Friday, May 24, 2024
- Advertisement -
- Advertisement -

ዜናሰሞኑን ግጭት የተካሄደባቸው የወልቃይት አካባቢዎችን መከላከያ ሠራዊት እንደተቆጣጠረ ነዋሪዎች ገለጹ

ሰሞኑን ግጭት የተካሄደባቸው የወልቃይት አካባቢዎችን መከላከያ ሠራዊት እንደተቆጣጠረ ነዋሪዎች ገለጹ

ቀን:

በወልቃይት ጠገዴ ሰቲት ሁመራ ዞን የተወሰኑ አካባቢዎች ባለፈው ዓርብ ሚያዝያ 25 ቀን 2016 ዓ.ም. በመከላከያ ሠራዊትና በፋኖ ታጣቂዎች መካከል ግጭት ተከስቶ እንደነበር፣ ይህንንም ተከትሎ መከላከያ ሠራዊት አካባቢዎቹን በአሁኑ ወቅት ሙሉ በሙሉ መቆጣጠሩን ነዋሪዎች ገለጹ፡፡

ዞኑ በአማራ ክልልና በትግራይ ክልል የይገባኛል ጥያቄ የሚነሳበት ሲሆን፣ በአካባቢው የመከላከያ ሠራዊት እንዳልነበርና የአካባቢው ሚሊሻና ፖሊስ ፀጥታውን ሲቆጣጠሩ እንደነበር ነዋሪዎች ለሪፖርተር ገልጸዋል፡፡ 

ከእሑድ ሚያዝያ 20 ቀን 2016 ዓ.ም. ጀምሮ የሰላም መደፍረሶች እንደነበሩ የገለጹት አንድ የአካባቢው የአገር ሽማግሌ፣ ‹‹ሚያዝያ 24 ቀን 2016 ዓ.ም. ምሽት የፋኖ ታጣቂዎች ‘በጠገዴ ወረዳ’ የምትገኘው ማክሰኞ ገበያ ከተማ ገቡ፡፡ ሚያዝያ 25 ቀን 2016 ዓ.ም. ንጋት ላይ ከከተማው የወጡ ሲሆን፣ ከከተማው ብዙም በማይርቅ ቦታ ላይ በመከላከያ ሠራዊትና በታጣቂዎቹ መካከል ግጭት መፈጠሩን ሰማን፤›› ብለዋል፡፡ 

- Advertisement -

በነዋሪዎች ሕይወትም ሆነ ንብረት ላይ የደረሰ ጉዳት አለመኖሩን የገለጹት የአገር ሽማግሌው፣ አሁን ላይ ግጭቱ መብረዱንና አካባቢዎቹንም መከላከያ ሠራዊት መቆጣጠሩን ገልጸዋል፡፡ ሪፖርተር ያነጋገራቸው ሌላኛው የአካባቢ ነዋሪ በበኩላቸው ግጭቱ ተከስቶ እንደነበር ገልጸዋል፡፡ 

የፋኖ ታጣቂዎች ወደ ከተማው ሲገቡ ከተማውን የመቆጣጠር እንቅስቃሴ የሚመስል ድርጊት አለመመልከታቸውን ገልጸው፣ በነዋሪዎቹም ሆነ በንብረት ላይ የደረሰ ጉዳት አለመኖሩን ተናግረዋል፡፡ ሆኖም ከከተማ ወጣ ብሎ በሚገኝ ሥፍራ በመከላከያ ሠራዊትና በፋኖ ታጣቂዎች መካከል ሚያዝያ 25 ቀን 2016 ዓ.ም. ግጭት ተከስቶ የነበረ መሆኑን ገልጸዋል፡፡ በአሁኑ ጊዜ አካባቢዎቹን የመከላከያ ሠራዊት መቆጣጠሩንና ግጭቱም መብረዱን አስረድተዋል፡፡ 

ሪፖርተር ስለተከተሰው ግጭትና በአሁኑ ወቅት በአካባቢዎቹ ስላለው ሁኔታ ከአገር መከላከያ በኩል መረጃ ለማግኘት ያደረገው ጥረት አልተሳካም። 

ከሰሜን ኢትዮጵያ ጦርነት በፊት ወልቃይት የምዕራብ ትግራይ አካል እንደነበር የሚገልጹት የትግራይ ኃይሎች፣ ወልቃይትን ጨምሮ ሌሎች የይገባኛል ጥያቄ በሚነሱባቸው አካባቢዎች የተቋቋሙ የአማራ ክልል የአስተዳደር መዋቅሮች እንዲፈርሱ፣ ታጣቂዎችም ከአካባቢዎቹ እንዲወጡና የፌደራል መንግሥት ኃላፊነት ወስዶ እንዲሠራ በተደጋጋሚ ሲጠይቁ ይሰማል፡፡ 

የትግራይ ክልል ጊዜያዊ አስተዳደር ምክትል ፕሬዚዳንት ሌተና ጄኔራል ታደሰ ወረደ ሚያዝያ 23 ቀን 2016 ዓ.ም. በክልሉ ለሚገኙ የመገናኛ ብዙኃን በሰጡት ጋዜጣዊ መግለጫ፣ የአካባቢዎቹ ሰላምና ደኅንነት ተረጋግጦ ተፈናቃዮች ወደ ቀድሞ ቦታቸው እንዲመለሱ የማድረግ ኃላፊነት የኢትዮጵያ መከላከያ ሠራዊትና የፌዴራል ፖሊስ ወስደው እንዲሠሩ ከፌደራል መንግሥት ጋር ስምምነት ላይ መድረሳቸውን ገልጸው ነበር፡፡

ይህን ሒደት ተግባራዊ ለማድረግም የጊዜ ሰሌዳ መቀመጡንና በዚህም፣ ‹‹ደቡብ ትግራይ፣ ራያና ፀለምት እስከ ግንቦት 30 ቀን 2016 ዓ.ም. ምዕራብ ትግራይ እስከ ሰኔ 30 ቀን 2016 ዓ.ም እንዲመለሱ የማድረጉ ሥራ እንዲጠናቀቅ ስምምነት ላይ ደርሰናል፤›› ብለዋል፡፡ 

በትግራይ ጊዜያዊ አስተዳደር በኩል የተሰጠውን መረጃ የሚያረጋግጥም ሆነ የሚቃረን መግለጫ፣ ከአማራ ክልል መንግሥትም ሆነ ከፌደራል መንግሥት በኩል እስካሁን አልተሰጠም።

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የማዳበሪያ አቅርቦትና ውጣ ውረዱ

በቅፅል ስሙ “The Father of Chemical Warfare” እየተባለ የሚጠራው...

የኢትዮጵያ ልማት ባንክ የትርፍ ምጣኔውን ከ70 በመቶ በላይ አሳደገ

ከሁለቱ መንግሥታዊ ባንኮች መካከል አንዱ የሆነው የኢትዮጵያ ልማት ባንክ...