Wednesday, June 19, 2024
- ማስታወቂያ -
- ማስታወቂያ -

በኅብረት ሥራ ማኅበራት ላይ በተደረገ ኦዲት 464 ሚሊዮን ብር ጉደለት ተገኘ

spot_img

ተዛማጅ ፅሁፎች

የኢትዮጵያ ኅብረት ሥራ ኮሚሽን በ13,653 ማኅበራት ላይ ባደረገው ኦዲት፣ 464,207,400 ብር ጉድለት መገኘቱ ተገለጸ፡፡

በሕዝብ ተወካዮች ምክር ቤት የግብርና ጉዳዮች ቋሚ ኮሚቴ የግብርና ሚኒስቴርን የ2016 በጀት ዓመት የዘጠኝ ወራት የዕቅድ አፈጻጸም ባለፈው ሳምንት ሲገመገም፣ ከቋሚ ኮሚቴ አባላት በተነሳ ጥያቄ መሠረት በ13,653 ማኅበራት ላይ በተደረገው ኦዲት የተጠቀሰው መጠን ጉድለት በመገኘቱ በቀጣይ ምን ለማድረግ እንደታሰበ ጥያቄ ቀርቧል፡፡

የኮሚሽኑ ምክትል ኮሚሽነር አቶ ሺሰማ ገብረ ሥላሴ የቋሚ ኮሚቴው ጥያቄ እውነት መሆኑን በመግለጽ፣ ኮሚሽኑ እያደረገ ለሚገኘው የሪፎርም ሥራ እንዲያግዝ ሥጋት ያለባቸውን ማኅበራት በመለየት ኦዲት ተሠርቷል ብለዋል፡፡

በተደረገው ኦዲት መሠረትም መሠረታዊ ማኅበራት የሚባሉት 348,101,838 ብር፣ ዩኒየኖች 116,105,534 ብር እንዲሁም ፌዴሬሽን የሚባሉት ደግሞ 28 ሚሊዮን ብር ጉድለት እንደተገኘባቸውና ኦዲቱም እንደሚቀጥል አስረድተዋል፡፡

የሪፎርም ሥራው ከተጀመረ ጊዜ አንስቶ ከማኅበራቱ የተመለሰ ገንዘብ 1.33 ቢሊዮን ብር የተገኘ ቢሆንም፣ ከ96.5 ሚሊዮን ብር በላይ ለብክነት ተዳርጓል ብለዋል፡፡

በሪፎርሙ መሠረት ማኅበራቱ የመዋሀድና የመክሰም ሒደት ላይ በመሆናቸው፣ የኦዲት ‹‹አውትሶርስ መመርያ›› እንዲጠቀሙ እየተደረገ መሆኑን ገልጸዋል፡፡

ሪፎርም የሚደረግበት ምክንያት የኅብረት ሥራ ማኅበራት የተቋቋሙበት ዓላማ በድጎማ መሠረት ዘይት፣ ስኳር፣ ዱቄት፣ ማዳበሪያና የመሳሰሉ ምርቶችን ለማሠራጨት ስለሆነ በሪፎርሙ ግን ቢዝነስ ተኮር እንዲሆኑ ማድረግ በማስፈለጉ ነው ሲሉ አቶ ሺሰማ ተናግረዋል፡፡

ማኅበራቱ ግራ መጋባት ውስጥ የገቡት ድጎማ ሲቀር መሆኑን የገለጹት ምክትል ኮሚሽነሩ፣ ሪፎርሙ ሲጠናቀቅ ማኅበራቱ ገበያ አላረጋጉም ወይም ዋጋ አልቀነሱም የሚሉ ጥያቄዎችን ለመቀነስ ይረዳል ብለዋል፡፡

በጠቅላይ ሚኒስትሩ አቅጣጫ መሠረት የተጀመረው ሪፎርም ሥራው ከባድ በመሆኑ፣ የሪፎርሙ አስፈላጊነት ላይ ከሕዝብ ጋር መግባባት መድረስ አልታቻለም ብለዋል፡፡ ሪፎርሙን በሚፈለገው መንገድ ለማስተግበር 985/2009 አዋጅ መሻሻል እንዳለበት አቶ ሺሰማ አስረድተዋል፡፡

የግብርና ጉዳዮች ቋሚ ኮሚቴ ሰብሳቢ አቶ ሰለሞን ላሌ የኅብረት ሥራ ማኅበራት ኦዲተሮች ዋነኛ ችግር ጥሩ ክፍያ የሌላቸው ስለሆነ ሥራ እየለቀቁ በመሆናቸው፣ ከሲቪል ሰርቪስ ጋር በመሆን በልዩ ሁኔታ ተጠንቶ መፍትሔ ማበጀት ያስፈልጋል ብለዋል፡፡

የኅብረት ሥራ ማኅበራት ኦዲት ካልተደረጉ ብክነት ከመፈጠሩም በላይ ሕዝቡ ብልሹ አሠራር ሲመለከት አመኔታ ያጣል ሲሉ ተናግረዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች