Saturday, May 18, 2024
- Advertisement -
- Advertisement -

ስፖርትየኢትዮጵያ ኦሊምፒክ ኮሚቴ የዓለም አቀፍ ኦሊምፒክ  ጉባዔን ከሦስት ዓመት በኋላ በአዲስ አበባ ለማስደረግ...

የኢትዮጵያ ኦሊምፒክ ኮሚቴ የዓለም አቀፍ ኦሊምፒክ  ጉባዔን ከሦስት ዓመት በኋላ በአዲስ አበባ ለማስደረግ እንቅስቃሴ መጀመሩ ተሰማ

ቀን:

  • ብሔራዊ ኦሊምፒክ ኮሚቴው ባደረገው አስቸኳይ ጉባዔ ሦስት ምክትል ፕሬዚዳንቶች እንዲኖሩት ወስኗል

የኢትዮጵያ ኦሊምፒክ ኮሚቴ ዓለም አቀፍ ኦሊምፒክ ኮሚቴ (አይኦሲ) በ2027 የሚያደርገውን ጠቅላላ ጉባዔውን በአዲስ አበባ እንዲሆን እንቅስቃሴ መጀመሩ ተሰምቷል፡፡

ብሔራዊ ኦሊምፒክ ኮሚቴው  ሰኞ ግንቦት 5 ቀን 2016 ዓ.ም. በጽሕፈት ቤቱ የመሰብሰቢያ አዳራሽ በዝግ ባካሄደው አስቸኳይ ጉባዔ፣ አይኦሲ በ2027 ሊያደርገው ያቀደውን ጉባዔ፣ ኢትዮጵያ የማስተናገድ ዕድሉን እንድታገኝ ከተወያየ በኋላ፣ ለመርሐ ግብሩ መሳካት መከናወን ስለሚገባው ጉዳይ ጭምር ተወያይቶ ውሳኔ አሳልፏል ተብሏል፡፡

ለዚህ ደግሞ የኢትዮጵያ ኦሊምፒክ ኮሚቴ፣ መንግሥትና ሌሎች የሚመለከታቸው ባለድርሻ አካላት ተናበው መሥራት እንዲችሉ ጉባዔው በትኩረት መነጋገሩን ተገልጿል፡፡ የአይኦሲን ጉባዔ ያለአንዳች ችግር ወደ ኢትዮጵያ ማምጣት እንደሚቻል ሙሉ እምነት እንዳለው፣ ለዚህም ሲባል ከወዲሁ ቅድመ ሁኔታዎች እንዲከናወኑ ማሳሰቢያ ተሰጥቷል። አይኦሲ  209 አባል አገሮች  ሲኖሩት፣ ይህ ጉባዔ በአዲስ አበባ የሚከናወን ከሆነ ከ1,000 በላይ ተሳታፊዎችን ኢትዮጵያ ማስተናገድ የሚጠበቅባት መሆኑ ታሳቢ ተደርጎ ዝግጅት ሊደረግ እንደሚጋባም ተጠቁሟል፡፡  

- Advertisement -

በሌላ በኩል  ኦሊምፒክ ኮሚቴው ለፓሪስ  ኦሊምፒክ እየተደረገ ያለው ዝግጅትን ከገመገመ በኋላ  ውሳኔዎችን ማሳለፉ ተሰምቷል፡፡

የክልሎችና ከተማ አስተዳደሮች ወጣቶችና ስፖርት ቢሮ ኃላፊዎች፣ ብሔራዊ ፌዴሬሽኖችና ሌሎች የሚመለከታቸው ባለድርሻ አካላት በተሳተፉበት በዚሁ ጉባዔ፣ ሁለት ብሔራዊ ፌዴሬሽኖች ማለትም የኢትዮጵያ እግር ኳስ ፌዴሬሽንና የኢትዮጵያ ቴኒስ ፌዴሬሽን አለመገኘታቸው ታውቋል፡፡

የፓሪስ 2024 ኦሊምፒክ ከቀረው ጊዜ አንፃር የኢትዮጵያ ኦሊምፒክ ኮሚቴ ዝምታን መርጧል፡፡ አሁን ባለው ሁኔታ በርካታ አገሮች ልዑካኖቻቸውን ይፋ ከማድረጋቸው በተጨማሪ፣ ከኦሊምፒክ ጋር የተያያዙ መረጃዎችን በየተቋሞቻቸው የማኅበራዊ ትስስር ገጽ ጭምር እያሳወቁ ስለመሆናቸው በመግለጽ ኮሚቴውን የሚተቹ ቁጥር ቀላል አይደለም፡፡

ብሔራዊ ኦሊምፒክ ኮሚቴው ባለፈው ሰኞ ባካሄደው አስቸኳይ ጉባዔ፣ ስለ ዝግጅቱ  የሚሰነዘሩ  ቅሬታዎችን ተከትሎ ለዝግጅቱ ሲባል የተቋቋሙትን የተለያዩ ብሔራዊ  ኮሚቴዎች በምን ሁኔታ ላይ እንደሚገኙና ያጋጠሙ ተግዳሮቶችም ካሉ አፋጣኝ መፍትሔ ተበጅቶላቸው ወደ እንቅስቃሴ እንዲገቡ ወስኗል ተብሏል፡፡

በሌላ በኩል የኢትዮጵያ ኦሊምፒክ ኮሚቴ የሥራ አስፈጻሚ ኮሚቴ ጥንቅርና መዋቅራዊ ቁመናው ላይ ማሻሻያ ማድረጉም ተገልጿል፡፡  ቀደም ባሉት ዓመታት አመራሩ የነበረው መዋቅራዊ ቅርፅ፣ ከዋናው ፕሬዚዳንት ሥር አንድ ተቀዳሚ ምክትል ፕሬዚዳንትና ምክትል ፕሬዚዳንት እንዲሁም በእነሱ ሥር ደግሞ የሥራ አስፈጻሚ ኮሚቴ አባላት የነበሩ መሆኑ ይታወቃል፡፡

ጉባዔው ባደረገው ውይይ ተቀዳሚውና ምክትል ፕሬዚዳንቶቹ ባሉበት ሌላ አንድ ተጨማሪ ምክትል ፕሬዚዳንት እንዲኖር መወሰኑ ምንጮች ለሪፖርተር ተናግረዋል፡፡
ቀደም ሲል በኢትዮጵያ ኦሊምፒክ ኮሚቴ የሥራ አመራር ቦርድ በነበረው አሠራር መሠረት፣ የኢትዮጵያ አትሌቲክስ ፌዴሬሽን  በኦሊምፒክ በሚኖረው ተሳትፎና ባለው የውጤት ብልጫ  ከግምት በማስገባት፣ ለብሔራዊ ኦሊምፒክ ኮሚቴ ፕሬዚዳንትነት ምርጫ ዕጩ ማቅረብ የማይችል ከሆነ ተቀዳሚ ምክትል ፕሬዚዳንትነቱ  ያለ ምርጫ በቀጥታ ይወስድ እንደነበረ  ይታወቃል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ