Wednesday, June 19, 2024
- ማስታወቂያ -
- ማስታወቂያ -

ግብርና ሚኒስቴር የጥጥ ምርት አፈጻጸሜ ዝቅተኛ ነው አለ

spot_img

ተዛማጅ ፅሁፎች

የግብርና ሚኒስቴር በሁሉም ምርቶች የተሻለ ውጤት ቢያስመዘግብም፣ የጥጥ ምርት አፈጻጸሙ ግን ከዓምናው ጋር ሲነፃፀር በጣም ዝቅተኛ መሆኑን አስታወቀ፡፡

ሚኒስቴሩ ይህንን የገለጸው የ2016 በጀት ዓመት የአሥር ወራት ዕቅድ አፈጻጸምና ቀጣይ ሥራዎችን በተመለከተ፣ ከክልል ግብርና ቢሮ ኃላፊዎች ጋር ማክሰኞ ግንቦት 13 ቀን 2016 ዓ.ም. ውይይት ሲያደርግ ነው፡፡

የውይይት መነሻ ጽሑፍ ያቀረቡት የሚኒስትሩ የስትራቴጂክ ጉዳዮች ሥራ አስፈጻሚ አቶ ሙሉጌታ ሥዩም እንደገለጹት፣ ዘንድሮ የጥጥ ምርት በሚመረትባቸው አካባቢዎች የፀጥታ ችግር ስላለ በቂ ምርት ማግኘት አልተቻለም፡፡

በመኸር 40 ሺሕ ሔክታር መሬት ለማልማት ዕቅድ እንደበር፣ ነገር ግን 21 ሺሕ ሔክታር በማልማት 53 በመቶ ማሳካት እንደተቻለ ገልጸዋል፡፡

ከዚህ በፊት የተሻለ የጥጥ ምርት ይገኝ እንደነበር የገለጹት ሥራ አስፈጻሚው፣ በአብዛኛው ለንግድ ልማት የተላለፉ መሬቶችን በአግባብ መጠቀም ባለመቻሉ ምርቱ መቀነሱን ተናግረዋል፡፡

በመካከለኛና በሰፋፊ እርሻዎች ከመኸር የሆሊቲካልቸር የመሬት ሽፋን የተገኘው ምርት አፈጻጸም ዝቅተኛ እንደሆነ ጠቅሰው፣ ይህም የሆነበት ዋነኛ ምክንያት ሰፋፊ መሬት ያሉባቸው አካባቢዎች በፀጥታ ችግር ውስጥ የሚገኙ በመሆናቸው እንደሆነ አስረድተዋል፡፡

ጥጥ ለማምረት ከፍተኛ የሰው ኃይል እንደሚያስፈልግ የተናገሩት ሥራ አስፈጻሚው ከዚህ በፊት የጥጥ ልማት ሥራን የሚከታተለው የኢንዱስትሪ ሚኒስቴር እንደነበርና ዘንድሮ በግብርና ሚኒስቴር ሥር መካተቱን ለሪፖርተር አስረድተዋል፡፡

ሚኒስቴሩ አብዛኞቹን የግብርና ሥራዎች ከዕቅድ በላይ ማሳካቱን ጠቅሰው፣ የሆሊቲካልቸርም ሆነ የሰብል ምርቶች በከፍተኛ ሁኔታ በመጨመራቸው የማኅበረሰቡን የአቅርቦት ፍላጎት በተወሰነ ደረጃ ማሟላት እንደተቻለ አብራርተዋል፡፡

በ2015/16 ዓ.ም. የመኸር ወቅት በኩታ ገጠም በሰብልና በሆሊቲካልቸር የተሸፈነው መሬት አፈጻጸም ካለፈው ዓመት ጋር ሲነፃፀር 44 በመቶ ማሳካት እንደተቻለ፣ ከዓምና ጋር ሲታይ ደግሞ በዘጠኝ በመቶ ብልጫ እንዳለው ጠቁመዋል፡፡

በተለይ ከ2012/15 ዓ.ም. በጀት ዓመታዊ የግብርና ዘርፍ ዕድገት እየጨመረ መምጣቱን ገልጸው፣ በአጠቃላይ 774 ቢሊዮን ብር በግብርና ብቻ ገቢ መገኘቱንና ይህንንም የፕላንና ልማት ሚኒስቴር ያዘጋጀው የስታትስቲክስ መረጃ እንደሚያሳይ ተናግረዋል፡፡

የግብርና ሚኒስቴር የ2016 ዓ.ም. የስድስት ወራት ዕቅድ አፈጻጸም በአርባ ምንጭ ግምገማ ባካሄደበት ወቅት በቀጣይ የትኩረት አቅጣጫዎች መደረግ ካለባቸው ጉዳዮች መካከል፣ ወቅታዊ የመስኖ ስንዴ ምርት ማሳደግ አንዱ ነበር ያሉት የግብርና ሚኒስትሩ ግርማ አመንቴ (ዶ/ር) ናቸው፡፡

በዚህ መሠረት ሦስት ሚሊዮን ሔክታር የመስኖ ስንዴ ለማልማት ታቅዶ 2.97 ሚሊዮን ሔክታር ወይም 99 በመቶ ማሳካት መቻሉን አስረድተዋል፡፡

በአሁኑ ወቅት ይህ የመስኖ ስንዴ ምርት እየተሰበሰበ እንደሆነ የገለጹት ሚኒስትሩ፣ እስካለፈው ሳምንት ድረስ ከ90 ሚሊዮን ኩንታል በላይ ምርት መሰብሰቡን ተናግረዋል፡፡

በአጠቃላይ 120 ሚሊዮን ኩንታል ለመሰብሰብ ዕቅድ መያዙን ገልጸው፣ ባለፈው ዓመትም ከመስኖ ስንዴ የተገኘው ምርት 48 ሚሊዮን ኩንታል እንደሆነና ዘንድሮ ከፍተኛ የሆነ የምርት ጭማሪ ማሳየቱን አክለዋል፡፡

ዘንድሮ በበልግ 3.1 ሚሊዮን ሔክታር መሬት ለመሸፈን ታቅዶ እስካሁን 2.9 ሚሊዮን ሔክታር በዘር የተሸፈነ መሆኑን በማስረዳት፣ አንዳንድ ያልተጠቃለሉ ሪፖርቶች ሲጨመሩ የታቀደውን ዕቅድ ሙሉ ለሙሉ የሚሳካበት ሁኔታ ይፈጠራል ብለዋል፡፡

‹‹በሌላ በኩል ከሌማት ትሩፋት አኳያ በግብዓት አቅርቦትም ሆነ በምርት ከዕቅዳችን በላይ አፈጻጸም የታየበት ነው፤›› ያሉት ሚኒስትሩ፣ ለአብነት ባለፈው ዓመት 42 ሚሊዮን የዶሮ ጫጩቶች መቅረባቸውን፣ ዘንድሮም በዘጠኝ ወራት ውስጥ 50 ሚሊዮን ጫጩቶች ለማቅረብ ታቅዶ 57 ሚሊዮን ማቅረብ መቻሉን ጠቁመዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች