባለሥልጣኑ ጥያቄ አቅርበው በሒደት ላይ ያሉ ሦስት ኩባንያዎች መኖራቸውንም አቶ ዮናስ አስረድተዋል፡፡

በሌላ በኩል አክሱም አቪዬሽንና ኖርዝ ስታር አቪዬሽን የአየር መንገድ አገልግሎት መስጠት የሚያስችል የኢንቨስትመንት ፈቃድ በመውሰድ፣ የንግድ ምዝገባ እንዳከናወኑ ተመላክቷል፡፡ ለሁለቱ ኩባንያዎች የተሰጠው ፈቃድ የአቪዬሽን አካዳሚ ማቋቋምን የሚጨምር መሆኑ ተጠቁሟል፡፡ 

የሲቪል አቪዬሽን ባለሥልጣን ለሠራተኞቹ ባቀረበውና ሪፖርተር በተመለከተው የዘጠኝ ወራት ሪፖርት፣ የተቋማትን ቁጥር ከአንድ ወደ ሦስት ለማሳደግ በያዘው ዕቅድ መሠረት መሆኑን አስቀምጧል፡፡ በተጨማሪም የአየር መንገድ አገልግሎት የሚሰጡ ተቋማትን ቁጥር ከአሥራ ሁለት ወደ አሥራ ስድስት ለማሳደግ ውጥን ይዞ እንደነበር በሪፖርቱ ተመላክቷል፡፡

አክሱም አቪዬሽን ባለቤትነቱ የአቶ ዳዊት ገብረ አግዚአብሔር እንደሆነ ሪፖርተር ስማቸው እንዲጠቀስ ካልፈለጉ የመረጃ ምንጮቹ የተረዳ ሲሆን፣ ኩባንያው መቀመጫውን ናይጄሪያ ማድረጉን ለማወቅ ተችሏል፡፡ አቶ ዳዊት በ1980ዎቹ መጨረሻ አካባቢ የጎሽ ኤር ባለቤት ነበሩ፡፡

ቢጂአይ ኢትዮጵያ ወደ ራሱ የጠቀለለው ራያ ቢራን ካቋቋሙ ባለሀብቶች መካከልም ስማቸው የሚነሳ ሲሆን፣ በወርቅ ንግድ፣ እንዲሁም የኤችአይቪ መመርመሪያ መሣሪያ ማስመጣትን ጨምሮ በበርካታ የንግድና የኢንቨስትመንት ሥራዎች ይሳተፋሉ፡፡

የአየር መንገድ አገልግሎት መስጠት የሚያስችል ፈቃድ የወሰደው ኖርዝ ስታር አቪዬሽንን ለማቋቋም የሰሜን ኢትዮጵያ ጦርነት ከመቀስቀሱ በፊት እንቅስቃሴዎች ሲደረጉ መቆየታቸው አይዘነጋም፡፡ መሠረቱን በትግራይ ክልል ያደረገው ኩባንያው በ3.8 ቢሊዮን ብር ካፒታል የመንገዶችና የጭነት አገልግሎት፣ የአቪዬሽን ማሠልጠኛና የጥገና አገልግሎት ለመስጠት ታስቦ የምሥረታ እንቅስቃሴ መጀመሩ ይታወሳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች